Li xkab’ xk’ulunik li Qaawa’, xb’aan laj Harry Anderson

22–28 mayo

Jose Smith—Mateo 1; Mateo 24–25; Markos 12–13; Lukas 21

“Taak’ulunq chaq li K’ajolb’ej”

Naq nakawil Jose Smith—Mateo 1; Mateo 24–25; Markos 12–13; ut Lukas 21, naru taapatz’, “K’a’ru chi na’leb’ wan sa’eb’ li ch’ol a’in choq’ we laa’in? choq’ re lin junkab’al? choq’ re lin b’oqb’al?”

Tz’iib’a li nakak’oxla

Eb’ lix tzolom li Jesus maare ke’sach xch’ool rik’in lix profeetil aatin: li nimla santil ochoch sa’ Jerusalen, li wan choq’ xch’oolil lix na’leb’eb’ ut lix paab’aaleb’ li tenamit aj Judio, taasachmanq toj reetal naq “ink’a’ taakanaaq … yal ta jun pek chixb’een li jun chik.” Eb’ li tzolom ke’raj rab’inkil chik li taak’ulmanq. “Jo’q’e taawanq li k’a’aq re ru a’in?” ke’xpatz’. “Ut k’a’ru reetalil laa k’ulunik?” (Jose Smith—Mateo1:2–4). Li k’a’ru kixsume li Kolonel kixk’utb’esi naq li nimla sache’k li taachalq sa’ Jerusalen—jun profeetil aatin li kitz’aqlok ru sa’ 70 chihab’ xk’ulunik chaq li Kristo —ka’ch’in chaq chiruheb’ li reetalil lix k’ulunik sa’ roso’jikeb’ li kutan. Wan k’a’ru q’axal xaqxo wi’chik chiru li santil ochoch sa’ Jerusalen li taawanq chi eek’anb’il sa’eb’ li kutan a’an—li saq’e, li po, eb’ li chahim, eb’ li tenamit, ut li palaw. Toj reetal “taachiq’manq lix wankilal li choxa” (Jose Smith—Mateo 1:33). Wi wan qamusiq’ejil na’leb’, li choqink a’in taaruuq tooxtenq’a chixkanab’ankil qib’ chiru li k’a’ru ink’a’ nalaj na’oso’. Jo’ kixye li Jesus, “Us ta taawulaq xkutankil naq taa’oso’q li choxa ut li ch’och’; li waatin b’an ink’a’ taa’oso’q. … Ut ani nak’uulank re li waatin, ink’a’ taab’alaq’iiq” (Jose Smith—Mateo 1:35, 37).

Li na’leb’ re xtzolb’aleb’ li loq’laj hu aajunes

K’a’ru li Jose Smith—Mateo?

Jose Smith—Mateo, li natawman sa’ li Q’ol Nim Xtz’aq, a’aneb’ li raqal jaltesinb’il ru xb’aan laj Jose Smith re Mateo 23 ut re Mateo 24. Sa’ li hu jaltesinb’il ru xb’aan laj Jose Smith, wan chi k’ojob’anb’il wi’chik li loq’laj na’leb’ li xsachman chaq. Sa’ eb’ li raqal 12–21 na’aatinak chirix lix sachik Jerusalen sa’ najter kutan, ut sa’eb’ li raqal 21–55 wankeb’ li profeetil aatin chirix roso’jikeb’ li kutan.

Jose Smith—Mateo 1:21–37; Markos 13:21–37; Lukas 21:25–38

Eb’ li profeetil aatin chirix li xkab’ xk’ulunik li Kolonel naru nikine’xtenq’a chixk’ulb’al rik’in paab’aal li k’a’ru toj taachalq.

