Laj Sakeo sa’ xtoonal li sikomoor, xb’aan laj James Tissot

15–21 mayo

Mateo 21–23; Markos 11; Lukas 19–20; Jwan 12

“We’ chaq aawik’in laa Rey”

Naq maj’ nakawileb’ li na’leb’ sa’ li tusleb’ aatin a’in, chawil Mateo 21–23; Markos 11; Lukas 19–20; ut Jwan 12. Tz’iib’a li musiq’anb’il na’leb’ naru nakawotz rik’in laa junkab’al, malaj sa’eb’ laa tzoleb’aal sa’ li Iglees.

Tz’iib’a li nakak’oxla

Li Kolonel kitz’okaak chirix b’eek chalen Betania toj Jerusalen, ut kiril chaq chi najt jun xtoonal li higo, li chanchan tixk’e xtzakemq. A’b’anan naq kinach’ok li Jesus, kixtaw chi maak’a’ ruuchinihom (chi’ilmanq Mateo 21:17–20; Markos 11:12–14, 20). Naru naqaye naq lix toonal li higo chanchaneb’ laj b’eresinel paab’aal sa’ Jerusalen, aj ka’pak’al-uheb’: maak’a’ ru li k’a’ru neke’xk’ut, ut us ta neke’xye rib’ naq neke’xb’aanu li santilal, maajun musiq’ejil tzakemq neke’xk’e. Eb’ laj Fariseo ut eb’ laj tz’iib’ naab’aleb’ li kok’ taqlahom neke’xpaab’, a’ut ke’sach chiruheb’ li wiib’ xninqal ru chaq’rab’: a’an xraab’al li Dios, ut xraab’aleb’ laa was aawiitz’in jo’ nakara aawib’ laa’at (chi’ilmanq Mateo 22:34–40; 23:23).

Chi junpak’al chik, wankeb’ naab’al li ke’ok chirilb’al naq chaab’il li naruuchini li k’a’ru k’utb’il xb’aan li Jesus. Naq kiwulak Jerusalen, ke’xk’ul rik’in yok’b’il ruq’ che’ li ke’xk’ojob’ chiru li b’e taab’eeq wi’ ut ke’saho’ xch’ool naq ak xwulak li yeeb’il sa’ jun najteril profeetil aatin, “We’ chaq aawik’in laa Rey” (Sakarias 9:9). Naq nakawil li aatin sa’ li xamaan a’in, k’oxla chan ru naq x’uuchin sa’ laa yu’am li k’a’ru kixk’ut li Kolonel ut lix mayej re tojb’al rix li maak, ut chan ru naq laa’at tatruuq chi “uuchink chi naab’al” (Jwan 12:24).

Li na’leb’ re xtzolb’aleb’ li loq’laj hu aajunes

Lukas 19:1–10

Li Qaawa’ naraqok aatin, moko chirix ta chan ru na’ilok li junjunq, chirix b’an li rajom lix ch’ool.

Sa’ xkutankil li Jesus, wankeb’ naab’al li neke’k’oxlank re naq eb’ laj titz’ol toj a’aneb’ aj b’alaq’, ut neke’relq’a xtumineb’ li tenamit. Chi jo’kan, sa’ xk’ab’a’ naq laj Sakeo, jun jolomil aj titz’ol toj, wan xb’ihomal, maare mas wi’chik naq ke’xk’oxla a’an chirix. A’b’an li Jesus ki’ilok chiru lix ch’ool laj Sakeo. K’a’ru k’utb’il sa’ Lukas 19:1–10 chirix lix xwanjik lix ch’ool laj Sakeo? Maare taak’e reetal sa’eb’ li raqal a’in k’a’ru yeeb’il chirix li naxb’aanu laj Sakeo re xk’utb’al chiru li Kolonel naq naxra. K’a’ru li rajom aach’ool laa’at? K’a’ru yookat chixb’aanunkil re xsik’b’al li Kolonel, jo’ kixb’aanu laj Sakeo?

