eb’ laj k’anjenel sa’ jun awimq

8–14 mayo

Mateo 19–20; Markos 10; Lukas 18

“K’a’ru maji’ ninb’aanu?”

Il Mateo 19–20; Markos 10; ut Lukas 18, chi wankeb’ sa’ laa k’a’uxl li kok’al nakatzoleb’. Tz’iib’a a’ yaal li na’leb’ taak’ul. Lix kawresinkil aawib’ tatxtenq’a chixk’utb’al chiruheb’ li kok’al li k’a’ru tento te’xnaw sa’eb’ li ch’ol a’in.

reetalil li wotzok

Xkanab’ankileb’ chi wotzok

Patz’ reheb’ li kok’al naq te’xwotz k’a’ru jultik reheb’ chirix li tzolok xeb’aanu jun xamaan chaq. K’uteb’ li jalam-uuch re xjultikankil reheb’.

reetalil li k’utuk

Xk’utb’al li tzol’leb’: Kok’al toj ka’ch’ineb’ xyu’am

Markos 10:6–8

Li qaChoxahil Yuwa’ naraj naq toosumlaaq sa’ li santil ochoch ut naq te’wanq qajunelikil junkab’al.

Chan ru naru neke’usaak li kok’al li nakatzoleb’ rik’in xtzolb’al li tzol’leb’ chirix li junelikil sumlaak? Maare us naq taatz’il rix li na’leb’ chirix li sumlaak sa’ “Li Junkab’al: Jun Jek’inb’il Aatin choq’ re li Ruchich’och’ ” (ChurchofJesusChrist.org).

Kok’ k’anjel naru chi b’aanumank

• Yaab’asi Markos 10:6–8 choq’ reheb’ li kok’al, ut k’ut jun xjalam-uuch jun li sumal sumsuukeb’. Patz’ reheb’ li kok’al naq te’xk’ut chi ruq’eb’ li winq ut li ixq naq te’rab’i li aatin teelom ut ixq. Ch’olob’ naq li qaChoxahil Yuwa’ naraj naq jun li winq ut jun li ixq te’sumlaaq (chi’ilmanq Genesis 1:27–28).

• K’uteb’ lix jalam-uuch jun li junkab’al ut jun li santil ochoch. Patz’ reheb’ li kok’al naq te’xye k’a’ru neke’ril sa’eb’ li jalam-uuch. Ch’olob’ naq li qaChoxahil Yuwa’ naraj naq tootz’ape’q sa’ junajil rik’in li qajunkab’al sa’ li santil ochoch re naq tooruuq chi wank rik’ineb’ a’an chi junelik. Eek’anb’il taaye laa waatin choq’ reheb’ li kok’al toj maji’ neke’tz’ape’ sa’ junajil rik’ineb’ lix na’ xyuwa’.

• B’ichahomaq jun li b’ich chirix li junkab’al, maare “Sa li qach’ool sa’ junkab’al” (B’ichleb’aal choq’ reheb’ li Kok’al, 104). Naru teeb’icha li b’ich wiib’ oxib’ sut. Patz’ reheb’ li kok’al naq te’xwotz li k’a’aq re ru se’se’ xb’aanuhomeb’ rik’ineb’ lix junkab’al. K’a’ut naq neke’xb’antioxi lix junkab’aleb’?

• B’ichahomaq jun li b’ich chirix li santil ochoch, maare “Saʼ li santil ochoch” malaj “Taaruuq toowanq aran saʼ choxa,” (B’ichleb’aal choq’ reheb’ li Kok’al, 99, 98). Kanab’eb’ li kok’al chixchapb’al xjalam-uucheb’ li santil ochoch malaj li junkab’al, ut b’oqeb’ chixchapb’al chi kutankil naq te’xb’icha li aatin “santil ochoch” malaj “junkab’al.” Tenq’aheb’ li kok’al chixk’oxlankil k’a’ut naq aajel ru li sumlaak sa’ li santil ochoch.

li Jesus rik’ineb’ li kok’al ut eb’ li na’b’ej yuwa’b’ej

Li Jesus naxrahebʼ li kokʼal, xbʼaan naq “reheb’ a’an lix nimajwal awa’b’ejihom li Dios” (Markos 10:14).

