“8–14 mayo. Mateo 19–20; Markos 10; Lukas 18: “K’a’ru maji’ ninb’aanu?,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“8–14 mayo. Mateo 19–20; Markos 10; Lukas 18,” Kim, Taaqehin—Choq’ reheb’ li komon ut li junkab’al: 2023
8–14 mayo
Mateo 19–20; Markos 10; Lukas 18
“K’a’ru maji’ ninb’aanu?”
Chawil ut chak’oxla Mateo 19–20; Markos 10; ut Lukas 18, ut taak’e reetal li na’leb’ nakak’ul. K’e reetal li na’leb’ k’eeb’il aawe, ut k’oxla chan ru naq taak’anjela.
Tz’iib’a li nakak’oxla
Wi ta tatruuq chixpatz’b’al jun patz’om chiru li Kolonel, k’a’ raj ru taapatz’? Naq jun li saaj winq b’ihom kixnaw ru li Kolonel xb’een wa, kixpatz’, “K’a’ru li chaab’ilal tinb’aanu re naq tweechani li junelik yu’am?” (Mateo 19:16). Lix sumehom li Kolonel naxk’ut naq kixb’antioxi li k’a’ru chaab’il ak xb’aanu li saaj winq, ut kixq’unb’esi xch’ool rik’in rahok naq toj wan k’a’ru tixb’aanu. Naq naqak’oxla li junelik yu’am, wan ajwi’ naq maare laa’o taqapatz’ ma toj wan chik li k’a’ru tento raj taqab’aanu. Naq naqapatz’ jo’ kixpatz’ a’an, “K’a’ru maji’ ninb’aanu?” (Mateo 19:20), li Qaawa’ naru chixk’eeb’al xsumenkil choq’ qe laa’o, jo’ chanru naq kixk’e re li saaj winq b’ihom. Maak’a’ naxye k’a’ru naxpatz’ li Qaawa’ naq taqab’aanu, re xb’aanunkil li k’a’ru naxsume wi’, junelik na’ajman ru naq taqakanab’ qib’ chiru a’an, ut ink’a’ chiru li qatiikilal laa’o (chi’ilmanq Lukas 18:9–14) ut naq “taqak’ul lix awa’b’ejihom li Dios jo’ junaq ch’ina al” (Lukas 18:17; chi’ilmanq ajwi’ 3 Nefi 9:22).
Li na’leb’ re xtzolb’aleb’ li loq’laj hu aajunes
Li sumlaak wan wi’ jun winq rik’in jun ixq, k’ojob’anb’il xb’aan li Dios.
Sa’ li seraq’ a’in kiwan wi’ li Kolonel rik’ineb’ laj Fariseo, wan jun paay chi aatin kixye li Kolonel chirix li sumlaak. Chirix rilb’al Mateo 19:3–9 ut Markos 10:2–12, tz’iib’a junjunq li na’leb’ li nakak’oxla naq naxye resil li kixk’oxla li Qaawa’ chirix li sumlaak. Chirix a’an naru nakatzol junqaq reheb’ li na’leb’ li neke’tawman sa’ “Matrimonio” (Temas del Evangelio, topics.ChurchofJesusChrist.org), ut naru nakatz’iib’a xkomon chik li na’leb’. Chan ru naq laa nawom chirix lix k’uub’anb’il na’leb’ li Yuwa’b’ej re li kolb’a-ib’ naxjal aak’a’uxl ut aaweek’ahom chirix li sumlaak?
Ma kixk’ut li Jesus naq li jachok-ib’ maajo’q’e us, ut naq eb’ li jachb’ileb’ rib’ tento naq ink’a’ te’sumlaaq wi’chik?
Sa’ jun yehom chirix li jachok-ib’, li Awa’b’ej Dallin H. Oaks kixye naq li qaChoxahil Yuwa’ naraj naq li sumlaak taawanq chi junelik. A’b’anan, li Dios naxtaw ajwi’ ru naq li jachok-ib’ wan naq aajel ru. Li Awa’b’ej Oaks kixch’olob’ naq li Qaawa’ “naxkanab’eb’ li jachb’ileb’ rib’ chi sumlaak wi’chik chi moko wan ta sa’ xb’eeneb’ xtz’ajnil li maak li ch’olob’anb’il sa’ li taqenaqil chaq’rab’. Wi jun li komon li xjach rib’ ink’a’ xb’aanu li ninqi q’etok aatin, a’an naru chixk’ulb’al jun xhuhil li santil ochoch rik’in xpaab’ankil li elajinb’il chiruheb’ li jun siir chik chi komon” (“El divorcio,” Liahona, mayo 2007, 70).
Mateo 19:16–22; Markos 10:17–22; Lukas 18:18–23
Wi ninpatz’ re li Qaawa’, a’an tixk’ut chiwu k’a’ru tento tinb’aanu re tinweechani li junelik yu’am.
Li k’a’ru kik’ulman rik’in li saaj winq b’ihom naru naxk’e chi k’oxlak jun li tzolom li xpaab’ank chiru chixjunil lix yu’am. Naq nakawil Markos 10:17–22, k’a’ru nakawil li naxk’ut chawu naq chaab’il ut anchal xch’ool li saaj winq? Chan ru kixsume li Kolonel li saaj aj b’ihom?
