3–9 abril

Li Paswa

“At kamk, b’ar wank laa wankil?”

Naq nakawileb’ li esil chirix lix waklijik li Kolonel chi yo’yo sa’ li tusb’il aatin a’in, k’e reetal li eek’ahom ut li na’leb’ tixk’e aawe li Santil Musiq’ej.

Tz’iib’a li nakak’oxla

Chiru lix raqikil xamaan lix yu’am li Kolonel, naab’aleb’ laj Judio yookeb’ chixb’aanunkil li k’anjel re li Paswa sa’ xsutam a’an. Ke’xk’uub’ li wa, ke’xb’ichaheb’ li b’ich, ut ke’ch’utla re xjultikankil chan ru naq ke’kole’ lix junkab’al laj Israel chiru li preexil wankeb’ wi’ chiruheb’ laj Egipto. Eb’ li junkab’al ke’rab’i li seraq’ chirix li anjel aj sachonel naq kinume’ sa’ xb’eeneb’ li rochocheb’ lix xe’ xtooneb’ li ke’xb’on xkik’el li karneer chiru rokeb’aal li rochocheb’. Sa’ xyi chixjunil li ninq’ehik a’in sa’ li wan wi’ k’iila reetalil li kole’k, ka’ch’in xk’ihaleb’ li ke’xnaw naq li Jesukristo, lix Karneer li Dios, ok re chixkolb’aleb’ chiru li preexil chiru li maak ut li kamk—rik’in lix rahil, lix kamik, ut lix waklijik chi yo’yo. Wankeb’ ajwi’ li ke’k’uluk re li Jesus jo’ lix Mesias li yeechi’inb’il chaq, li taakoloq reheb’ chi junelik. Chalen chaq sa’ li kutan a’an, eb’ lix tzolom li Jesukristo xe’xk’ut xyaalal chiru chixjunil li ruchich’och’ “naq li Kristo kikamk xb’aan li qamaak … ; kimuqe’k ut kiwakliik chi yo’yo sa’ rox li kutan” (1 Korintios 15:3–4).

Li na’leb’ re xtzolb’aleb’ li loq’laj hu aajunes

Mateo 21–28

Li Jesukristo nikinxkol chiru li maak ut li kamk, nikinixkawob’resi sa’ xq’unal wu, ut naxk’ojob’ inch’ool sa’eb’ lix yalb’al wix.

Jun na’leb’ re xk’oxlankil li osob’tesink nachal rik’in lix tojb’al rix li maak xb’aan li Kolonel sa’ li xamaan a’in, a’an xnumsinkil li hoonal wulaj wulaj sa’ rilb’al resil lix raqikil xamaan lix yu’am li Jesus (wan arin jun tusleb’aal kutan re taawil). K’a’ru nakawil sa’eb’ li ch’ol a’in li nakatxtenq’a chireek’ankil naq raab’ilat xb’aan li Kolonel? K’oxla li neke’xk’ut chawu eb’ li ch’ol a’in chirix lix wankil li Kolonel chakolb’al chiru li maak, li kamk, li yale’k, ut li q’unal ch’oolej. Chan ru naq yookat chixk’anjelankil aapaab’aal chirix lix wankilal a’an chi kolok?

• Domingo: Ki’ok sa’ Jerusalen rik’in wankilal (Mateo 21:6–11)

• Lunes: Kixsaqob’resi ru li santil ochoch (Mateo 21:12–16)

• Martes: Kik’utuk sa’ Jersualen (Mateo 21–23)

• Miercoles: Toj yoo chi k’utuk (Mateo 24–25)

• Jueves: Li Paswa, ut li Kristo kixk’ul rahilal sa’ li Awimq Getsemani (Mateo 26)

• Viernes: Kiraqe’ aatin chirix, kikamsiik chiru krus, ut kimuqe’ (Mateo 27:1–61)

• Sabado: Kikana lix tib’el li Kristo sa’ li muqleb’aal (Mateo 27:62–66) ut lix musiq’ kik’anjelak sa’ li ruchich’och’ reheb’ li musiq’ej (Tzol’leb’ ut Sumwank 138)

• Domingo: Lix waklijik chi yo’yo li Jesukristo ut lix k’utb’al rib’ chiruheb’ lix tzolom (Mateo 28:1–10)

Chi’ilmanq ajwi’ Easter.ComeuntoChrist.org.

