li Jesus nab’eek rik’ineb’ lix tzolom li wankeb’ lix chakach nujenaq rik’in kaxlan wa

27 marzo–2 abril.

Mateo 14; Markos 6; Jwan 5–6

“Mexxiwak”

Naq nakakawresi aawib’ chixk’utb’al li k’a’ru wan sa’ Mateo 14; Markos 6; ut Jwan 5–6, sik’eb’ li esil li taawanq xloq’al sa’ xyu’ameb’ li kok’al li nakatzoleb’. K’a’ru naru natenq’ank reheb’ li kok’al chixtawb’aleb’ ru li esil a’an? Li tusleb’ aatin a’in naru naxk’e junjunq laa na’leb’.

reetalil li wotzok

Xkanab’ankileb’ chi wotzok

K’ut jun xjalam-uuch li Jesus naq nab’eek sa’ xb’een li ha’ (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al malaj Hu reheb’ li Jalam-uuch re li Evangelio, 43), ut patz’ reheb’ li kok’al naq te’xwotz li k’a’ru neke’xnaw chirix li seraq’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Jwan 5:1–9

Li Jesukristo naxnaw li k’a’ru nawaj ru ut naru nikinixtenq’a.

K’oxla rix li seraq’ naq li Jesus kixk’irtesi li winq chire li Ha’ Betesda. Chan ru taatenq’aheb’ li kok’al chixk’eeb’al reetal k’a’ru naxk’ut li seraq’ chirix lix chaab’ilal ut lix rahom li Jesus?

Kok’ k’anjel naru chi b’aanumank

• Oksi li jalam-uuch Li Kristo naxk’irtesiheb’ li yaj aran Betesda (Hu reheb’ li Jalam-uuch re li Evangelio, 42) re xseraq’inkil reheb’ li kok’al li esil sa’ Jwan 5:1–9. Malaj k’ut li video “Jesús sana a un hombre paralítico en el día de reposo” (ChurchofJesusChrist.org). Patz’ reheb’ li kok’al naq’ te’xk’oxla naq a’aneb’ li kristiaan kixk’irtesi li Jesus. Chan raj ru te’reek’a naq te’k’irtesiiq raj xb’aan li Jesus.

• Patz’ reheb’ li kok’al naq te’xye junjunq li k’a’aq re ru ch’a’aj choq’ reheb’ a’an malaj li naxrahob’tesi xch’ooleb’. Seraq’i reheb’ jun sutaq naq xak’ul aatenq’ankil xb’aan li Kolonel sa’ laa yu’am chiru jun li ch’a’ajkil yale’k. Ch’olob’ xyaalal naq li Jesus naxnaw chixjunileb’ li qach’a’ajkilal ut naraj qatenq’ankil.

Mateo 14:13–21

Nintaaqe lix b’aanuhom li Jesukristo naq chaab’ilin rik’ineb’ li kristiaan.

Li Jesus kixk’ut lix rahom naq kixk’eheb’ chi wa’ak laj taaqehom re naq ke’tz’oka. Chan ru naru nakatenq’aheb’ li kok’al chixtzolb’al k’anjelak chiruheb’ li kristiaan jo’ kixb’aanu li Jesus?

Kok’ k’anjel naru chi b’aanumank

• K’ut chiruheb’ li kok’al jun li chakach ut b’ayaq li kaxlan wa naq yookat chixseraq’inkil li seraq’ sa’ Mateo 14:13–21. Ch’olob’ naq us ta li Jesus ak kixyal xq’e re wank xjunes, li kristiaan ke’raj wank chi nach’ rik’in a’an. Wotz lix raqik li seraq’ rik’ineb’ li kok’al ut patz’ reheb’ naq te’rab’i chi us li kixb’aanu li Jesus re xk’utb’al lix chaab’ilal ut xrahom choq’ reheb’ li kristiaan.

• Patz’ reheb’ li kok’al naq te’xwotz chan ru naq xk’ut xchaab’ilal junaq rik’ineb’ a’an. Tenq’aheb’ chixk’oxlankil k’a’ru naru te’xb’aanu re xk’utb’al xchaab’ilaleb’ chiruheb’ li rech kristiaanil chiru li xamaan a’in. Rik’in li junjunq chi sumenk te’xye, yiib’ jun xjalam-uuch li kaxlan wa malaj jun li kar chiru li pizarron. Ye reheb’ li kok’al naq wi neke’xb’aanu li k’a’aq re ru a’an, yookeb’ chixtaaqenkil lix b’aanuhom li Jesus naq kixk’eheb’ chi wa’ak li oob’ mil chi kristiaan ke’tz’oka.

