“5–11 junio. Jwan 14–17: “Kanaaqex sa’ lin rahom,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“5–11 junio. Jwan 14–17,” Kim, Taaqehin—Choq’ reheb’ li komon ut li junkab’al: 2023
Li wa’ak sa’ roso’jik, xb’aan laj William Henry Margetson
5–11 junio
Jwan 14–17
“Kanaaqex sa’ lin rahom”
Naq nakawil lix yehom li Kolonel sa’ Jwan 14–17, li Santil Musiq’ej tatxtenq’a chixk’eeb’al reetal li na’leb’ li taatenq’anq aawe. Tz’iib’a li na’leb’ nakak’ul.
Tz’iib’a li nakak’oxla
Anajwan li “wa’ak sa’ roso’jik” naqaye re, a’ut ink’a’ naqanaw ma ke’xnaw lix tzolom li Jesus, naq ke’xch’utub’ rib’ re xninq’ehinkil li Paswa li nab’aanuman rajlal chihab’, naq ka’aj chik li jun sut a’in te’wa’aq rik’in lix Tzoloneleb’ rub’elaj xkamik. A’ut li Jesus ak naxnaw naq “xwulak lix hoonal” (Jwan 13:1). Sa’ junpaat chik tixk’ul li rahilal sa’ Getsemani, taakanab’aaq ut taatz’eqtaanaaq xb’aaneb’ li neke’ochb’eenink re, ut taakamq rik’in nimla rahilal chiru li krus. Us ta ok re chixk’ulb’al chixjunil a’in, li Jesus ink’a’ kixk’oxla rib’, kixk’oxla b’an k’anjelak chiruheb’ lix tzolom. K’a’ raj ru tento te’xnaw chiruheb’ li kutan ut li chihab’ chalel? Lix sahil k’utum li Jesus li natawman sa’ Jwan 14–17 naxk’ut li nareek’a chirixeb’ lix tzolom, sa’ li hoonal a’an ut anajwan. Sa’ xyanq chixjunil li yaal kixwotz naqataw reetalil naq maajun wa tooxkanab’. “Wi nekepaab’ lin chaq’rab’,” “texkanaaq sa’ lin rahom” (Jwan 15:10).
Li na’leb’ re xtzolb’aleb’ li loq’laj hu aajunes
Nink’ut lin rahom choq’ re li Jesukristo naq ninpaab’eb’ lix taqlahom.
Naq nakawil Jwan 14–15 naru taak’e reetal malaj taaweetali li junjunq sut na’oksiman li aatin rahok. Naru nakak’e reetal naq li aatin taqlahom (malaj chaq’rab’) chi kok’ aj xsa’ narochb’eeni li aatin rahok sa’eb’ li ch’ol a’in. K’a’ru nakatzol sa’ lix k’utum li Kolonel chirix li rahok ut chan ru naq naxk’am rib’ rik’ineb’ li taqlahom? K’a’ru chik chi aatinul ut raqal nakataw chirix li rahok sa’eb’ li ch’ol a’an?
K’oxla chan ru nakatxtenq’a lix rahom li Kolonel.
Chi’ilmanq ajwi’ Jwan 13:34–35; D. Todd Christofferson, “Texkanaaq sa’ lin rahom,” Jolomil ch’utub’aj-ib’ re octubre 2016.
Li wa’ak sa’ roso’jik, xb’aan laj Clark Kelley Price
Li Santil Musiq’ej nikinixtenq’a chixb’aanunkil ink’anjel jo’ xtzolom li Jesukristo.
Maare jwal ra choq’ reheb’ li tzolom rab’inkil naq lix hoonal rik’in li Kolonel yoo chi wulak roso’jik. Jo’kan ajwi’ maare ke’xk’oxla chan ru te’elq chi uub’ej wi maak’a’aq a’an. Sa’ rilb’al Jwan 14–16, sik’ li kixye li Kolonel re xtuqub’ankileb’ xch’ool. Chi tz’aqal, k’e reetal li kixk’ut chiruheb’ chirix li Santil Musiq’ej. K’a’ru nakatzol chirix lix k’anjel li Santil Musiq’ej rik’in li raatin li Kolonel sa’eb’ li raqal a’in?
K’a’ut naq eb’ lix tzolom ke’raj ru tenq’aak chi jo’kan xb’aan li Santil Musiq’ej? Chan ru naq li Santil Musiq’ej xb’aanu li k’anjel a’in sa’ laa yu’am laa’at? K’oxla li tatruuq chixb’aanunkil re naq lix k’anjel taanumtaaq sa’ laa yu’am.
Chi’ilmanq ajwi’ 3 Nefi 19:9; 27:20; Tzol’leb’ ut Sumwank 11:12–14; Moises 6:61; Michelle D. Craig, “Musiq’ejil seeb’al,” Jolomil ch’utub’aj-ib’ re octubre 2019.
Naq ninkanaak rik’in li Kristo, tin’uuchinq chi chaab’il.
K’a’ru naraj naxye choq’ aawe “kanaak rik’in li Kristo”? (Jwan 15:4). K’a’ru laa “wuuchinihom” li naxk’ut xyaalal naq wankat choq’ ruq’ lix toonal li uva, li wan choq’ reetalil li Jesukristo?
Li Jesus kitijok choq reheb’ lix tzolom.
Li raatin li Jesus li tz’iib’anb’il sa’ Jwan 17 a’an li tij re b’aanunk uuchil yeeb’il re. Sa’ li tij a’in, li Jesus kitijok choq’ reheb’ lix apostol, ut “chirixeb’ li te’paab’anq [re a’an] sa’ xk’ab’a’ li raatineb’ a’an” (Jwan 17:20). A’in naraj naxye naq yoo chaq chi tijok chawix laa’at. K’a’ru kixtz’aama li Jesus chiru lix Yuwa’ choq’ aawe laa’at ut choq’ reheb’ chixjunileb’ laj paab’anel? K’a’ru naxk’ut chawu a’in chirix li nareek’a chawix?