Chi’ilmanq ajwi’ Tzol’leb’ ut Sumwank 137:9.

Mateo 23; Lukas 20:45–47

Li Jesus naxtz’eqtaana li ka’pak’al-u.

Li raatin li Kolonel choq’ reheb’ laj tz’iib’ ut laj Fariseo wan tz’aqal xjalanil rik’in li raatin choq’ re laj Sakeo. Jo’ kixch’olob’ li Awa’b’ej Dieter F. Uchtdorf, “[Li Jesus] kichal xjosq’il rik’ineb’ laj ka’pak’al-u jo’eb’ laj tz’iib’, eb’ laj Fariseo, ut eb’ laj Saduceo—eb’ li yal neke’k’utun chi tiikeb’ xch’ool re te’nimaaq ru ut te’xk’ul xwankilal ut xb’ihomal li ruchich’och’, us ta yookeb’ ajwi’ chixrahob’tesinkil li ani tento raj xe’rosob’tesi” (“Li wank chi tz’aqal yaal,” Jolomil ch’utub’aj-ib’ re abril 2015).

Sa’ Mateo 23, li Kolonel kixk’ut junjunq li jaljookil ru aatin re xyeeb’al resileb’ laj ka’pak’al-u. K’oxla xk’eeb’al reetal malaj xtz’iib’ankileb’ li jaljookil ru aatin a’in, ut k’a’ru neke’xk’ut chirix li ka’pak’alil. K’a’ru xjalanil li ka’pak’alil ut lix q’unal qametz’ew naq naqayal xyu’aminkil li evangelio? K’a’ru musiq’anb’ilat chixjalb’al sa’ laa yu’am xb’aan lix yehom li Kolonel?

Mateo 21:1–11; Markos 11:1–11; Lukas 19:29–44; Jwan 12:1–8, 12–16

Li Jesukristo a’an lin Rey.

Naq li Jesus kiwulak Jerusalen rub’elaj lix tojb’al rix li maak, li ke’nawok ru jo’ lix Reyeb’ ke’xloq’oni ut ke’xyul, ke’xhel li raq’eb’ chiru li b’e, ut ke’xk’e xaqche’ chiru li b’e toj Jerusalen ut yookeb’ chixloq’oninkil. K’oxla chan ru naq eb’ li raqal li wankeb’ taq’a neke’ru chixkawresinkil laa na’leb’ chirix li k’a’ru kik’ulman sa’ xtiklajik lix raqikil xamaan lix yu’am li Kolonel.

• Chan ru naq kiyule’ jun li rey sa’ najter kutan: 2 Reyes 9:1–6, 13

• Jun profeetil aatin re najter chirix li rokik li Rey rik’in wankilal: Sakarias 9:9

• Li naraj naxye li aatin hosanna: “Hosanna” sa’ li K’utul Raqal reheb’ li Loq’laj Hu

• Eb’ li profeetil aatin chirix lix chalik wi’chik li Kolonel: Apokalipsis 7:9–12

Chan ru naru nakak’ul laa’at li Kolonel jo’ laa Qaawa’ ut laa Rey?

Chi’ilmanq ajwi’ Gerrit W. Gong, “Hosanna ut Aleluya—Li yo’yookil Kristo: Tz’aqal xch’oolil li Paswa ut li k’ojob’ank wi’chik,” Jolomil ch’utub’aj-ib’ re abril 2020; “La entrada triunfal del Señor en Jerusalén” (video), ChurchofJesusChrist.org.

Mateo 22:34–40

Li wiib’ xninqal ru taqlahom a’aneb’ xraab’al li Dios, ut xraab’aleb’ li was wiitz’in jo’ ninra wib’ laa’in.

