“24–30 Epril. Jon 7–10: ‘Mi Nao, Mi Olsem Gudfala Man Ya blong Lukaot long Sipsip,’” Kam Folem Mi—Blong Praemeri: Niu Testeman 2023 (2022)
“24–30 Epril. Jon 7–10,” Kam Folem Mi—Blong Praemeri: 2023
Mi Tu Mi No Save Jajem Yu, i kam long Eva Koleva Timothy
24–30 Epril
Jon 7–10
“Mi Nao, Mi Olsem Gudfala Man Ya blong Lukaot long Sipsip”
Taem yu ridim Jon 7–10, tingting long ol pikinini we yu stap tijim. Plante long ol aedia blong ol bigfala pikinini we oli stap long aotlaen ia, yu save stretem blong yusum wetem ol pikinini we oli smosmol, mo nara wei raon.
Invaetem Ol Pikinini blong Serem Wanem Oli Gat
Talem bakegen long ol pikinini, wan samting we yu bin invaetem olgeta blong mekem long wan lesen we i pas finis. Askem olgeta blong serem wanem oli mekem blong tekem aksen folem invitesen ia.
Tijim Doktrin: Ol Smol Pikinini
Lod bae i helpem mi blong mekem wok blong Hem.
Jisas i bin tijim se yumi save kasem wan testemoni abaot ol trutok we Hem i bin serem taem yumi stap laef folem olgeta. Pis we yumi filim taem yumi obei ol komanmen, i helpem yumi save se oli tru. Tingting long olsem wanem yu save tijim ol pikinini ia long trutok ia.
Samfala Aktiviti we Yu Save Mekem
-
Talem long sot toktok Jon 7:17, long ol toktok we ol pikinini bae oli andastanem. Helpem olgeta save se, blong stap obei ol komanmen. I helpem yumi blong filim moa kolosap long Jisas Kraes. Eksampol. Yu save singsing long wan singsing tugeta olsem “Keep the Commandments” o “Choose the Right Way” (Children’s Songbook, 146–47, 160–61). Askem ol pikinini blong lisin, long olsem wanem bae yumi kasem blesing, taem yumi obei ol komanmen.
-
Serem wan eksperiens taem yu kasem wan testemoni se, wan komanmen i kam long God, from se yu bin stap laef folem komanmen ia, olsem blong stap pem taeting o blong fogivim wan narawan we i no kaen long yu. Invaetem ol pikinini blong tingting long wan eksperiens we oli bin kasem, taem oli bin obei long wan komanmen. Askem olgeta blong serem wanem oli filim, taem oli bin obei long hem.
-
Askem ol pikinini blong dro ol pikja blong olgetawan we oli stap obei long wan komanmen. (Helpem olgeta blong tingting long ol narafala eksampol.) Invaetem olgeta blong serem ol pikja blong olgeta wetem olgetawan, mo tokbaot bigfala glad we oli bin kasem taem oli stap obei long komanmen ia.
Jisas i bin obei long Papa blong Hem.
Jisas Kraes, oltaem i stap mekem ol samting we i mekem Papa blong Hem long Heven i glad tumas long Hem from. ?Olsem wanem nao yu save helpem ol pikinini blong faenem ol wei blong folem eksampol blong Hem?
Samfala Aktiviti we Yu Save Mekem
-
Helpem ol pikinini blong ripitim wanem we Jisas i bin talem abaot Papa long Heven long Jon 8:29: “Oltaem, Mi stap mekem ol samting we Hem i wantem.” Askem olgeta blong tokbaot ol samting we Jisas i bin mekem we i mekem Papa long Heven i hapi. Soem sam pikja long olgeta long Gospel Art Buk blong givim sam aedia long olgeta.
-
Askem ol pikinini se, wanem i stap mekem olgeta oli hapi. O invaetem wan papa o mama blong wan pikinini blong serem wan eksperiens, taem we pikinini ia i bin mekem wan samting we i mekem, papa mo mama, tufala i glad tumas o hapi long hem from. ?Wanem nao yumi save mekem blong mekem se Papa long Heven bae i glad? Invaetem ol pikinini blong droem ol pikja blong olgetawan, taem oli stap mekem ol aktiviti ia i go hom mo rimaenem olgeta.
Jisas i save mi mo i lavem mi.
Parabol blong gudfala man blong lukaot long sipsip, i save helpem ol pikinini blong andastanem se, Jisas i lavem olgeta mo save huia olgeta.
Samfala Aktiviti we Yu Save Mekem
-
Givim sam pikja long ol pikinini we i ripresentem wan samting long parabol blong gudfala man blong lukaot long sipsip, olsem, sipsip, man blong lukaot long sipsip o wan rabis animol. Jusum sam ves long Jon 10:1–16 blong ridim long ol pikinini, mo askem olgeta blong leftemap ol pikja blong olgeta, taem we bae oli harem yu ridimaot ol samting we i stap long ol pikja blong olgeta. Helpem ol pikinini blong tingting long ol wei we Jisas i olsem man blong lukaot long ol sipsip long yumi. Serem testemoni blong yu abaot lav blong Sevya long yumi, mo bae Hem i lidim yumi gobak long Hem.