Li tij a’in naxk’ut ajwi’ junjunq li junelikil yaal. K’a’ chik chi yaal nakataw? Chirix rilb’al ru li ch’ol a’in, naru nakatz’iib’a li nakatzol chirix li na’leb’eb’ a’in:
-
Tijok
-
Lix wanjik li Jesukristo rik’in lix Yuwa’
-
Lix wanjik li Jesukristo rik’ineb’ lix tzolom
-
Chan ru naq eb’ li tzolom jalanaqeb’ rik’in li ruchich’och’
-
Junqaq chik li yaal nawulak chawu
Li qaChoxahil Yuwa’ ut li Jesukristo juneb’ chi tz’aqal re ru.
Sa’ lix tij wan sa’ Jwan 17, li Jesus kixjultika lix junajil rik’in li Yuwa’b’ej. Chan ru naq li Yuwa’b’ej ut li Alalb’ej “junajeb’ ”? (Jwan 17:11, 21–23). K’e reetal naq li Kolonel kixtz’aama naq eb’ lix tzolom junajaqeb’ “jo’ naq”—malaj jo’ chanru naq— a’an ut lix Yuwa’ junajeb’ (Jwan 17:22). K’a’ru naraj naxye choq’ aawe? K’oxla laa wanjik—jo’ eetalil, rik’in laa wixaqil malaj laa b’eelom ut jalaneb’ chik sa’ laa junkab’al, rik’ineb’ li komon sa’ laa teep, ut jalaneb’ aj Kristiano. Chan ru taayal aaq’e re xtawb’al lix junajil li Jesus rik’in li Yuwa’b’ej?
Chi’ilmanq ajwi’Quentin L. Cook, “Kemb’il sa’ komonil lix ch’ooleb’ rik’in junajil ut rik’in rahok,” Jolomil ch’utub’aj-ib’ re octubre 2020; Sharon Eubank, “Rik’in li junajil naqak’ul lix wankilal li Dios,” Jolomil ch’utub’aj-ib’ re octubre 2020.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Jwan 14:5–6.Eb’ li komon re laa junkab’al naru nawulak chiruheb’ xk’amb’al xb’e li junkab’al sa’ jun li b’eek chiru jun ch’ina b’e. Chan ru naq li Jesus a’an “li b’e”? B’ar nokoxk’am?
-
Jwan 14:26–27.K’a’ru xjalanil li tuqtuukilal naxk’e li Jesus rik’in li “naxk’e li ruchich’och’ ”? Eb’ li komon re li junkab’al naru neke’xye chan ru xe’xtaw li tuqtuukilal ut xkawileb’ xch’ool rik’in li Santil Musiq’ej.
-
Jwan 15:1–8.Maare us raj rilb’aleb’ li raqal a’in chirix kab’l, chixk’atq jun xtoonal li uva malaj jalan chik xtoonal li che’. K’a’ru neke’xk’ul li ruq’ li che’ naq neke’mich’e’ chiru lix toonal? Naru neketz’il rix chan ru juntaq’eeto rik’in li ruq’ li che’ ut li naraj naxye “wank” rik’in li Kolonel ut “uuchink.”
-
Jwan 15:17–27; 16:1–7.K’a’ut nakak’oxla naq li Jesukristo kixtijeb’ lix tzolom chirix li rahob’tesiik? Chan ru naq neke’rahob’tesiik lix tzolom li Kristo sa’eb’ li kutan a’in? Chan ru naq li raatin li Kolonel sa’eb’ li raqal a’in naru chiqatenq’ankil naq naqak’ul li rahob’tesiik?
-
Jwan 16:33.Chan ru naq li Jesukristo kixq’ax ru xwankil li ruchich’och’? Chan ru naq lix tojb’al rix li maak naxk’e qatuqtuukilal ut qapaab’aal? (chi’ilmanq ajwi’ Tzol’leb’ ut Sumwank 68:6).
-
Jwan 17:21–23.K’a’ raj ru taatenq’anq re li junkab’alej chi wank sa’ junajil jo’ li Jesukristo ut li Yuwa’b’ej junajeb’? Maare naru nekex’aatinak chirix junaq li ch’uut aj b’atz’unel li nawulak cheru ut chan ru neke’k’anjelak sa’ junajil re xb’aanunkil junaq li rajomeb’. Malaj naru nekerab’i junaq li coro ut teetz’il rix chan ru naq eb’ laj toch’ol son neke’xch’utub’ rib’ chixtoch’b’al ch’ina-usil b’ich.
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Li Santil Musiq’ej,” B’ichleb’aal choq’ reheb’ li Kok’al, 56.
Xkawresinkil qib’ jo’ aj k’utunel
Oksi li chapb’il aatin. Naq nakak’uteb’ li loq’laj hu chiru laa junkab’al, naru taak’oxla roksinkileb’ li loq’laj hu chi chapb’il li aatin, jo’ natawman sa’ ChurchofJesusChrist.org malaj sa’ li aplicacion Biblioteca del Evangelio. K’a’jo’ naq naru nak’anjelak rab’inkil Jwan 14–17 xb’aan naq wan naab’al li raatin li Kolonel sa’eb’ li ch’ol a’in.
Li Jesus kixk’ut, “Laa’in lix toonal li uva, laa’ex li ruq’ ” (Jwan 15:5).