Wan naq xiwxiw rilb’al resil li k’a’ru taak’ulmanq rub’elaj li xkab’ xk’ulunik li Jesukristo. A’b’anan naq li Jesus kixye resil a’in, kixye reheb’ lix tzolom, “ink’a’ chepoqle eek’a’uxl” (Jose Smith—Mateo 1:23). Chan ru naru naq “ink’a’ taapoqle aak’a’uxl” naq taawab’i resileb’ li hiik, li ninqi pleet, li b’alaq’il, ut li we’ej? K’oxla li patz’om a’in naq nakawileb’ li raqal a’in. K’e reetalil malaj tz’iib’a li na’leb’ li tixk’ojob’ aach’ool.

Chi’ilmanq ajwi’ Temas del Evangelio, “Segunda venida de Jesucristo,” topics.ChurchofJesusChrist.org.

Jose Smith—Mateo 1:26–27, 38–55; Mateo 25:1–13; Lukas 21:29–36

Junelik tento tinwanq chi kawresinb’il choq’ re li xkab’ xk’ulunik li Kolonel.

Li Dios ink’a’ xk’utb’esi “jo’q’e xkutankil chi moko lix hoonalil lix k’ulunik li K’ajolb’ej” (Mateo 25:13). A’b’anan a’an ink’a’ naraj naq taachalq li kutan a’an sa’ qab’een “chi maak’a’aq sa’ qach’ool” (Lukas 21:34), ut chi jo’kan xk’e li qana’leb’ chirix chan ru xkawresinkil qib’.

Naq nakawileb’ li raqal a’in, k’e reetaleb’ li jaljookil ru aatin ut xkomoneb’ chik li na’leb’ naroksi li Kolonel re xk’utb’al chiqu naq junelik toowanq chi kawresinb’il choq’ re li xkab’ xk’ulunik. K’a’ru nakatzol rik’ineb’ li na’leb’ a’in? K’a’ru nakaweek’a naq eek’asinb’ilat chixb’aanunkil?

Naru nakak’oxla chan ru naq li Kolonel naraj naq laa’at tat-tzaqonq chixkawresinkil li ruchich’och’ choq’ re li xkab’ xk’ulunik. K’a’ru naraj naxye choq’ aawe li wank chi kawresinb’il re xk’ulb’al li Kolonel sa’ xk’ab’ xk’ulunik? Li raatin li Elder D. Todd Christofferson, “Xkawresinkil qib’ choq’ re lix sutq’ijik li Qaawa’ ” (Jolomil ch’utub’aj-ib’ re abril 2019) maare naru tatxtenq’a chi na’leb’ak chirix a’an.

Chi’ilmanq ajwi’ Russell M. Nelson, “Xk’ulb’al li k’a’ru chalel rik’in paa’b’aal,” Jolomil ch’utub’aj-ib’ re octubre 2020.

Mateo 25:14–30

Li qaChoxahil Yuwa’ naraj naq taqoksi li maatan li k’eeb’il qe rik’in xchaab’ilal li na’leb’.

Sa’ li jaljookil ru aatin kixwotz li Kolonel, jun “talento” nayeeman chirix li tumin. A’b’anan li jaljookil ru aatin chirixeb’ li talento nokoxk’am chi na’leb’ak chirix roksinkil chi us li qosob’tesinkil, ut ink’a’ ka’ajwi li tumin. Naq nakawil li jaljookil ru aatin a’in, tz’iib’a junjunqaq li osob’tesink ut li maatan li xk’e aawe li qaChoxahil Yuwa’. K’a’ru naraj a’an naq taab’aanu rik’ineb’ li osob’tesink a’in? Chan ru naq nakatru chiroksinkileb’ li maatan a’in chi q’axal chaab’il wi’chik?

Mateo 25:31–46

Naq nink’anjelak chiruheb’ li was wiitz’in, yookin chi k’anjelak chiru li Dios.

Wi nakak’oxla chan ru naq li Qaawa’ taaraqoq aatin chirix laa yu’am, il li jaljookil ru aatin chirixeb’ li karneer ut eb’ li chib’aat. K’a’ut naq rilb’aleb’ li neb’a’ tatxtenq’a chixkawresinkil aawib’ chi “ok sa’ xnimal rawa’b’ejihom” li Dios?

