“15–21 mayo. Mateo 21–23; Markos 11; Lukas 19–20; Jwan 12: “We’ chaq aawik’in laa Rey,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“15–21 mayo. Mateo 21–23; Markos 11; Lukas 19–20; Jwan 12,” Kim, Taaqehin—Choq’ re li Tzoleb’aal reheb’ li Kok’al: 2023
Laj Sakeo sa’ xtoonal li sikomoor, xb’aan laj James Tissot
15–21 mayo
Mateo 21–23; Markos 11; Lukas 19–20; Jwan 12
“We’ chaq aawik’in laa Rey”
Naq yookat chirilb’al Mateo 21–23; Markos 11; Lukas 19–20; ut Jwan 12, k’e laa wab’ihom rik’in li na’leb’ nakak’ul rik’in li Santil Musiq’ej. Sik’ sa’ “Xb’aanunkil li nak’anjelak choq’ reheb’ li kok’al li toj ka’ch’ineb’ xyu’am” sa’ xtiklajik li hu a’in re xtawb’al li k’a’ru tento taawanq sa’ laa k’a’uxl naq yookat chixk’utb’aleb’ li na’leb’ a’an.
Xkanab’ankileb’ chi wotzok
K’ut li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al, ut patz’ reheb’ li kok’al naq te’xwotz k’a’ru neke’xnaw chirix li yoo chi k’ulmank sa’ li jalam-uuch.
Xk’utb’al li tzol’leb’: Kok’al toj ka’ch’ineb’ xyu’am
Li qaChoxahil Yuwa’ ut li Jesus neke’xnaw wu rik’in ink’ab’a’.
Naq nakawil ru li raatin li Kolonel rik’in laj Sakeo, k’a’ru li esil nakataw li naru taarosob’tesiheb’ li kok’al nakatzoleb’?
Kok’ k’anjel naru chi b’aanumank
-
K’ut jun xjalam-uuch laj Sakeo sa’ xtoonal li sikomoor (sa’ li tusleb’ aatin a’in malaj sa’ ChurchofJesusChrist.org). Tenq’aheb’ li kok’al chixtawb’al laj Sakeo ut chixyeeb’al lix k’ab’a’. K’oxlaheb’ eek’asink-ib’ li naru te’xb’aanu li kok’al naq laa’at yookat chixyeeb’al li resilal laj Sakeo ut li Jesus—maare xaqliik rik’in ru’uj oqej re ilok sa’ xb’eeneb’ li k’iila kristiaan, malaj xyeeb’al naq yookeb’ chi taqe’k sa’ ru’uj jun li che’. Ch’olob’ naq li Kolonel kiril laj Sakeo ut naq kixb’oq rik’in xk’ab’a’. Ch’olob’ xyaalal naq li Kolonel naxnaw ajwi’ ruheb’ li kok’al chi junjunq ut naxnaw lix k’ab’a’eb’.
-
K’am jun xkaaxukuut jun li jalam-uuch chi yamyo ru sa’ li tzoleb’aal, malaj yiib’ jun rik’in hu. Kanab’ li junjunq chi kok’al chixchapb’al li kaaxukuut chiru lix naq’ ru naq lix komoneb’ te’xye, “Li qaChoxahil Yuwa’ ut li Jesus neke’xnaw ru [xk’ab’a’ li ch’ina al].”
-
B’ichahomaq jun li b’ich chirix lix rahom li qaChoxahil Yuwa’, maare “Laa’in jun ralal li Dios” (B’ichleb’aal choq’ reheb’ li Kok’al, 2─3). Tenq’aheb’ li kok’al chirab’inkil li k’a’ru natenq’ank reheb’ chixnawb’al naq raarookeb’ xb’aan li qaChoxahil Yuwa’.
Li santil ochoch a’an jun na’ajej loq’.
Li roxloq’ li Kolonel chirix li santil ochoch, jo’ k’utb’il sa’eb’ li raqal a’in, naru naxtenq’aheb’ li kok’al chixtawb’al ru naq li santil ochoch a’an jun na’ajej loq’.
Kok’ k’anjel naru chi b’aanumank
-
K’ut li jalam-uuch Li Jesus naxsaqob’resi ru li santil ochoch (Hu reheb’ li Jalam-uuch re li Evangelio, 51), ut ye li seraq’ jo’ li wan sa’ Mateo 21:12–14. Tenq’aheb’ li kok’al chixtawb’aleb’ li tumin ut li xul sa’ li jalam-uuch. Chirix a’an, tz’ilomaq rix k’a’ut naq li Kolonel kiraj naq eb’ laj jalol ru tumin ut eb’ li neke’k’ayin xul te’elq sa’ li santil ochoch.
