Li alalb’ej sachenaq, xb’aan li xLiz Lemon Swindle

1–7 mayo

Lukas 12–17; Jwan 11

“Chisaho’q sa’ qach’ool wochb’eenex, xb’aan naq xintaw lin karneer li xsachk chiwu”

Naq nakawil Lukas 12–17 ut Jwan 11, sik’ rik’in tijok li k’a’ru naraj laa Choxahil Yuwa’ naq taanaw ut taab’aanu. Naq nakatzoleb’ li ch’ol a’in, taaruuq chi teemank aach’ool re xk’ulb’aleb’ li na’leb’ li wankeb’ choq’ aawe.

Tz’iib’a li nakak’oxla

Naru naqak’oxla naq xsachb’al yal jun re jun cient mas chaab’il—a’b’anan ink’a’ naq yooko chi aatinak chirixeb’ li ralal xk’ajol li Dios li raarookeb’ xb’aan (chi’ilmanq Tzol’leb’ ut Sumwank 18:10). Naq yooko chi aatinak chirix yal ta jun aamej, na’ajman ru sik’ok chi anchal li qach’ool “toj reetal toxqataw chaq” (Lukas 15:4), jo’ chanru kixk’ut li Kolonel sa’ li jaljookil ru aatin chirix li karneer sachenaq. Toja’ naq naru natikla li sahil ch’oolejil, xb’aan naq sa’ choxa “q’axal nim chik li sahil ch’oolej taawanq naq junaq aj maak tixyot’ xch’ool tixjal xk’a’uxl, chiruheb’ li b’elelaju ro’k’aal tiikeb’ xch’ool li moko aajel ta chik ru naq te’xjal xk’a’uxleb’ ” (Lukas 15:7). Wi chanchan naq moko tiik ta ru a’an, us xjultikankil naq maajun wan li “moko aajel ta chik ru naq tixjal xk’a’uxl.” Chiqajunil naqaj ru li kole’k. Ut chiqajunil nokoru chi tz’aqonk sa’ li kolok, ut taasaho’q qach’ool rik’in li junjunq aamej li nakole’ (chi’ilmanq Tzol’leb’ ut Sumwank 18:15–16).

Li na’leb’ re xtzolb’aleb’ li loq’laj hu aajunes.

Lukas 12; 14–16

Nikin’osob’tesiik naq nink’e inch’ool chirix li junelikil k’a’aq re ru.

K’a’ut naq “at jip” kixye li Dios re jun li winq li kaw nak’anjelak ut kixyiib’ ninqi k’uuleb’aal ut kixnujob’resi rik’in li ruuchinihom lix k’anjel? (chi’ilmanq Lukas 12:16–21). Sa’eb’ li ch’ol a’in sa’ Lukas, li Kolonel kixk’ut junjunq li jaljookil ru aatin li neke’ru chixtaqsinkil li qilob’aal chi junpak’al chik li k’a’ru re li ruchich’och’ toj rik’in li k’a’ru re junelik. Wankeb’ chi tusb’ileb’ arin junjunq reheb’ li jaljookil ru aatin a’in. K’a’ru xyaalalil li junjunq, jo’ nakaye laa’at? K’a’ru nakak’oxla naq yoo chixyeeb’al li Qaawa’ aawe?

• Li b’ihom maak’a’ xna’leb’ (Lukas 12:13–21)

• Li xnimal wa’ak (Lukas 14:12–24)

• Li alalb’ej sachenaq (Lukas 15:11–32)

• Li mertoom ink’a’ tiik xch’ool (Lukas 16:1–12)

• Li b’ihom ut laj Lazaro (Lukas 16:19–31)

Chi’ilmanq ajwi’ Mateo 6:19–34; 2 Nefi 9:30; Tzol’leb’ ut Sumwank 25:10.

Lukas 15

Li qaChoxahil Yuwa’ nasaho’ sa’ xch’ool naq neke’tawe’ li ani sachenaq.

