Li Jesus kixtzoleb’ li tenamit chire li palaw, xb’aan laj James Tissot

20–26 febrero

Mateo 6–7

“Kixtzoleb’ chi wank xwankil”

Naq naqatzoleb’ li loq’laj hu chi wank sa’ qak’a’uxl jun patz’om ut wi anchal qach’ool chixtawb’al ru li k’a’ru naraj li qaChoxahil Yuwa’ naq taqanaw, yooko chixb’oqb’al chaq li Santil Musiq’ej re xk’eeb’al qana’leb’. Naq nakawil Mateo 6–7, k’e reetaleb’ li na’leb’ nakak’ul.

Tz’iib’a li nakak’oxla

Li aatin jultikanb’il chiru li tzuul a’an jun reheb’ li aatin q’axal nawb’il ru sa’ chixjunil li Kristianil. Li Kristo ki’aatinak rik’in chaq’al ru jaljookil ru aatin, jo’ chirix li tenamit k’ojk’o sa’ xb’een li tzuul, chirixeb’ li utz’u’uj sa’ pim, ut chirixeb’ li xojb’ tiqtookeb’ chaq rik’in rix li karneer. A’b’anan li aatin jultikanb’il chiru li tzuul maawa’ ka’ajwi’ ch’ina-usil aatin. Lix wankil li aatin kixk’ut li Kolonel chiruheb’ lix tzolom naru chixjalb’al qayu’am, ut k’a’jo’ wi’chik wi naqak’e qach’ool chixyu’aminkil. Chi jo’kan, ink’a’ chik yal aatin lix yehom; neke’ok choq’ jun kawil k’ojleb’aal choq’ re li qayu’am, ut chanchan lix kab’l li winq li wank xna’leb’, taaruuq chixkuyb’al li kaq-sut-iq’ ut li b’uut’iha’ re li ruchich’och’ (chi’ilmanq Mateo 7:24–25).

Li na’leb’ re xtzolb’aleb’ li loq’laj hu aajunes

Mateo 6–7

Xyu’aminkil lix k’utum li Kolonel naru nikinixtenq’a chi wulak jo’ a’an.

Sa’ li aatin jultikanb’il chiru li tzuul natawman naab’al li raqal re li evangelio. Naq taatzoleb’ li ch’ol a’in, patz’ re li Qaawa’ li naraj naq taatzol.

Jun reheb’ li na’leb’ naru nakatzol a’an naq aajel ru xk’eeb’al chi uub’ej lix k’anjel li Dios chiru chixjunil li k’a’aq re ru re li ruchich’och’. B’arwan reheb’ li na’leb’ kixk’ut li Kolonel sa’ Mateo 6–7 nakatxtenq’a chixk’eeb’al xb’een wa li k’a’ru re choxa? K’a’ru chik nakak’oxla malaj nakaweek’a? K’a’ru li eek’asinb’ilat chixb’aanunkil? Maare naru taatz’iib’a li k’a’ru nakaweek’a. Jo’ jun eetalil:

Mateo 6:1–4	Nawaj naq tink’oxla li k’a’ru naxk’oxla li Dios chiwix chi mas wi’chik chiru li k’a’ru neke’xk’oxla xkomoneb’ chik li kristiaan.

Jun chik li na’leb’ sa’ Mateo 6–7 a’an li tijok. K’oxla chiru junpaat chan ru li tijok nakab’aanu. Chan ru nakaweek’a naq yookat chi nach’ok rik’in li Dios rik’in tijok? K’a’ru li k’utb’il sa’ Mateo 6–7 li na’eek’asink aawe chixchaab’ilob’resinkil laa tij? Tz’iib’a li na’leb’ nakak’ul. Jo’ jun eetalil:

Mateo 6:9	Naq tintijoq, nawaj roxloq’inkil lix k’ab’a’ lin Choxahil Yuwa’.
Matteo 6:10	Naq nintijok, naru tinch’olob’ naq nawaj naq taa’uxq li rajom li Qaawa’.

Us wi taawil jun sut chik li aatin jultikanb’il chiru li tzuul, ut taasik’ junaq chik na’leb’ malaj li esilal li taak’anjelaq choq’ aawe. Tz’iib’a li k’a’ru nakataw sa’ jun li ch’ina hu, rochb’een li k’a’ru nakak’oxla ut nakaweek’a chirix.

Naru nokojilok rik’in li Dios rik’in tijok.

Mateo 6:7

K’a’ru xyaalalil “xyeeb’al k’iila aatin” naq nokotijok?

Wankeb’ li neke’k’oxlank re naq “xyeeb’al k’iila aatin” naraj naxye xyeeb’al chi juntaq’eet k’iila sut li aatin. A’b’anan li aatin a’in yoo chi aatinak chirix li maak’a’ xyaalal li maak’a’ na’ok wi’. Li tijok rik’in “xyeeb’al k’iila aatin” naru naxye tijok chi ink’a’ anchal li qach’ool (chi’ilmanq Alma 31:12–23).

Mateo 7:1–5

Naru tinraqoq aatin chi tiik inch’ool.

Sa’ Mateo 7:1, chanchan naq li Kolonel yoo chixyeeb’al naq mooraqok aatin, a’b’anan sa’ jalaneb’ chik raqal (jo’kan ajwi’, sa’ li jun ch’ol a’in), naxch’olob’ chan ru tooraqoq aatin. Naru nasach qana’leb’ rik’in a’in, a’ut li raatinul li jun raqal a’in chi jaltesinb’il ru xb’aan laj Jose Smith naru nokoxtenq’a: “Mexraqok aatin chi moko tiik ta, re naq ink’a’ taaraqe’q aatin cherix; tiikaq b’an li raqb’a-aatin nekexraqok wi’ aatin sa’ JJS Mateo 7:1–2. K’a’ru nakataw sa’ Mateo 7:1–5 ut sa’ chixjunil li jun ch’ol a’in, li nakatxtenq’a re naq “tiikaq li raqb’a-aatin nakatraqok wi’ aatin”?

