6–12 febrero

Jwan 2–4

“Tento naq texyo’laaq wi’chik”

Naq nakawil Jwan 2–4, li Musiq’ej tixk’ut chawu li na’leb’ chirix lix jalajik laa ch’ool. Tz’iib’a resil li naxk’ut chawu. Naru taataw chik xkomon li musiq’ejil na’leb’ rik’in xtzolb’al li na’leb’ sa’ li jun ch’ol a’in.

Tz’iib’a li nakak’oxla

Sa’ xninq’ehinkil jun li sumlaak sa’ Kanahan, li Kristo kixjaltesi li ha’ choq’ viin—a’an “xtiklajikeb’ li eetalil” jo’ kixye laj Jwan (Jwan 2:11). Yaal a’in chi k’iila paay ru xyaalal. A’an li xb’een sachb’a-ch’oolej kixb’aanu li Jesus chi k’utk’u, a’ut jo’kan ajwi’ wan choq’ reetalil xtiklajik li hoonal re sachb’a-ch’oolejil—a’an naq najale’ li qach’ool naq yooko chi nach’ok rik’in li qaKolonel. Li sachb’a-ch’oolej a’in li nak’ulman sa’ li qayu’am natikla naq naqak’e qach’ool chixtaaqenkil li Jesukristo, chixjalb’al qib’, ut chixsik’b’al rik’in a’an jun yu’am li q’axal chaab’il wi’chik. Li jalaak a’in naru naxjal li qayu’am toj reetal naq naru naqaye naq “xooyo’la wi’chik” (Jwan 3:7). A’ut li yo’laak wi’chik a’an yal xtiklajik li b’e re li wank choq’ tzolom. Li raatin li Kristo re li ixq aj Samaria chire li yo’leb’aal ha’ naxjultika qe naq wi toj toowanq chi b’eek chiru li b’e a’in, li evangelio taawanq qe choq’ jun “yu’am ha’ ” sa’ li qach’ool, li “nab’ululnak re li junelik yu’am” (Jwan 4:14).

Li na’leb’ re xtzolb’aleb’ li loq’laj hu aajunes

Jwan 2:1–11

Eb’ li sachb’a-ch’oolej kixb’aanu li Kristo “ke’xk’ut lix loq’al.”

Naq yooqat chirilb’al chan ru naq li Kolonel kixjaltesi li ha’ choq’ viin sa’ Jwan 2:1–11, taataw naab’al aana’leb’ chirix naq taatz’il rix li ke’xk’oxla li kristiaan ke’wan aran; sa’ xyanqeb’ wan li xMaria, eb’ lix tzolom, ut naab’aleb’ chik li kristiaan. Wi laa’at kawil raj li na’leb’ nayeeman arin, k’a’ raj ru kak’oxla chirix li Jesus? K’a’ru naxk’ut li sachb’a-ch’oolej a’in chawu chirix a’an?

Jwan 3:1–21

Tento naq tinyo’laaq wi’chik re tin’ok sa’ lix awa’b’ejihom li Dios.

Naq kiwulak laj Nikodemo rik’in li Jesus sa’ muqmu, a’an yal yoo chixsik’b’al xna’leb’. A’ut, moqon, ki’aatinak chi k’utk’u re xkolb’al rix li Jesus (chi’ilmanq Jwan 7:45–52) ut kixjunaji rib’ rik’ineb’ laj paab’anel sa’ xmuqlajik li Jesus (chi’ilmanq Jwan 19:38–40). K’a’ru li k’utb’il sa’ Jwan 3:1–21 li maare kireek’asi laj Nikodemo chixtaaqenkil li Jesus ut chi yo’laak wi’chik?

Li profeet aj Jose Smith kixye, “Li yo’laak wi’chik, nachal chaq rik’in lix Musiq’ li Dios sa’ xk’ulb’aleb’ li k’ojob’anb’il k’anjel” (Enseñanzas de los Presidentes de la Iglesia: José Smith [2007], 101). K’a’ru xk’anjel laa k’ub’iha’ ut laa k’ojob’ankil—li “yo’laak rik’in ha’ ut sa’ musiq’ej” (Jwan 3:5)—sa’ xyalb’al aaq’e re yo’laak wi’chik? K’a’ru yookat chixb’aanunkil re naq toj yooq chi uxmank li jalaak a’in? (chi’ilmanq Alma 5:11–14).

Chi’ilmanq ajwi’ Mosiah 5:7; 27:25–26; David A. Bednar, “Os es necesario nacer de nuevo,” Liahona, mayo 2007, 19–22.

Jwan 3:16–17

Lin Choxahil Yuwa’ rik’in lix k’anjel li Jesukristo naxk’ut chiwu naq nikinixra.

Li Elder Jeffrey R. Holland kixye, “Li xb’een xnimal ru yaal re li junelik q’e kutan a’an naq li Dios nokoxra laa’o chi anchal lix ch’ool, xmetz’ew, xk’a’uxl, ut xkawilal a’an” (“Wulaj li Qaawa’ tixb’aanu sachb’a-ch’oolej sa’ eeyanq,” Jolomil ch’utub’aj-ib’ re abril 2016). Chan ru naq xaweek’a lix rahom li Dios rik’in li maatan re li Ralal?

Li loq’laj wa’ak naxk’e qahoonal re xk’oxlankil lix rahom li Dios ut li maatan re li Ralal. K’a’ruheb’ li b’ich re li loq’laj wa’ak neke’tenq’ank aawe chireek’ankil li rahok a’in? K’a’ru naru taab’aanu re naq mas wi’chik taatoch’e’q aach’ool rik’in li loq’laj wa’ak?

