“24–30 abril. Jwan 7–10: “Laa’in li chaab’il aj k’aak’alenel karneer,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“24–30 abril. Jwan 7–10,” Kim, Taaqehin—Choq’ re li Tzoleb’aal reheb’ li Kok’al: 2023
Chi moko laa’in tatink’e sa’ tojb’a-maak, xb’aan li xEva Koleva Timothy
24–30 abril
Jwan 7–10
“Laa’in li chaab’il aj k’aak’alenel karneer”
Naq nakawil Jwan 7–10, che’wanq li kok’al nakatzoleb’ sa’ laa k’a’uxl. Naab’al reheb’ li na’leb’ choq’ reheb’ li kok’al ak ninqeb’ re li tusleb’ aatin a’in naru ajwi’ na’oksiman choq’ reheb’ li kok’al toj ka’ch’ineb’ xyu’am, malaj chi jaljo ru.
Xkanab’ankileb’ chi wotzok
Jultika reheb’ li kok’al k’a’ru xab’oqeb’ chixb’aanunkil chiru junaq li tzolok numenaq. Patz’ reheb’ naq te’xwotz k’a’ru xe’xb’aanu rik’in li b’oqok a’an.
Xk’utb’al li tzol’leb’: Kok’al toj ka’ch’ineb’ xyu’am
Li ab’ink chiruheb’ li taqlahom tinixtenq’a chixnawb’al naq yaaleb’.
Li Jesus kixk’ut naq naru naqataw xnawom qach’ool chirixeb’ li yaal li kixwotz naq yooqo chixyu’aminkileb’. Li tuqtuukilal naqeek’a naq noko’ab’in chiruheb’ li taqlahom nokoxtenq’a chixnawb’al naq yaaleb’. K’oxla chan raj ru taak’ut chiruheb’ li kok’al li yaal a’an.
Kok’ k’anjel naru chi b’aanumank
-
K’os ru Jwan 7:17 rik’ineb’ aatin li te’xtaw ru li kok’al. Tenq’aheb’ chixtawb’al ru naq ab’ink chiruheb’ li taqlahom nokoxtenq’a chi nach’ok rik’in li Jesukristo. Re xtenq’ankileb’, naru nekeb’icha jun li b’ich, maare “Paab’eb’ li taqlahom” malaj “Tinsik’ ru li us” (B’ichleb’aal choq’ reheb’ li Kok’al, 68–69, 82–83). Patz’ reheb’ li kok’al naq te’ab’inq chi us re xk’eeb’al reetal chan ru too’osob’tesiiq naq too’ab’inq chiruheb’ li taqlahom.
-
Wotz jun aanumsihom b’ar wi’ xak’ul xnawom aach’ool naq jun li taqlahom nachal rik’in li Dios xb’aan naq xayu’ami li taqlahom a’an, maare xtojb’al li lajetqil malaj xkuyb’al xmaak junaq li xatxmajewa. Patz’ reheb’ li kok’al naq te’xk’oxla jun li numsihom wanjenaq reheb’ naq xe’ab’in chiru junaq li taqlahom. Patz’ reheb’ naq te’xye k’a’ru xe’reek’a naq xe’ab’in.
-
Patz’ reheb’ li kok’al naq te’xyiib’ xjalam-uucheb’ naq neke’ab’in chiru jun li taqlahom. (Tenq’aheb’ chixk’oxlankil k’a’ru naru te’xyiib’.) Patz’ reheb’ naq te’xwotz lix jalam-uuch chirib’ileb’ rib’, ut naq te’aatinaq chirix li sahil ch’oolejil li nachal rik’in ab’ink chiru li taqlahom a’an.
Li Jesus ki’ab’in chiru lix Yuwa’.
Li Jesukristo junelik kixb’aanu li k’a’ru nawulak chiru lix Choxahil Yuwa’. Chan ru taatenq’aheb’ li kok’al chixtawb’al chan ru naru neke’xtaaqe lix b’aanuhom li Jesus?
Kok’ k’anjel naru chi b’aanumank
-
Tenq’aheb’ li kok’al chixka’sutinkil li kixye li Jesus chirix li qaChoxahil Yuwa’ sa’ Jwan 8:29: “Junelik ninb’aanu li nawulak chiru a’an.” Patz’ reheb’ naq te’xwotz li k’a’ru kixb’aanu li Jesus li kisaho’ wi’ xch’ool li qaChoxahil Yuwa’. K’ut chiruheb’ jun li jalam-uuch re Hu reheb’ li Jalam-uuch re li Evangelio re xk’eeb’aleb’ xna’leb’.