Mateo 14:22–33

Li paab’aal chirix li Jesukristo naru nikinixtenq’a chirisinkil lin xiw.

Laj Pedro kixk’ut xnimal xpaab’aal naq kib’eek sa’ xb’een li ha’ rik’in li Jesus. K’a’ raj ru li tzole’k naru natawman sa’ li seraq’ a’an choq’ reheb’ li kok’al?

Kok’ k’anjel naru chi b’aanumank

• K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, (chi’ilmanq ajwi’ Hu reheb’ li Jalam-uuch re li Evangelio, 43) naq yookat chixseraq’inkil li natawman sa’ Mateo 14:22–33. Maare us naq taawoksi li perel re kok’ k’anjel re li xamaan a’in re xtenq’ankileb’ li kok’al chixyeeb’al aawe li seraq’. Naru ajwi’ taak’am jun li ch’ina sek’ rik’in ha’ ut taapatz’ reheb’ li kok’al naq te’xye naq “neke’b’eek” rik’in li ru’uj ruq’eb’ sa’ xb’een li ha’.

• K’ut li video “¿Por qué dudaste?” (ChurchofJesusChrist.org), ut patz’ reheb’ li kok’al naq te’rab’i chi us k’a’ut naq kiwan xxiw laj Pedro. Chirix a’an patz’ reheb’ naq te’aatinaq chirix jun hoonal naq xe’reek’a xxiw ut te’xwotz k’a’ru xtenq’ank reheb’. Tenq’aheb’ chirilb’al naq li paab’aal chirix li Jesukristo nokoxtenq’a chixq’axb’al ru li qaxiw.

reetalil li k’utuk

Xk’utb’al li tzol’leb’: Kok’al ak ninqeb’

Jwan 5:17–47

Li Jesukristo nikinixtzol chirix lin Choxahil Yuwa’.

Chan ru naq lix k’utum li Jesus chirix lix Yuwa’ naru naxtenq’aheb’ li kok’al chi tzolok chirix li qaChoxahil Yuwa’?

Kok’ k’anjel naru chi b’aanumank

• Yoob’ wiib’ li b’atz’unk rik’ineb’ kok’ hu li neke’xk’ul rib’, rik’ineb’ li aatin kiroksi li Jesus naq kik’utuk chirix li qaChoxahil Yuwa’ sa’ Jwan 5, jo’eb’ li aatin rahok, yu’am, ut k’anjel (chi’ilmanq Jwan 5:20, 26, 36). K’eheb’ li kok’ hu chi huphu ut patz’ reheb’ li kok’al naq te’xsik’ li neke’xk’ul rib’ rik’in xb’alq’usinkil wiib’ sa’ jun sut. Rajlal sut naq te’xtaw jun sumal, yaab’asi li raqal wan wi’ li aatin a’an, ut patz’ reheb’ li kok’al k’a’ru naxk’ut chiqu li aatin a’an chirix li qaChoxahil Yuwa’.

• Patz’ reheb’ li kok’al naq te’ril Jwan 5:30, ut chirix a’an te’xchoy li ch’ol aatin a’in: “Ink’a’ ninsik’ li wajom laa’in, a’ b’an …” Chan ru kixb’aanu li Jesukristo li rajom lix Choxahil Yuwa’? Chan ru naru naqab’aanu laa’o li rajom li qaChoxahil Yuwa’?

eb’ li kaxlan wa ut li kar

Li Jesus kixk’e chi wa’ak oob’ mil rik’in oob’ kaxlan wa ut wiib’ li kar.

Jwan 6:5–14

Lin kok’ mayej naru neke’tenq’ank.

Jun li ch’ina al kik’ehok re li kaxlan wa ut eb’ li kar li kiroksi li Jesus re xk’eeb’aleb’ chi wa’ak oob’ mil chi kristiaan. Chan ru taatenq’aheb’ li kok’al li nakatzoleb’ chirilb’al chan ru naru neke’tenq’an sa’ lix k’anjel li Qaawa’?

Kok’ k’anjel naru chi b’aanumank

• Tenq’aheb’ li kok’al chixk’oxlankil chan raj ru xk’ihaleb’ oob’ mil chi kristiaan. Chan raj ru xk’eeb’aleb’ chi wa’ak chixjunileb’ li kristiaan a’an rik’in ka’ajwi’ oob’ chi kaxlan wa ut wiib’ chi kar?

