3–9 Epril

Ista

“?E, Ded, Olsem Wanem Yu Save Win?”

Yusum taem blong yu wetem ol pikinini blong helpem olgeta blong luk Ista olsem wan sisen blong stap glad long Sevya mo talem ol bigfala tangkyu blong olgeta from sakrifaes blong Hem. Ol aedia long aotlaen ia, i save jenis blong i save helpem ol pikinini we yu tijim long we oli gat oli defdefren yia.

Invaetem Ol Pikinini blong Serem Wanem Oli Gat

Soem ol pikja blong Sevya long Getsemane, long kros mo afta long Laef bakegen long ded (luk ol pikja long aotlaen blong wik ia long Kam Folem Mi—Blong Wanwan Man, Woman mo Famli mo long Gospel Art Buk, ol namba 56–60). Askem ol pikinini blong serem wanem oli save abaot ol samting we i hapen long ol pikja ia.

Tijim Doktrin: Ol Smol Pikinini

Jisas Kraes Hem I Sevya blong Mi.

Taem yu rid abaot Atonmen blong Jisas Kraes, tingting hevi long olsem wanem yu save helpem ol pikinini blong filim, hamas Jisas i lavem olgeta.

Samfala Aktiviti we Yu Save Mekem

• Soem wan pikja blong Jisas mo askem ol pikinini blong serem wanem oli save abaot wanem we Hem i bin mekem blong yumi. Serem testemoni blong yu abaot lav blong Sevya mo paoa blong Hem blong sevem yumi long ol sin blong yumi. Leftemap wan mira, mo askem ol pikinini blong lukluk long hem, wan afta narawan. Taem wanwan pikinini i talem: “Jisas i lavem [nem blong pikinini], mo Hem i save helpem [nem blong pikinini] blong stap laef wetem Papa long Heven bakegen.”

• Soem pikja blong Jisas I Stap Prea long Getsemane (Gospel Art Buk, namba 56) taem yu stap talem stori blong Jisas we stap safa long Getsemane from ol sin blong wol (luk long Matiu 26:36–46; Luk 22:39–44). Testifae se from safaring blong Hem, yumi save kasem fogivnes taem yumi mekem wan rong joes. Yu save yusum tu “Japta 51: Jisas I Safa long Garen blong Getsemane” (long Ol Niu Testeman Stori, 129–32, o vidio we i go wetem long ChurchofJesusChrist.org).

• Singsing tugeta wan singsing abaot lav blong Jisas from yumi “Filim Lav blong Sevya” (Children’s Songbook, 74–75). Helpem ol pikinini blong talemaot ol toktok we singsing ia i stap tokbaot abaot lav blong Sevya. ?Wanem nao i helpem yumi blong filim lav blong Hem? ?Olsem wanem nao yumi save helpem ol narafala wan blong filim lav blong Hem?

Hem i Girap Bakegen long Ded, i kam long Greg Olsen

From Jisas i ded mo i bin laef bakegen long ded, bae mi laef bakegen.

?Olsem wanem nao yu save helpem ol pikinini blong andastanem se, from se Jisas Kraes, yumi mo olgeta we yumi lavem, bae yumi laef bakegen?

Samfala Aktiviti we Yu Save Mekem

• Tijim ol pikinini abaot stori blong Ista mo yusum ol pikja blong Kraes long Getsemane, long kros mo afta we Hem i Laef Bakegen long Ded (luk long Gospel Art Buk, ol namba 56–60 mo pikja we i fulwan long aotlaen blong wik ia long Kam Folem Mi—Blong Wanwan Man, Woman mo Famli). Askem sam pikinini blong holem ol pikja ia taem yu stap talem stori. Talem long ol pikinini abaot sam long ol pipol we oli bin luk Jisas afta we Hem i laef bakegen long ded, olsem Meri (luk long Jon 20:1–18) o Tomas (luk long Jon 20:24–29).

• Askem ol pikinini se from wanem yumi selebretem Ista? Eksplenem se long Ista yumi selebretem dei ia we Jisas Kraes i laef bakegen long ded long hem. Askem sapos eni pikinini i wantem blong serem wanem ol famli blong hem oli stap tingbaot long saed blong Laef Bakegen long Ded, blong Jisas Kraes.

• Eksplenem se laef bakegen long ded i stap minim se bae yumi laef bakegen afta long ded. Serem testemoni blong yu se from Jisas Kraes, bae yumi laef bakegen long ded—bae yumi laef bakegen afta we yumi ded mo bae yumi neva ded bakegen.