-
Patz’ reheb’ li kok’al k’a’ru nak’ehok xsahileb’ xch’ool. Malaj b’oq jun reheb’ lix na’ malaj xyuwa’ jun li ch’ina al chixwotzb’al junaq xnumsihom b’ar wi’ li ralal kixb’aanu li k’a’ru kixk’e xsahileb’ xch’ool lix na’ xyuwa’. K’a’ru naru naqab’aanu re naq sahaq xch’ool li qaChoxahil Yuwa’? Patz’ reheb’ li kok’al naq te’xyiib’ rib’ sa’ jalam-uuch naq yookeb’ chixb’aanunkileb’ li kok’ k’anjel a’an re naq te’xk’am sa’eb’ li rochoch ut te’jultikanq reheb’.
Li Jesus naxnaw wu ut nikinixra.
Li jaljookil ru aatin re li chaab’il aj k’aak’alenel karneer naru naxtenq’aheb’ li kok’al chixtawb’al ru naq li Jesus naxraheb’ ut naq naxnaw aniheb’.
Kok’ k’anjel naru chi b’aanumank
-
K’e reheb’ li kok’al eb’ li jalam-uuch neke’reetali li k’a’ru wan sa’ li jaljookil ru aatin re li chaab’il aj ilol karneer, maare jun li karneer, jun aj ilol karneer, malaj jun li xojb’. Yaab’asi junjunq li raqal re Jwan 10:1–18 choq’ reheb’ li kok’al, ut patz’ reheb’ naq te’xchap chi kutankil lix jalam-uucheb’ naq te’rab’i xk’ab’a’ li k’a’ru wan sa’ xjalam-uucheb’. Tenq’aheb’ li kok’al chixk’oxlankil chan ru naq li Jesus a’an aj ilol qe. Ch’olob’ xyaalal naq li Kolonel nokoxra ut tooxb’eresi chi sutq’iik rik’in.
-
K’ut xjalam-uuch li Jesus ut eb’ li karneer sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Chan ru naqanaw naq li Jesus naxraheb’ li karneer? Chan ru naqak’e reetal naq eb’ li karneer neke’xra li Jesus? Chan ru naqak’ut chiru li Jesus naq naqara?
Xk’utb’al li tzol’leb’: Kok’al ak ninqeb’
Li ab’ink chiruheb’ li taqlahom tinixtenq’a chixnawb’al naq yaaleb’.
Laa’at ut eb’ li kok’al nakatzoleb’ maare wanjenaq xk’ulumeb’ sa’ xyu’aminkileb’ lix na’leb’ li evangelio ut sa’ xtzolb’al naq yaaleb’. Chan ru naru nakatkab’lak sa’ xb’eeneb’ li numsihom a’an naq nakatk’utuk?
Kok’ k’anjel naru chi b’aanumank
-
Tz’iib’a li junjunq chi raqal re Jwan 7:14–17 chiruheb’ jalan jalanq kok’ hu, ut k’uteb’ chi jalb’ileb’ xtusulal. Patz’ reheb’ li kok’al naq te’xtus ru chi us ut te’ril sa’ Jwan 7:14–17 ma tz’aqal a’an li te’xb’aanu. Patz’ reheb’ li kok’al naq te’xch’utub’ rib’ sa’ ka’kab’il ut te’xwotz rik’ineb’ li rochb’een k’a’ru neke’xtaw ru sa’ li junjunq chi raqal. Chan ru naq li ab’ink chiruheb’ lix taqlahom li Dios naxtenq’aheb’ chixnawb’al naq eb’ li taqlahom tz’aqal yaaleb’?
-
Wotz reetalileb’ sa’eb’ li loq’laj hu chan ru naq eb’ li kristiaan ke’osob’tesiik xb’aan xyu’aminkil lix yaalalil li evangelio, jo’ laj Daniel (chi’ilmanq Daniel 6) malaj xElisabet (chi’ilmanq Lukas 1:5–14). K’a’ru li usilal ak xqak’ul xb’aan ab’ink chiruheb’ li taqlahom?