-
Soem pikja blong Jisas mo ol smol sipsip long aotlaen blong wik ia long Kam Folem Mi—Blong Wanwan Man, Woman mo Famli. ?Olsem wanem nao yumi save se Jisas i lavem ol smol sipsip? ?Olsem wanem nao yumi save talem se ol smol sipsip oli lavem Jisas? ?Olsem wanem nao yumi save soem long Jisas se yumi lavem Hem?
Tijim Doktrin: Ol Bigfala Pikinini
Lod bae i helpem mi blong mekem wok blong Hem.
Yu mo ol pikinini we yu tijim maet yufala bin gat ol eksperiens, taem yufala stap laef folem ol trutok blong gospel mo lanem se oli tru. ?Long wanem wei nao yu save bildimap olgeta long ol eksperiens ia taem yu stap tijim olgeta?
Samfala Aktiviti we Yu Save Mekem
-
Raetem wanwan ves blong Jon 7:14–17 long ol defdefren pis blong pepa, mo miksim mo soem long olgeta. Askem ol pikinini blong putum olgeta long stret oda mo jekem Jon 7:14–17 blong luk sapos oli mekem i stret. Invaetem ol pikinini blong go long tu patna, mo serem wanem oli andastanem long wanwan ves ia wetem patna blong olgeta. ?Olsem wanem nao taem oli stap obei long ol komanmen blong God, i helpem olgeta blong save se ol komanmen oli tru?
-
Serem ol eksampol long ol skripja we i stap soem olsem wanem ol pipol oli bin kasem blesing, blong stap laef folem ol trutok blong gospel, olsem Daniel (luk long Daniel 6) o Elisabet (luk long Luk 1:5–14). ?Wanem blesing nao yumi kasem taem yumi stap obei long ol komanmen?
-
Sam dei bifo klas, invaetem wan pikinini blong raetemdaon, wan taem we hem i bin kasem wan testemoni, blong stap laef folem gospel. Long taem blong klas, askem pikinini ia blong serem wanem hem i bin raetem.
Trutok i save mekem mi kam fri.
Sam pipol oli filim se blong laef folem gospel oli ol samting we i stap blokem olgeta. ?Olsem wanem nao yu save yusum Jon 8:31–36 blong helpem ol pikinini blong andastanem se blong stap laef folem gospel, i tru, i mekem yumi fri?
Samfala Aktiviti we Yu Save Mekem
-
Invaetem ol pikinini blong ridim Jon 8:31–36 mo serem wanem oli ting se, i stap minim blong stap wan wokman blong sin. ?Long wanem wei nao ol tijing blong Jisas i helpem yumi blong kam fri?
-
Soem wan lok blong ripresentem sin mo wan ki blong ripresentem olsem wanem ol trutok blong gospel i save mekem yumi kam fri. Eksampol. Taem yumi save abaot Atonmen blong Sevya, i save mekem yumi kam fri blong sakem sin mo blong kasem fogivnes from ol sin blong yumi. O, blong save abaot Tok blong Waes, i save mekem yumi kam fri blong stopem ol samting we yumi no save kontrolem.
Jisas i tijim “Trutok ya bambae i mekem yufala i fri man” (Jon 8:32).
Jisas i olsem wan man blong lukaot long mi.
Taem yu stap stadi long parabol blong gudfala man blong lukaot long sipsip, lukaotem ol trutok we i tijim abaot rilesensip blong yumi wetem Sevya. Blong save ol trutok ia, ?long wanem wei nao ol trutok ia oli blesem ol pikinini?
Samfala Aktiviti we Yu Save Mekem
-
Raetem gudfala man blong lukaot long sipsip mo man we i kasem mane from wok long bod. Eksplenem se, man we i kasem mane from wok, i wan man we oli pem hem blong mekem wan wok. Askem ol pikinini blong mekem lis blong ol defdefren samting bitwin wan gudfala man blong lukaot long sipsip o wan man we i wok from mane long Jon 10:1–18. . ?From wanem bae yu wantem blong folem gudfala man blong lukaot long sipsip bitim man we oli pem hem blong mekem wan wok? ?Olsem wanem nao Jisas i olsem wan man blong lukaot long sipsip, long yumi?
-
Droem o soem wan pikja blong wan doa. Ridim tugeta Jon 10:7–9, mo askem ol pikinini se long wanem wei nao Jisas i olsem wan doa. Folem ves 9, ?wanem blesing nao i kam long olgeta we oli “pas [long doa] blong go insaed”? ?Olsem wanem nao bae yumi go tru long doa we Jisas Kraes i mekem blong yumi?
Stap Leftemap Tingting blong Lanem Samting long Hom
Helpem ol pikinini blong tingting long wan komanmen we oli save obei long hem fulwan. Askem olgeta blong traem blong obei long komanmen ia long wik we i stap kam.
Stap Kam Antap long Fasin blong Yumi blong Stap Tij
Askem ol kwestin we oli givim insperesen. Askem ol kwestin we oli invaetem ol pikinini blong we yu tijim blong oli toktok moa bitim blong stap givim wan ripot nomo. Blong mekem hemia, leftemap tingting blong olgeta blong serem ol testemoni blong olgeta abaot ol trutok blong gospel. Eksampol, sapos yu stap tokbaot ol komanmen, yu save askem ol pikinini blong serem olsem taem oli obei long ol komanmen i bin blesem laef blong olgeta.