Re xnimankil injultikankil, xb’aan laj Walter Rane

29 mayo–4 junio

Mateo 26; Markos 14; Jwan 13

“Re xnimankil injultikankil”

Naq nakawil Mateo 26; Markos 14; ut Jwan 13, sik’eb’ li na’leb’ nakaweek’a naq te’osob’tesinq reheb’ li kok’al.

Xkanab’ankileb’ chi wotzok

K’uteb’ xjalam-uuch li kik’ulman sa’eb’ li ch’ol a’an, maare Hu reheb’ li Jalam-uuch re li Evangelio, 54–55, ut patz’ reheb’ li kok’al naq te’xye k’a’ru yoo chi k’ulmank sa’eb’ li jalam-uuch.

Xk’utb’al li tzol’leb’: Kok’al toj ka’ch’ineb’ xyu’am

Mateo 26:26–29; Markos 14:22–24

Li loq’laj wa’ak nikinixtenq’a chixk’oxlankil li Jesus.

Tenq’aheb’ li kok’al chixtawb’al ru naq sa’ xk’ulb’al li loq’laj wa’ak naru naqak’oxla li kixb’aanu li Jesus choq’ qe.

Kok’ k’anjel naru chi b’aanumank

• K’os ru li seraq’ naq li Jesus kixtikib’ li loq’laj wa’ak. Naru nakawoksi “Ch’ol 49: Li xb’een Loq’laj Wa’ak,” (sa’ Eb’ li Esilal sa’ li Ak’ Chaq’rab’, 124–126, malaj li video sa’ ChurchofJesusChrist.org), malaj li video “La Santa Cena” (ChurchofJesusChrist.org). K’a’ut naq naqak’ul li loq’laj wa’ak? Tenq’aheb’ li kok’al chixtawb’al ru naq najultiko’ qe li Jesus sa’ li loq’laj wa’ak.

• K’ut chiruheb’ li kok’al xjalam-uuch li kaxlan wa ut jun sek’ re ha’. Patz’ reheb’ ma neke’xnaw k’a’ru neke’reetali li kaxlan wa ut li ha’ re li loq’laj wa’ak. Ch’olob’ naq eb’ li eetalil a’an neke’xjultika qe naq li Jesus kikam sa’ qak’ab’a’ ut naq kiwakli chaq sa’ xyanqeb’ li kamenaq.

• Patz’ reheb’ li kok’al naq te’xmutz’ li ruheb’ ut te’xk’oxla junaq kristiaan neke’xra, ut chirix a’an kanab’eb’ chawaatinankil chirix li kristiaan a’an. Patz’ reheb’ naq te’xmutz’ wi’chik li ruheb’, te’xk’oxla li Kolonel, ut chirix a’an te’xwotz k’a’ru neke’xnaw chirix a’an. B’oqeb’ chixk’oxlankil li Jesus sa’ li loq’laj wa’ak rajlal xamaan.

• B’oqeb’ li kok’al chixk’utb’al chawu k’a’ru naru neke’xb’aanu re te’xk’oxla li Jesus ut re te’oxloq’inq sa’ li loq’laj wa’ak. Tenq’aheb’ li kok’al chixyiib’ankileb’ li kok’ hu re li perel re kok’ k’anjel re li xamaan a’in, ut oksi a’an re xtenq’ankileb’ chixk’oxlankil li Jesus sa’ li loq’laj wa’ak. Malaj kanab’eb’ chixsik’b’aleb’ xjalam-uuch li Jesus sa’eb’ li puktesinb’il hu re li Iglees ut chixyiib’ankil jun xtusb’al ru k’iila jalam-uuch li naru neke’ril sa’ li loq’laj wa’ak.

Jwan 13:34–35

Naru tinraheb’ li kristiaan jo’ kixb’aanu li Jesus.

Li Jesus kixk’ut lix rahom naq kik’anjelak chiruheb’ li wankeb’ chixsutam. Chan ru naq eb’ li kok’al nakatzoleb’ naru neke’xk’ut xrahomeb’ choq’ reheb’ li ras riitz’in?

