“5–11 junio. Jwan 14–17: “Kanaaqex sa’ lin rahom,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“5–11 junio. Jwan 14–17,” Kim, Taaqehin—Choq’ re li Tzoleb’aal reheb’ li Kok’al: 2023
Li wa‘ak sa‘ roso‘jik, xb‘aan laj William Henry Margetson
5–11 junio
Jwan 14–17
“Kanaaqex sa’ lin rahom”
Tijon re xnawb’al li neke’raj ru li kok’al li nakatzoleb’ naq yookat chirilb’al Jwan 14–17. Kim, Taaqehin—Choq’ reheb’ li komon ut li junkab’al naru tatxtenq’a chi tzolok, ut li tusleb’ aatin a’in naru naxk’e aana’leb’ chirix chan ru taatzoleb’ li kok’al re laa tzoleb’aal.
Xkanab‘ankileb‘ chi wotzok
Re xtenq’ankileb’ li kok’al chixwotzb’al li k’a’ru yookeb’ chixtzolb’al sa’ kab’l, kanab’eb’ chixchapb’al jun li aamej yiib’anb’il rik’in hu ut chixwotzb’al li k’a’ru neke’xb’aanu re xk’utb’aleb’ xrahom chiruheb’ li kristiaan.
Xk’utb’al li tzol’leb’: Kok’al toj ka’ch’ineb’ xyu’am
Nink’ut lin rahom choq’ re li Jesukristo naq ninpaab’eb’ lix taqlahom.
Tenq’aheb’ li kok’al chixtawb’al ru naq naru neke’xk’ut chiru li Kolonel naq neke’xra wi te’xpaab’eb’ lix taqlahom.
Kok’ k’anjel naru chi b’aanumank
-
Tenq’aheb’ li kok’al chixyaab’asinkil Jwan 14:15. Ye reheb’ naq te’xye “Wi nikineera” naq taataqsi jun aamej yiib’anb’il rik’in hu. Ye reheb’ naq te’xye “Teepaab’ lin chaq’rab’ ” naq taataqsiheb’ li loq’laj hu.
-
Tenq’aheb’ li kok’al chixk’oxlankileb’ junjunq lix taqlahom li Jesus. K’e xb’oqb’aleb’ chixyeeb’al chan ru naru neke’xpaab’ li junjunq taqlahom. Ch’olob’ xyaalal naq xb’aanunkil a’an naxk’ut naq naqara li Jesukristo.
-
B’ichahomaq jun li b’ich chirixeb’ li taqlahom, maare “Paab’eb’ li taqlahom” (B’ichleb’aal choq’ reheb’ li Kok’al, 68–69).
-
B’aanu li b’atz’unk li wan sa’ li perel re kok’ k’anjel re li xamaan a’in rik’ineb’ li kok’al.
Jwan 14:26–27; 15:26; 16:13–14
Li Santil Musiq’ej nikinixtenq’a.
Li Jesus kixk’ut chiruheb’ lix tzolom xninqal ru na’leb’ chirix li Santil Musiq’ej. K’oxla chan ru naq li na’leb’ a’an naru narosob’tesiheb’ li kok’al nakatzoleb’.
Kok’ k’anjel naru chi b’aanumank
-
K’ut li jalam-uuch Li wa’ak sa’ roso’jik (Hu reheb’ li Jalam-uuch re li Evangelio, 54). Ch’olob’ chiruheb’ li kok’al naq sa’ li wa’ak sa’ roso’jik, li Jesus kik’utuk chiruheb’ lix tzolom chirix li Santil Musiq’ej. Ye reheb’ li k’a’ru kixk’ut sa’ Jwan 14:26–27; 15:26; 16:13–14.
Jalam-uuchli Jesus na’aatinak rik’ineb’ lix tzolomLi wa’ak sa’ roso’jik, xb’aan laj Clark Kelley Price
-
Wotz jun aanumsihom naq li Santil Musiq’ej xk’ojob’ aach’ool, xk’am aab’e, malaj xch’olob’ li yaal chawu. Ch’olob’ xyaalal naq li Santil Musiq’ej naru ajwi’ tixtenq’aheb’ li kok’al chi jo’kan.
