jun winq naxq’alu li ralal

Li alalb’ej sachenaq, xb’aan li xLiz Lemon Swindle

1–7 mayo

Lukas 12–17; Jwan 11

“Chisaho’q sa’ qach’ool wochb’eenex, xb’aan naq xintaw lin karneer li xsachk chiwu”

Rik’in tijok, il Lukas 12–17 ut Jwan 11 re xsik’b’al chan ru naru nakatenq’aheb’ li kok’al li nakatzoleb’ chixtawb’aleb’ ru li yaal sa’eb’ li ch’ol a’in ut chireek’ankil lix rahom li qaChoxahil Yuwa’.

reetalil li wotzok

Xkanab’ankileb’ chi wotzok

Jultika reheb’ li kok’al junjunqeb’ li jaljookil ru aatin ut seraq’ neke’tawman sa’ Lukas 12–17 ut Jwan 11, ut patz’ reheb’ naq te’xsik’ ru junaq ut te’xwotz k’a’ru neke’xnaw chirix.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Lukas 15

Li qaChoxahil Yuwa’ naraj naq chixjunileb’ li ralal xk’ajol te’q’ajq rik’in a’an.

K’oxlaheb’ li kok’al re laa tzoleb’aal, jo’eb’ ajwi’ li ink’a’ mas neke’wulak. Chan ru taatenq’aheb’ chireek’ankil lix rahom li qaChoxahil Yuwa’? Chan ru taawaklesiheb’ xch’ool li kok’al chixye’b’al li ruq’eb’ reheb’ a’an rik’in rahok?

Kok’ k’anjel naru chi b’aanumank

• K’e re jun li ch’ina al jun li kok’ tumin, re jun chik k’e lix jalam-uuch jun li karneer, ut re jun chik jun xjalam-uuch li alalb’ej sachenaq (chi’ilmanq ChurchofJesusChrist.org malaj li perel re kok’ k’anjel re li xamaan a’in). Seraq’i li oxib’ chi jaljookil ru aatin li neke’tawman sa’ Lukas 15 ut patz’ reheb’ li kok’al naq te’xtaqsi chi kutankil li kok’ tumin malaj li jalam-uuch naq taaye xk’ab’a’. Naru nakapatz’ reheb’ li kok’al naq te’xseraq’i wi’chik li jaljookil ru aatin chirib’ileb’ rib’ rik’in li raatineb’ a’an.

• Patz’ reheb’ li kok’al naq te’xwotz junaq hoonal naq xe’xtz’eq junaq k’a’ re ru. K’a’ru xe’xb’aanu re xtawb’al? Ch’olob’ naq naru nokosach sa’ musiq’ej naq ink’a’ naqataaqe li qaChoxahil Yuwa’. Ch’olob’ xyaalal naq li Dios naraj naq eb’ li sachsookeb’ te’chalq rik’in, ut laa’o naru te’qatenq’a.

• Patz’ reheb’ li kok’al naq te’xk’oxlaheb’ li kok’al li ink’a’ neke’wulak sa’ li Tzoleb’aal reheb’ li Kok’al. Tenq’aheb’ chixb’onb’al malaj chixtz’iib’ankileb’ kok’ esil re xb’oqb’aleb’ li kok’al a’an chi chalk sa’ li tzoleb’aal malaj sa’ junaq ch’ina k’anjel re li Tzoleb’aal reheb’ li Kok’al . Chan raj chik ru naru naqatenq’aheb’ li kok’al a’an chireek’ankil lix rahom li qaChoxahil Yuwa’?

Lukas 17:11–19

Naru nink’ut lin rahom choq’ re lin Choxahil Yuwa’ naq ninb’antioxiheb’ li wosob’tesinkil.

Chan raj ru naq li seraq’ reheb’ li laajeb’ saqlep rixeb’ tixwaklesi xch’ooleb’ li kok’al re b’antioxink?

Kok’ k’anjel naru chi b’aanumank

• Ye li seraq’ chirixeb’ li laajeb’ saqlep rixeb’ li ke’k’irtesiik xb’aan li Jesus. K’ut li jalam-uuch natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al ut patz’ reheb’ li kok’al naq te’ajlanq toj sa’ lajeeb’ rik’ineb’ li ru’uj ruq’eb’. Chirix a’an patz’ reheb’ naq te’xkub’si b’eleeb’ reheb’ li ru’uj ruq’eb’ re xk’utb’al li jun ajwi’ reheb’ li saqlep rix kib’antioxin rik’in li Jesus. Tenq’aheb’ li kok’al chixk’oxlankil ani aj-e te’b’antioxinq xb’aan jun chaab’ilal kixb’aanu reheb’.