-
Naq maji’ nawulak xkutankil li tzolok, patz’ re jun li ch’ina al naq taatz’iib’aq chirix junaq hoonal naq xtaw xnawom xch’ool chirix junaq taqlahom xb’aan xyu’aminkil. Chiru li tzolok, patz’ re li ch’ina al naq tixwotz li xtz’iib’a.
Li yaal naru nikinrach’ab’.
Wankeb’ li neke’xk’oxla naq xyu’aminkil li evangelio naxrameb’. Chan ru taawoksi Jwan 8:31–36 re xtenq’ankileb’ li kok’al chixtawb’al ru naq a’an b’an li evangelio li na’ach’ab’ank qe?
Kok’ k’anjel naru chi b’aanumank
-
Patz’ reheb’ li kok’al naq te’ril Jwan 8:31–36 ut te’xwotz li neke’xk’oxla naq naraj naxye li wank choq’ xloq’b’il moos li maak. Chan ru nokohe’xtenq’a lix k’utum li Jesus chi wank chi ach’ab’anb’il?
-
K’ut jun li tz’apleb’ li taareetali li maak ut jun li laaw li taareetali chan ru naq eb’ lix yaalalil li evangelio neke’ru chiqach’ab’ankil. Li nawom chirix lix tojb’al rix li maak xb’aan li Kolonel naru naxk’e qach’ab’ankil re taqajal qak’a’uxl ut taakuye’q li qamaak. Malaj li nawom chirix li Aatin re Chaab’il Na’leb’ naru naxk’e qach’ab’ankil re xkolb’al ru li nak’aytesin.
Li Jesus kixk’ut, “Ut li yaal taa’ach’ab’anq eere” (Jwan 8:32).
Li Jesus a’an aj ilol we.
Naq yookat chixtzolb’al li jaljookil ru aatin re li chaab’il aj ilol karneer, sik’eb’ li yaal li k’utb’ileb’ chirix li qawanjik rik’in li Kolonel. Chan ru naq xnawb’aleb’ li yaal a’an taarosob’tesiheb’ li kok’al?
Kok’ k’anjel naru chi b’aanumank
-
Tz’iib’a chaab’il aj ilol karneer ut li yal tojb’il chiru li pizarron. Ch’olob’ naq jun li yal tojb’il a’an li ani nasik’e’ re xb’aanunkil jun li k’anjel xb’aan tumin. Patz’ reheb’ li kok’al naq te’xk’e rajlil lix jalanileb’ li chaab’il aj k’aak’alenel karneer ut li yal tojb’il neke’tawman sa’ Jwan 10:1–18. K’a’ut raj naq taawaj xtaaqenkil li chaab’il aj ilol karneer sa’ xna’aj jun yal tojb’il? Chan ru naq li Qaawa’ a’an aj ilol qe?
-
Yiib’ jun xjalam-uuch malaj k’ut xjalam-uuch jun li okeb’aal. Ilomaq Jwan 10:7–9, ut patz’ reheb’ li kok’al chan ru naq li Jesus chanchan jun li okeb’aal. Jo’ naxye sa’ li raqal 9, k’a’ru li usilal neke’xk’ul li “neke’ok” sa’ li okeb’aal? Chan ru noko’ok sa’ li okeb’aal li naxk’e li Jesukristo?
Xb’oqb’aleb’ chi tzolok sa’ kab’l
Tenq’aheb’ li kok’al chixk’oxlankil jun li taqlahom li te’ruuq raj chixpaab’ankil chi tz’aqal. Patz’ reheb’ naq te’xyal xpaab’ankil li taqlahom a’an chiru li xamaan chal re.
Xkawresinkil qib’ jo’ aj k’utunel
Oksiheb’ li musiq’anb’il patz’om. Oksiheb’ li patz’om li tixkanab’eb’ li kok’al li nakatzoleb’ chi xik mas wi’chik chi uub’ej chiru ka’ajwi’ xyeeb’al resil li kik’ulman. Choq’ ruuchil a’an, waklesiheb’ xch’ool chixwotzb’al lix nawom xch’ooleb’ chirixeb’ li na’leb’ re li evangelio. Wi yookex chi aatinak chirixeb’ li taqlahom, naru nakapatz’ reheb’ li kok’al naq te’xwotz chan ru naq neke’osob’tesiik xb’aan xpaab’ankileb’ li taqlahom.