-
B’ichahomaq jun li b’ich chirix li Santil Musiq’ej, maare “Li Santil Musiq’ej” (B’ichleb’aal choq’ reheb’ li Kok’al, 56). B’oqeb’ chirab’inkil chi us k’a’ru naxye li b’ich naq naxb’aanu li Santil Musiq’ej.
Naru tinnaw ru lin Choxahil Yuwa’ ut li Jesukristo.
Li Jesukristo kixk’ut naq “li junelik yu’am,” a’an xnawb’al ru “li junaj chi tz’aqal Dios, ut … li Jesukristo.” Naq eb’ li kok’al nakatzoleb’ neke’wulak chixnawb’aleb’ ru, te’xtaw xmetz’ew sa’ musiq’ej li taa’osob’tesinq reheb’ chiru xyu’ameb’ ut li taatenq’anq reheb’ chixk’ulb’al li junelik yu’am.
Kok’ k’anjel naru chi b’aanumank
-
Yaab’asi Jwan 17:3, ut patz’ reheb’ li kok’al naq te’rab’i ani naraj li Jesus naq taqanaw ru. K’ut wiib’ oxib’ li jalam-uuch li neke’xk’ut chan ru taqanaw ru li qaChoxahil Yuwa’ ut li Jesukristo, maare xjalam-uucheb’ li loq’laj hu, jun junkab’al natzolok sa’ komonil, ut junaq li nak’anjelak chiru ras riitz’in. K’eheb’ li jalam-uuch chi huphu, ut patz’ reheb’ li kok’al naq te’xk’e xhoonaleb’ chirib’ileb’ rib’ chixb’alq’usinkileb’ ut chixch’olob’ankil k’a’ru wan chiru li jalam-uuch. Chan ru nokohe’xtenq’a li k’a’aq re ru a’an chixnawb’al ru li qaChoxahil Yuwa’ ut li Jesukristo?
-
Aatinan rik’ineb’ li kok’al chirix li naru te’xb’aanu re xnawb’aleb’ ru li ramiiweb’ chi us. Chan ru naq taqanaw ru chi us li qaChoxahil Yuwa’ ut li Jesukristo? Wotz chan ru naq laa’at aab’aanuhom a’in.
Xk’utb’al li tzol’leb’: Kok’al ak ninqeb’
Nink’ut lin rahom choq’ re li Jesukristo naq ninpaab’eb’ lix taqlahom.
Naq nakawileb’ ru li raqal a’an naq nakattzolok aajunes, k’oxlaheb’ li kok’al li nakatzoleb’. Chan ru te’osob’tesiiq naq neke’xtaw ru naq li ab’ink chiru li Kolonel, a’an reetalil lix rahomeb’ choq’ re?
Kok’ k’anjel naru chi b’aanumank
-
Patz’ reheb’ li kok’al naq te’xwotz chan ru naq li Jesus ki’ab’in chiru li qaChoxahil Yuwa’. K’uteb’ xjalam-uuch lix yu’am li Kolonel re xtenq’ankileb’ (chi’ilmanq Hu reheb’ li Jalam-uuch re li Evangelio, 34–35, 56–57). Patz’ reheb’ li kok’al naq te’xye hoonal naq xe’ab’in chiru li qaChoxahil Yuwa’.
-
Patz’ re jun ch’ina al naq taaril Jwan 14:15. Kanab’eb’ li kok’al chixk’eeb’aleb’ xhoonal chirib’ileb’ rib’ re xyiib’ankileb’ li jalam-uuch li te’reetali junaq li yoo chixpaab’ankil junaq taqlahom, naq lix komoneb’ li kok’al te’xq’ehi li k’a’ru yookeb’ chixyiib’ankil sa’ jalam-uuch. Re xtawb’aleb’ li taqlahom naru te’roksi, chi’ilmanq li hu Choq’ re Xkawilaleb’ li Saaj (2022). Chan ru naq lix paab’ankileb’ li taqlahom naxk’utb’esi naq naqara li Kolonel?
