Li aatin jultikanb’il xb’aan li Jesus chiru li tzuul, xb’aan laj Gustave Doré

13–19 febrero

Mateo 5; Lukas 6

“Us xaq eere”

K’e reetal li musiq’anb’il na’leb’ nakak’ul naq nakawil Mateo 5 ut Lukas 6, ut tz’iib’a resil sa’ jun li ch’ina hu. Li tusleb’ aatin a’in naru nakatxtenq’a chixtzolb’aleb’ li na’leb’ aajeleb’ ru sa’eb’ li ch’ol a’in, a’b’an yo’on wanqat maare taataw jalaneb’ chik laa’at naq yooqat chi tzolok.

Tz’iib’a li nakak’oxla

Naq li Jesus yoo chixb’aanunkil lix k’anjel, kik’eeman reetal naq li k’a’ru yoo chixk’utb’al jalan wi’ rik’in li k’a’ru k’aynaqeb’ chirab’inkil li ani yo’yookeb’ sa’ li kutan a’an. Eb’ li neb’a’ te’xk’ul lix awa’b’ejihom li Dios? Eb’ li tuulan te’reechani li ruchich’och’? Us xaq reheb’ li rahob’tesinb’ileb’? Chi moko eb’ laj tz’iib’ ut eb’ laj Fariseo ke’xk’ut li na’leb’ a’in. A’b’anan, eb’ li ke’tawok ru li raatin li Dios ke’xtaw ru li yaal sa’ li raatin li Kolonel. “Isinb’ilaq sa’ ru li ani x’isink sa’ laa wu” ut “xik’ taawil li xik’ na’ilok aawe” a’aneb’ chaq’rab’ li kub’enaq xwankil (Mateo 5:38, 43). A’b’anan li Jesus kichal chixk’utb’al jun chaq’rab’ li taqenaq wi’chik xwankil (chi’ilmanq 3 Nefi 15:2–10), li kik’uub’aman re qatenq’ankil re naq sa’ junaq kutan “tz’aqalaq qe qu jo’ li qaChoxahil Yuwa’ tz’aqal re ru” (Mateo 5:48).

Li na’leb’ re xtzolb’aleb’ li loq’laj hu aajunes

Mateo 5:1–12; Lukas 6:20–26, 46–49

Nachal li sahil ch’oolejil li ink’a’ nalaj na’oso’ rik’in li wank jo’ chanru kixk’ut li Jesukristo.

Chixjunileb’ neke’raj wank chi saheb’ sa’ xch’ool, a’b’anan moko juntaq’eet ta li na’ajej neke’xsik’ wi’ li sahil ch’oolejil. Wankeb’ li neke’sik’ok re sa’ li ruchich’och’il wankilal malaj li taqlank, ut wankeb’ chik li neke’sik’ok re rik’in li b’ihomal, malaj rik’in xsahob’resinkil li atawanb’il xb’aan li tz’ejwalej. Li Jesukristo kichal re xk’utb’al li b’e li nawulak sa’ li sahil ch’oolejil li ink’a’ nalaj na’oso’, ut re xk’utb’al k’a’ru xyaalalil li wank chi osob’tesinb’il. K’a’ru nakatzol chirix xtawb’al li sahil ch’oolejil sa’ Mateo 5:1–12 ut Lukas 6:20–26? Chan ru naq jalan wi’ a’in chiru lix na’leb’ li ruchich’och’ chirix li sahil ch’oolejil?

K’a’ru neke’xk’ut chawu eb’ li raqal a’in, jo’ ajwi’ Lukas 6:46–49, chirix li wank choq’ xtzolom li Jesukristo? K’a’ru nakaweek’a naq taawaj xb’aanunkil re tatwanq jo’ chanru yeeb’il sa’eb’ li raqal a’in?

Chi’ilmanq ajwi’ “El Sermón del Monte: Las Bienaventuranzas” (video), ChurchofJesusChrist.org.

Mateo 5:13

“Laa’ex li ratz’amil li ruchich’och’.”