Xkamik chiru krus, xb’aan li xLouise Parker

Mateo 28:1–10; Lukas 24:13–35; Jwan 20:19–29; 1 Korintios 15:1–8, 55

K’iila aj yehol nawom ke’xch’olob’ xyaalal lix waklijik li Jesukristo chi yo’yo.

K’oxla chan ru naq kiwan choq’ reheb’ li tzolom naq ke’ril li Jesus chi eetz’uuk, chi rahob’tesiik, ut chi kamsiik chiru krus. Eb’ a’an ke’ril chaq lix wankilal, ke’reek’a chaq naq yaal li raatin, ut ke’wan xpaab’aal naq a’an li Ralal li Dios. Maare chirix lix kamik eb’ lix tzolom ke’raho’ ut ke’sach xch’ool. A’b’anan chirix a’an ke’wulak jo’ aj yehol nawom chirix lix sachb’a-ch’oolejil waklijik chi yo’yo.

K’a’ru naru nakatzol rik’in li esil li ke’xtz’iib’a li ani ke’ilok re li Kolonel chi waklijenaq chi yo’yo? K’e reetalil malaj tz’iib’a li k’a’ru kixk’ul li junjunq sa’ Mateo 28:1–10; Lukas 24:13–35; Jwan 20:19–29; ut 1 Korintios 15:1–8, 55. (Neke’tawman xkomoneb’ chik li ke’ilok re li Kristo naq waklijenaq chi yo’yo sa’ 3 Nefi 11; Mormon 1:15; Eter 12:38–39; Tzol’leb’ ut Sumwank 76:19–24; 110:1–10; ut Jose Smith—Resilal 1:15–17.) K’a’ru xwulak chawu chirix lix nawom xch’ooleb’ laj yehol nawom? Chirix naq kiwakli li Kolonel chi yo’yo, wankeb’ chik li ke’wakli chi yo’yo ut ke’xk’ut rib’ chiru naab’aleb’ (chi’ilmanq Mateo 27:52–53; 3 Nefi 23:9). Chan ru naq laa paab’aal chirix li Kolonel ut lix waklijik chi yo’yo nakatxtenq’a?

Chi’ilmanq ajwi’ “Jesús resucita,” “El Señor resucitado se aparece a los Apóstoles,” “Bienaventurados los que no vieron y creyeron” (eb’ li video), ChurchofJesusChrist.org.

1 Pedro 1:3–11

Li Jesukristo naxk’e inyo’onihom ut xsahil inch’ool.

K’a’ru li aatin malaj li raqal chi aatin sa’ 1 Pedro 1:3–11 li naxk’e aayo’onihom sa’ xk’ab’a’ li Jesukristo? Jo’q’e xaweek’a li yo’onink a’an?

Li Elder Gerrit W. Gong kixch’olob’ naq li wakliik chi yo’yo “naxk’e xyo’onihom li ani xsach li roq malaj li ruq’; li mutz’ li ru, li tz’ap xik, li ink’a’ nab’eek; malaj li anchal maajo’q’e nakotz junaq xmajelal sa’ xtib’el malaj sa’ xk’a’uxl, malaj jalan jalanq chik chi yajel. Nokoxtaw li Kristo. Nokoxk’irtesi. … Rik’in naq “li Dios ajwi’ naxtoj rix lix maak li ruchich’och’,” [Alma 42:15], … naru tooxtenq’a sa’ uxtaan jo’ chanru li qamajelal. … Laa’o naqayal qaq’e ut naqajal qak’a’uxl. Li Qaawa’ nokoxsut “sa’ ruq’ lix rahom” [2 Nefi 1:15]” (“Hosanna ut aleluya—Li yo’yookil Kristo: Tz’aqal xch’oolil li Paswa ut li k’ojob’ank wi’chik,” Jolomil ch’utub’aj-ib’ re abril 2020).