• Patz’ reheb’ li kok’al naq te’xk’utb’esi jun reheb’ li k’a’ru neke’xb’antioxi, ut patz’ reheb’ lix komoneb’ li kok’al naq te’xq’ehi k’a’ru a’an. Patz’ reheb’ li kok’al naq te’xwotz chan ru naru taqak’ut chiru li qaChoxahil Yuwa’ naq nokob’antioxin xb’aaneb’ li qosob’tesinkil.

Jwan 11:1–46

Naqapaab’ naq li Jesus a’an li Ralal li Dios.

Li xMarta, li ranab’ laj Lazaro, kixye re li Jesus: “Laa’in ninpaab’ naq laa’at li Kristo, li Ralal li Dios” (Jwan 11:27). Li resilal li xMarta ut laj Lazaro naru tixkawob’resi lix nawom xch’ooleb’ li kok’al chirix li Jesukristo.

Kok’ k’anjel naru chi b’aanumank

• K’os ru li seraq’ naq li Jesus kixwaklesi chaq laj Lazaro sa’ xyanqeb’ li kamenaq (chi’ilmanq ajwi’ “Ch’ol 43: Li Jesus naxwaklesi chi yo’yo laj Lazaro,” sa’ Eb’ li Esilal sa’ li Ak’ Chaq’rab’, 107–109, malaj li video sa’ ChurchofJesusChrist.org). K’ut ruq’ jun li chaqi che’ ut jun li yo’yookil che’ chiruheb’ li kok’al, ut patz’ reheb’ b’ar wan li kamenaq ut b’ar wan li yo’yo. Ch’olob’ xyaalal naq sa’ xk’ab’a’ lix wankilal li Jesukristo, eb’ li kristiaan ak kamenaqeb’ te’wakliiq chi yo’yo ut te’wanq xyu’am chi junelik.

• Tenq’aheb’ li kok’al chixkanab’ankil sa’ xk’a’uxleb’ li ch’ol aatin kixye li Jesus re xMarta: “Laa’in li wakliik chi yo’yo ut li yu’am” (Jwan 11:25). Ch’olob’ naq sa’ xk’ab’a’ lix waklijik chi yo’yo li Kolonel, taqileb’ wi’chik li qaraarookil komon li ak kamenaqeb’.

reetalil li k’utuk

Xk’utb’al li tzol’leb’: Kok’al ak ninqeb’

Lukas 15

Naru nintenq’a li Jesus chixtawb’aleb’ lix karneer sachsookeb’.

Chiqajunilo naqanaw li ani chanchan li karneer sachenaq, li tumin sachenaq, malaj li alalb’ej sachenaq sa’ lix jaljookil ru aatin li Kolonel. K’oxla chan ru taawaklesi xch’ooleb’ li kok’al chixye’b’al ruq’eb’ re li kristiaan a’an rik’in rahok.

Kok’ k’anjel naru chi b’aanumank

• Tenq’aheb’ li kok’al chirilb’al li jaljookil ru aatin re li karneer sachenaq malaj li jaljookil ru aatin re li kok’ tumin sachenaq, li neke’tawman sa’ Lukas 15:1–10, ut chixwotzb’al li k’a’ru xe’xtzol.

• Tz’iib’aheb’ li k’ab’a’ej a’in chiru li pizarron: yuwa’b’ej, alalb’ej asb’ej, ut alalb’ej iitz’inb’ej. K’ut li video “El hijo pródigo” (ChurchofJesusChrist.org) ut xaqab’ jun sutaq re naq eb’ li kok’al te’ruuq chixtz’iib’ankil chiru li pizarron junjunq li reek’ahomeb’ li kristiaan tz’iib’anb’ileb’ xk’ab’a’ chiru li pizarron. K’a’ru neke’reek’a li qaChoxahil Yuwa’ ut li Jesus chirixeb’ laj maak?

• Patz’ re jun li ch’ina al naq taa’elq chirix li tzoleb’aal naq lix komoneb’ li kok’al te’xmuq jun li kok’ tumin malaj jun xjalam-uuch jun karneer. Patz’ re li ch’ina al naq taa’ok ut tixsik’ li kok’ tumin malaj li karneer. Chan ru naq eb’ li kristiaan neke’reek’a naq “sachsookeb’ ” chanchan li tumin malaj li karneer? Patz’ reheb’ li kok’al naq te’xye chan ru naru neke’xtenq’aheb’. B’ichahomq jun li b’ich, maare “Saʼ raam laj Ilol Karneer,” (Eb’ li B’ich, 142), ut ch’olob’ xyaalal li sahil ch’oolejil na’eek’aman naq li kristiaan neke’q’aj rik’in li Dios.

