“10–16 abril. Mateo 15–17; Markos 7–9: “Laa’at li Kristo,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“10–16 abril. Mateo 15–17; Markos 7–9,” Kim, Taaqehin—Choq’ re li Tzoleb’aal reheb’ li Kok’al: 2023
Li jaltesiik ru, xb’aan laj Carl Heinrich Bloch
10–16 abril
Mateo 15–17; Markos 7–9
“Laa’at li Kristo”
Naq nakatz’il rix Mateo 15–17 ut Markos 7–9, k’e reetal li musiq’anb’il na’leb’ nakak’ul li tatxtenq’a chixnawb’al k’a’ru neke’raj ru li kok’al sa’ laa tzoleb’aal.
Xkanab’ankileb’ chi wotzok
Patz’ reheb’ li kok’al naq te’xwotz k’a’ut naq neke’xb’antioxi naq wankeb’ laj jolominel sa’ li Iglees, jo’eb’ li profeet, li apostol, ut laj jolominel sa’ xna’ajeb’ a’an. K’a’ru xqab’iheb’ chixyeeb’al toje’?
Xk’utb’al li tzol’leb’: Kok’al toj ka’ch’ineb’ xyu’am
Naru nintaw jun xnawom inch’ool naq li Jesukristo a’an li Ralal li Dios.
K’oxla chan ru taawoksi lix nawom xch’ool laj Pedro ut lix sumehom li Jesus re xk’utb’al chiruheb’ li kok’al k’a’ru li xnawom ch’oolej ut re xwaklesinkileb’ xch’ool chixsik’b’al li reheb’.
Kok’ k’anjel naru chi b’aanumank
-
Patz’ reheb’ li kok’al naq te’rab’i li kixye laj Pedro naq yookat chixyaab’asinkil Mateo 16:15–17. (Chi’ilmanq ajwi’ “Ch’ol 32: Laj Pedro naxch’olob’ xyaalal li Kristo,” sa’ Eb’ li Esilal sa’ li Ak’ Chaq’rab’, 76–77, malaj li video sa’ ChurchofJesusChrist.org.) Ch’olob’ naq laj Pedro yoo chixyeeb’al lix nawom xch’ool chirix li Jesukristo. Yaab’asi wi’chik li raqal. (Malaj k’ut wi’chik li video.) Anajwan patz’ reheb’ li kok’al naq te’ab’inq re xk’eeb’al reetal ani kiyehok re laj Pedro naq li Jesukristo a’an li Ralal li Dios.
-
Ye lix nawom aach’ool chirix li Jesukristo ut ch’olob’ chan ru naq xataw. B’oqeb’ li kok’al chixyalb’al xtawb’al rik’in li qaChoxahil Yuwa’ lix nawomeb’ xch’ool.
Li Jesukristo naxk’e reheb’ li profeet ut eb’ li apostol lix laawil li tijonelil re xb’eresinkil lix Iglees.
Li Kolonel kixjuntaq’eeta li k’utb’esinb’il na’leb’ rik’in jun li pek ut li wankilal re li tijonelil rik’ineb’ li laaw. Chan ru taawoksiheb’ li juntaq’eetank a’an re xtenq’ankileb’ li kok’al chi wank xpaab’aaleb’ chirixeb’ li ani neke’b’eresink re lix Iglees li Kristo?
Kok’ k’anjel naru chi b’aanumank
-
K’ut jun li pek chiruheb’ li kok’al naq yookat chixyaab’asinkil Mateo 16:18. Ka’suti rik’ineb’ a’an li ch’ol aatin “sa’ xb’een li pek a’in tink’ojob’ lin iglees,” rik’in eek’asink-ib’ li naxk’ul rib’ rik’ineb’ li aatin. Ch’olob’ naq li Iglees k’ojk’o sa’ xb’een li “pek” re li k’utb’esinb’il na’leb’.
-
K’ut chiruheb’ li kok’al junjunqeb’ li laaw, ut patz’ reheb’ k’a’ruheb’ aj-e. Ch’olob’ naq li Jesus kixk’e lix laawil li tijonelil re laj Pedro ut reheb’ xkomon li apostol. Eb’ li laaw a’an, “neke’xte” choq’ qe li osob’tesihom ut li b’e sa’ li choxa. Rik’ineb’ lix laawil li tijonelil naru nak’ub’siman qaha’ ut naru nokotz’aqon sa’ li loq’laj wa’ak. K’e reheb’ li kok’al li huhil laaw ut patz’ reheb’ naq te’xtz’iib’a junjunq li osob’tesihom “neke’xte” lix laawil li tijonelil.