• Patz’ re jun li ch’ina al naq tixye rik’in li raatin li seraq’ re xk’eeb’aleb’ chi wa’ak li oob’ mil chi kristiaan. Jultika reheb’ naq a’an jun li ch’ina al kik’ehok re li kaxlan wa ut eb’ li kar li kiroksi li Qaawa’ re xb’aanunkil li sachb’a-ch’oolej a’in. Chan ru naru nokowan jo’ li ch’ina al sa’ Jwan 6:9? Kanab’eb’ li kok’al chixyiib’ankil xjalam-uuch li kaxlan wa ut eb’ li kar chiru li hu, ut chixtz’iib’ankil chiruheb’ junjunq li k’a’aq re ru naru neke’xk’e re li Qaawa’ re tenq’ank sa’ lix k’anjel.

• K’e reheb’ li junjunq chi kok’al jun li ch’ina rompecabezas re naq te’xtusub’ ru. K’a’ raj ru taak’ulmanq wi ta jun re lix cha’alil li rompecabezas sachso? Ch’olob’ naq chanchano jun xcha’alil li rompecabezas—chiqajunilo wan qaloq’al, ut naqaj qib’ chiqib’il qib’. Tenq’aheb’ li kok’al chixyeeb’al k’a’ut naq aajleb’ ru sa’ lix junkab’aleb’, lix tzoleb’aaleb’, ut xkomoneb’ chik li ch’uut.

Mateo 14:22–33

Li paab’aal chirix li Jesukristo naru nikinixtenq’a chirisinkil lin xiw.

Li paab’aal ut li xiw wan jun xnimal xk’anjeleb’ sa’ li seraq’ naq li Jesus ut laj Pedro ke’b’eek sa’ xb’een li palaw. K’a’ru naru naqatzol sa’ li seraq’ a’an?

Kok’ k’anjel naru chi b’aanumank

• K’ut li jalam-uuch wan sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al (chi’ilmanq ajwi’ Hu reheb’ li Jalam-uuch re li Evangelio, 43). Patz’ reheb’ li kok’al naq te’xsik’ li aatin sa’ Mateo 14:22–33 li tixch’olob’ li jalam-uuch a’an.

• Patz’ reheb’ li kok’al naq te’xsik’ reetalil li paab’aal ut li xiw naq yooqeb’ chirilb’al Mateo 14:22–33. Naru ajwi’ nakak’ut li video “¿Por qué dudaste?” (ChurchofJesusChrist.org). K’a’ru naraj naxye naq wan aapaab’aal chirix li Jesukristo? Tenq’aheb’ li kok’al chixjultikankileb’ li hoonal naq lix paab’aaleb’ kixtenq’aheb’ chirisinkil lix xiweb’.

• Patz’ reheb’ li kok’al naq te’xk’oxla naq ke’wan ut kiwan jun li camara rik’ineb’ naq li Jesus ut laj Pedro kib’eek sa’ xb’een li palaw. B’ar raj wan reheb’ li hoonal li te’risi raj sa’ jalam-uuch ut k’a’ut? Ye reheb’ naq naru neke’xsik’ xna’leb’eb’ sa’ Mateo 14:22–33. Patz’ reheb’ naq te’xyiib’ jun xjalam-uuch li hoonal xe’xsik’ ru, naq te’xwotz lix jalam-uuch, ut naq te’xch’olob’ k’a’ut naq xe’xsik’ ru li hoonal a’an.

reetalil li tzolok

Xb’oqb’aleb’ chi tzolok sa’ kab’l

Wi eb’ li kok’al ak xe’xb’aanu li perel re kok’ k’anjel re li xamaan a’in, patz’ reheb’ naq te’roksi re xk’utb’al chiruheb’ lix junkab’aleb’ li xe’xtzol sa’ li tzoleb’aal. Malaj k’e li hu a’an reheb’ re naq te’xb’aanu rik’ineb’ lix junkab’al sa’ kab’l.

Xkawresinkil qib’ jo’ aj k’utunel

Kanab’eb’ chi wotzok. Patz’ reheb’ li kok’al chirix lix k’a’uxleb’, li reek’ahomeb’, ut li k’a’ru xe’xk’ul. Taak’e reetal naq junelik wan xna’leb’eb’ moko ch’a’aj ta xtawb’al ru a’b’an jwal ninqeb’ ru.

perel re kok’ k’anjel: li Jesukristo naru tinixtenq’a re naq ink’a’ tinxuwaq