Pikinini Boe we i Lus mo Kambak, i kam long Liz Lemon Swindle

1–7 Mei

Luk 12–17; Jon 11

“Yufala I Glad Wetem Mi From Mi Mi Faenem Sipsip Ia blong Mi we I Lus”

Prea plante taem yu stap ridim Luk 12–17 mo Jon 11, mo lukaotem olsem wanem yu save helpem ol pikinini we yu tijim blong andastanem ol trutok long ol japta ia mo filim lav lav blong Papa long Heven.

Invaetem Ol Pikinini blong Serem Wanem Oli Gat

Rimaenem ol pikinini long sam long ol parabol mo ol stori we yu save faenem long Luk 12–17 mo Jon 11, mo invaetem olgeta blong serem wanem oli save abaot ol stori ia.

Tijim Doktrin: Ol Smol Pikinini

Luk 15

Papa long Heven i wantem evriwan long ol pikinini blong Hem blong gobak stap wetem Hem.

Tingbaot ol pikinini long klas blong yu, mo tu, olgeta we oli no stap kam oltaem long klas. ?Olsem wanem yu save helpem olgeta blong filim lav blong Papa long Heven? ?Olsem wanem yu save givim insperesen long ol narafala pikinini blong helpem yu blong go mo givhan long olgeta wetem lav?

Samfala Aktiviti we Yu Save Mekem

• Givim wan koen long wan pikinini, mo wan pikja blong wan smol sipsip long wan narafala pikinini, mo wan pikja blong pikinini boe we i lus mo i kambak bakegen (luk long ChurchofJesusChrist.org o aktiviti pej blong wik ia). Tokbaot ol tri parabol we i stap long Luk 15 mo invaetem ol pikinini blong leftemap koen o pikja, taem yu talemaot olgeta. Yu save invaetem ol pikinini blong talem bakegen ol parabol long olgeta wanwan, long toktok blong olgetawan nomo.

• Askem ol pikinini blong serem wan taem we oli bin lusum wan samting. ?Olsem wanem nao oli faenem? Eksplenem se ol pipol oli save lus long saed blong spirit, taem we oli no folem Papa long Heven. Testifae se God i wantem ol pipol we oli lus blong kam long Hem, mo yumi save helpem olgeta.

• Invaetem ol pikinini blong tingting long ol narafala pikinini we oli no kam long Praemeri. Helpem olgeta blong kala mo raetem ol not blong stap invaetem ol pikinini ia, blong kam long Praemeri o long wan aktiviti blong Praemeri. ?Long wanem nara wei bakegen yumi save helpem ol pikinini ia blong oli filim lav we Papa long Heven i gat long olgeta?

Luk 17:11–19

Mi save soem lav long Papa long Heven taem mi stap glad long ol blesing blong mi.

?Olsem wanem nao stori blong ten man we oli gat leprosi, i leftemap tingting blong ol pikinini blong gat fasin blong stap tangkyu?

Samfala Aktiviti we Yu Save Mekem

• Talem stori blong ol ten man we oli gat leprosi, we Jisas i bin hilim olgeta. Soem ol pikja we oli faenem long aotlaen blong wik ia long Kam Folem Mi—Blong Wanwan Man, Woman, mo Famli, mo invaetem ol pikinini blong kaontem wan kasem ten long ol fingga blong olgeta. Mo askem olgeta blong putumdaon naen fingga blong soem wan sik man ia we i bin talem tangkyu long Jisas. Helpem ol pikinini blong tingting long wan we oli tangkyu from we hem i bin kaen o givim help long olgeta.

• Invaetem wanwan pikinini blong aktem wan samting we hem i tangkyu from, mo askem evriwan long klas blong talemaot wanem hem stap aktem ia. Askem ol pikinini blong serem ol wei we yumi save soem long Papa long Heven se yumi tangkyu bigwan from ol blesing.

Jon 11:1–46

Mifala i biliv se Jisas i Pikinini blong God.

Mata, sista blong Lasaros i bin talem long Jisas : “Mi mi bilif se yu yu Mesaea, yu yu Pikinini blong God” (Jon 11:27). Stori blong Meri, Mata mo Lasaros i save mekem testemoni blong ol pikinini i kam moa strong long saed blong Jisas Kraes.

Samfala Aktiviti we Yu Save Mekem

• Talem long sot toktok stori blong Jisas we i stap resemap Lasaros long ded (luk tu long “Japta 43: Jisas I Mekem Lasaros I Laef Bakegen,” long Ol Niu Testeman Stori, 107–109, o vidio we i go wetem long ChurchofJesusChrist.org). Soem long ol pikinini wan branj blong tri we i drae mo wan plant we i stap laef, mo askem olgeta wijwan i ded mo wijwan i stap laef. Serem testemoni blong yu se, tru long paoa blong Jisas Kraes, ol pipol we oli ded bae oli laef bakegen long ded mo laef blong oltaem.

• Helpem ol pikinini blong lanem baehat sentens ia we Jisas i bin talem long Mata: “Mi nao, mi stamba blong laef bakegen long ded” (Jon 11:25). Eksplenem se, from Laef Bakegen long Ded blong Sevya, bae yumi luk bakegen olgeta we yumi lavem, we oli bin ded finis.