Kok’ k’anjel naru chi b’aanumank

• K’ut chiruheb’ li kok’al xjalam-uucheb’ li seraq’ ak xe’xtzol chiru li chihab’ a’in naq li Jesus kixk’ut lix rahom choq’ reheb’ li kristiaan (che’ilmanq li tusleb’ aatin sa’ Kim, Taaqehin—Choq’ reheb’ li komon ut li junkab’al). Yaab’asi Jwan 13:34–35, ut tenq’aheb’ li kok’al chixyeeb’al k’iila sut li ch’ol aatin “Jo’ naq xexinra laa’in, … chera eerib’ cherib’il eerib’.” Chan ru naru taqak’ut li qarahom choq’ reheb’ li qajunkab’al ut li qamiiw.

• Patz’ re jun ch’ina al naq tixchap jun xjalam-uuch li Kolonel naq yooqex chixb’ichankil jun li b’ich chirix lix rahom li Kolonel, maare “Li rahok cherib’il eerib’ ” (B’ichleb’aal choq’ reheb’ li Kok’al, 74). K’e reheb’ li kok’al kok’ aamej re hu, ut patz’ reheb’ naq te’xyiib’ rib’ sa’ jalam-uuch naq yookeb’ chixk’utb’al xrahomeb’ choq’ re jun li kristiaan.

Xk’utb’al li tzol’leb’: Kok’al ak ninqeb’

Mateo 26:26–29; Markos 14:22–24

Li loq’laj wa’ak nikinixtenq’a chixjultikankil li Jesukristo ut lix mayej aj tojol-ix kixb’aanu choq’ we.

Chan ru taatenq’aheb’ li kok’al chireek’ankil chi mas wi’chik xyaalalil li loq’laj wa’ak?

Kok’ k’anjel naru chi b’aanumank

• Patz’ reheb’ li kok’al naq te’xk’e xhoonaleb’ chirib’ileb’ rib’ re rilb’aleb’ li raqal re Mateo 26:26–29 malaj Markos 14:22–24 (chi’ilmanq ajwi’ JJS, Markos 14:20–24) ut Tzol’leb’ ut Sumwank 20:75–79. K’a’ru li aatin ut li na’leb’ juntaq’eeteb’ sa’ li wiib’ chi raqal a’an?

• Patz’ reheb’ li kok’al k’a’ru neke’xb’aanu li natenq’ank reheb’ chixk’oxlankil li Jesus sa’ li loq’laj wa’ak. Tenq’aheb’ chixtawb’aleb’ li raqal sa’ li loq’laj hu malaj sa’ li raatinuleb’ li b’ich re li loq’laj wa’ak li naru neke’ril ru sa’ li loq’laj wa’ak, ut chirix a’an tz’iib’aheb’ chiru jun li ch’ina hu li naru neke’ril ru li kok’al li jun sut chik naq te’xk’ul li loq’laj wa’ak. B’icha junjunq reheb’ li b’ich a’an rik’ineb’ li kok’al (chi’ilmanq Eb’ li B’ich, 100–120).

  

  Li loq’laj wa’ak nokoxtenq’a chixjultikankil li Jesukristo ut lix mayej aj tojol-ix kixb’aanu choq’ qe.

• Tz’iib’aheb’ chiru li pizarron li ch’ol aatin ninqeb’ xwankil sa’eb’ li tij re li loq’laj wa’ak, ut tenq’aheb’ li kok’al chixtzolb’aleb’ sa’ xk’a’uxl. K’a’ru naraj neke’xye li ch’ol aatin a’an? K’a’ut naq aajel ru x’ak’ob’resinkil li qasumwank re li kub’iha’ rajlal xamaan?

• B’oq junaq laj k’amol re li Tijonelil re Aaron re taa’aatinaq rik’ineb’ li kok’al chirix li naxnumsi naq naxkawresi, narosob’tesi, ut naxjek’i li loq’laj wa’ak. K’a’ru natenq’ank re chixkawresinkil rib’ choq’ re a’an? K’a’ru nareek’a naq naxb’aanu a’an? Chan ru naq natenq’aak xb’aan li kaxlan wa ut li ha’ chixjultikankil li Kolonel?

