“17–23 Epril. Matiu 18; Luk 10: ‘?Bambae Mi Mas Mekem Olsem Wanem blong Kasem Laef Ia we I No Save Finis?,’” Kam Folem Mi—Blong Praemeri: Niu Testeman 2023 (2022)
“17–23 Epril. Matiu 18; Luk 10,” Kam Folem Mi—Blong Praemeri: 2023
Gudfala Man Sameria, i kam long Dan Burr
17–23 Epril
Matiu 18; Luk 10
“?Bambae Mi Mas Mekem Olsem Wanem blong Kasem Laef Ia we I No Save Finis??”
?Wanem ol trutok long Matiu 18 mo Luk 10 we oli pikinini oli nidim blong lanem? Lisin long ol kwaet toktok blong Tabu Spirit taem yu stap ridim ol japta ia. Kam Folem Mi—Blong Wanwan Man, Woman mo Famli i save help blong lidim stadi blong yu, mo aotlaen ia i save givim ol tijing aedia long yu.
Invaetem Ol Pikinini blong Serem Wanem Oli Gat
Askem ol pikinini blong serem wan samting we oli bin lanem abaot Jisas Kraes long hom o long Praemeri.
Tijim Doktrin: Ol Smol Pikinini
Mi mas oltaem fogivim ol narafala man.
Taem yu ridim Matiu 18:21–35, tingting long ol eksperiens blong yuwan long saed blong fasin blong fogiv mo wanem ol pikinini oli nidim blong save abaot prinsipol ia.
Samfala Aktiviti we Yu Save Mekem
-
Talem stori blong wokman ia we i no gat sore (luk long Matiu 18:23–35). Eksplenem se taem wan man i no kaen o i no fea long ol narawan, faswan, bae yumi harem se yumi kros o harem nogud. Be, fasin blong fogiv, i minim se yumi save filim pis bakegen. Taem yumi fogivim wan narafala man, yumi agri blong nomo kros wetem olgeta bakegen. (Helpem ol pikinini blong andastanem se, sapos wan man i no kaen o mekem i fea long olgeta, oli mas askem papa mo mama o wan adalt, blong kasem help.)
-
Raetem Mi fogivim yu long bod, mo talem long ol pikinini se, ol toktok ia oli save help blong tanem ol taem blong harem nogud i go long ol taem blong stap glad. Droem wan fes we i no glad long bod, mo serem sam eksampol blong ol pikinini we oli stap fogivim olgeta. Afta long wan eksampol, invaetem pikinini blong jenisim fes we i no glad i go long wan fes we i glad.
-
Singsing tugeta wetem ol pikinini wan singsing abaot fasin blong fogiv, olsem “Help Me, Dear Father” (Children’s Songbook, 99). Serem testemoni blong yu se Papa long Heven bae i helpem yumi blong fogivim ol narafala man.
Jisas i tijim mi blong lukluk long evri pipol olsem ol neba blong mi mo lavem olgeta.
Parabol blong gudfala Man Sameria i save soem long ol pikinini, huia nao ol neba blong yumi, mo olsem wanem yumi mas tritim olgeta. Tingting long ol wei we yu save givim insperesen long ol pikinini blong oli “go, mo mekem … semmak” (Luk 10:37).
Samfala Aktiviti we Yu Save Mekem
-
Askem wanwan pikinini, “?Huia nao neba blong yu?” Talem long sot toktok, stori long Luk 10:25–37, mo serem olsem wanem Jisas i ansarem kwestin ia. ?Wanem nao Jisas i tijim abaot olsem wanem yumi mas tritim ol neba blong yumi?
-
Ridim Luk 10:25–37 taem ol pikinini oli aktem parabol blong gudfala Man Sameria. Helpem olgeta blong tingting long ol wei we oli save kam olsem gudfala Man Sameria ia, taem oli stap soem lav mo fasin blong stap kaen long ol narafala man.
-
Raetem sam eksampol blong ol situesen, taem we wan i nidim help, mo haedem ol pepa raon long rum. Askem ol pikinini blong lukaotem ol pepa. Ridim ol situesen, mo invaetem ol pikinini blong serem olsem wanem olgeta save soem fasin blong stap kaen long man we i stap long situesen ia.
-
Singsing wetem ol pikinini wan singsing abaot, fasin blong stap kaen,olsem “Jesus Said Love Everyone” o “Kindness Begins with Me” (Children’s Songbook, 61, 145). Helpem ol pikinini blong tingting long sam we oli stap soem lav mo kaen fasin long ol narafala man. Mo tu, oli save droem ol pikja blong olgetawan, taem oli stap mekem ol samting ia.
Tijim Doktrin: Ol Bigfala Pikinini
Papa long Heven bae i fogivim mi, taem bae mi fogivim ol narafala man.