Tijim Doktrin: Ol Bigfala Pikinini

Luk 15

Mi save helpem Jisas blong faenem sipsip blong Hem we i bin lus.

Yumi evriwan i save wan we i lus long sam wei, olsem wan sipsip we i lus, o koen we i lus o pikinini boe we i lus mo kambak bakegen, long ol parabol blong Sevya. Tingting long wei we yu save givim insperesen long ol pikinini blong go aot mo givhan long ol pipol ia wetem lav.

Samfala Aktiviti we Yu Save Mekem

• Helpem ol pikinini blong ridim parabol blong sipsip we i bin lus o parabol blong koen we i lus, we i stap long Luk 15:1–10, mo serem wanem oli lanem.

• Raetem ol nem ia long bod: papa, bigfala brata, mo yangfala brata. Soem vidio blong “The Prodigal Son” (ChurchofJesusChrist.org) mo stop wanwan taem blong mekem se ol pikinini oli save raetem long bod, sam long ol filing blong ol pipol we oli putum long lis blong olgeta ia. ?Olsem wanem nao Papa long Heven mo Jisas, Tufala i filim abaot olgeta we oli mekem sin?

• Askem wan pikinini blong go aotsaed long klasrum, mo ol narafala pikinini oli haedem wan koen o wan pepa sipsip. Askem pikinini ia blong kambak mo lukaotem koen ia o sipsip ia. ?Wanem nao sam wei we ol pipol oli save filim se “oli lus” olsem koen o sipsip ia? Invaetem ol pikinini blong talemaot sam wei we oli save go aot mo givhan long olgeta. Singsing wetem ol pikinini wan singsing we i go wetem, olsem “Dear to the Heart of the Shepherd” (Hymns, namba 221), mo testifae long glad ia we i kam long ol pipol we oli kambak long God.

• Eksplenem se Jisas i yusum sipsip we i lus, koen we i lus mo pikinini boe we i bin lus mo kambak bakegen, blong ripresentem ol pipol we oli “lus” from se oli No gat ol blesing blong gospel. Invaetem ol pikinini blong tingting long ol pipol we oli save, we oli no gat ol blesing ia long laef blong olgeta. ?Wanem nao oli save mekem blong helpem ol pipol ia blong filim lav blong Papa long Heven long olgeta.

Man blong Lukaot long Ol Sipsip we I Kaen, i kam long Yongsung Kim

Luk 17:11–19

Mi save soem lav blong mi long Papa long Heven taem mi stap glad long ol blesing blong mi.

Stori blong ol ten man we oli gat rabis sik long skin, maet i wan gudfala wei blong givim insperesen long ol pikinini blong soem.

Samfala Aktiviti we Yu Save Mekem

• Ridim tugeta stori blong ten man we oli gat rabis sik long skin. ?Long wanem wei nao hemia we i talem tangkyu i kasem blesing from fasin blong talem tangkyu? ?From wanem i impoten blong talem tangkyu long God from ol blesing blong yumi?

• Invaetem ol pikinini blong mekem lis blong ol samting we oli tangkyu from, we i stat wetem wanwan leta long nem blong olgeta.

• Askem ol pikinini blong raetem ol tangkyu not i go long Papa long Heven from ol blesing we Hem i stap givim long olgeta. Oli save hangem ol not ia long saed blong bed blong olgeta blong rimaenem olgeta blong stap talem tangkyu taem oli prea.

Jon 11:1–46

Mifala i biliv se Jisas i Pikinini blong God.

?Olsem wanem nao yu save yusum stori blong Meri, Mata mo Lasaros blong helpem ol pikinini blong save, semmak olsem we Mata i bin mekem, se Jisas i “Kraes, Pikinini blong God”? (Jon 11:27).

Samfala Aktiviti we Yu Save Mekem

• Raetem sam stetmen blong ol pipol we oli bin talem long bod, long Jon 11. Askem ol pikinini blong talemaot huia i talem wanwan stetmen, mo invaetem olgeta blong lukaotem long Jon 11 blong jekem ol ansa blong olgeta. ?Wanem nao bae oli filim sapos olgeta nao Jisas, Mata, Meri o Lasaros? ?Olsem wanem nao taem yumi stap biliv long Jisas Kraes, i helpem yumi taem yumi harem nogud o taem yumi fraet?

• Ridim testemoni blong Mata we i stap long Jon 11:20–27. Askem ol pikinini blong lukaotem ol toktok mo sentens we i soem se Mata i bin gat fet long Jisas Kraes. ?Wanem nao yumi save mekem blong gat fet long Hem?

• Helpem ol pikinini blong oli lanem baehat Jon 11:25. Eksplenem se evriwan bae oli laef bakegen long ded, be olgeta nomo we oli stret mo gud bae oli kasem laef we i no save finis mo laef wetem Papa long Heven mo Jisas Kraes bakegen.

Stap Leftemap Tingting blong Lanem Samting long Hom

Givim sam pepa long ol pikinini, we oli save yusum blong raetem o droem ol samting we oli glad from, long ful wik.

Kam Antap long Fasin blong Yumi blong Stap Tij

Blong stap ripriptim samting i wan ki step blong stap lanem samting. Ol pikinini oli mekem gud moa taem oli harem wan gospel prinsipol o mekem wan aktiviti moa bitim wan taem. Traem blong stap ripitim ol aktiviti long plante defren wei.