Naq yooqat chirilb’al mas chirix lix k’utum ut xb’aanuhom li Kolonel, patz’ aawib’ chan ru nakatxtenq’a li yookat chirilb’al, sa’ xtawb’al ru ut reek’ankil lix rahom li Dios?

Jwan 4:24

Ma yal musiq’ej li Dios?

Maare wankeb’ li neke’sach xna’leb’ rik’in li raatin li Jesus naq li Dios a’an musiq’ej. Li aatin a’in chi jaltesinb’il ru xb’aan laj Jose Smith naxkutanob’resi li na’leb’ a’in, ut naxye “re xkomoneb’ a’an li Dios kixyeechi’i lix Musiq’ “ (chi’ilmanq JJS, Jwan 4:26). Rik’in li k’a’ru k’utb’esinb’il sa’eb’ li kutan a’in, k’utb’il naq li Dios wan xjunxaqalil li tib’ ut b’aq okenaq (chi’ilmanq Tzol’leb’ ut Sumwank 130:22–23; chi’ilmanq ajwi’ Genesis 5:1–3; Hebreos 1:1–3).

Jwan 4:5–26

Li Kristo naxyeechi’i we lix yo’yookil ha’.

K’a’ru xyaalalil li raatin li Jesus naq kixye re li ixq aj Samaria naq li ani taa’uk’aq re li ha’ tixk’e, maajo’q’e chik taachaqiq re? Chan ru naq li evangelio chanchan li yo’yookil ha’?

Lix evangelio li Kristo a’an li yo’yookil ha’ li nach’olanink re li qaam.

Jun reheb’ li na’leb’ kixk’ut li Jesus chiru li ixq aj Samaria a’an naq nim wi’chik xwankil chan ru nokoloq’onin chiru b’ar nokoloq’onin (chi’ilmanq Jwan 4:21–24). K’a’ru yookat chixb’aanunkil re “xloq’onkinkil li Yuwa’b’ej sa’ musiq’ej ut rik’in li yaal”? (Jwan 4:23).

Chi’ilmanq ajwi’ K’utul Raqal reheb’ li Loq’laj Hu, “Loq’onink”; Dean M. Davies, “Eb’ li osob’tesink re li loq’onink,” Jolomil ch’utub’aj-ib’ re octubre 2016.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Jwan 2–4.Naq nekeril sa’ junkab’al eb’ li ch’ol a’in chiru li xamaan a’in, k’ehomaq reetal chan ru naq li Kolonel kiroksi li k’a’aq re ru na’ilman wulaj wulaj—jo’ li yo’laak, li iq’, li ha’, ut li tzakemq—re xk’utb’al li musiq’ejil na’leb’. K’a’ru wan sa’ laa wochoch li naru na’oksiman re xk’utb’aleb’ li musiq’ejil yaal?

Naq teetzol li ch’ol a’in, maare us wi teerileb’ li video chirixeb’ li na’leb’ a’in: “Jesús convierte el agua en vino,” “Jesus purifica el templo,” “Jesus enseña acerca de nacer de nuevo,” ut “Jesus enseña a una mujer samaritana” (ChurchofJesusChrist.org).

Jwan 2:13–17.K’a’ru li tento teeram chi ok sa’ lee rochoch re naq taawanq choq’ loq’laj na’ajej—jo’ li santil ochoch? K’a’ru taab’aanu laa’at re xramb’al chi ok li k’a’aq re ru a’an?

Jwan 3:1–6.Ye reheb’ li komon sa’ li junkab’al li sachb’a-ch’oolej na’uxman rik’in li wank sa’ yu’am—li hoonal re xyo’ob’tesinkil jun kristiaan li na’eek’an ut wan xna’leb’. Li Kristo kixk’ut naq tento tooyo’laaq wi’chik xb’een wa re tooruuq chi ok sa’ lix awa’b’ejihom li Dios. Chan ru naq li yo’laak wi’chik a’an jun chaab’il jaljookil ru aatin chirix li jalaak li na’ajman ru re tooruuq chi ok sa’ lix awa’b’ejihom li Dios? Chan ru naq laa’o tooruuq chi yo’laak wi’chik sa’ musiq’ej?

Jwan 3:16–17.B’oqeb’ li komon sa’ li junkab’al naq te’xye li raqal a’in sa’ tz’aqal li raatineb’, chanchan yookeb’ chixch’olob’ankil chiru jun ramiiw. Chan ru nokoxtenq’a li Jesukristo chireek’ankil lix rahom li Dios?

Jwan 4:5–15.K’a’ru yoo chixk’utb’al li Kolonel naq kixjuntaq’eeta li evangelio rik’in li yo’yookil ha’? Maare jo’ junkab’al teeril junaq li roq ha’ ut teewotz li neketaw ru chirix li roq ha’ a’an. K’a’ut naq aajel ru naq naquk’ li ha’ wulaj wulaj? Chan ru naq lix evangelio li Jesukristo chanchan “jun li roq li ha’ li nab’ululnak re li junelik yu’am”? (Jwan 4:14).

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Lix rahom li Dios,” B’ichleb’aal choq’ reheb’ li Kok’al, 143.

Xkawresinkil aawib’ chi tzolok

Sik’eb’ li eetalil. Sa’eb’ li loq’laj hu, k’iila sut na’oksiman li k’a’ru ilb’il, li k’a’ru b’aanunb’il, malaj li k’a’ru k’utb’il, choq’ reetalil li musiq’ejil na’leb’. Eb’ li eetalil a’in neke’ru chixchaab’ilob’resinkil laa nawom chirix li na’leb’ li yoo chi k’utmank. Jo’ jun eetalil, li Kolonel kixjuntaq’eeta lix jalajik qach’ool rik’in li yo’laak wi’chik.

Yo’yookil ha’, xb’aan laj Simon Dewey