• Yusum wan hanglav blong tijim ol pikinini se yumi evriwan i gat wan bodi (olsem we hanglav ia i ripresentem) mo wan spirit (olsem we han i ripresentem). Taem yumi ded, spirit mo bodi blong yumi i seperet. Spirit blong yumi i gohed blong laef, be i no bodi blong yumi. Taem yumi laef bakegen long ded, spirit mo bodi blong yumi i kam tugeta bakegen. Letem ol pikinini i gat janis blong werem hanglav ia mo stap tekemaot.

• Singsing tugeta wan singsing blong Ista olsem “Did Jesus Really Live Again?” o “Jesus Has Risen” (Children’s Songbook, 64, 70), mo soem pikja blong Jisas afta we Hem i laef bakegen long ded (luk long Gospel Art Buk, ol namba 59–61).

• Soem wan pikja blong wan we yu save we i bin ded finis. Serem testemoni blong yu se, hem bae i laef bakegen long ded from Atonmen mo Laef Bakegen blong Jisas Kraes.

• Wajem tugeta vidio blong “Jesus Is Resurrected” o “The Risen Lord Appears to the Apostles” (ChurchofJesusChrist.org). O soem wan narafala Ista vidio we yu save faenem long Easter.ComeuntoChrist.org.

Tijim Doktrin: Ol Bigfala Pikinini

Jisas i safa from mi long Getsemane mo long kros.

Taem yu stap stadi long ol skripja long wik ia, tingting hevi long olsem wanem yu save helpem ol pikinini bildimap fet blong olgeta long Jisas Kraes mo Atonmen blong Hem.

Samfala Aktiviti we Yu Save Mekem

• Ridim Luk 22:39–44 wetem ol pikinini mo jusum ol ves long Matiu 27:29–50. Invaetem olgeta blong lukaotem ol toktok we i helpem olgeta blong andastanem wanem we Sevya i bin eksperiensem long Getsemane mo long kros.

• Helpem ol pikinini blong lanem baehat nambatri toktok blong bilif. Serem testemoni blong yu se Jisas Kraes i gat paoa blong sevem yumi long sin mo ded.

• Helpem ol pikinini blong rere long ol sot toktok abaot Atonmen blong Jisas Kraes, we bae oli save serem wetem ol narafala wan. Leftemap tingting blong olgeta blong putum wan skripja mo testemoni blong olgeta, insaed long ol toktok blong olgeta. Sapos oli nidim moa help, oli save ridim “Aton, Atonmen” long Gaed long Ol Skripja (olskripja.ChurchofJesusChrist.org).

From se Jisas i ded mo i bin laef bakegen, bae mi laef bakegen.

Ol pikinini we yu tijim bae sam dei, oli eksperiensem ded blong wan we oli lavem, sapos oli no bin gat wan yet. Helpem olgeta blong save se, from we Jisas Kraes i bin laef bakegen long ded, yumi evriwan bae yumi laef bakegen long ded.

Samfala Aktiviti we Yu Save Mekem

• Soem ol pikja ia, ol namba 57–59 long Gospel Art Buk, mo askem ol pikinini blong majem ol pikja ia wetem ol ves ia long Matiu 27:29–38, 59–60; Jon 20:10–18.

• Invaetem wanwan pikinini blong ridim “Laef Bakegen long Ded” long Gaed long Ol Skripja (olskripja.ChurchofJesusChrist.org) mo faenem wan samting we bae oli wantem blong tijim long ol famli blong olgeta. Givim taem long ol pikinini blong serem wanem we oli faenem.

• Helpem ol pikinini lukluk ol topik insaed long indeks blong ol topik long Children’s Songbook blong faenem wan singsing we bae oli wantem blong singsing abaot Jisas Kraes o blong Laef Bakegen long Ded. Singsing tugeta long singsing ia moa askem ol pikinini se oli lanem wanem long singsing ia.

• Soem vidio blong “Jesus Is Resurrected” (ChurchofJesusChrist.org), mo invaetem sam pikinini blong serem testemoni blong olgeta abaot Atonmen mo Laef Bakegen long Ded blong Sevya. (Maet yu save askem ol pikinini ia blong mekem hemia sam dei bifo klas, mekem se oli save rere.) Invaetem ol pikinini blong oli raetemdaon testemoni blong olgeta blong serem long hom.

Stap Leftemap Tingting blong Lanem Samting long Hom

Blong helpem ol pikinini blong serem wanem we oli bin lanem wetem ol famli blong olgeta, leftemap tingting blong olgeta blong singsing long wan singsing abaot Jisas Kraes long hom, long wik ia.

Stap Kam Antap long Fasin blong Yumi blong Stap Tij

Ol pikinini oli lanem samting aot long fasin blong stap ripitim samting. No fraet blong ripitim ol aktiviti plante taem, speseli wetem ol smol pikinini. Fasin blong stap ripitim samting i helpem ol pikinini blong tingbaot wanem oli stap lanem.