-
K’ut xjalam-uucheb’ li santil ochoch (chi’ilmanq Hu reheb’ li Jalam-uuch re li Evangelio, 117–119), ut patz’ reheb’ li kok’al naq te’xwotz li neke’reek’a naq neke’ril li santil ochoch. Naru taach’olob’ naq nokoxik sa’ li santil ochoch re ok sa’ sumwank rik’in li Dios, re xtawb’al xsumenkil li qatij, ut re wank chi nach’ rik’in li Dios. Tenq’aheb’ li kok’al chixk’eeb’al reetali li eek’ahom naxk’e li Santil Musiq’ej naq yoo chixyeeb’al reheb’ naq li santil ochoch a’an jun chaq’al ru na’ajej. Patz’ reheb’ li kok’al naq te’wanq jo’ chan raj ru te’wanq chi sa’ li santil ochoch. Qayehaq, naru neke’hasb’ak naq neke’aatinak ut chunlaak rik’in oxloq’.
-
B’ichahomaq jun li b’ich chirix li santil ochoch, maare “Saʼ li santil ochoch” (B’ichleb’aal choq’ reheb’ li Kok’al, 99), ut b’oqeb’ li kok’al chixxaqab’ankileb’ xmeta re ok sa’ li santil ochoch sa’ jun kutan.
Li santil ochoch, a’an rochoch li Qaawa’.
Naru nin’ab’in chiru li Dios.
Li qaChoxahil Yuwa’ naraj naq too’ab’inq chiru. Rik’in li jaljookil ru aatin chirixeb’ li wiib’ chi alalb’ej, naru taak’ut naq aajel ru li ab’ink chiru li Dios.
Kok’ k’anjel naru chi b’aanumank
-
Yiib’ xjalam-uucheb’ li wiib’ chi alalb’ej chiru li pizarron, ut oksiheb’ li jalam-uuch naq yookat chixseraq’inkil li jaljookil ru aatin sa’ Mateo 21:28–32. B’ar wan reheb’ li alalb’ej kixb’aanu li us sa’ xraqik? Patz’ reheb’ li kok’al naq te’xye li k’a’ru naru neke’xb’aanu sa’ li rochocheb’ re ab’ink. Kanab’eb’ chixyiib’ankileb’ rib’ sa’ jalam-uuch naq neke’xb’aanu jun reheb’ li k’a’aq re ru a’an.
-
Patz’ reheb’ li kok’al naq te’xwotz xnumsihomeb’ rik’in ab’ink chiruheb’ lix na’ xyuwa’. Chan ru naq xe’osob’tesiik xb’aan naq xe’ab’in?
Xk’utb’al li tzol’leb’: Kok’al ak ninqeb’
Naq tinsik’ li Qaawa’, tintaw.
Naru nakawoksi li seraq’ chirix laj Sakeo re xtenq’ankileb’ li kok’al chixk’oxlankil k’a’ru naru neke’xb’aanu re nach’ok chi us chiru li Kolonel.
Kok’ k’anjel naru chi b’aanumank
-
Yaab’asi Lukas 19:1–10, ut naq nakawil ru wiib’ oxib’ li raqal, aatinanqex chirix li nayeeman chirix laj Sakeo. K’a’ru kixb’aanu laj Sakeo re rilb’al li Jesus? Chan ru kisumen naq li Jesus kixye re naq taakub’eeq chaq sa’ ru’uj li che’? Patz’ re li junjunq chi kok’al naq tixwotz jun xyaalal k’a’ut raj naq taawulaq chiru rilb’al li Jesus. Wi ta li Kolonel taachalq sa’ li qatenamit, k’a’ raj ru taqab’aanu re xkawresinkil qib’?
-
Patz’ reheb’ li kok’al naq te’xxk’oxlaheb’ li kristiaan neke’xnaw ru li maare yookeb’ chixsik’b’al li Kolonel, jo’ kixb’aanu laj Sakeo. Patz’ reheb’ li kok’al k’a’ raj ru te’xb’aanu re xtenq’ankil junaq chi tzolok chirix li Kolonel.
-
Patz’ reheb’ li kok’al naq te’xwotz xnumsihomeb’ naq xe’reek’a naq yookeb’ chi ile’k ut neke’rahe’k xb’aan li qaChoxahil Yuwa’ ut li Jesukristo.
Sa’ li santil ochoch wan jun na’ajej li jwal ch’ina-us ut tuqtu, li choxahil na’ajej xk’ab’a’.
Chan ru naru nakatxtenq’a li seraq’ naq li Kolonel kixsaqob’resi ru li santil ochoch re xk’utb’al chiruheb’ li kok’al naq loq’eb’ li santil ochoch?
