“3–9 abril. Li Paswa: “At kamk, b’ar wank laa wankil?,” ” Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023 (2022)
“3–9 abril. Li Paswa,” Kim, Taaqehin—Choqʼ re li Tzoleb’aal reheb’ li Kok’al: 2023
3–9 abril
Li Paswa
“At kamk, b’ar wank laa wankil?”
Oksi li hoonal rik’ineb’ li kok’al re xtenq’ankileb’ chirilb’al li Paswa jo’ jun li hoonal re saho’k ch’oolej chirix li Kolonel ut xnimob’resinkil lix b’antioxihomeb’ xb’aan lix mayej. Eb’ li na’leb’ sa’ li tusleb’ aatin a’in naru neke’oksiman re aatenq’ankil chixtzolb’aleb’ li kok’al a’ yaal jarub’ chihab’ wan reheb’.
Xkanab’ankileb’ chi wotzok
K’uteb’ xjalam-uuch li Kolonel sa’ Getsemani, chiru li krus, ut chirix lix waklijik chi yo’yo (chi’ilmanq li jalam-uuch sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al ut Hu reheb’ li Jalam-uuch re li Evangelio, 56–60). Patz’ reheb’ li kok’al naq te’xwotz k’a’ru neke’xnaw chirixeb’ li jalam-uuch a’an.
Xk’utb’al li tzol’leb’: Kok’al toj ka’ch’ineb’ xyu’am
Li Jesukristo, a’an lin Kolonel.
Naq yookat chirilb’al ru li esil chirix lix tojb’al rix li maak xb’aan li Jesukristo, tz’il rix chan ru naru nakatenq’aheb’ li kok’al chireek’ankil lix rahom li Jesus.
Kok’ k’anjel naru chi b’aanumank
-
K’ut jun xjalam-uuch li Jesus, ut patz’ reheb’ li kok’al naq te’xye k’a’ru neke’xnaw chirix li kixb’aanu a’an choq’ qe. Ch’olob’ xyaalal lix rahom li Kolonel ut lix wankilal chiqakolb’al chiru li maak. Chap jun li lem chi kutankil, ut kanab’eb’ naq chixjunileb’ li kok’al te’ril rib’ chi sa’. Naq taaril rib’ li junjunq reheb’, laa’at taaye, “Li Jesus naxra laj/lix [xk’ab’a’], ut naru naxtenq’a laj/lix [xk’ab’a’] chi sutq’iik rik’in li qaChoxahil Yuwa’.”
-
K’ut li jalam-uuch Li Kristo natijok sa’ Getsemani (Hu reheb’ li Jalam-uuch re li Evangelio, 56) naq taaye li seraq’ naq li Jesus kixk’ul rahilal sa’ Getsemani xb’aan lix maakeb’ li ruchich’och’ (chi’ilmanq Mateo 26:36–46; Lukas 22:39–44). Ch’olob’ xyaalal naq sa’ xk’ab’a’ naq li Jesus kixnumsi rahilal, naru nakuye’ qamaak naq xqasik’ ru li ink’a’ us. Naru ajwi’ nakawoksi “Ch’ol 51: Li Jesus naxnumsi rahilal sa’ li awimq Getsemani,” Eb’ li Esilal sa’ li Ak’ Chaq’rab’, 129–132, malaj li video sa’ ChurchofJesusChrist.org).
-
B’ichahomaq jun li b’ich chirix li rahok, maare “Ninnaw naq raab’ilin” (B’ichleb’aal choq’ reheb’ li Kok’al, 42─43). Tenq’aheb’ li kok’al chixtawb’aleb’ li raatinul li b’ich li neke’xch’olob’ lix rahom li Kolonel. K’a’ru nokoxtenq’a chireek’ankil lix rahom a’an? Chan ru naru taqatenq’aheb’ li qas qiitz’in chireek’ankil lix rahom?
Waklijenaq, xb’aan laj Greg Olsen
Sa’ xk’ab’a’ naq li Jesus kikam ut kiwakli chi yo’yo, taawanq wi’chik inyu’am.
Chan ru taatenq’aheb’ li kok’al chixtawb’al ru naq, sa’ xk’ab’a’ li Jesukristo, laa’o ut eb’ li neke’qara toowakliiq chi yo’yo sa’ jun kutan?
