Sa’ li yamyookil ch’och’, xb’aan li xEva Koleva Timothy

30 enero–5 febrero

Mateo 4; Lukas 4–5

“Lix Musiq’ li Qaawa’ wank sa’ inb’een”

Li Kolonel kiroksi li loq’laj hu re xq’axb’al ru li raalehom laj tza, ut re xch’olob’ankil xyaalal lix choxahil k’anjel (chi’ilmanq Lukas 4:1–21). K’oxla chan ru naq eb’ li loq’laj hu neke’ru chixnimob’resinkil laa paab’aal ut laa wajom chixtz’eqtaanankil li aaleek.

Tz’iib’a li nakak’oxla

Chalen chaq sa’ xka’ch’inal, chanchan naq li Jesus ak kixnaw naq wan jun li loq’laj k’anjel kawresinb’il choq’ re. Naq yoo chaq li Jesus chixkawresinkil lix k’anjel sa’ li ruchich’och’, laj tza kiraj xch’ikb’al xkab’il rix xch’ool li Kolonel. “Wi laa’at Ralal li Dios,” chan laj Satanas (Lukas 4:3, tiqb’il xkawilal li aatin). A’b’an li Kolonel ak wanjenaq chi aatinak rik’in lix Yuwa’ li wan sa’ Choxa. A’an kixnaweb’ ru li loq’laj hu, ut kixnaw ani a’an. Choq’ re a’an, lix yeechi’ihom laj Satanas—“Tink’e aawe chixjunil a’ wankilal ut a’ loq’al a’in” (Lukas 4:6)—maak’a’ ru, xb’aan naq rik’in naq kixkawresi rib’ chiru chixjunil lix yu’am, li Kolonel kiru chixk’ulb’al lix wankil li Musiq’ej (Lukas 4:14). Chi jo’kan, us ta kixk’ul li aaleek, lix yalb’al rix, ut li tz’eqtaanaak, li Jesukristo maajo’q’e ki’eek’an sa’ li k’anjel xaqab’anb’il choq’ re: “Tento tinpuktesi lix Chaab’il Esil lix nimajwal awa’b’ejihom li Dios … xb’aan naq a’in aj-e naq xintaqlaak chaq” (Lukas 4:43).

Li na’leb’ re xtzolb’aleb’ li loq’laj hu aajunes

Mateo 4:1–2

Li aatinak rik’in li Dios nikinxkawresi chi k’anjelak chiru.

Re xkawresinkil rib’ choq’ re lix k’anjel, li Jesus xko’o sa’ li yamyookil ch’och’ “re taawanq rik’in li Dios” (JJS, Mateo 4:1). K’oxla k’a’ru nakab’aanu re naq nach’ taaweek’a aawib’ rik’in li Dios. Chan ru naq a’in nakatxkawresi choq’ re li k’anjel taaraj a’an naq taab’aanu?

Mateo 4:1–11; Lukas 4:1–13

Li Jesukristo kixk’ut li chaab’il b’e chiwu rik’in xq’axb’al ru li aaleek.

Wan naq neke’reek’a li kristiaan naq wankeb’ xmaak wi yal neke’aaleek chi maakob’k. A’b’anan li Kolonel, us ta kiwan chi maak’a’ xmaak sa’ xyu’am” (Hebreos 4:15), kixk’ul li aaleek. Li Jesukristo naxnaw chixjunil li aaleek naqak’ul ut chan ru naru chiqatenq’ankil re xnumsinkil (chi’ilmanq Hebreos 2:18; Alma 7:11–12).