Chirix rilb’aleb’ li jaljookil ru aatin kixk’ut li Jesus sa’ Lukas 15, k’a’ru nakatzol chirix li nareek’a li qaChoxahil Yuwa’ chirixeb’ li wankeb’ sa’ maak malaj li “sachenaqeb’ ”? K’a’ raj ru te’reek’a laj k’amol b’e—malaj a’ yaal anihaq qe laa’o—chirixeb’ a’an? K’oxla chan raj ru ke’xsumeheb’ li patz’om a’an eb’ laj Fariseo ut eb’ laj tz’iib’ (chi’ilmanq Lukas 15:1–2). Lix sumenkileb’ kixk’e li Jesus neke’tawman sa’ oxib’ li jaljookil ru aatin sa’ Lukas 15. Naq taawil, k’oxla li kixk’ut li Jesus chiruheb’ laj Fariseo ut eb’ laj tz’iib’ sa’eb’ li jaljookil ru aatin a’an.

Naru ajwi’ nakatz’iib’a lix juntaq’eetil ut lix jalanil wankeb’ sa’eb’ li jaljookil ru aatin a’an. Jo’ eetalil, naru nakak’e reetal li kisach sa’ junjunq reheb’ a’an ut k’a’ut, ut chan ru naq kitawman wi’chik, ut k’a’ru ke’xye li kristiaan naq kitawman. K’a’ru li esilal yoo chixk’eeb’al li Jesus reheb’ li ani “sachenaqeb’ ”—ut jo’kaneb’ ajwi’ li ani ink’a’ neke’xk’oxla naq sachenaqeb’? K’a’ru li esilal yoo chixk’eeb’al reheb’ li ani neke’sik’ok reheb’ li sachenaqeb’?

Chi’ilmanq ajwi’ Tzol’leb’ ut Sumwank 18:10–16; Jeffrey R. Holland, “El otro hijo pródigo,” Liahona, mayo 2002, 62–64.

Li tumin plaat sachenaq, xb’aan laj James Tissot

Lukas 16:1–12

K’a’ru yoo chixk’utb’al li Kristo rik’in li jaljookil ru aatin chirix laj mertoom li moko tiik ta xch’ool?

Li Elder James E. Talmage kixch’olob’ naq jun li na’leb’ naqak’ul rik’in li jaljookil ru aatin a’an a’in: “Chiwanq aasak’ahil, xb’aan naq sa’ junpaat taanume’q li kutan tatruuq wi’ chiroksinkil aab’ihomal sa’ li ruchich’och’. Taw aana’leb’ rik’ineb’ li moko tiikeb’ ta ut eb’ laj maak; wi eb’ a’an wankeb’ xna’leb’ re xkawresinkil rib’ choq’ re li chalk re, k’a’jo’ wi’chik naq tento taab’aanu laa’at, li nakapaab’ naq wan k’a’ru taqak’ul sa’ li junelik q’e kutan. Wi ink’a’ xataw aana’leb’ ut aachaab’ilal sa’ roksinkil li “maa’us aj tumin,” chan ru naq taak’eemanq sa’ aawuq’ li b’ihomal ink’a’ nalaj na’oso’?” (Jesús el Cristo [1916], 489). K’a’ chik li na’leb’ nakataw sa’eb’ li raqal a’in?

Lukas 17:11–19

Wi ninb’antioxi li osob’tesink nink’ul, tinnach’o’q rik’in li Dios.

Wi ta laa’at jun reheb’ li lajeeb’ li saqlep rix, ma nakak’oxla naq xatsutq’i raj chixb’antioxinkil chiru li Kolonel? K’a’ chik ru chi osob’tesink kixk’ul li jun saqlep rik’in naq kib’antioxin?

Naru ajwi’ nakatk’oxlak chirix li raatin li Kolonel, “Laa paab’aal xk’irtesink aawe” (raqal 19). Choq’ aawe, chan ru neke’xtz’aqob’resi rib’ li b’antioxink ut li paab’aal? Chan ru nokohe’xtenq’a chi k’iraak? Li video “Presidente Russell M. Nelson: El poder sanador de la gratitud” (ChurchofJesusChrist.org) naru nakatxtenq’a chi k’oxlak chirixeb’ li patz’om a’an.

