Li xkab’ xk’ulunik li Qaawa’, xb’aan laj Harry Anderson

22–28 mayo

Jose Smith—Mateo 1; Mateo 24–25; Markos 12–13; Lukas 21

“Taak’ulunq chaq li K’ajolb’ej”

K’oxlan chirix li k’a’ru tento te’xtzol li kok’al li nakatzoleb’ chirix Jose Smith—Mateo 1; Mateo 24–25; Markos 12–13; ut Lukas 21. Naru taawoksi li na’leb’ choq’ reheb’ li kok’al ak ninqeb’ sa’ li tusleb’ aatin a’in choq’ reheb’ li kok’al li toj ka’ch’ineb’ xyu’am, ut chi ka’pak’al.

Xkanab’ankileb’ chi wotzok

K’am chaq sa’ li tzoleb’aal jun k’a’aq re ru malaj jalam-uuch wan xyaalal rik’in jun jaljookil ru aatin malaj seraq’ re li xamaan a’in (maare li aseeyt re reetalinkileb’ li lajeeb’ chi tuq’ixq, malaj li kok’ tumin re reetalinkileb’ li talento malaj lix kok’ tumin li xmalka’an). Patz’ reheb’ li kok’al naq te’xwotz k’a’ru neke’xnaw chirix li jaljookil ru aatin malaj seraq’.

Xk’utb’al li tzol’leb’: Kok’al toj ka’ch’ineb’ xyu’am

Jose Smith—Mateo 1:31

Naq maji’ nak’ulun wi’chik li Jesus, li evangelio taajultikamanq sa’ chixjunil li ruchich’och’.

Jun reetalil naq sutq’iik re li Jesus, a’an naq lix evangelio taajultikamanq sa’ chixjunil li ruchich’och’. Eb’ li kok’al naru neke’tenq’an chixk’eeb’al chi uxmank li profeetil aatin a’an naq neke’xwotz li evangelio.

Kok’ k’anjel naru chi b’aanumank

• K’ut jun li reetalil malaj xjalam-uuch li ruchich’och’ (chi’ilmanq Hu reheb’ li Jalam-uuch re li Evangelio, 3) ut tenq’aheb’ li kok’al chixyeeb’al: “Li evangelio a’in … taajultikamanq sa’ chixjunil li ruchich’och’ ” (Jose Smith—Mateo 1:31). K’a’ut naq li Dios naraj naq chixjunileb’ li ralal xk’ajol te’rab’i li evangelio?

• B’oqeb’ li kok’al chi b’eek sa’ lix na’ajeb’ naq yooqex chixb’ichankil “Nawaj tinwanq choqʼ jun li misioneer” ut “Bʼoqbʼilo choqʼ xmoos” (B’ichleb’aal choq’ reheb’ li Kok’al, 90, 94–95).

• K’ut li video “A donde me mandes iré” (ChurchofJesusChrist.org). Naq eb’ li kok’al te’ril, tenq’aheb’ chirajlankil chan ru naru te’xwotz li evangelio, jo’ k’utb’il sa’ li video. K’a’ chik ru naru te’xb’aanu re xwotzb’al li evangelio?

Taajultikamanq li evangelio sa’ chixjunil li ruchichʼochʼ. Jalam-uuch xk’ehom chaq li Centro Espacial Johnson de la NASA.

Mateo 25:14–30

Naru nawoksiheb’ li maatan naxk’e we li Dios.

Eb’ li kok’al toj ka’ch’ineb’ xyu’am yookeb’ chixtawb’aleb’ lix maatan ut lix seeb’aleb’. Tenq’aheb’ chixtawb’al ru naq eb’ li maatan ut li seeb’al a’an neke’chal chaq rik’in li qaChoxahil Yuwa’.

Kok’ k’anjel naru chi b’aanumank

• K’am naab’aleb’ li kok’ tumin li naru nakawoksi naq yookat chixseraq’inkil li jaljookil ru aatin chirix li tumin sa’ Mateo 25:14–30. Naru nakapatz’ reheb’ oxib’ li kok’al naq te’reetaliheb’ li oxib’ chi moos. Ch’olob’ naq sa’ lix kutankil li Jesus, li talento a’an li tumin, a’b’an sa’ li kutankil a’in li talento naru naq a’anaqeb’ li qamaatan ut eb’ li qaseeb’al.

• Patz’ reheb’ li kok’al naq te’xye chan ru naq neke’tenq’aak xb’aaneb’ lix na’ xyuwa’, li ras riitz’ineb’, eb’ laj k’utunel, malaj eb’ li ramiiw. K’a’ru lix maataneb’ li kristiaan a’an li neke’tenq’ank reheb’ chi k’anjelak chiruheb’ li ras riitz’in?