Chalen chaq najter na’oksiman li atz’am re k’uulank, re xk’eeb’al xsahil li tzakemq, ut re saqob’resink. Li atz’am kiwan ajwi’ xk’anjel sa’ lix paab’aaleb’ laj Israelita. Ki’oksiman sa’eb’ li mayej re xul li kib’aanuman sa’ lix chaq’rab’ laj Moises (chi’ilmanq Levitico 2:13; Numeros 18:19). Naq li atz’am nasach xsahil, maak’a’ chik xk’anjel, ut “maak’a’ na’ok wi’ ” (Mateo 5:13). Nak’ulman a’in naq li atz’am wan chi junajinb’il rik’in k’a’aq chik re ru, malaj naq tz’ajninb’il xb’aan.

Chinaq sa’ aach’ool a’an naq taawil Mateo 5:13. Chan ru taak’uula laa sahil jo’ xtzolom li Jesukristo? Chan ru taab’aanu laa k’anjel re kolok ut saqob’resink jo’ lix atz’amil li ruchich’och’?

Chi’ilmanq ajwi’ Tzol’leb’ ut Sumwank 103:9–10.

“Laa’ex li ratz’amil li ruchich’och’ ” (Mateo 5:13).

Mateo 5:17–48; Lukas 6:27–35

Lix chaq’rab’ li Kristo naxk’ul xna’aj lix chaq’rab’ laj Moises.

Eb’ li tzolom maare ke’sach xch’ool naq ke’rab’i li Jesus chixyeeb’al naq lix tiikilaleb’ tento tixq’ax ru xtiikilaleb’ laj tz’iib’ ut laj Fariseo (chi’ilmanq Mateo 5:20), rik’in naq eb’ a’an neke’xnima rib’ rik’in xpaab’ankil chi tz’aqal tz’aqal lix chaq’rab’ laj Moises.

Naq nakawil Mateo 5:21–48 ut Lukas 6:27–35, k’oxla xk’eeb’al reetalil li k’a’ru yeeb’il sa’ lix chaq’rab’ laj Moises (“Eerab’ihom resil naq …”) ut li k’a’ru kixye li Jesus re xtaqsinkil wi’chik xwankil. K’a’ut naq nekek’oxla naq lix k’utum li Kolonel a’an jun li chaq’rab’ taqenaq xwankil?

Jo’ jun eetalil, k’a’ru kixk’ut li Jesus sa’ Mateo 5:27–28 chirix li qateneb’ankil rik’in li k’a’ru naqak’oxla? Chan ru tatruuq chixb’eresinkileb’ li na’leb’ ut eek’ahom li neke’k’ulun sa’ laa k’a’uxl ut sa’ laa waam? (chi’ilmanq Tzol’leb’ ut Sumwank 121:45).

Chi’ilmanq ajwi’ “El sermón del monte: La ley mayor” (video), ChurchofJesusChrist.org.

Mateo 5:48

Ma tz’aqal taaraj inChoxahil Yuwa’ naq tinwanq chi tz’aqal we wu?

Li Awa’b’ej Russell M. Nelson kixye:

“Li aatin tz’aqalaq eere eeru jaltesinb’il chaq ru rik’in jun aatin sa’ Griego, teleios, li naraj naxye “tz’aqlojenaq.” … Lix xe’il li aatin a’an teleiono, li naraj naxye, “wulak sa’ xraqik, nimank toj sa’ q’anil, xtz’aqob’resinkil ru, malaj xchoyb’al.” Chek’e reetal naq li aatin ink’a’ naraj naxye “chi maak’a’ xmajelal’; ka’ajwi’ naraj naxye naq ‘wulajenaq sa’ jun sik’b’il na’ajej.” …

“… Li Qaawa’ kixye, “Ink’a’ nekexru chixkuyb’al wank chiru li Dios anajwan … ; jo’kan ut, chexkanaaq chi wank eekuyum toj reetal naq tz’aqob’resinb’il eere eeru” [Tzol’leb’ ut Sumwank 67:13].

