“10–16 abril. Mateo 15–17; Markos 7–9: “Laa’at li Kristo,” ” Kim, Taaqehin—Choq’ reheb’ li komon ut li junkab’al: Li Ak’ Chaq’rab’ 2023 (2022)
“10–16 abril. Mateo 15–17; Markos 7–9,” Kim, Taaqehin—Choq’ reheb’ li komon ut li junkab’al: 2023
Li jaltesiik ru, xb’aan laj Carl Heinrich Bloch
10–16 abril
Mateo 15–17; Markos 7–9
“Laa’at li Kristo”
Rilb’al li loq’laj hu naxb’oq li Loq’laj Musiq’ej sa’ laa yu’am. Jun lix nimal ru xk’anjel li Santil Musiq’ej, a’an ch’olob’ank chirix li Jesukristo. Naq taawil ru li loq’laj hu chiru li xamaan a’in, k’e aach’ool chireek’ankil li musiq’anb’il eek’ahom li tixkawresi laa nawom chirix li Kolonel.
Tz’iib’a li nakak’oxla
Ma ink’a’ sachol ch’oolej naq eb’ laj Fariseo ut eb’ laj Saduceo ke’relaji naq li Jesus tixk’ut chiruheb’ “junaq eetalil taachalq sa’ choxa”? Ma ink’a’ tz’aqaleb’ li k’iila sachb’a-ch’oolej li ak xb’aanu chaq? Ma ink’a’ xk’ut ajwi’ li na’leb’ nim xwankil, ut kixtz’aqob’resi ru k’iila profeetil aatin re najter? Ke’relaji a’in, moko rik’in ta naq maak’a’eb’ li eetalil ke’k’utman, rik’in b’an naq ink’a’ ke’ru chixk’eeb’al reetaleb’ li eetalil ut chixk’ulub’ankileb’. (Chi’ilmanq Mateo 16:1–4.)
Laj Pedro, jo’eb’ laj Fariseo ut eb’ laj Saduceo, kirileb’ li sachb’a-ch’oolej kixb’aanu li Kolonel, ut kirab’i li k’a’ru kixk’ut. A’b’anan lix nawom xch’ool laj Pedro li kixch’olob’, “Laa’at li Ralal li yo’yookil Dios,” moko kichal ta rik’in li k’a’ru ilb’il xb’aan li tz’ejwalej ut li kik’elej. Lix nawom xch’ool kiwan chi k’utb’esinb’il chiru xb’aan “lix Yuwa’ li wan sa’ choxa.” Li k’utb’esink a’an li pek li naxkab’la wi’ li Kolonel lix Iglees sa’ li kutan a’an jo’ sa’eb’ li kutan a’in—li na’leb’ k’utb’esinb’il chalen chaq sa’ choxa chiruheb’ lix moos. Ut a’in li pek li naqakab’la wi’ li qawanjik jo’ tzolom—li k’utb’esihom naq li Jesus a’an li Kristo, ut naq eb’ lix moos xe’xk’ul “xlaawil li awa’b’ejihom.” Naq wanko chi kab’lanb’il sa’ xb’een li k’ojleb’aal a’in, “lix wankil li xb’alb’a ink’a’ taanumtaaq sa’ qab’een” (Mateo 16:15–19).
Li na’leb’ re xtzolb’aleb’ li loq’laj hu aajunes
Nachal xnawom qach’ool chirix li Kristo chi k’utb’esinb’il.
Wi ta li Jesukristo tixpatz’ raj reheb’ li kristiaan anajwan, “Ani naq neke’xye li winq naq a’an li ralal li winq?” k’a’ raj ru te’xye? K’a’ raj ru taaye wi ta li Jesus tixpatz’ aawe, “Anihin laa’in naq nakaye?” (Chiʼilmanq Mateo 16:13–15.)
K’oxla lix nawom aach’ool chirix li Kolonel, ut chan ru naq xak’ul. K’a’ru nakatzol sa’ Mateo 16:15–17 li taaruuq chixkawob’resinkil? Wi taawaj xtawb’al chik aana’leb’ chirix li xnawom ch’oolej ut li k’utb’esink chiru li junjunq, tz’ileb’ rix li raqal a’in: Jwan 15:26; 2 Nefi 31:17–18; Alma 5:45–48; ut Tzol’leb’ ut Sumwank 8:2–3.