• Tz’iib’a jun li ch’ina esil choq’ re li junjunq chi kok’al b’ar wi’ taaye k’a’ruheb’ lix maatan malaj lix seeb’al nakawil. Naq nakawotz rik’ineb’ li kok’al eb’ li maatan nakawil rik’ineb’, waklesi xch’ooleb’ chixchaab’ilob’resinkileb’ lix maatan ut chiroksinkileb’ re k’anjelak chiruheb’ li kristiaan.

Mateo 25:31–46

Li Jesus naraj naq tink’anjelaq chiruheb’ li was wiitz’in.

Nokok’anjelak chiru li qaChoxahil Yuwa’ ut chiru li Jesukristo naq nokok’anjelak chiruheb’ li wankeb’ chiqasutam. Tenq’aheb’ li kok’al chixk’oxlankil chan ru naru neke’k’anjelak chiruheb’ li ras riitz’in.

Kok’ k’anjel naru chi b’aanumank

• K’os ru li jaljookil ru aatin li wan sa’ Mateo 25:34–46. Tenq’aheb’ li kok’al chixtawb’al ru naq rik’in k’anjelak chiruheb’ li qas qiitz’in, yooko ajwi’ chi k’anjelak chiru li Jesukristo.

• Chap jun xjalam-uuch jun li ch’ina al rik’in jun xjalam-uuch li Jesus chi muqmu chirix. K’a’ru naru naqab’aanu re k’anjelak chiru li ch’ina al a’an? Isi lix jalam-uuch li ch’ina al ut ch’olob’ naq rik’in naq nokok’anjelak chiqu chiqib’il qib’, yooko ajwi’ chi k’anjelak chiru li Jesus.

• Patz’ reheb’ li kok’al naq te’xyiib’ rib’ sa’ jalam-uuch naq yookeb’ chi k’anjelak chiruheb’ li kristiaan jo’ chanru naxye li Kolonel sa’ Mateo 25:35–36. Patz’ reheb’ lix komoneb’ li kok’al naq te’xq’ehi k’a’ru yookeb’ chixyiib’ankil sa’ jalam-uuch.

• Patz’ reheb’ li kok’al naq te’xwotz lix numsihomeb’ naq jun kristiaan xk’anjelak chiruheb’ a’an malaj chiruheb’ lix junkab’aleb’ jo’ tixb’aanu raj li Kristo.

Xk’utb’al li tzol’leb’: Kok’al ak ninqeb’

Jose Smith—Mateo 1:31

Naq maji’ nak’ulun wi’chik li Jesus, li evangelio taajultikamanq sa’ chixjunil li ruchich’och’.

Eb’ li kok’al li nakatzoleb’ naru neke’tenq’an chixjultikankil li evangelio sa’ chixjunil li ruchich’och’ naq maji’ nawulak li xkab’ xk’ulunik li Kolonel.

Kok’ k’anjel naru chi b’aanumank

• Patz’ reheb’ li kok’al naq te’xwotz li osob’tesink ak xk’ulumeb’ malaj li te’xk’ul sa’ xk’ab’a’ naq a’aneb’ komon re lix Iglees li Kristo. Ilomaq Jose Smith—Mateo 1:31, ut patz’ reheb’ li kok’al chan ru naq li evangelio taarosob’tesiheb’ li ralal xk’ajol li Dios chiru chixjunil li ruchich’och’.

• K’ut chiruheb’ li kok’al jun li reetalil ch’och’ re li ruchich’och’ malaj re Guatemala, ut tenq’aheb’ chixtawb’al junjunq li na’ajej b’ar wi’ junaq li komon sa’eb’ lix junkab’al malaj junaq li ramiiweb’ xjultika chaq li evangelio chiru lix mision.

• Patz’ re wiib’ oxib’ li kok’al naq te’wulaq chi kawresinb’ileb’ re xwotzb’al chan ru naq eb’ li komon sa’ lix junkab’al malaj lix xe’tooneb’ ke’xnaw ru li evangelio.

• Patz’ re li junjunq chi kok’al naq tixtz’iib’a xk’ab’a’ junaq li naru na’aatinak wi’ chirix li Jesukristo malaj xb’oqb’al chi xik sa’ iglees. Patz’ ajwi’ reheb’ li kok’al naq te’xtus rajlil li k’a’ru naru neke’xb’aanu re te’wanq jo’ misioneer ak anajwan.

Mateo 25:1–13

Teneb’anb’il sa’ inb’een lix jalajik inch’ool laa’in rik’in li Jesukristo.