Wi wan naq nakaweek’a naq q’axal ch’a’aj xtaaqenkil li Jesukristo, li raatin li Jesus re laj ch’olob’anel chaq’rab’ sa’ Mateo 22 naru tatxtenq’a chirisinkil xch’a’ajkil li wank choq’ tzolom. A’in jun li na’leb’ re taab’aanu chi jo’kan: Tz’iib’a chi tusb’il junjunq reheb’ lix taqlahom li Qaawa’. Chan ru naq li junjunq chi taqlahom li xatz’iib’a naxk’am rib’ rik’ineb’ li wiib’ xninqal ru chaq’rab’ a’in? Chan ru naq li junjunq chi taqlahom li xatz’iib’a naxk’am rib’ rik’ineb’ li wiib’ xninqal ru chaq’rab’ a’in?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 21:12–14.Chan ru naq li raatin ut xb’aanuhom li Jesus li natawman sa’ Mateo 21:12–14 naxk’ut li reek’ahom chirix li santil ochoch? Chan ru naqak’ut laa’o li naqeek’a chirix li santil ochoch? K’a’ru naru “naqisi” (raqal 12) sa’ li qayu’am re naq li qochoch taawulaq jo’ li santil ochoch? Naru teeb’icha jun li b’ich chirix li santil ochoch, maare “Saʼ li santil ochoch” (B’ichleb’aal choq’ reheb’ li Kok’al, 99).

Mateo 21:28–32.K’a’ru nakatzol sa’ li jaljookil ru aatin chirix li winq ut li wiib’ ralal li taaruuq chixtenq’ankil laa junkab’al? Jo’ jun eetalil, naru taawoksi li seraq’ a’in re aatinak chirix paab’ank ut li jalb’a-k’a’uxlej chi anchal ch’oolej. Maare eb’ li komon sa’ laa junkab’al naru te’xb’aanu li yeeb’il resil sa’ li jaljookil ru aatin, ut li junjunq tixb’aanu ruuchil li wiib’ chi alalb’ej.

Mateo 22:15–22; Lukas 20:21–26.Maare taawulaq chiruheb’ li kok’al xyiib’ankil kok’ tumin rik’in lix “jalam-uuch ut resil” li Jesus. Naru neke’xtz’iib’a chirix li kok’ tumin junqaq li “k’a’aq re ru re li Dios” (Mateo 22:21) li tooruuq chixk’eeb’al re. Naru ajwi’ nakat-aatinak chirix li naraj xyeeb’al “jalam-uuch ut resil” li Kolonel choq’ qe (Mateo 22:20; chi’ilmanq ajwi’ Mosiah 5:8; Alma 5:14).

Jwan 12:1–8.Chan ru naq li xMaria kixk’ut chiru li Kolonel naq naxra? Chan ru naq laa’o naqak’ut chiru naq naqara?

Xch’ajb’al li roq li Jesus, xb’aan laj Brian Call

Jwan 12:42–43.K’a’ru li wan sa’ li qatenamit li nokoxram chixyeeb’al malaj chixkolb’al rix li qapaab’aal chirix li Kristo? Re rilb’al junjunq li kristiaan li ink’a’ ke’q’unb’esiik xch’ool xb’aan lix tenamiteb’, chi’ilmanq Daniel 1:3–20; 3; 6; Jwan 7:45–53; 9:1–38; ut Mosiah 17:1–4. Chan ru naru naqoxloq’i li qas qiitz’in naq neke’xye resil lix paab’aaleb’, malaj naq neke’xkol rix lix paab’aaleb’?

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li Kristo wan choq’ Rey,” Eb’ li B’ich, 33.

Xkawresinkil qib’ jo’ aj k’utunel

Oksil li jalam-uuch re xtenq’ankileb’ li komon sa’ li junkab’al. “Sa’ li hu Hu reheb’ li Jalam-uuch re li Evangelio ut li Biblioteca multimedia del Evangelio sa’ ChurchofJesusChrist.org wankeb’ k’iila jalam-uuch ut video li te’ruuq chixtenq’ankil laa junkab’al chixtawb’al ru li na’leb’ malaj li k’a’ru kik’ulman” (Li k’utuk jo’ li Kolonel, 22).

Ki’ok rik’in wankilal, xb’aan laj Walter Rane