K’a’ru juntaq’eeteb’ wi’ li jaljookil ru aatin a’in rik’in li wiib’ wankeb’ sa’ Mateo 25? K’a’ru esil neke’xwotz sa’ oxib’al?

Chi’ilmanq ajwi’ Mosiah 2:17; 5:13.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Jose Smith—Mateo.Re xtenq’ankil laa junkab’al chixtzolb’al li jun ch’ol a’in, ye reheb’ naq te’xsik’ li kixye li Kolonel chirix xkawresinkil qib’ choq’ re li xkab’ xk’ulunik (jo’ jun eetalil, ileb’ li raqal 22–23, 29–30, 37, 46–48). K’a’ru naru naqab’aanu re xb’aanunkil li naxye? Maare laa junkab’al taaraj xb’ichankil “Naq taak’ulunq li Kolonel” (B’ichleb’aal choq’ reheb’ li Kok’al, 46–47) ut te’xb’on li xkab’ xk’ulunik li Kolonel.

Jose Smith—Mateo 1:22, 37.K’a’ru xyaalalil xk’uulankil li raatin li Dios? Chan ru naru naqab’aanu a’in jo’ junkab’al ut sa’ junesal? Chan ru naq a’in tooxtenq’a re naq ink’a’ toob’alaq’iiq?

Mateo 25:1–13.Naru taawoksi li jalam-uuch reheb’ li lajeeb’ tuq’ixq li narochb’eeni li tusleb’ aatin a’in re aatinak chirix Mateo 25:1–13. K’a’ru naqil sa’ li jalam-uuch a’in li yeeb’il resil sa’eb’ li raqal a’in?

Naru nakaset kok’ hu chanchan jun tz’uqul li aseeyt ut taamuqeb’ sa’ li ochoch. Naru nakamuqeb’ chixk’atq li k’a’aq re ru jo’ li loq’laj hu malaj junaq li jalam uuch re li santil ochoch. Naq eb’ li wankeb’ sa’ li junkab’al te’xtaw li tz’uq, naru te’xye chan ru naq li k’a’aq re ru a’an nokohe’xtenq’a chixkawresinkil qib’ choq’ re li xkab’ xk’ulunik li Kolonel.

Markos 12:38–44; Lukas 21:1–4.Jo’ yeeb’il sa’eb’ li raqal a’in, chan ru naq li Qaawa’ naril li qamayej? Ch’olob’ chiru laa junkab’al chan ru xtojb’al li lajetqil ut xk’eeb’al li mayej re li Qaawa’. Chan ru nokohe’xtenq’a li mayej a’an chixkab’lankil lix awa’b’ejihom li Dios? K’a’ chik ru tooruuq chixb’aanunkil re xyeechi’inkil “chixjunil li wan qe” re li Qaawa’? (Markos 12:44).

Lix tumin li xmalka’an, xb’aan li xSandra Rast

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Naq taak’ulunq li Kolonel,” B’ichleb’aal choq’ reheb’ li Kok’al, 46–47.

Xkawresinkil aawib’ chi tzolok

Kawresi li na’ajej wankat wi’. “Li na’ajej wanko wi’ naru taawanq xnimal xwankil chirix qaseeb’al chixtzolb’al ut chireek’ankil li yaal” (Li k‘utuk jo’ li Kolonel, 15). Yal aaq’e chixsik’b’al jun li na’ajej re xtzolb’aleb’ li loq’laj hu re taawanq aran li Santil Musiq’ej. Li chaab’il b’ich ut jalam-uuch neke’ru ajwi’ chixk’eeb’al xb’oqb’al li Musiq’ej.

Oob’ wankeb’ xna’leb’, xb’aan laj Walter Rane