“17–23 Epril. Matiu 18; Luk 10: ‘?Bambae Mi Mas Mekem Olsem Wanem blong Kasem Laef Ia we I No Save Finis?’” Kam Folem Mi—Blong Wanwan Man, Woman mo Famli: Niu Testeman 2023 (2022)
“17–23 Epril. Matiu 18; Luk 10” Kam Folem Mi—Blong Wanwan Man, Woman mo Famli: 2023
Gudfala Man Sameria, i kam long Dan Burr
17–23 Epril
Matiu 18; Luk 10
“?Bambae Mi Mas Mekem Olsem Wanem blong Kasem Laef Ia we I No Save Finis?”
Taem yu stap rid mo tingting hevi long Matiu 18 mo Luk 10, wetem prea, lisin gud long ol kwaet toktok blong Tabu Spirit. Bambae Hem i talem long yu olsem wanem ol tijing mo ol stori ia oli blong yu tu. Raetemdaon ol filing mo tingting we yu kasem.
Raetemdaon Ol Filing mo Tingting blong Yu
Taem yu askem wan kwestin long Lod, maet bae yu kasem wan ansa we yu no bin ting long hem. ?Huia i neba blong mi? Eniwan we i nidim helpem mo lav blong yu. “?Long ol man we God i King blong olgeta, hu man we i moa hae long olgeta? Wan pikinini. ?Hem i inaf blong fogivim wan man we i stap mekem nogud long man, seven taem? No. Yu mas fogiv seventi taem seven. (Luk long Luk 10:29–37; Matiu 18:4, 21–22.) Ol ansa blong Lod, we yumi no ting long ol, oli save invaetem yumi blong jenisim wei we yumi tingting, yumi filim, mo tekem aksen. Sapos yu stap lukaotem tingting blong Lod from se yu rili wantem lanem samting aot long Hem, nao bae Lod i tijim yu olsem wanem blong laef long wan wei we i lidim yu i go long laef we i no save finis wetem Hem.
Sam Aedia blong Skripja Stadi blong Yuwan
Mi mas fogivim ol narawan sapos mi wantem kasem fogivnes blong Lod.
Tingting blong Pita se hem i save fogivim man seven taem i go, maet yumi luk se i bigwan tumas, be Jisas i tijim wan loa we i hae moa. Ansa blong Hem: “Yu no save fogivim hem seven taem nomo. Yu mas fogivim hem olwe gogo i no save finis” (ves 22), i no stap tijim ol namba nomo, be fasin blong stap developem wan fasin we i olsem hemia blong Kraes, long saed blong fasin blong fogiv. Taem yu stap ridim parabol blong wokman ia we i no gat sore, tingting hevi long ol taem we yu bin filim sore blong God mo lav mo sore blong Hem. ?I gat wan we i nidim blong filim sore ia mo lav mo sore blong yu?
Elda David E. Sorensen i bin impoten woning ia: “Nomata we yumi mas fogivim wan neba we i mekem nogud long yumi, yumi mas wok long wan gud fasin blong stopem nogud fasin ia blong i ripit bakegen. … Fogivnes i no askem yumi blong akseptem, o gohed blong tekem ivel fasin. … Be taem yumi faet agensem sin, yumi no mas letem bigfala kros i kontrolem ol tingting mo ol aksen blong yumi” (“Forgiveness Will Change Bitterness to Love,” Liahona, May 2003, 12).
?Huia Olgeta Seventi?
Folem wan paten we i stap long taem blong OlTesteman, (luk long Eksodas 24:1; Namba 11:16), Jisas Kraes i bin jusum ol nara seventi lida, antap long Olgeta Twelef Aposol blong Hem, blong oli witnes abaot Hem, blong oli prijim gospel, mo blong oli helpem Hem long wok blong Hem. Paten ia i stap gohed insaed long Jos ia we i kambak. Oli singaotem Olgeta Seventi blong helpem Olgeta Twelef long misin blong olgeta olsem ol spesel witnes blong Jisas Kraes i go long ful wol.
Luk tu long Doktrin mo Ol Kavenan 107:25–26, 33–34, 97.
Blong kasem laef we i no save finis, mi mas lavem God mo lavem neba blong mi olsem miwan.
Hem i help blong tingbaot se parabol blong gudfala Man Sameria, hem i wei blong Jisas blong ansarem tufala kwestin ia: “?Bambae mi mas mekem olsem wanem blong kasem laef ya we i no save finis?” mo “?Be hu ol man ya we oli stap raonabaot long mi?” (Luk 10:25, 29). Taem yu stap ridim parabol ia, kipim ol kwestin ia oli stap long maen blong yu. ?Wanem ansa nao yu yu faenem?