Chi’ilmanq ajwi’ Alma 27:28; 36:1–24; 3 Nefi 9:11–17; Moroni 7:40–41.

Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al

ComeuntoChrist.org.Easter.ComeuntoChrist.org naxch’olob’ li kik’ulman rajlal kutan chiru li xamaan naq ak kamk re li Kolonel. Chiru li junjunq kutan re li xamaan, texruuq chirilb’al li tz’iib’anb’il, re rilb’al k’a’ru kixb’aanu li Kolonel sa’ li kutan a’an, malaj texruuq chirilb’al ru resil li xamaan a’an sa’ li Santil Hu jo’ junkab’al (chi’ilmanq li k’a’ru tz’iib’anb’il sa’ li raqal “Li na’leb’ re xtzolb’aleb’ li loq’laj hu aajunes”).

Eb’ li B’ich ut B’ichleb’aal choq’ reheb’ li Kok’al.Naru teeb’ichaheb’ li b’ich chirix lix tojb’al rix li maak ut chirix lix waklijik li Kolonel chiru li xamaan a’an, maare junqaqeb’ li ink’a’ jwal nekenaw. (Chi’ilmanq li tusleb’aal na’leb’ sa’ Eb’ li B’ich malaj B’ichleb’aal choq’ reheb’ li Kok’al, rub’eleb’ li na’leb’ jo’ “Xtojb’al rix li maak,” “Rahil kutan,” ut “Wakliik chi yo’yo.”) Re xtenq’ankileb’ li komon chixtzolb’aleb’ li b’ich, naru taak’uteb’ li jalam-uuch li neke’xk’am rib’ rik’in li aatin.

“Jesukristo” sa’ li Biblioteca del Evangelio.Sa’ jun raqal re li Biblioteca del Evangelio li naxk’ab’a’in “Jesukristo” wankeb’ li video, jalam-uuch, ut b’ich li neke’ru chi tenq’ank re laa junkab’al chixninq’ehinkil ru lix waklijik li Kolonel chiru li Paswa a’in.

“Li Yo’yookil Kristo: Lix Ch’olob’ahomeb’ li Apostol.”Jo’ junkab’al, ilomaq “Li Yo’yookil Kristo: Lix Ch’olob’ahomeb’ li Apostol” (ChurchofJesusChrist.org). B’oqeb’ chi junjunqal sa’ laa junkab’al chixsik’b’al ru junaq li raqal chirix li Paswa sa’ li hu a’in re te’xwotz rik’ineb’ jalan chik. Jo’ jun eetalil, taaruuq raj te’xk’uub’ jun li k’utleb’ aatin re xk’eeb’al sa’ li redes sociales, chiru rokeb’aal laa wochoch, malaj sa’ rilob’aal laa wochoch.

Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.

Jun b’ich naru xb’ichankil: “Xwakli Jesus,” B’ichleb’aal choq’ reheb’ li Kok’al, 44.

Xkawresinkil aawib’ chi tzolok

K’eheb’ li meta li nakatru chixb’aanunkil. Wi ta raj taanumsi yal junjunq k’asal wulaj wulaj re xtzolb’aleb’ li loq’laj hu, taaruuq taa’osob’tesiiq laa yu’am. K’e aach’ool chi tzolok wulaj wulaj, ut k’oxla k’a’ru taab’aanu re taajultiko’q aawe, ut yal aaq’e chixb’aanunkil. Wi nasach sa’ aach’ool, mich’ina aach’ool. Ka’ajwi’ taatikib’ wi’chik.

Getsemani, xb’aan laj Adam Abram