• Patz’ re wiib’ oxib’ reheb’ li kok’al li ak xe’kub’e xha’ naq te’xwotz k’a’ru najultiko’ reheb’ chirix li k’a’ru xe’xk’ul. K’a’ru xe’reek’a? K’a’ru li sumwank xe’ok wi’? (chi’ilmanq Mosiah 18:8–10). Ye reheb’ naq xb’aan naq nokotz’aqon sa’ li loq’laj wa’ak rajlal xamaan, chanchan naq nakub’e wi’chik qaha’—naru neke’kuye’ li qamaak ut naqa’ak’ob’resiheb’ li qasumwank.

Jwan 13:1–17

Li Jesukristo kixk’ut chiwu chan ru naq tink’anjelaq chiruheb’ li was wiitz’in.

Li seraq’ chirix li Kolonel naq kixch’aj li roqeb’ lix tzolom naru taareek’asiheb’ li kok’al nakatzoleb’ chi k’anjelak chiruheb’ li ras riitz’in rik’in rahok.

Kok’ k’anjel naru chi b’aanumank

• Wiib’ oxib’ kutan rub’elaj, b’oq jun reheb’ li kok’al chirilb’al Jwan 13:4–9 ut chixwotzb’al li seraq’ sa’ li tzoleb’aal, a’ yaal lix na’leb’ laj Pedro. K’a’ru li yoo chixyalb’al xk’utb’al li Kolonel chiru laj Pedro ut xkomoneb’ chik li apostol? Eb’ li kok’al naru te’xtz’il rix k’a’ru xe’xtzol chirix li Jesukristo sa’ li seraq’ a’an. K’a’ru naqatzol chirix k’anjelak chiruheb’ li qas qiitz’in?

• Ilomaq Jwan 13:12–17. Patz’ reheb’ li kok’al naq te’xtz’iib’a resil jun sut naq li Kolonel kik’anjelak chiru jun li kristiaan. B’oqeb’ chixtz’iib’ankil ajwi’ li xe’xtzol rik’in li kixb’aanu. Wi neke’raj xtenq’, naru te’xtaweb’ li eetalil sa’ li video “Los atributos de Cristo” (ChurchofJesusChrist.org). Patz’ reheb’ naq te’xwotz sa’ li tzoleb’aal k’a’ru xe’xtz’iib’a.

Jwan 13:34–35

Eb’ lix tzolom li Jesukristo neke’rahok jo’ kixb’aanu a’an.

Naq nakub’e qaha’, noko’ok sa’ sumwank naq toowanq jo’ xtzolom li Jesukristo. Sa’ Jwan 13:34–35, li Kolonel kixch’olob’ chan ru naqak’ut naq laa’o lix tzolom.

Kok’ k’anjel naru chi b’aanumank

• Tz’iib’a chiru li pizarron: eerib’ cherib’il eerib’; Jo’ naq laa’in (Jwan 13:34). Patz’ reheb’ li kok’al naq te’ril li raqal sa’ li loq’laj hu ut te’xnujob’resi li yamyo. K’a’ chik ru naru taqab’aanu re xk’utb’al naq laa’o lix tzolom li Kristo? Eb’ li kok’al maare te’xk’oxla jalan chik li aatin re xnujob’resinkil li yamyo chiru li pizarron, maare chetenq’a ut xexintenq’a malaj chetzol ut xexintzol.

• Patz’ reheb’ li kok’al naq te’ril Jwan 13:35 ut te’xk’oxla ani neke’xnaw ru li neke’wan jo’ chaab’il tzolom chiru li Jesukristo. Patz’ reheb’ naq te’xye chan ru naq eb’ li kristiaan a’an neke’xk’ut lix rahomeb’ jo’ kixb’aanu li Kolonel.

Xb’oqb’aleb’ chi tzolok sa’ kab’l

Patz’ reheb’ li kok’al naq te’xwotz rik’ineb’ lix junkab’al k’a’ru te’xb’aanu xb’aan li xe’xtzol sa’ li tzoleb’aal. Maare te’xwotz chan ru taajultiko’q li Jesukristo reheb’ sa’ li loq’laj wa’ak.

Xkawresinkil qib’ jo’ aj k’utunel

Wotz lix nawom aach’ool sa’ li tzoleb’aal. Jun xnawom ch’oolej moko xninqal ta na’leb’ naraj jo’ a’in: “Ninnaw naq li qaChoxahil Yuwa’ nekexxra chi junjunqalex” malaj “Sa naweek’a naq nintzolok chirix li Jesukristo.”