• Ch’olob’ naq li Jesus kiroksi li karneer sachenaq, li kok’ tumin sachenaq, ut li alalb’ej sachenaq re reetalinkileb’ li kristiaan li “sachsookeb’ ” xb’aan naq ink’a’ neke’xk’ul li rosob’tesihom li evangelio. B’oqeb’ li kok’al chixk’oxlankileb’ li kristiaan neke’xnaw ru li ink’a’ neke’xk’ul li osob’tesink a’an sa’ xyu’ameb’. K’a’ru naru neke’xb’aanu re xtenq’ankileb’ li kristiaan a’an re te’reek’a lix rahom li qaChoxahil Yuwa’?

li Jesus ut eb’ li karneer

Li chaab’il aj ilol karneer, xb’aan laj Yongsung Kim

Lukas 17:11–19

Naru nink’ut lin rahom choq’ re lin Choxahil Yuwa’ naq ninb’antioxiheb’ li wosob’tesinkil.

Li resilal li lajeeb’ saqlep rixeb’ naru tixwaklesiheb’ xch’ool li kok’al chi b’antioxink chiru li qaChoxahil Yuwa’ xb’aan li rosob’tesinkileb’.

Kok’ k’anjel naru chi b’aanumank

• Ilomaq li seraq’ chirixeb’ li lajeeb’ saqlep rixeb’. Chan ru naq ki’osob’tesiik li saqleb’ xb’aan naq kib’antioxin? K’a’ut naq aajel ru li b’antioxink chiru li Dios xb’aaneb’ li qosob’tesinkil?

• Patz’ reheb’ li kok’al naq te’xye k’a’ru li neke’xb’antioxi li natikla xk’ab’a’ rik’in li junjunq chi leetr sa’ lix k’ab’a’eb’.

• Patz’ reheb’ li kok’al naq te’xtz’iib’a kok’ esil re xb’antioxinkil chiru li qaChoxahil Yuwa’ li osob’tesihom naxk’e reheb’. Naru neke’xt’uyub’ li kok’ esil chixk’atq lix ch’aateb’ re te’xjultika li b’antioxink naq te’tijoq.

Jwan 11:1–46

Naqapaab’ naq li Jesus a’an li Ralal li Dios.

Chan ru taawoksi li seraq’ re xMaria, xMarta, ut laj Lazaro re xtenq’ankileb’ li kok’al chixnawb’al, jo’ li xMarta, naq li Jesus “a’an li Kristo, li Ralal li Dios”? (Jwan 11:27).

Kok’ k’anjel naru chi b’aanumank

• Tz’iib’a chiru li pizarron junjunq re li raatineb’ li kristiaan sa’ Jwan 11. Patz’ reheb’ li kok’al naq te’xq’ehi ani kiyehok re li junjunq chi na’leb’ a’an, ut patz’ reheb’ naq te’xsik’ sa’ Jwan 11 re rilb’al ma us li xe’xq’ehi. K’a’ raj ru te’reek’a wi a’aneb’ raj li Jesus, xMarta, xMaria, malaj laj Lazaro? Chan ru naru nokoxtenq’a xpaab’ankil li Jesus naq ra li qach’ool malaj wan li qaxiw?

• Yaab’asi lix nawom xch’ool li xMarta, li natawman sa’ Jwan 11:20–27. Patz’ reheb’ li kok’al naq te’xsik’ aatin malaj ch’ol aatin li neke’xk’utb’esi naq kiwan xpaab’aal xMarta chirix li Jesukristo. K’a’ru naru taqab’aanu re naq wanq ajwi’ qapaab’aal chirix?

• Tenq’aheb’ li kok’al chixtzolb’al sa’ xk’a’uxleb’ Jwan 11:25. Ch’olob’ naq chiqajunilo toowakliiq chi yo’yo, a’b’an ka’ajwi’ eb’ li tiikeb’ xch’ool te’xk’ul li junelik yu’am ut te’wanq wi’chik rik’in li qaChoxahil Yuwa’ ut li Jesukristo.

reetalil li tzolok

Xb’oqb’aleb’ chi tzolok sa’ kab’l

K’e reheb’ li kok’al li hu li naru te’roksi re xtz’iib’ankil malaj xyiib’ankil sa’ jalam-uuch li k’a’aq re ru neke’xb’antioxi chiru li xamaan a’in.

Xkawresinkil qib’ jo’ aj k’utunel

Li ka’sutink a’an xjayal li tzolok. Eb’ li kok’al te’tenq’aaq xb’aan rab’inkil jun li na’leb’ re li evangelio malaj naq neke’xb’aanu jun li ch’ina k’anjel chi k’iila sut. Ka’sutiheb’ li kok’ k’anjel chi naab’al paay ru.

perel re kok’ k’anjel: naru tintenq’a li Jesus chixtawb’al ut chixk’amb’aleb’ chaq wi’chik lix karneer sachenaqeb’