Markos 10:13–16

Li Jesus naraj naq eb’ li kok’al toj ka’ch’ineb’ xyu’am te’chalq rik’in a’an re naq naru taarosob’tesiheb’.

Li seraq’ a’in naxk’e laa hoonal re xtenq’ankileb’ li kok’al chireek’ankil xnimal lix rahom li Jesus choq’ reheb’ a’an.

Kok’ k’anjel naru chi b’aanumank

• Rik’in laa waatin, wotz li seraq’ sa’ Markos 10:13–16. Naru ajwi’ nakak’ut li video “Dejad a los niños venir a mí” (ChurchofJesusChrist.org). Tenq’aheb’ li kok’al chixk’oxlankil jo’q’e xe’reek’a xrahom li Jesus choq’ reheb’. Ye lix nawom aach’ool reheb’ li kok’al naq li Jesus naxraheb’ ut naq naraj rosob’tesinkileb’.

• K’ut li jalam-uuch Li Kristo ut eb’ li kok’al (Hu reheb’ li Jalam-uuch re li Evangelio, 47). Tenq’aheb’ li kok’al chixk’oxlankil chan raj ru li chunlaak chixk’atq li Jesus jo’eb’ li kok’al a’an. Patz’ reheb’ li kok’al naq te’xwotz k’a’ru neke’reek’a chirix li Jesus.

• Kanab’eb’ li kok’al chixyiib’ankileb’ rib’ sa’ jalam-uuch naq yooqeb’ chi osob’tesiik xb’aan li Jesus (chi’ilmanq Markos 10:16 ut li perel re kok’ k’anjel re li xamaan a’in).

Markos 10:17–22

Wi nin’ab’ink chiruheb’ li taqlahom, naru tink’ul li junelik yu’am.

Li Jesus kixk’ut chiru li winq b’ihom naq re xk’ulb’al li junelik yu’am—jun yu’am jo’ li re li qaChoxahil Yuwa’—tento tixpaab’eb’ li taqlahom.

Kok’ k’anjel naru chi b’aanumank

• Seraq’i reheb’ li kok’al li seraq’ chirix li winq b’ihom sa’ Markos 10:17–22. (Chi’ilmanq ajwi’ “Ch’ol 42: Li saaj aj b’ihom,” sa’ Eb’ li Esilal sa’ li Ak’ Chaq’rab’, 105–106, malaj li video sa’ ChurchofJesusChrist.org.) Patz’ reheb’ naq te’rab’i chi us li k’a’ru kixye li Jesus re li winq naq tixb’aanu, ut chan ru kisumen li winq.

• Seraq’i jun malaj naab’aleb’ chik li esilal chirixeb’ li kok’al li neke’xpatz’ xna’leb’ malaj xb’eresinkil reheb’ lix yuwa’ a’b’an ink’a’ neke’xtaaqe ut ink’a’ neke’ab’in. B’ar wan junjunq li k’a’aq re ru li naxpatz’ qe li qaChoxahil Yuwa’ chixb’aanunkil? Chan ru naqeek’a naq naqapaab’eb’ lix taqlahom?

• Wotzeb’ laa numsihom naq xak’ul aana’leb’ rik’in li Musiq’ej re xb’aanunkil li tatxtenq’a chi chaab’ilo’k.

reetalil li k’utuk

Xk’utb’al li tzol’leb’: Kok’al ak ninqeb’

Markos 10:6–8

Li qaChoxahil Yuwa’ naraj naq toosumlaaq sa’ li santil ochoch ut naq te’wanq qajunelikil junkab’al.

Lix k’utum li Jesus chirix li sumlaak naru tixtenq’aheb’ li kok’al chiroyb’eninkil li sumlaak sa’ li santil ochoch ut xk’iresinkil xjunkab’aleb’ chi junelik.

Kok’ k’anjel naru chi b’aanumank

• Patz’ re jun li ch’ina al naq taaril Markos 10:6–8 chi kaw xyaab’ xkux. Ch’olob’ naq junajaqeb’ chik te’kanaaq naraj naxye naq te’xchap rib’ ut ut te’wanq sa’ junajil. K’a’ut naq mas aajel ru naq li b’eelomej ut li ixaqilb’ej te’xjunaji rib’, te’xra rib’, ut te’k’anjelaq jo’ rochb’eeneb’ rib’?