-
K’ut jun xjalam-uuch li Awa’b’ej re li Iglees, ut ch’olob’ xyaalal naq a’an wan chixjunileb’ li laaw re li tijonelil rik’in sa’eb’ li kutan a’in, jo’ naq kiwan chaq rik’in laj Pedro.
Eb’ lix laawil li tijonelil, a’aneb’ li wankilal chixb’eresinkil lix k’anjel li tijonelil.
Lin paab’aal naru naxk’eheb’ chi uxmank li sachb’a-ch’oolej.
Naq nakawil ru lix yeechi’ihom li Jesus naq li paab’aal chanchan li riyajil li mostaza naru nareek’asiheb’ li tzuul, k’a’ru li na’leb’ nakak’ul chirixeb’ li kok’al li nakatzoleb’?
Kok’ k’anjel naru chi b’aanumank
-
Yaab’asi Mateo 17:19–20 chiruheb’ li kok’al. Kanab’eb’ li kok’al chixyiib’ankil xjalam-uuch li ninqi tzuul ut eb’ li kok’ iyaj chiru li pizarron. Ch’olob’ naq li ninqi tzuul a’aneb’ li k’a’aq re ru li ch’a’ajeb’ choq’ qe xb’aanunkil. B’ar wankeb’ junjunq reheb’ li k’a’aq re ru chanchaneb’ li ninqi tzuul choq’ qe? Oksi li perel re kok’ k’anjel re li xamaan a’in re xtenq’ankileb’ li kok’al chixk’oxlankil chan ru naq li paab’aal naru naxtenq’aheb’ chixb’aanunkileb’ li k’a’aq re ru li naraj li Dios naq te’xb’aanu.
-
K’e jun xjalam-uuch jun nimla tzuul sa’ jun xpak’al li tzoleb’aal. Patz’ reheb’ li kok’al naq te’xye li k’a’aq re ru li naru neke’xb’aanu re xtawb’al xkomon lix paab’aaleb’ chirix li Jesukristo. Kanab’ naq li junjunq chi ch’ina al li tixye junaq na’leb’ tixnumsi li tzuul mas nach’ wi’chik sa’ xjunpak’alil li tzoleb’aal. Yaab’asi Mateo 17:19–20, ut ch’olob’ xyaalal lix wankilal li paab’aal sa’ laa yu’am.
-
B’ichahomaq jun li b’ich chirix li paab’aal, maare “Li paab’aal” (B’ichleb’aal choq’ reheb’ li Kok’al, 50). K’e reheb’ li kok’al jun li iyaj re te’xk’am sa’ rochocheb’. B’oqeb’ chirawb’al li iyaj ut chixk’eeb’al sa’ jun na’ajej b’ar wi’ naru neke’ril chi k’iik re xjultikankil reheb’ naq te’wanq xpaab’aal chirix li qaChoxahil Yuwa’ ut li Jesukristo.
Xk’utb’al li tzol’leb’: Kok’al ak ninqeb’
Nachal xnawom qach’ool chirix li Jesukristo chi k’utb’esinb’il.
Chan raj ru naq lix nawom xch’ool laj Pedro li wan resilal sa’ Mateo 16:13–17 tixtenq’aheb’ li kok’al chixwaklesinkil lix nawomeb’ xch’ool?
Kok’ k’anjel naru chi b’aanumank
-
Patz’ reheb’ li kok’al k’a’ raj ru te’xye wi ta junaq tixpatz’ reheb’, “Ani li Jesus?” Patz’ reheb’ li kok’al naq te’ril Mateo 16:13–17 re xsik’b’al chan ru kisumen laj Pedro rik’in li patz’om a’an. Chan ru naq kixtaw lix nawom xch’ool chirix li Jesus? K’a’ru naru naqab’aanu re xkawob’resinkil lix nawom qach’ool?
-
Tenq’aheb’ li kok’al chixjuntaq’eetankil chan ru naq naqanaweb’ li musiq’ejil yaal rik’in chan ru naq naqanaweb’ jalaneb’ chik li yaal. Qayehaq, chan ru naqanaw lix teram jun li kristiaan malaj chan ru wan li kutan? Chan ru naqanaw naq li Jesukristo a’an li Ralal li Dios? Ye reheb’ li kok’al chan ru naq li Santil Musiq’ej naxch’olob’ xyaalal li Kolonel chawu.
-
Wotz lix nawom aach’ool chirix li Jesukristo ut b’oqeb’ li kok’al chixtawb’al malaj chixkawob’resinkil lix nawomeb’ xch’ool chirix.