Kok’ k’anjel naru chi b’aanumank
-
K’ut chiruheb’ li kok’al li seraq’ chirix li Paswa rik’in roksinkileb’ xjalam-uuch li Kristo sa’ Getsemani, chiru li krus, ut chirix lix waklijik chi yo’yo (chi’ilmanq Hu reheb’ li Jalam-uuch re li Evangelio, 56–60 jo’ ajwi’ li jalam-uuch li natawman sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Kanab’eb’ junjunq li kok’al chixchapb’aleb’ li jalam-uuch naq yookat chixyeeb’al li seraq’. Aatinan rik’ineb’ li kok’al chirix junjunq reheb’ li kristiaan li ke’ilok re li Jesus chirix naq kiwakli chi yo’yo: maare li xMaria (chi’ilmanq Jwan 20:1–18) malaj laj Tomas (chi’ilmanq Jwan 20:24–29).
-
Patz’ reheb’ li kok’al k’a’ut naq naninq’ehiman li Paswa. Ch’olob’ naq chiru li Paswa naninq’ehiman li kutan naq li Jesukristo kiwakli chi yo’yo. Patz’ ma taawulaq raj chiruheb’ xwotzb’al li k’a’ru naxb’aanu lix junkab’al re xjultikankil lix waklijik chi yo’yo li Jesukristo.
-
Ch’olob’ naq li wakliik chi yo’yo naraj naxye wank wi’chik chi yo’yo chirix li kamk. Ch’olob’ xyaalal naq sa’ xk’ab’a’ li Jesukristo, toowakliiq chi yo’yo—taawanq wi’chik qayu’am chirix naq ak xookam, ut maajun wa chik tookamq.
-
Oksi jun li ramleb’ uq’ re xk’utb’al chiruheb’ li kok’al naq chiqajunilo wan qajunxaqalil (eetalinb’il rik’in li ramleb’ uq’) ut li qamusiq’ (eetalinb’il rik’in li uq’ej). Naq nokokam, li qamusiq’ ut li qajunxaqalil neke’xjach rib’. Li qamusiq’ toj nakana chi yo’yo, a’b’an li qajunxaqalil ink’a’. Naq nokowakli chi yo’yo, li qamusiq’ ut li qajunxaqalil neke’xjunaji wi’chik rib’. Kanab’eb’ li kok’al chiroksinkil li ramleb’ uq’ ut chirisinkil wi’chik.
-
B’ichahomaq jun li b’ich re li Paswa, maare “Ma yaal naq li Jesus xwakli,” malaj “Xwakli Jesus” (B’ichleb’aal choq’ reheb’ li Kok’al, 45, 44) ut k’ut chiruheb’ li kok’al li jalam-uuch naq ak xwakli chi yo’yo (Hu reheb’ li Jalam-uuch re li Evangelio, 59–61).
-
K’ut lix jalam-uuch ani nakanaw ru li kikam. Wotz lix nawom aach’ool naq a’an taawakliiq chi yo’yo sa’ xk’ab’a’ lix tojb’al rix li maak xb’aan li Jesukristo ut lix waklijik chi yo’yo.
-
Ilomaq li video “Jesús resucita” malaj “El Señor resucitado se aparece a los Apóstoles” (ChurchofJesusChrist.org). Malaj k’ut jalan chik li video re li Paswa sa’ Easter.ComeuntoChrist.org.
Xk’utb’al li tzol’leb’: Kok’al ak ninqeb’
Li Jesus kixnumsi rahilal sa’ ink’ab’a’ sa’ Getsemani ut chiru li krus.
Naq yookat chixtzolb’aleb’ li loq’laj hu chiru li xamaan a’in, k’oxla chan ru taatenq’aheb’ li kok’al chixkawob’resinkil xpaab’aaleb’ chirix li Jesukristo ut lix tojb’al rix li maak xb’aan.
Kok’ k’anjel naru chi b’aanumank
-
Il ru rik’ineb’ li kok’al Lukas 22:39–44 ut junjunqeb’ li raqal sa’ Mateo 27:29–50. Patz’ reheb’ naq te’xsik’ li aatin li taatenq’anq reheb’ chixtawb’al ru li kixnumsi li Kolonel sa’ Getsemani ut chiru li krus.
