li wa’ak sa’ roso’jik

Re xnimankil injultikankil, xb’aan laj Walter Rane

29 mayo–4 junio

Mateo 26; Markos 14; Jwan 13

“Re xnimankil injultikankil”

Naq nakawil ru li kik’ulman sa’ Mateo 26; Markos 14; ut Jwan 13, k’e reetal laa week’ahom nakak’ul li tz’aqal nakatxtenq’a chixnimob’resinkil laa paab’aal chirix li Jesukristo ut laa b’aanuhom chiru.

Tz’iib’a li nakak’oxla

Sa’ li kutan naq ok re chi kamk, li Jesukristo kixk’e reheb’ lix tzolom jun li k’a’aq re ru re te’xjultika. “Kixchap li wa, kiyoxink sa’ xb’een, kixjachi, kixk’e reheb’ lix tzolom ut kixye, Kʼulumaq, waʼomaq; a’an a’in lin tz’ejwal. “Chirix chik a’an kixchap jun li uk’leb’ sek’, kiyoxink, kixk’e reheb’ ut kixye: “Uk’umaq chejunilex li xsa’ li sek’ a’in; xb’aan naq a’an a’in lin kik’el” ” (Mateo 26:26–28).

A’in kik’ulman 2000 mil chihab’ chaq anajwan, sa’ jun na’ajej li maare maajun wa taqil, sa’ jun li aatinob’aal yal junqaq natawok ru. A’b’anan, anajwan rajlal domingo sa’eb’ li qach’uutleb’aal, eb’ li wankeb’ rik’in li tijonelil, li k’eeb’ileb’ xliceens chi k’anjelak sa’ xk’ab’a’ li Jesukristo, neke’xb’aanu li kixb’aanu chaq junxil. Neke’rosob’tesi li kaxlan wa ut li ha’, ut neke’xk’e qe chiqajunjunqal, jo’ xtzolomeb’ a’an. Yaal naq a’an yal jun ch’ina k’anjel—xtzekankil li kaxlan wa ut ruk’b’al li ha’. A’b’anan li kaxlan wa ut li ha’ a’in a’an oxloq’ choq’ qe, xb’aan naq nokoxtenq’a chixk’oxlankil. A’an chan ru naqaye, “Maajun wa taasachq sa’ inch’ool”—ut ink’a’ ka’ajwi, “Maajun wa taasachq sa’ inch’ool li wilom ru chirix lix k’utum ut lix yu’am.” Naqaye b’an, “Maajun wa taasachq sa’ inch’ool li kixb’aanu choq’ we.” “Maajun wa taasachq sa’ inch’ool naq kinixkol naq kintz’aama intenq’.” Ut “maajun wa taasachq sa’ inch’ool lix yeechi’ihom choq’ we ut lin yeechi’ihom choq’ re—chi moko li sumwank qab’aanuhom.”

reetalil li tzolok aajunes

Li na’leb’ re xtzolb’aleb’ li loq’laj hu aajunes

Mateo 26:6–13; Markos 14:3–9

“A’an kichalk … chixyulb’al lin tib’el re lin muqb’al.”

Rik’in xq’unal xch’ool re loq’onink, li ixq li nayeeman resil sa’eb’ li raqal a’an kixk’ut naq naxnaw ru li Jesus ut li ok re chixb’aanunkil (chi’ilmanq Mateo 26:12). K’a’ut naq lix b’aanuhom kixtoch’ xch’ool li Kolonel? (chi’ilmanq li raqal 13). K’a’ru nawulak chawu chirix li ixq ut lix paab’aal? Tz’il rix chan ru tatruuq chixtaaqenkil lix b’aanuhom.

Chi’ilmanq ajwi’ Jwan 12:1–8.

Mateo 26:20–22; Markos 14:17–19

“Qaawa’, ma laa’inin?”