Long taem blong Jisas, nogud filing we i stap bitwin Ol Man Jiu mo Ol Man Sameria, i bin stap blong plante handred yia finis i pas. Ol Man Sameria oli kamaot long laen blong Ol Man Jiu we oli bin stap laef long Sameria, we oli bin stap maredem Ol Jentael. Ol Man Jiu oli bin filim se Ol Man Sameria oli bin kam doti from se oli joen wetem Ol Jentael mo oli bin mekem apostasi. Ol Man Jiu oli bin travel plante kilometa longwe blong no stap pastru long Sameria. (Luk tu long Luk 9:52–54; 17:11–18; Jon 4:9; 8:48.)
Long tingting blong yu, ?from wanem nao Sevya i bin jusum wan Man Sameria, wan we ol Man Jiu oli no bin laekem nating, olsem wan eksampol blong lav mo sore, mo blong stap lavem neba blong yu? ?Wanem nao parabol ia i stap givim insperesen long yu blong yu go mekem?
Luk tu long Mosaea 2:17; “Parable of the Good Samaritan” mo “A Good Samaritan” (vidio), ChurchofJesusChrist.org.
Yumi jusum gudfala pat ia taem yumi mekem ol joes, evri dei, we i go long laef we i no save finis.
Long Luk 10:38–42, Jisas i invaetem Mata blong tingting defren abaot wei we hem i stap spendem taem blong hem. Afta we hem i kwotem ol ves ia, Sista Carol F. McConkie i tijim: “Sapos yumi wantem kam tabu, yumi mas lan blong sidaon long leg blong Tabu Wan blong Isrel, mo givim taem long tabu fasin. ?Yumi stap lego fon, mo longfala lis blong ol samting blong mekem, mo ol nara kea blong fasin blong wol? Prea, stadi, mo mekem folem toktok blong God i stap invaetem yumi blong Hem i klinim yumi, mo invaetem lav blong Hem we i hilim man, i kam insaed long sol blong yumi. Bae yumi tekem taem blong yumi kam tabu, blong mekem se Spirit blong Hem we i tabu mo i mekem yumi kam tabu, i kam fulap long yumi” (“The Beauty of Holiness,” Liahona, May 2017, 11). Maet bae yu wantem luklukgud long yuwan, long wei we yu spendem taem blong yu—iven long ol gudfala samting. ?I gat wan samting we i nidim blong yu lukluk “moa” (ves 42) long hem?
Ol Aedia blong Famli Skripja Stadi mo Haos Naet
-
Matiu 18:1–11.?From wanem Jisas i wantem yumi blong kam olsem wan smol pikinini? ?Wanem fasin nao ol pikinini oli gat, we yumi save developem blong kam moa olsem Kraes? (luk long Mosaea 3:19).
Jisas i wantem ol disaepol blong Hem blong kam olsem ol smol pikinini.
-
Matiu 18:15.?Olsem wanem yumi save praktisim advaes we i stap long Matiu 18:15 long wei we yumi mekem samting wetem famli blong yumi? ?Long wanem wei nao, sapos yumi mekem hemia, bae i blesem famli blong yumi?
-
Matiu 18:21–35.?Wanem nao parabol ia i stap tijim yumi abaot Jisas Kraes? ?Wanem nao parabol ia i stap tijim yumi abaot wei blong tritim ol nara man?
-
Luk 10:25–37.Maet ol memba blong famli oli glad blong werem ol defren klos mo aktem parabol ia. ?Weswe? ?Yumi tu samtaem yumi olsem ol defren pipol ia insaed long parabol ia? ?Olsem wanem Sevya i olsem gudfala Man Sameria ia? ?Olsem wanem nao yumi save stap olsem gudfala Man Sameria ia?
Maet yu save tingting blong singsing wan hym tugeta, mo wan singsing blong ol pikinini we i sapotem ol trutok insaed long parabol ia. Wan eksampol hem i: “Lord, I Would Follow Thee” (Hymns, namba 220), be i gat plante moa. Maet ol memba blong famli bae oli laekem blong faenem wan hym o wan singsing, mo stap eksplenem olsem wanem i go wetem parabol.
-
Luk 10:38–42.?I tru se i stap kam had moa blong putum ol samting long saed blong spirit insaed long taemtebol blong famli blong yu? Stori blong Meri mo Mata, i save givim insperesen long wan famli kaonsel, o long wan hom haos naet, abaot wei blong mekem hemia i gud moa. Olsem wan famli, yu save mekem wan lis blong ol wei blong jusum gudfala pat ia (Luk 10:42).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Jesus Said Love Everyone,” Children’s Songbook, 61.
Stap Kam Antap long Fasin blong Yumi blong Stap Tij
Mekem wan ples we oli filim lav long hem. Wei we ol memba blong famli oli stap filim mo tritim olgeta i save lidim bigwan spirit we i stap insaed long hom blong yu. Helpem ol memba blong famli blong mekem pat blong olgeta blong stanemap wan hom we i gat lav mo respek, blong mekem se evriwan i filim fri blong serem ol eksperiens, ol kwestin, mo ol testemoni. (Luk long Teaching in the Savior’s Way, 15.)
Kraes insaed long Hom blong Meri mo Mata, i kam long Walter Rane