Parabol blong man blong wok we i no gad sore, i save kam wan memori wei blong tijim ol pikinini se, Papa long Heven i wantem yumi blong fogivim evriwan.
Samfala Aktiviti we Yu Save Mekem
-
Ridim Matiu 18:23–35 wetem ol pikinini. Eksplenem se king o Lod, i ripresentem Papa long Heven, wokman i ripresentem yumi, mo ol narafala man blong wok oli ripresentem olgeta we oli mekem nogud long yumi. Askem ol kaen kwestin olsem long long pikinini olsem, “?Wanem nao stori i tijim abaot olsem wanem yumi mas tritim ol narafala man? ?Wanem nao yu luk se i had, blong fogivim wan narafala man from? ?Olsem wanem nao yu lego ol ol filing blong harem nogud? ?Wetaem nao yu nidim blong askem fogivnes from wan rong joes?
-
Soem vidio blong “Forgive Every One Their Trespasses: The Parable of the Unmerciful Servant” (ChurchofJesusChrist.org) blong helpem ol pikinini blong pikjarem long maen blong olgeta parabol ia.
-
Raetem long bod, problem ia long saed blong matematik 70 × 7, mo helpem ol pikinini blong wokemaot ansa blong hem. Askem wan blong ridim Matiu 18:21–22, mo eksplenem se Jisas i yusum namba ia blong tijim yumi se, oltaem yumi mas fogivim ol narawan.
-
Askem ol pikinini blong helpem yu blong tingting long ol situesen we maet oli nid blong fogivim wan narafala man. Invaetem ol pikinini blong aktem olsem wanem bae oli save soem fasin blong fogiv long ol situesen ia.
-
Singsing tugeta wetem ol pikinini wan singsing abaot fasin blong fogiv, olsem “Help Me, Dear Father” (Children’s Songbook, 99). Helpem ol pikinini blong andastanem wanem singsing ia i tijim yumi abaot fasin blong fogivim ol narafala man.
Mi save lavem mo givim seves long ol narafala man, speseli olgeta we oli stap long nid.
Tingting hevi long ol laef blong yuwan, taem wan i bin “wan gudfala Man Sameria” long yu. ?Long wanem wei nao yu save givim insperesen long ol pikinini blong stap olsem wan “gudfala Man Sameria” long ol narafala man?
Samfala Aktiviti we Yu Save Mekem
-
Givim wok long wan pikinini blong rid kwaet pat blong parabol blong gudfala Man Sameria. Invaetem ol pikinini blong talem ol pat blong ol parabol blong olgeta, long oda, blong ol taem we ol samting ia oli bin hapen.
-
Eksplenem long ol pikinini se, Ol Man Jiu oli no laekem Ol Man Sameria, mekem se taem oli travel long Jerusalem i go long Galili, bae oli go raon long Sameria, blong no mitim Ol Man Sameria. Blong mekem hemia, soem map long Baebol 1, “Map Blong Ol Defren Kaen Ples Long Holi Graon.” From wanem Jisas i yusum wan Man Sameria olsem wan eksampol blong fasin blong stap kaen, long parabol ia? ?Wanem nao stori ia i tijim yumi abaot, helpem ol narawan we oli stap long nid? (Luk tu long Mosaea 4:16–22.)
-
Askem ol pikinini blong serem wan eksperiens, taem we wan i bin stap olsem wan gudfala man Sameria long olgeta.
-
Givim jalenj long ol pikinini blong putum wan gol blong stap olsem wan gudfala man Sameria long wik ia. Yu save askem olgeta sapos oli save wan we i sik o i stap hemwan, mo i no stap kam long jos oltaem. Askem ol pikinini olsem wanem nao oli save helpem man o woman ia. Helpem ol pikinini blong andastanem olsem wanem taem yumi givim seves long ol narafala man, i soem se oli stap obei long ol promes we oli bin mekem long taem we oli kasem baptaes (luk long Mosaea 18:8–10).
Stap Leftemap Tingting blong Lanem Samting long Hom
Invaetem ol pikinini blong serem wetem ol famli blong olgeta, wanem oli plan blong mekem, mo save stap fogiv moa o mekem moa olsem gudfala man Sameria, long wik ia.
Stap Kam Antap long Fasin blong Yumi Blong Stap Tij
Tijim ol pikinini blong raetemdaon ol filing mo ol tingting. Sapos ol pikinini oli save lanem fasin blong stap raetemdaon ol filing mo tingting, bae hemia i helpem olgeta blong luksave mo folem Spirit. Ol pikinini oli save raetemdaon ol filing o tingting blong olgeta taem oli stap makem ol skripja, dro ol pikja, o raet smol long wan jenol.