Chi’ilmanq “Awa’b’ej Nelson: Escúchalo – Revelación Personal” (video), ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa5%2Fea%2Fa5eada71136cac24c16f0634e3beae5cbd0d22ea%2Fa5eada71136cac24c16f0634e3beae5cbd0d22ea.jpeg/full/!250,/0/default)
Mateo 16:13–19; 17:1–9; Markos 9:2–9
“Lix laawil lix nimajwal wankilal li choxa” wan sa’ xb’een li ruchich’och’ anajwan.
Lix “laawil lix nimajwal wankilal li choxa” li kixye li Kolonel naq tixk’e re laj Pedro, a’an xlaawil li tijonelil (Mateo 16:19). K’a’ruheb’ lix laawil li tijonelil? K’a’ut naq neke’k’anjelaq qe? K’oxlaheb’ li patz’om a’in naq taawileb’ lix yeechi’ihom li Kolonel li neke’tawman sa’ Mateo 16:13–19 ut lix tz’aqlojik ru sa’ Mateo 17:1–9; Markos 9:2–9 (chi’ilmanq ajwi’ JJS, Markos 9:3).
Xkomon chik li tenq’ re tzolok chirix lix laawil li tijonelil a’aneb’ Tzol’leb’ ut Sumwank 65:2; 107:18–20; 110:11–16; 128:9–11; “Xlaawil li tijonelil” sa’ li K’utul Raqal reheb’ li Loq’laj Hu; ut li raatin li Elder Gary E. Stevenson, “B’ar wankeb’ xlaawil ut xwankilal li tijonelil?,” (Jolomil ch’utub’aj-ib’ re abril 2016). Naq taatzoleb’ li hu a’in, naru nakatz’iib’a chixjunil li taatzol chirix lix laawil li tijonelil ut li osob’tesiik nachal rik’in a’an. K’a’ut naq li laaw a’an jun chaab’il eetalil re xb’eresinkil li k’anjel nab’aanuman sa’ li tijonelil?
Chi’ilmanq ajwi’ Dallin H. Oaks, “Li tijonelil re Melkisedek ut eb’ li laaw,” Jolomil ch’utub’aj-ib’ re abril 2020.
Eb’ lix laawil li tijonelil, a’aneb’ li wankilal chixb’eresinkil lix k’anjel li tijonelil.
Mateo 17:14–21; Markos 9:14–29
Re xkawresinkil lin paab’aal, naru nintikib’ rik’in lin paab’aal ak wan.
Li yuwa’b’ej li yeeb’il resil sa’ Mateo 17 ut Markos 9 kiru raj kiwan xkab’il xch’ool naq li Jesus taaruuq chixk’irtesinkil li ralal. Ak kixpatz’ chaq reheb’ lix tzolom li Jesus naq te’xk’irtesi li ralal, ut ink’a’ kiru chiruheb’. A’b’anan naq kixpatz’ re li Kolonel jun li sachb’a-ch’oolej, kiraj xk’utb’al lix paab’aal. “Qaawa’ ninpaab’,” kixye. Ut sa’ xk’eeb’al reetal naq moko tz’aqal ta re ru lix paab’aal, kixye, “Tenq’ahin sa’ xmajelal inpaab’aal.”
K’a’ru naxk’ut li Musiq’ej chawu naq nakawil resil li sachb’a-ch’oolej a’in? Chan ru naq laa Choxahil Yuwa’ xatxtenq’a chixnimob’resinkil laa paab’aal? K’a’ru naru taab’aanu re kab’lak sa’ xb’een li paab’aal li ak wan aawe? Maare tatruuq chixtz’iib’ankil junjunq li raqal sa’eb’ li loq’laj hu, li aatin sa’ li jolomil ch’utub’aj-ib’, malaj li k’a’aq chik re ru li xnimob’resink re laa paab’aal.
Chi’ilmanq ajwi’ Jeffrey R. Holland, “Creo,” Liahona, mayo 2013, 93–95.