Chi’ilmanq ajwi’ Temas del Evangelio, “Juzgar a los demás,” topics.ChurchofJesusChrist.org; Lynn G. Robbins, “Aj tiikil raqol aatin,” Jolomil ch’utub’aj-ib’ re octubre 2016.

Mateo 7:21–23

Nin’ok chixnawb’al ru li Jesukristo rik’in xb’aanunkil li rajom xch’ool.

Li aatin “Maajun wa xinnaw eeru” sa’ Mateo 7:23 kijalman sa’ li aatin jaltesinb’il ru xb’aan laj Jose Smith chixyeeb’al “Maajun wa xenaw wu.” Chan ru naq li jalb’il aatin a’in nakatxtenq’a chixnawb’al li k’a’ru kixk’ut li Qaawa’ sa’eb’ li raqal 21–22 chirix xb’aanunkil li rajom a’an? Ma nakaweek’a naq nakanaw ru chi us li Qaawa’? Kʼaʼru naru taabʼaanu re naq taanaw ru chi us wi’chik?

Chi’ilmanq ajwiʼ David A. Bednar, “Wi nekenaw wu laa’in,” Jolomil ch’utub’aj-ib’ re octubre 2016.

Mateo 7:24–27

Xpaab’ankil lix k’utum li Kolonel naxk’ojob’ xxe’el lin yu’am chi kaw.

Xyu’aminkil li evangelio ink’a’ narisi li yale’k sa’ li qayu’am. Li wiib’ chi ochoch ki’aatinak wi’ li Kolonel sa’ Matthew 7:24–27 ke’xnumsi li yale’k. A’b’anan jun reheb’ kiru chixq’axb’al ru. Chan ru naq xyu’aminkil lix k’utum li Kolonel naxkawob’resi laa xe’el? K’a’ru eek’asinb’ilat chixb’aanunkil re naq yooqat chi kab’lak sa’ xb’een li pek”? (chi’ilmanq li raqal 24).

Chi’ilmanq ajwi’ Helaman 5:12.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 6–7.Jun li na’leb’ re textzoloq chirix Mateo 6–7 jo’ junkab’al a’an rilb’al li video “El Sermón del Monte: El Padre nuestro” ut “El Sermón del Monte: Tesoros en los cielos” (ChurchofJesusChrist.org). Eb’ li komon sa’ li junkab’al te’ruuq chirilb’al sa’eb’ li loq’laj hu ut te’xxaqab’ li video naq neke’rab’i jun na’leb’ li te’raj aatinak wi’. Naru taab’aanumanq li k’anjel a’in chiru wiib’ oxib’ kutan, wi na’ajman ru.

Mateo 6:5–13.K’a’ru naru naqatzol chirix li tijok rik’in chan ru naq kitijok li Kolonel? Chan ru naq lix tij a’an naru chi ok choq’ eetalil re xchaab’ilob’resinkil li tij naqab’aanu qajunes ut sa’ junkab’al? (Chi’ilmanq ajwi’ Lukas 11:1–13.) Wi wankeb’ laa kok’al li ka’ch’ineb’ xyu’am, naru teeyal tijok sa’ komonil.

Mateo 6:33.K’a’ru xyaalalil “xsik’b’al … xb’een wa lix nimajwal awa’b’ejihom li Dios”? Chan ru yooko chixb’aanunkil a’in sa’ junesal ut jo’ junkab’al?

Mateo 7:1–5.Re xtawb’al ru li k’utum a’in, li junkab’al naru naxsik’ jun li mul (jun li ch’ina che’) ut jun li tz’amb’a (jun li nimla che’). K’a’ru naxk’ut chiqu xjuntaq’eetankileb’ li wiib’ chi k’a’aq re ru a’an chirix li raqok aatin chirixeb’ li qas qiitz’in? Wi nakawaj xtzolb’al xkomon chirix li na’leb’ a’in, naru nakasik’ sa’ “Juzgar a los demás” (Temas del Evangelio, topics.ChurchofJesusChrist.org).

Mateo 7:24–27.Re xtenq’ankil laa junkab’al chixtawb’al ru lix jaljookil ru aatin li Kolonel chirix li winq li wan xna’leb’ ut li maak’a’ xna’leb’, naru nakakanab’eb’ chixhoyb’al li ha’ sa’ xb’een li samahi’ ut sa’ xb’een jun pek. Chan ru naru naqak’e li qamusiq’ejil k’ojleb’aal sa’ xb’een li pek?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li ochoch sa’ xb’een li pek,” B’ichleb’aal choq’ reheb’ li Kok’al, 132).

Xkawresinkil aawib’ chi tzolok

Xwotzb’al li na’leb’ nakak’ul. Rik’in aatinak chirix li na’leb’ nakak’ul sa’ tzolok aajunes, nakatru chixtzolb’aleb’ aawas aawiitz’in, a’ut jo’kan ajwi’ taanimanq aanawom laa’at. Wotz jun li na’leb’ xatzol sa’ rilb’al li loq’laj hu sa’ li xamaan a’in rik’in jun komon sa’ laa junkab’al malaj sa’ laa tzoleb’aal sa’ li Iglees.

Xintijok chawix, xb’aan laj Del Parson