Naq nakawil Mateo 4:1–11 ut Lukas 4:1–13, k’a’ru nakatzol li taatenq’anq aawe naq taak’ul li aaleek? Naru taatusub’ li na’leb’ sa’ jun kaaxukuut jo’ a’in:

Jesukristo	Laa’in
Jesukristo K’a’ru li kiraj laj Satanas naq tixb’aanu li Kristo?	Laa’in K’a’ru nikinraale laj Satanas re tinb’aanu?
Jesukristo Chan ru naq li Kristo kixkawresi rib’ chixq’axb’al ru li aaleek?	Laa’in Chan ru naru ninkawresi wib’ chixq’axb’al ru li aaleek?
Jesukristo	Laa’in

K’a’ chik ru li na’leb’ nakak’ul rik’in li jaltesinb’il ru xb’aan laj Jose Smith sa’ Mateo 4?

Chi’ilmanq ajwi’ 1 Korintios 10:13; Alma 13:28; Moises 1:10–22; Temas del Evangelio, “Tentación,” topics.ChurchofJesusChrist.org.

Lukas 4:16–32

Li Jesukristo a’an li Mesias li yeeb’il chaq resil najter.

Wi taapatz’manq aawe k’a’ru kitaqlaak li Jesukristo sa’ ruchich’och’ chixb’aanunkil, k’a’ raj ru taaye? Naq kixyaab’asi jun profeetil aatin kixye laj Isaias chirix li Mesias, li Kolonel yoo chaq chi aatinak chirix lix k’anjel a’an (chi’ilmanq Lukas 4:18–19; Isaias 61:1–2). K’a’ru nakatzol chirix lix k’anjel naq nakawileb’ li raqal a’in?

Chan ru nakatxb’oq li Kolonel chi tz’aqonk sa’ lix k’anjel?

Us ta eb’ laj Judio chiru naab’al cient chihab’ yookeb’ chiroyb’eninkil naq taatz’aqloq ru lix profeetil aatin laj Isaias, naab’al reheb’ ink’a’ ke’xpaab’ naq li Jesus a’an li Mesias naq kixye, “Li tz’iib’anb’il aatin a’in li toja’ xerab’i xtz’aqlok ru anajwan” (Lukas 4:21). Naq nakawil Lukas 4:20–30 (chi’ilmanq ajwi’ Markos 6:1–6, k’oxla k’a’ raj ru taak’oxla wi ta wankat sa’ xna’ajeb’ li tenamit aj Nazaret. Ma wan k’a’ru li taaramoq raj aawe chixk’ulb’al li Kristo chi anchal aach’ool jo’ aj Kolol aawe?

Chi’ilmanq ajwi’ Mosiah 3:5–12; “Jesus declara que Él es el Mesías” (video), ChurchofJesusChrist.org.

Mateo 4:18–22; Lukas 5:1–11

Wi ninkanab’ wib’ chiru li Qaawa’, a’an naru nikinixtenq’a chixtawb’al li diosilal li chalel we.

Li Awa’b’ej Ezra Taft Benson kixye, “Eb’ li winq ut ixq li neke’xq’axtesi lix yu’ameb’ chiru li Dios te’xtaw naq a’an q’axal nim wi’chik ru li taaruuq chixb’aanunkil rik’in lix yu’ameb’ chiru li ke’ru raj chixb’aanunkil eb’ a’an” (Enseñanzas de los Presidentes de la Iglesia: Ezra Taft Benson [2014], 47). K’e reetal chan ru naq a’an ajwi’ kik’ulman sa’ xyu’ameb’ laj Simon Pedro ut eb’ lix komon aj kar. Li Jesus kiril li xnimal ru xseeb’aleb’ chiru li ke’ril a’aneb’. Ut kiraj xkanab’ankileb’ choq’ aj “sik’oleb’ re li ras riitz’in choq’ ruuchil li kar” (Mateo 4:19; chi’ilmanq ajwi’ Lukas 5:10).

Naq nakawil Mateo 4:18–22 ut Lukas 5:1–11, k’oxla anihat yookat wi’ chi wulak rik’in xtenq’ li Jesukristo. Chan ru nakaweek’a naq nakatxb’oq re xtaaqenkil? Chan ru naru taak’ut chiru li Qaawa’ naq wan aach’ool chixkanab’ankil chixjunil re xtaaqenkil? (chi’ilmanq Lukas 5:11).