Li seraq’ a’in naru nakatxk’am chixpatz’b’al aawib’, “K’a’ru maji’ ninb’aanu?” (Mateo 19:20). Chan ru nokoxtenq’a li Qaawa’ chixb’aanunkil li maji’ naqab’aanu? (chi’ilmanq Eter 12:27). K’a’ru naru naqab’aanu re xkawresinkil qib’ re xk’ulub’ankil li tuqub’aak ut tenq’aak naq yooko chi elk chi uub’ej?
Chi’ilmanq ajwi’ Larry R. Lawrence, “K’a’ru maji’ ninb’aanu?,” Jolomil ch’utub’aj-ib’ re octubre 2015; S. Mark Palmer, “Li Jesus kixka’ya, kixra,” Jolomil ch’utub’aj-ib’ re abril 2017.
Chixjunileb’ neke’ru chixk’ulb’al li osob’tesink re li junelik yu’am, maak’a’ naxye jo’q’e neke’xk’ul li evangelio.
Ma naru nakaye resil li ke’xk’ul laj k’anjelenel sa’ li awimq? K’a’ru li na’leb’ nakatzol laa’at sa’ li aatin a’in? Li raatin li Elder Jeffrey R. Holland “Los obreros de la viña” (Liahona, mayo 2012, 31–33) naru tatxtenq’a chirilb’al chan ru xk’anjelankil li jaljookil ru aatin a’in. K’a’ chik ru li na’leb’ naxk’e aawe li Musiq’ej?
Laj titz’ol toj li yot’b’il xch’ool ut laj Fariseo aj q’etq’et sa’ li santil ochoch, xb’aan laj Frank Adams
Tento tinkanab’ wib’ chiru li ruxtaan li Dios, ut moko chiru ta lin tiikilal laa’in.
Chan raj ru taawotz chi ka’ch’in ru lix jalanileb’ li wiib’ chi tij a’in sa’ li jaljookil ru aatin a’in? K’oxlan chirix li naru taab’aanu re naq chanchanaqat laj titz’ol toj ut ink’a’ laj Fariseo.
Chi’ilmanq ajwi’ Filipenses 4:11–13; Alma 31:12–23; 32:12–16.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Markos 10:13–16; Lukas 18:15–17.Re xtenq’ankil laa junkab’al chi na’leb’ak chirix li seraq’ wan sa’eb’ li raqal a’in, naru nekeb’icha sa’ komonil jun li b’ich, maare “Xwab’i resilal li xk’ulman chaq najter” (B’ichleb’aal choq’ reheb’ li kok’al, 35). Chan tawi’ raj ru wank sa’ xyanqeb’ li kok’al li kirosob’tesiheb’ li Jesus? K’a’ru naraj naxye “xk’ulb’al li rawa’b’ejihom li Dios jo’ jun ch’ina al”? (Markos 10:15).
-
Markos 10:23–27.K’a’ru xjalanil naq wan li b’ihomal rik’in naq naqak’e qach’ool chirix li b’ihomal? (chi’ilmanq Markos 10:23–24). Naq nakawil li raqal 27, naru nakak’ut li k’a’ru naxye li jaltesinb’il ru xb’aan laj Jose Smith: “Chiruheb’ li winq li neke’xkanab’ rib’ chiru li b’ihomal, ink’a’ naru; a’ut moko wan ta chi ink’a’ naru chiruheb’ li winq li neke’xkanab’ rib’ chiru li Dios ut neke’xkanab’ chixjunil choq’ we laa’in, xb’aan naq rik’ineb’ a’in naru chixjunil li na’leb’ a’in” (sa’ Markos 10:27, chi jaltesinb’il ru xb’aan laj Jose Smith). Jo’ junkab’al, chan ru naqak’ut naq naqak’e qach’ool rik’in li Dios ut ink’a’ sa’ li b’ihomal?
-
Mateo 20:1–16.Re xk’utb’aleb’ li raqal chi na’leb’ sa’ Mateo 20:1–16, naru taak’uub’ jun ch’ina b’atz’unk, jo’ jun li carrera. Chirix naq xe’xchoy li carrera, k’e li maatan chi juntaq’eet re chixjunileb’, ut taatikib’ rik’in li xkana chi ixej toj rik’in li xq’axok-u. K’a’ru naxk’ut a’in chiqu chirix ani na’osob’tesiik rik’in li junelik yu’am, sa’ lix k’uub’anb’il na’leb’ li qaChoxahil Yuwa’?
-
Mateo 20:25–28; Markos 10:42–45.K’a’ru xyaalalil li aatin “Ani naraj naq nimaq xwankil sa’ eeyanq, a’anaq laj k’anjel cheru”? (Mateo 20:27). Chan ru naq li Jesukristo kixk’ut rik’in xb’aanuhom li na’leb’ a’in? Chan ru naru taqab’aanu li kixb’aanu a’an sa’ li qajunkab’al, li qateep, ut li qatenamit?
-
Lukas 18:1–14.K’a’ru naqatzol chirix li tijok sa’ li wiib’ chi jaljookil ru aatin sa’eb’ li raqal a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Ex kok’al, li Dios texril,” Eb’ li B’ich, 51.
Xkawresinkil aawib’ chi tzolok
Taw jo’q’e naru tattzoloq. Wan naq us wi’chik tzolok naq nakatru chixtzolb’aleb’ li loq’laj hu naq maa’ani taa’aatinanq aawe. K’oxla jun hoonal li taak’anjelaq aawe, ut k’e aach’ool chi tzolok sa’ li hoonal a’an wulaj wulaj.
Li Kristo ut li saaj aj b’ihom, xb’aan laj Heinrich Hofmann