Li Santil Musiq’ej nab’eresin, nak’ojob’an ch’oolej, ut naxch’olob’ li yaal.
Ma ak xe’xk’ul li maatan re li Santil Musiq’ej li kok’al li nakatzoleb’? K’a’ru neke’xnaw chirix li tenq’ naru naxk’e li Santil Musiq’ej reheb’? K’oxla chan ru taatenq’aheb’ chixtawb’al ru chi us lix k’anjel li Santil Musiq’ej.
Kok’ k’anjel naru chi b’aanumank
-
K’e reheb’ li kok’al li jun siir chi raqal a’in re te’ril sa’ ka’kab’il: Jwan 14:26; 15:26; ut 16:13. Patz’ reheb’ naq te’xtaweb’ li aatin li neke’xk’ut chiruheb’ k’a’ru naxb’aanu li Santil Musiq’ej. Tz’iib’aheb’ li aatin a’an chiru li pizarron.
-
Wotz jun aanumsihom naq li Santil Musiq’ej xatxb’eresi, xk’ojob’ aach’ool, xkol aawix, malaj xch’olob’ li yaal chawu. Patz’ reheb’ li kok’al naq te’xwotz xnumsihomeb’ a’an. Chan ru xe’xk’e reetal lix wankil li Santil Musiq’ej?
-
Patz’ reheb’ li kok’al naq te’xyiib’ xjalam-uuch li rilob’aaleb’ chiru jun li b’oolx yiib’anb’il rik’in hu. Loch jun li pook, li taareetali li Santil Musiq’ej, chi sa’eb’ li b’oolx. Chirix a’an, k’eheb’ k’a’aq re ru sa’ li b’oolx li te’xram li saqen, jo’ jun li ch’ina t’ikr, re xk’utb’al naq li k’a’ru ink’a’ us naqasik’ ru xb’aanunkil naru naxram lix wankil li Santil Musiq’ej sa’ li qayu’am. Kanab’eb’ li kok’al chirisinkil li ch’ina t’ikr sa’ li b’oolx re reetalinkil li jalb’a-k’a’uxlej.
Li qaChoxahil Yuwa’ ut li Jesukristo neke’raj naq tinnaweb’ ru.
Laa’at taawosob’tesi lix yu’ameb’ li kok’al wi nakatenq’aheb’ chixnawb’al ru li qaChoxahil Yuwa’ ut li Jesukristo.
Kok’ k’anjel naru chi b’aanumank
-
K’ut jun li pim (malaj xjalam-uuch) naq eb’ li kok’al te’xk’e xhoonaleb’ chirib’ileb’ rib’ re rilb’aleb’ li raqal re Jwan 15:1–9. Chan ru naq li Jesukristo a’an chanchan jun xtoonal li uva? Chan ru naq laa’o chanchano li ruq’ li che’? K’a’ru naru naqab’aanu re “tookanaaq rik’in,” malaj toowanq chi nach’ rik’in li Kolonel?
-
Yaab’asi Jwan 17:3. Patz’ reheb’ li kok’al k’a’ru yookeb’ chixb’aanunkil re xnawb’al ru li qaChoxahil Yuwa’ ut li Jesukristo. Wotz chan ru yookat laa’at chixnawb’aleb’ ru.
Xb’oqb’aleb’ chi tzolok sa’ kab’l
Waklesi xch’ooleb’ li kok’al chixwotzb’al rik’ineb’ lix junkab’al jun li b’ich toje’ xe’xtzol sa’ li tzoleb’aal malaj sa’ li hoonal re b’ichank.
Xkawresinkil qib’ jo’ aj k’utunel
Oksiheb’ li kok’ k’anjel. Wi nakatzoleb’ li kok’al toj ka’ch’ineb’ xyu’am, sa’ li perel reheb’ li kok’al ak ninqeb’ re li tusleb’ aatin a’in taataw xkomon li na’leb’ li naru nakawoksi sa’ laa tzoleb’aal. Jo’kan ajwi’, li kok’ k’anjel reheb’ li kok’al toj ka’ch’ineb’ xyu’am naru neke’oksiman re xtzolb’aleb’ li kok’al ak ninqeb’.