Lix Iglees li Jesukristo b’eresinb’il xb’aaneb’ li wankeb’ xlaawil li tijonelil rik’ineb’.
Rilb’al Mateo 16:15–19 naru naxk’awob’resi xpaab’aaleb’ li kok’al chirix naq Lix Iglees li Jesukristo reheb’ laj Santil Paab’anel sa’ Roso’jikeb’ li Kutan a’an jun xk’ojob’ankil wi’chik li Iglees kixk’ojob’ li Jesus naq kiwan sa’ li ruchich’och’.
Kok’ k’anjel naru chi b’aanumank
-
Tz’iib’a Mateo 16:19 chiru li pizarron, ut isi junjunqeb’ li aatin, jo’ ajwi’ li aatin “laaw.” Patz’ reheb’ li kok’al naq te’xtaw li aatin li maak’a’eb’.
-
K’ut li video “¿Dónde están las llaves?” (ChurchofJesusChrist.org), malaj ilomaq “Xlaawil li tijonelil” sa’ li K’utul Raqal reheb’ li Loq’laj Hu. K’a’ruheb’ lix laawil li tijonelil? Chan ru naq eb’ lix laawil li tijonelil chanchaneb’ li tz’aqal laaw?
-
Tenq’aheb’ li kok’al chixtz’iib’ankil chiru li pizarron xk’ab’a’eb’ li kristiaan neke’xk’am lix laawil li tijonelil. Naru xtawb’al junjunq reheb’ a’an sa’ “Xlaawil li tijonelil” sa’ li K’utul Raqal reheb’ li Loq’laj Hu. Patz’ re jun li komon re laa teep li naxk’ameb’ li laaw re li tijonelil naq tixch’olob’ chiruheb’ li kok’al k’a’ut naq aajeleb’ ru li laawil a’an.
-
Muq naab’aleb’ li laaw (malaj xjalam-uuch li laaw) sa’ li tzoleb’aal, ut kanab’eb’ li kok’al chixtawb’aleb’. Chirix xtawb’al li junjunq chi laaw, tenq’aheb’ li kok’al chixk’oxlankil li osob’tesihom naqak’ul b’antiox reheb’ lix laawil li tijonelil (maare li wank chi junelik sa’ qajunkab’al, li kub’iha’, ut li loq’laj wa’ak).
Li Jesukristo a’an li Ralal li Dios.
Eb’ li raqal a’in neke’xye resil naq ki’ab’iman lix yaab’ xkux li Dios li Yuwa’b’ej chixch’olob’ankil xyaalal lix Raarookil Alal. Naq nakatzol li seraq’ a’an rik’ineb’ li kok’al naru nakak’awob’resi lix paab’aaleb’ chirix li Jesukristo.
Kok’ k’anjel naru chi b’aanumank
-
Patz’ reheb’ li kok’al naq te’xyiib’ xjalam-uuch li xe’ril sa’ Mateo 17:1–9. Patz’ reheb’ naq te’xch’olob’ lix jalam-uucheb’ chirib’ileb’ rib’. (Chi’ilmanq ajwi’ “Ch’ol 33: K’utuk-ib’ sa loq’alil: Li jaltesiik-u,” sa’ Eb’ li Esilal sa’ li Ak’ Chaq’rab’, 76–77, malaj li video sa’ ChurchofJesusChrist.org.)
-
K’e xhoonaleb’ li kok’al chixk’oxlankil k’a’ru naxk’ut li seraq’ Mateo 17:1–9 chirix li Jesukristo. Patz’ reheb’ naq te’xtz’iib’a chiru li pizarron li k’a’ru xe’xk’oxla. Patz’ reheb’ li kok’al naq te’xye chan ru neke’xnaw naq li Jesukristo a’an li Ralal li Dios.
Xb’oqb’aleb’ chi tzolok sa’ kab’l
Patz’ reheb’ li kok’al naq te’xpatz’ reheb’ lix na’ xyuwa’ malaj re jalan chik komon re lix junkab’al chan ru xe’xtaw xnawom xch’ool chirix li Jesukristo.
Xkawresinkil qib’ jo’ aj k’utunel
Oksiheb’ li b’ich. Eb’ li b’ich reheb’ li kok’al ut sa’ li b’ichleb’aal naru neke’xtenq’aheb’ li kok’al a’ yaal jarub’ chihab’ wan reheb’ chixtawb’al ru ut chixjultikankileb’ li yaal re li evangelio. Li b’ichank naru ajwi’ naxtenq’aheb’ li kok’al chi tz’aqonk sa’eb’ li tzolok. (Chi’ilmanq Li k’utuk jo’ li Kolonel, 22.)