“Ink’a’ na’ajman ru naq taaraho’q qach’ool wi li k’anjel re xtawb’al xtz’aqalil qe qu chanchan naq ch’a’aj ut chanchan naq maamin taa’oso’q. Lix tz’aqalil qe qu toj chalk re. K’a’ajwi’ naru chi chalk chi tz’aqal chirix li wakliik chi yo’yo, ut ka’ajwi’ sa’ xk’ab’a’ li Qaawa’. A’ut wan choq’ reheb’ chixjunileb’ li neke’rahok re a’an ut neke’xpaab’eb’ lix taqlahom” (“La inminencia de la perfección,” Liahona, noviembre 1995, 86, 88).

Chi’ilmanq ajwi’ 2 Pedro 1:3–11; Moroni 10:32–33; Tzol’leb’ ut Sumwank 76:69; Jeffrey R. Holland, “Tz’aqalaq eere eeru—junaq kutan,” Jolomil ch’utub’aj-ib’ re octubre 2017.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 5:1–9.K’a’ruheb’ li na’leb’ k’utb’il sa’ Mateo 5:1–9 li te’ruuq chetenq’ankil re naq taawanq li sahil ch’oolejil sa’ lee rochoch? Naru nekesik’ jun malaj wiib’aq li jwal aajelaq ru choq’ re lee junkab’al. Jo’ jun eetalil, k’a’ru k’utum naqataw li naru tooxtenq’a chi wank jo’ aj k’ojob’ahom re li tuqtuukilal? (chi’ilmanq Mateo 5:21–25, 38–44). K’a’ruheb’ li meta naru taqak’e? Chan ru taqil naq taab’aanumanq?

Mateo 5:13.Tzakehomaq k’a’aq re ru chi wanq ratz’amil ut jo’kan ajwi’ chi maak’a’aq ratz’amil. K’a’ru xjalanil naqataw? K’a’ru naraj naxye wank choq’ “ratz’amil li ruchich’och’ ”? Chan ru taqab’aanu a’an?

Mateo 5:14–16.Re xtenq’ankil laa junkab’al chixtawb’al ru k’a’ru xyaalalil li wank choq’ “xkutan li ruchich’och’,” naru tex’aatinaq chirix li k’a’ru nak’ehok saqen sa’ lee rochoch, sa’ lee tenamit, ut sa’ li ruchich’och’. Maare naru nakak’ut k’a’ru nak’ulman naq nakatz’ap ru jun saqen. K’a’ru xyaalalil li raatin li Jesus naq kixye, “Laa’ex lix kutan li ruchich’och’ ”? (Mateo 5:14). Ani wanjenaq jo’ kutan chiru li qajunkab’al? Chan ru naru toowanq choq’ saqen rik’ineb’ li qas qiitz’in? (chi’ilmanq 3 Nefi 18:16, 24–25).

Mateo 5:43–45.Naq yooqex chirilb’al li raatin li Kolonel li wan sa’eb’ li raqal a’an sa’ junkab’al, naru tex’aatinaq chirix ani texruuq chixraab’al, chirosob’tesinkil, ut chi tijok chirix. Chan ru naru natam li qarahom chirixeb’ li kristiaan a’an?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Lemtz’un,” B’ichleb’aal choq’ reheb’ li Kok’al, 96.

Xkawresinkil qib’ jo’ aj k’utunel

K’e reetal li nak’ulman. Naq nakak’e reetal li k’a’ru yoo chi k’ulmank sa’ xyu’ameb’ laa kok’al, k’a’jo’ naq taak’eemanq chawu xk’eeb’aleb’ xna’leb’. … Li na’leb’ neke’xwotz malaj li patz’om neke’xb’aanu naru nakatxtenq’a chi k’utuk” (Li k’utuk jo’ li Kolonel, 16).

“Laa’ex lix kutan li ruchich’och’ ” (Mateo 5:14).