• Patz’ reheb’ li kok’al naq tate’xtenq’a chixk’oxlankil xsumenkileb’ li patz’om jo’ “K’a’ut naq aajeleb’ ru li junkab’al sa’ li Iglees?” malaj “K’a’ut naq aajel ru choq’ aawe li sumlaak sa’ li santil ochoch?” Tenq’aheb’ chixtawb’al xsumenkileb’ sa’ Markos 10:6–8; 1 Korintios 11:11; Tzol’leb’ ut Sumwank 42:22; 131:1–4; Moises 3:18, 21–24; ut “Li Junkab’al: Jun Jek’inb’il Aatin choq’ re li Ruchich’och’.”

• B’ichahomaq jun li b’ich chirix li junkab’al, maare “Taaruuq toowanq aran sa’ choxa” (B’ichleb’aal choq’ reheb’ li Kok’al, 98). Wotz lix nawom aach’ool rik’ineb’ li kok’al chirix li junelikil sumlaak ut li junkab’al. Patz’ reheb’ naq te’xwotz ajwi’ lix nawom xch’ooleb’.

Markos 10:17–22

Li Jesus naru tinixtenq’a chixnawb’al li k’a’ru tento tinb’aanu re chaab’ilo’k.

Li winq b’ihom kixsik’ li Jesus ut kixk’ul xna’leb’ chi tz’aqal ka’ajwi’ choq’ re a’an. Chan ru naru nakawaklesi xch’ooleb’ li kok’al chixsik’b’al xb’eresinkil chi jo’kan ajwi’ sa’ lix yu’am?

Kok’ k’anjel naru chi b’aanumank

• Patz’ reheb’ li kok’al naq te’xtaw jun raqal sa’ Markos 10:17–22 li tixch’olob’ li jalam-uuch re li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al. Ch’olob’ naq li na’leb’ kixk’e li Jesus re li winq, ak re ajwi’ xjunes, ut naq chiqajunil naru naqak’ul qab’eresinkil xb’aan li Qaawa’ rik’in li Musiq’ej.

• Ilomaq Markos 10:17–22. Patz’ reheb’ li kok’al naq te’xtz’iib’aheb’ chiru li pizarron li taqlahom kixye li Kolonel re li winq b’ihom naq tixpaab’ (chi’ilmanq li raqal 19). K’a’ chik ru kixpatz’ li Jesus naq tixb’aanu? (chi’ilmanq raqal 21). Waklesiheb’ xch’ool li kok’al chixk’oxlankileb’ k’a’aq re ru li maare tento te’xtikib’ xb’aanunkil malaj te’xkanab’ xb’aanunkil re xtaaqenkil li Jesus chi chaab’il. Chan ru naru taqasik’ li k’a’ru naraj li Jesus naq taqab’aanu?

reetalil li tzolok

Xb’oqb’aleb’ chi tzolok sa’ kab’l

Patz’ reheb’ li kok’al naq te’xk’ut xrahomeb’ chiru lix junkab’aleb’, maare rik’in kok’ esil malaj kok’ b’aanuhom re chaab’ilal.

Xkawresinkil qib’ jo’ aj k’utunel

K’e reetaleb’ li kok’al. Chan ru yookeb’ li kok’al sa’ laa tzoleb’aal chixk’ulub’ankil li kok’ k’anjel re tzolok? Wi chanchan naq ink’a’ yookeb’ chi tz’aqonk, maare a’an xhoonalil naq taayal junaq chik ch’ina k’anjel malaj xik chi b’eek junpaataq rik’in oxloq’. Ut jun chik, wi nakawil naq eb’ li kok’al yookeb’ chi tz’aqonk ut chi tzolok ka’ajwi’ rik’in jun raqal re li k’utum, moko aajel ta ru naq taab’aanu lix komon ka’ajwi’ re xchoyb’al xk’utb’al chixjunil.

perel re kok’ k’anjel: li Jesus naraj naq eb’ li kok’al te’chalq rik’in a’an re naq naru taarosob’tesiheb’