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 4:1–2; Lukas 4:1–2.K’a’ru li na’leb’ naru naqak’ul sa’ li esil a’in chirix lix wankil li kuyuk sa’? Re xtenq’ankil laa junkab’al chi tzolok chirix li kuyuk sa’, naru nakawoksi “Ayuno y ofrendas de ayuno” sa’ Temas del Evangelio (topics.ChurchofJesusChrist.org). Eb’ li komon re laa junkab’al naru neke’xwotz xnumsihomeb’ chirix li kuyuk sa’. Maare rik’in tijok texruuq chixk’uub’ankil jo’ junkab’al li kuyuk sa’ choq’ re junaq ajom.

Mateo 4:3–4; Lukas 4:3–4.Naq laj Satanas kiraale li Kristo re tixjaltesiheb’ li pek choq’ wa, a’an kixyal rix lix diosilal li Kristo naq kixye, “Wi laa’at Ralal li Dios” (Mateo 4:3, tiqb’il xkawilal li aatin). K’a’ut naq laj Satanas naxyal xq’e re taawiib’anq qach’ool chirix li qadiosilal— jo’ li Kolonel? Chan ru naq naxb’aanu a’in? (Chi’ilmanq ajwi’ Moises 1:10–23.)

JJS, Mateo 4:11.Chirix naq li Jesus kiyale’ rix sa’ tz’ejwalej ut sa’ musiq’ej, ki’ok chixk’oxlankil laj Jwan aj Kub’sihom Ha’, li wan sa’ tz’alam: “Anajwan ut li Jesus kixnaw naq laj Jwan tz’apb’il sa’ tz’alam, ut kixtaqlaheb’ li anjel, ut k’ehomaq reetal, ke’chal ut ke’k’anjelak chiru” (JJS, Mateo 4:11). Chan ru naq noko’osob’tesiik naq naqataaqe li Kristo rik’in xk’oxlankileb’ li qas qiitz’in xb’een wa chiqu laa’o?

Lukas 4:16–21.Ma naqanaw ru anihaq li rahob’tesinb’il, malaj li taaraj ru “ach’ab’aak”? (Lukas 4:18). Chan ru naq naru naqatenq’aheb’ li qas qiitz’in chixk’ulb’al lix k’irtesinkileb’ ut li rach’ab’ankileb’ xb’aan li Kolonel? Naru ajwi’ nekextz’il rix chan ru naq xb’aanunkileb’ li k’uub’anb’il k’anjel sa’eb’ li santil ochoch natenq’an chixk’amb’al chaq li kole’k chiruheb’ “li wankeb’ sa’ tz’alam” (Lukas 4:18).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Kim, taaqehin,” Eb’ li B’ich, 66.

Xkawresinkil qib’ jo’ aj k’utunel

Xyu’aminkil lix evangelio li Jesukristo. Jo’ na’b’ej yuwa’b’ej malaj jo’ aj k’utunel, “li q’axal aajel ru a’an … xyu’aminkil li evangelio chi anchal aach’ool. … A’an a’in li tz’aqal b’e re taaruuq taawanq aawik’in li Santil Musiq’ej. Moko aajel ta ru naq tz’aqalaq aawe aawu, yal tento xyalb’al aaq’e chi yaal—ut xsik’b’al lix kuyb’al laa maak rik’in lix tojb’al rix li maak xb’aan li Kolonel wi nakattichk’ok” (Li k’utuk jo’ li Kolonel, 13).

Li Kristo kixb’oqeb’ li apostol aj Santiago ut aj Jwan, Edward Armitage (1817–1896) / Sheffield Galleries and Museums Trust, Reino Unido / © Museums Sheffield / © Museums Sheffield / The Bridgeman Art Library International