Kok’ k’anjel naru chi b’aanumank
-
Patz’ reheb’ li kok’al naq te’ril Mateo 21:12–14. K’ut li jalam-uuch Li Jesus naxsaqob’resi ru li santil ochoch (Hu reheb’ li Jalam-uuch re li Evangelio, 51), ut patz’ reheb’ b’ar wan li raqal yoo chireetalinkil li jalam-uuch.
-
Patz’ reheb’ li kok’al naq te’xwotz li neke’reek’a naq neke’ok sa’ li santil ochoch, naq neke’rula’ani lix sutam li santil ochoch, malaj naq neke’ril xjalam-uuch li santil ochoch. K’a’ru xtenq’ank reheb’ chixnawb’al naq li santil ochoch a’an jun na’ajej loq’? Naru taaye reheb’ li kok’al k’a’ut naq nakara li santil ochoch. K’a’ut naq nim xloq’al choq’ aawe?
-
Patz’ re jun malaj wiib’ oxib’ li saaj naq te’wulaq sa’ li tzoleb’aal ut te’xwotz chan ru naq neke’xkawresi rib’ re ok sa’ li santil ochoch. Wi ak wanjenaqeb’ sa’ li santil ochoch, patz’ reheb’ naq te’xwotz k’a’ru xe’reek’a naq xe’wan chaq aran.
-
Set jun xjalam-uuch junaq santil ochoch chi kok’ putz’ re jun rompecabezas, ut k’e re chixjunqaleb’ li kok’al jun lix putz’ulal. Patz’ reheb’ li kok’al naq te’xtz’iib’a chirix lix putz’ulal li rompecabezas jun k’a’aq re ru naru neke’xb’aanu re xkawresinkileb’ rib’ re ok sa’ li santil ochoch. Naq li junjunq chi kok’al tixwotz lix na’leb’, k’e lix cha’alil li rompecabezas sa’ xna’aj.
-
Chiru li pizarron, tz’iib’a: naru nikinixtenq’a chixkawresinkil wib’ re tink’anjelaq sa’ li santil ochoch. Ye reheb’ li kok’al naq te’xye chan ru naru xchoyb’al li ch’ol aatin a’an. Maare te’xye “Xpaab’ankil lin sumwank re li kub’iha’,” malaj “Li Santil Musiq’ej.”
Li Jesus naraj naq tiikaqin sa’ lin b’aanuhom ut li wajom.
Li Jesus kixk’ut chiruheb’ laj tz’iib’ ut laj Fariseo naq aajel ru xyu’aminkil chi tz’aqal li evangelio—ut ink’a’ ka’ajwi’ xpak’b’al wank chi tiik. K’a’ru naru taatenq’anq reheb’ li kok’al chixtawb’al ru li yaal a’an?
Kok’ k’anjel naru chi b’aanumank
-
Naq yookat chirilb’al Mateo 23:25–28 rik’ineb’ li kok’al, wotz li naraj naxye li aatin aj ka’pak’al-u: “Junaq li naxpak’ li wank jo’ aj paab’anel us ta maawa’ aj paab’anel.” K’a’ut naq ink’a’ us wank jo’ aj ka’pak’al-u?
-
K’ut chiruheb’ li kok’al jun li sek’ saq ru chirix ut tz’aj lix sa’ re reetalinkil li jaljookil ru aatin wan sa’ Mateo 23:25. Chan ru naru naqanaw chi tz’aqal naq ch’ajb’il qu ut saq qu?
Xb’oqb’aleb’ chi tzolok sa’ kab’l
Tenq’aheb’ li kok’al chixk’oxlankil junaq k’a’aq re ru xe’xtzol sa’ li tzolok li naru te’xwotz rik’ineb’ lix junkab’al.
Xkawresinkil qib’ jo’ aj k’utunel
Tenq’aheb’ lix na’ xyuwa’eb’ li kok’al. “Eb’ li na’b’ej yuwa’b’ej a’aneb’ laj k’utunel re li evangelio q’axal aajeleb’ ru choq’ reheb’ li ralal xk’ajol—a’aneb’ li teneb’anb’ileb’ jo’ ajwi’ li wankeb’ xnimaleb’ xwankil chixtenq’ankileb’ li ralal xk’ajol (chi’ilmanq Deuteronomio 6:6–7). Naq nakatzoleb’ li kok’al sa’ Iglees, sik’ rik’in tijok chan ru taatenq’aheb’ lix na’ xyuwa’ sa’ lix k’anjeleb’ li aajel ru” (Li k’utuk jo’ li Kolonel, 25).