K’a’ru nakatzol chirix li ke’xpatz’ lix tzolom li Qaawa’ re a’an sa’eb’ li raqal a’in? K’a’ut naq ke’patz’ok re? K’oxla chan ru taapatz’ re li Qaawa’: “Ma laa’inin?”

Chi’ilmanq ajwi’ Dieter F. Uchtdorf, “¿Soy yo, Señor?,” Liahona, noviembre 2014, 56–59.

Mateo 26:26–29; Markos 14:22–25

Rik’in li loq’laj wa’ak naru najultiko’ qe li Kolonel.

Naq li Kolonel kixk’e xb’een sut li loq’laj wa’ak reheb’ lix tzolom, k’a’ru nakak’oxla naq ke’xk’oxla ut ke’reek’a? K’oxlan chirix a’in naq taawil li ke’xk’ul sa’ Mateo 26:26–29 ut Markos 14:22–25. K’a’ut naq li Jesus kixsik’ ru li na’leb’ a’an re naq taqajultika? Naru ajwi’ nakak’oxla laa numsihom chiru xhoonalil li loq’laj wa’ak. Ma wan k’a’aq re ru tatruuq chixb’aanunkil re naq li loq’laj wa’ak a’anaq oxloq’ choq’ aawe?

Chirix rilb’al ru ut xtz’ilb’aleb’ rix li raqaleb’ a’an, tz’iib’a junqaq li na’leb’ li musiq’anb’ilat chixk’oxlankil chirix li Kolonel. Naru taawil ru laa tz’iib’ahom chiru xhoonalil li loq’laj wa’ak. Naru ajwi’ taawil ru sa’ jalan jalanq hoonal, jo’ reetalil naq “najultiko’ aawe rajlal” (Moroni 4:3).

Chi’ilmanq ajwi’ Lukas 22:7–39; 3 Nefi 18:1–13; Tzol’leb’ ut Sumwank 20:76–79; Temas del Evangelio, “Santa Cena,” topics.ChurchofJesusChrist.org; “Para recordarle siempre” (video), ChurchofJesusChrist.org.

Jwan 13:1–17

Li Kolonel rik’in xb’aanuhom kixk’ut chiqu chan ru k’anjelak chiru li qas qiitz’in rik’in tuulanil.

Sa’ xkutankil li Kolonel, xch’ajb’aleb’ roq li kristiaan a’an xk’anjeleb’ li moos, ink’a’ reheb’ laj k’amol b’e. A’b’anan li Jesus kiraj naq eb’ lix tzolom te’xk’oxla k’a’ru naraj naxye li wank jo’ aj k’amol b’e ut k’anjelak chiru ras riitz’ineb’. K’a’ru esil nakataw sa’ li raatin ut xb’aanuhom li Kolonel sa’ Jwan 13:1–17? Maare sa’ laa na’aj, xch’ajb’aleb’ roq li kristiaan ink’a’ a’an jun eetalil re k’anjelak chiruheb’. A’b’anan k’oxla li tatruuq chixb’aanunkil re xtaaqenkil lix tuulanil b’aanuhom li Kolonel.

Jo’kan ajwi’ maare us xk’eeb’al reetal lix nawom li Jesus ut li reek’ahom chiru li loq’laj hoonal naq kiwan rik’ineb’ lix tzolom (chi’ilmanq raqal 1 ut 3). K’a’ru neke’xk’ut chawu li na’leb’ a’in chirix li Kolonel?

Chi’ilmanq ajwi’ Lukas 22:24–27.

Jwan 13:34–35

Lin rahom chirixeb’ li was wiitz’in, a’an jun reetalil naq laa’inin jun tz’aqal xtzolom li Jesukristo.

Najter chaq, li Jesus kixk’e li taqlahom “taara laa was aawiitz’in jo’ naq nakara aawib’ laa’at” (Mateo 22:39). Anajwan kixk’e “jun chik ak’ taqlahom.” K’a’ru naraj naxye choq’ aawe xraab’aleb’ li qas qiitz’in jo’ nakatxra li Jesus laa’at? (chi’ilmanq Jwan 13:34).