Li jaljookil ru aatin chirixeb’ li lajeeb’ chi tuq’ixq naxk’ut naq lix jalajik qach’ool rik’in li Kolonel ink’a’ naru naqato’oni rik’in jalan chik. Chan ru taatenq’aheb’ li kok’al chixk’ulb’al sa’ xb’eeneb’ li teneb’ahom re lix jalajikeb’ xch’ool?

Kok’ k’anjel naru chi b’aanumank

• Patz’ re jun li ch’ina al naq taawulaq chi kawresinb’il re xwotzb’al chan ru naq xtzol li jaljookil ru aatin chirixeb’ li lajeeb’ chi tuq’ixq sa’ kab’l chiru li xamaan a’in.

• Yiib’ xjalam-uuch jun li kandeel rik’in aseeyt chiru li pizarron, ut k’e choq’ xjolomil xnawom ch’oolej. K’e re li junjunq chi kok’al jun li hu setb’il jo’ jun tz’uqul li aseeyt, ut patz’ reheb’ naq te’xtz’iib’a chiru k’a’ru te’xb’aanu re te’jalaaq xch’ool chi us rik’in li Kolonel. Letzeb’ lix hu setb’il jo’ jun tz’uqul li aseeyt chiru li pizarron chire li kandeel.

• B’oqeb’ li kok’al chatenq’ankil chixk’uub’ankil jun xtusulal li ka’a’q re ru li naru neke’xb’aanu re xkawresinkileb’ rib’ choq’ re jun aj ula’ jwal chaab’il. Chan ru naq juntaq’eeteb’ malaj jalaneb’ li k’a’aq re ru a’an rik’in chan ru naru naqakawresi qib’ sa’ musiq’ej choq’ re li xkab’ xk’ulunik li Kolonel?

• Chiru oob’ chi kok’ hu, tz’iib’aheb’ li k’a’aq re ru li ink’a’ naru chi to’onimank. Chiru oob’ chik chi kok’ hu, tz’iib’aheb’ li k’a’aq re ru li naru chi to’onimank. Junaji ruheb’ li kok’ hu, ut patz’ reheb’ li kok’al naq te’xtuseb’ ru sa’ wiib’ ch’uut. Ilomaq Mateo 25:1–13. K’a’ut naq jwal aajel ru naq ink’a’ taqakanab’ qib’ chiruheb’ li qakomon re xjalb’al qach’ool rik’in li Jesukristo?

Mateo 25:14–46

Sa’ li raqb’a-aatin sa’ roso’jik, taqaq’axtesi chiru li Qaawa’ resil li qayu’am.

Chirix li wakliik chi yo’yo, li Qaawa’ tixraq aatin chiqix a’ yaal jo’ chanru xoo’ab’in chiruheb’ lix taqlahom ut xqak’ulub’a lix mayej re xtojb’al rix li maak. Li jaljookil ru aatin chirixeb’ li talento ut chirixeb’ li karneer ut li chib’aat nokohe’xtzol chirix li raqb’a-aatin a’an.

Kok’ k’anjel naru chi b’aanumank

• B’oq lix yiitoq laa tzoleb’aal chirilb’al Mateo 25:14–30 ut li jun jachal chik chirilb’al Mateo 25:31–46. Patz’ reheb’ li ch’uut naq te’xk’utb’esi li jaljookil ru aatin chiru li tzoleb’aal. K’a’ru yoo chixk’utb’al li Qaawa’ chiqu sa’eb’ li jaljookil ru aatin a’an?

• Patz’ reheb’ li kok’al naq te’ril Mateo 25:35–36 chi ka’kab’il, ut naq te’xtz’iib’a li naru neke’xb’aanu re xk’utb’al lix rahomeb’ choq’ re li Jesukristo.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al chan ru neke’ru chi chaab’ilo’k jo’ misioneer, ut chi aatinak rik’ineb’ lix junkab’al chirixeb’ li kristiaan li naru neke’aatinak wi’ chirix li evangelio.

Xkawresinkil qib’ jo’ aj k’utunel

Rab’inkil malaj xk’utb’al jun seraq’. Xb’aan naq eb’ li kok’al mas nawulak chiruheb’ li seraq’, sik’ chan ru taak’eheb’ chi tz’aqonk sa’eb’ li seraq’ reheb’ li loq’laj hu li nakawotz. A’aneb’ naru neke’xchap li jalam-uuch malaj k’a’aq re ru, naru neke’xyiib’ li jalam-uuch chirix li seraq’, naru neke’xk’utb’esi, malaj nakate’xtenq’a chixseraq’inkil. Ka’sutiheb’ li esil re xtenq’ankileb’ chixtawb’al lix k’utumeb’ li evangelio aajeleb’ ru.