-
Tenq’aheb’ li kok’al chixkanab’ankil sa’ xk’a’uxleb’ li rox xraqalil li paab’aal. Ch’olob’ xyaalal naq li Jesukristo wan xwankil re qakolb’al chiru li maak ut chiru li kamk.
-
Tenq’aheb’ li kok’al chixkawresinkileb’ li kok’ esil chirix lix tojb’al rix li maak xb’aan li Jesukristo li naru neke’xwotz rik’ineb’ li kristiaan. Waklesiheb’ xch’ool chixk’eeb’al sa’eb’ lix kok’ esil jun li raqal re li loq’laj hu ut lix nawom xch’ooleb’. Wi neke’raj xkomon chik xtenq’, naru te’ril “Xtojb’al rix li maak” sa’ li K’utul Raqal reheb’ li Loq’laj Hu.
Sa’ xk’ab’a’ naq li Jesus kikam ut kiwakli chi yo’yo, taawanq wi’chik inyu’am.
Eb’ li kok’al li nakatzoleb’ sa’ jun kutan te’nume’q chiru lix kamik junaq lix komoneb’ wi toj maji’ neke’nume’ chiru a’an. Tenq’aheb’ chixnawb’al naq sa’ xk’ab’a’ naq li Jesukristo kiwakli chi yo’yo, chiqajunilo toowakliiq chi yo’yo.
Kok’ k’anjel naru chi b’aanumank
-
K’uteb’ li jalam-uuch 57–59 sa’ Hu reheb’ li Jalam-uuch re li Evangelio, ut patz’ reheb’ li kok’al naq te’xk’e chixk’ul rib’ li jalam-uuch rik’ineb’ li raqal a’in: Mateo 27:29–38, 59–60; Jwan 20:10–18.
-
B’oqeb’ li kok’al chirilb’al ru xjuneseb’ “Wakliik chi yo’yo” sa’ li K’utul Raqal reheb’ li Loq’laj Hu, ut chixtawb’al li k’a’ru te’raj xwotzb’al rik’ineb’ lix junkab’al. K’e xhoonaleb’ li kok’al chixwotzb’al li k’a’ru xe’xtaw.
-
Tenq’aheb’ li kok’al chixsik’b’al sa’ li wan chi sa’ re li B’ichleb’aal choq’ reheb’ li Kok’al re xtawb’al jun li b’ich chirix li Jesukristo malaj chirix li wakliik chi yo’yo li te’raj raj xb’ichankil. B’ichahomaq li b’ich, ut patz’ reheb’ li kok’al k’a’ru neke’xtzol sa’ li b’ich a’an.
-
K’ut li video “Jesús resucita” (ChurchofJesusChrist.org), ut patz’ re junjunq li kok’al naq te’xwotz lix nawomeb’ xch’ool chirix lix tojb’al rix li maak xb’aan li Jesukristo ut lix waklijik chi yo’yo. (Maare taapatz’ a’in reheb’ wiib’ oxib’ li kutan rub’elaj li tzolok re naq te’xkawresi rib’.) B’oqeb’ li kok’al chixtz’iib’ankil lix nawom xch’ooleb’ re naq te’xwotz sa’ kab’l.
Xb’oqb’aleb’ chi tzolok sa’ kab’l
Re xtenq’ankileb’ li kok’al chixwotzb’al rik’ineb’ lix junkab’al li k’a’ru xe’xtzol, waklesiheb’ xch’ool chixb’ichankil jun li b’ich chirix li Jesukristo chiru li xamaan a’in sa’ kab’l.
Xkawresinkil qib’ jo’ aj k’utunel
Eb’ li kok’al neke’xtaw ru chi us naq naka’sutiman li nak’ute’. Matxuwak chixb’aanunkileb’ li kok’ k’anjel naab’al sut, a’ tz’aqal rik’ineb’ li kok’al toj ka’ch’ineb’ xyu’am. Li ka’sutink tixtenq’aheb’ chixjultikankil li taak’ut chiruheb’.