Li na’leb’ re xtzolb’aleb’ li loq’laj hu jo’ junkab’al, ut choq’ re li q’ojyin re junkab’al
-
Mateo 15:7–9; Markos 7:6–7.K’a’ru xjalanil xloq’oninkil li Dios rik’in xtz’uumal qe malaj yal rik’in aatin ut xloq’oninkil rik’in qach’ool?
-
Mateo 15:17–20; Markos 7:18–23.K’a’ut naq toj naqil li naqak’e sa’ qe? Rik’in li kixk’ut li Kolonel sa’eb’ li raqal a’an, k’a’ut naq tento taqil chi us li na’el sa’ qe ut sa’ qach’ool? Chan ru naru naq saqaq ru li qach’ool?
-
Mateo 16:15–17.Chan ru naxk’ut chiqu li Dios naq li Jesus a’an “li Kristo, li Ralal li yo’yookil Dios”? (raqal 16). Chan ru naru naqakawresi qib’ re xk’ulb’al li k’utb’esinb’il na’leb’ rik’in a’an?
-
Mateo 16:13–19; 17:1–9.Re xtzolb’aleb’ li kok’al chirix lix laawil li tijonelil, naru nakawotz lix k’ulum li Elder Gary E. Stevenson naq kixtz’eq lix laawil lix b’eleb’aal ch’iich’ (chi’ilmanq li video “Donde estan las llaves?” sa’ ChurchofJesusChrist.org). Naru taakanab’eb’ laa kok’al chiroksinkil li laaw re xteeb’al li kab’l, li b’eleb’aal ch’iich’, malaj jalaneb’ chik li tz’apleb’. Naru taak’ut xjalam-uuch li awa’b’ej re li Iglees, ut taach’olob’ xyaalal naq a’an nak’amok re chixjunil lix laawil li tijonelil, jo’ chanru ajwi’ laj Pedro.
-
Mateo 17:20.Eb’ li profeet li wankeb’ xpaab’aal chirix li Jesukristo xe’xjal xna’ajeb’ li tzuul (chi’ilmanq Jakob 4:6; Moises 7:13). A’b’anan moko a’aneb’ ta li sachb’a-ch’oolej li te’qaj. Li Awa’b’ej M. Russell Ballard kixye: “Wi ta wan qapaab’aal jo’ jun riyajil li mostaas, li Qaawa’ taaruuq raj tooxtenq’a chirisinkileb’ li tzuul re ka’ch’ino’k ch’oolej ut wiib’ank ch’oolej chirix li k’anjel toj tento taqab’aanu naq nokok’anjelak chiruheb’ li ralal xk’ajol li Dios, jo’ li qajunkab’al, eb’ li komon sa’ li Iglees, ut eb’ li maji’ qakomon sa’ li Iglees” (“Eb’ li chaq’al ru maatan re li Dios,” Jolomil ch’utub’aj-ib’ re abril 2018). K’a’ruheb’ li tzuul sa’ li qayu’am li te’ajmanq ru risinkil? Chan ru naq naru naqak’ut li qapaab’aal naq li Dios wan xwankil chiqatenq’ankil re risinkileb’ li tzuul a’in?
Re xtawb’al xkomon chik li na’leb’ chirix xtzolb’aleb’ li kok’al, chi’ilmanq li tusleb’ aatin re li xamaan a’in sa’ Kim, Taaqehin—Choq’ re li Tzoleb’aal reheb’ li Kok’al.
Jun b’ich naru xb’ichankil: “Ninpaabʼ li Kristo,” Ebʼ li Bʼich, 75.
Xkawresinkil qib’ jo’ aj k’utunel
Ch’utub’omaq eerib’ chi kok’ aj xsa’. Li Awa’b’ej Henry B. Eyring kixye, “Maakanab’ chi nume’k li hoonal taaruuq wi’ taach’utub’eb’ li kok’al re te’xtzol li tzol’leb’ chirix li Jesukristo. Moko k’iheb’ ta li hoonal a’an, ut k’a’jo’ naq k’eek’o xch’ool li xik’ na’ilok qe” (“El poder del enseñar la doctrina,” Liahona, julio 1999, 87).
At Tzolonel, xink’am chaq aawik’in li walal, xb’aan laj Walter Rane