Naru ajwi’ nakak’oxla chan ru naq eb’ li kristiaan neke’xnaw naq laa’at jun xtzolom li Jesukristo. K’a’ru taab’aanu re naq laa rahom a’anaq jun reetalil naq laa’at jun aj Kristiano?

reetalil li tzolok jo’ junkab’al

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

Mateo 26:26–29; Markos 14:22–25.Chan ru wan laa junkab’al naq yoo chi uxmank li loq’laj wa’ak rajlal xamaan? Rilb’al resil li xb’een loq’laj wa’ak naru nekexxtenq’a chi aatinak chirix xnimal ru li loq’laj wa’ak, ut chan ru xchaab’ilob’resinkil li loq’onink nekeb’aanu. Naru taak’ut li jalam-uuch Xjek’inkil li loq’laj wa’ak (Hu reheb’ li Jalam-uuch re li Evangelio, 108), ut teeye k’a’ru naru nekeb’aanu naq maji’ na’uxman li loq’laj wa’ak, naq yoo chi uxmank, ut chirix naq x’uxman.

jun ixq yoo chi tz’aqonk sa’ li loq’laj wa’ak

Li loq’laj wa’ak nokoxtenq’a chixjultikankil li Jesukristo.

Mateo 26:30.Naru nekeb’icha junaq b’ich, jo’ kixb’aanu li Jesus ut eb’ lix apostol—maare junaq li b’ich re li loq’laj wa’ak. Chan ru naq li b’ichank kirob’tesi li Jesus ut eb’ lix apostol sa’ li hoonal a’an? Chan ru naq eb’ li b’ich a’aneb’ jun li osob’tesiik choq’ qe?

Jwan 13:1–17.Naru nakak’ut chiru laa junkab’al eb’ li jalam uuch li wankeb’ sa’ xraqik li tusleb’ aatin a’in naq yooqex chirilb’aleb’ li raqal a’in. K’a’ruheb’ li yaal kixk’ut li Kolonel rik’ineb’ lix b’aanuhom? K’a’ru naqataw sa’eb’ li jalam uuch li nokoxtenq’a chixtawb’aleb’ ru li yaal a’an? Maare li junkab’al naru neke’xwotz chan ru naq xyu’aminkileb’ li yaal a’an naxk’e xsahileb’ xch’ool (chi’ilmanq Jwan 13:17).

Jwan 13:34–35.Chirix rilb’aleb’ li raqal a’an, naru neketz’il rix chan ru naq eb’ li kristiaan neke’xk’e reetal naq laa’exex xtzolom li Jesukristo. Chan ru naraj li Kolonel naq te’nawmanq ru lix moos? Naru nakapatz’ re laa junkab’al naq te’aatinaq chirixeb’ li kristiaan li neke’xk’ut rik’in xrahomeb’ naq a’aneb’ tz’aqal xtzolom li Jesukristo. Naru ajwi’ te’xye chan ru te’ruuq chixk’utb’al xrahomeb’ jo’ junkab’al.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Li rahok cherib’il eerib’,” B’ichleb’aal choq’ reheb’ li kok’al, 74.

Xkawresinkil aawib’ chi tzolok

K’oxlak. Eb’ li loq’laj hu wankeb’ xwankil li naru naqakanab’ reek’ankil wi yal naqileb’ ru, jo’ naqab’aanu rik’ineb’ jalanil hu. Maayal aaq’e chixchoyb’al sa’ junpaat jun ch’ol. K’e aahonal chixk’oxlankil li yookat chirilb’al.

li Jesus naq yoo chixch’ajb’al roqeb’ lix tzolom

Lix nimal ru sa’ choxa, xb’aan laj J. Kirk Richards