Chi’ilmanq ajwi’ Dale G. Renlund, “K’oxla lix chaab’ilal ut li xloq’al li Dios,” Jolomil ch’utub’aj-ib’ re abril 2020.

Jwan 11:1–46

Li Jesukristo a’an li wakliik chi yo’yo ut li yu’am.

Li sachb’a-ch’oolej re xwaklesinkil laj Lazaro chiru li kamk kixk’ut xyaalal rik’in nimla wankilal naq li Jesus a’an tz’aqal li Ralal li Dios ut li Mesias li yeechi’inb’il. K’a’ru li aatin malaj li na’leb’ sa’ Jwan 11:1–46 li naxkawob’resi laa paab’aal naq li Jesukristo a’an “li wakliik wi’chik chi yo’yo ut li yu’am”? K’a’ru naraj naxye choq’ aawe naq li Jesus a’an “li wakliik chi yo’yo ut li yu’am”?

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Lukas 15:1–10.Ma neke’xtaw ru li komon sa’ laa junkab’al li k’a’ru na’eek’aman naq wan k’a’ru sachso chiqu—malaj naq wanko chi sachso? Rik’in aatinak chirix li k’a’ru xe’xk’ul naru natikla jun seraq’ chirix li jaljookil ru aatin re li karneer sachenaq ut li tumin sachenaq. Malaj ut naru teeb’aanu jun b’atz’unk sa’ li tixmuq wi’ rib’ jun komon ut lix komoneb’ chik te’xsik’. Chan ru naq li b’atz’unk a’in nokoxtenq’a chixtawb’aleb’ ru li jaljookil ru aatin a’in?

Lukas 15:11–32.Chan ru naq wan naq laa’o chanchano li yuwa’b’ej sa’ li esilal a’in wi wankeb’ li raarookeb’ qab’aan li sachsookeb’? K’a’ru naru naqatzol rik’in li k’a’ru kixb’aanu li asb’ej, li naru tooxtenq’a re toowanq wi’chik jo’ li Kristo? Chan ru naq li jaljookil ru aatin a’in chanchan li qaChoxahil Yuwa’?

Lukas 17:11–19.Re xtenq’ankil laa junkab’al chixyu’aminkil li seraq’ chirixeb’ li lajeeb’ saqlep rix, naru taaye reheb’ naq te’xtz’iib’a chi muqmu li neke’xb’antioxi wi’ rik’ineb’ li komon sa’ li junkab’al. Naru ajwi’ teeb’icha sa’ komonil “K’e sa’ ajl li k’iila usilal” (Eb’ li B’ich, 153), ut tex’aatinaq chirix li usilal xk’ul laa junkab’al.

Jwan 11:1–46.Eb’ li wankeb’ sa’ laa junkab’al naru te’ril li video “Lázaro es levantado de entre los Muertos” (ChurchofJesusChrist.org)) ut te’xwotz lix nawomeb’ xch’ool chirix li Jesukristo.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Saʼ raam laj Ilol Karneer,” Eb’ li B’ich, 142.

Xkawresinkil qib’ jo’ aj k’utunel

Oksiheb’ li seraq’ ut li na’leb’ re xk’utb’aleb’ li jar raqal re li evangelio. Li Kolonel k’iila sut kixk’uteb’ li na’leb’ chirix li evangelio rik’in roksinkileb’ li seraq’ ut li jaljookil ru aatin. K’oxlaheb’ li na’leb’ ut li seraq’ chirix tz’aqal aayu’am li te’ruuq chixtenq’ankileb’ li wankeb’ sa’ laa junkab’al chixtawb’al ru jun na’leb’ chirix li evangelio (chi’ilmanq Li k’utuk jo’ li Kolonel, 22).

B’ar wankeb’ li b’eleeb’, xb’aan li xLiz Lemon Swindle