“22–28 Mei. Josef Smit—Matiu 1; Matiu 24–25; Mak 12–13; Luk 21: ‘Pikinini blong Ol Man Bambae I Kam,’” Kam Folem Mi—Blong Praemeri: Niu Testeman 2023 (2022)
“22–28 Mei. Josef Smit—Matiu 1; Matiu 24–25; Mak 12–13; Luk 21,” Kam Folem Mi—Blong Praemeri: 2023
Seken Kaming, i kam long Harry Anderson
22–28 Mei
Josef Smit—Matiu 1; Matiu 24–25; Mak 12–13; Luk 21
“Pikinini blong Ol Man Bambae I Kam”
Tingting hevi long wanem ol pikinini we yu tijim, oli nidim blong lanem long Josef Smit—Matiu 1; Matiu 24–25; Mak 12–13; mo Luk 21. Yu save jenisim folem ol aedia blong ol bigfala pikinini long aotlaen ia, blong ol yangfala pikinini, mo nara wei raon.
Invaetem Ol Pikinini blong Serem Wanem Oli Gat
Karem wan samting o wan pikja i kam long klas we i go wetem wan long ol parabol o stori long riding blong wik ia (olsem oel, blong ripresentem ol ten yangfala gel o koen blong ripresentem ol talen o tu smol mane blong wido). Askem ol pikinini blong serem wanem oli save abaot parabol o stori ia.
Tijim Doktrin: Ol Smol Pikinini
Bifo Jisas bae i kambak bakegen, bae oli prijim gospel i go long ful wol.
Wan saen we i stap soem se Jisas bae i kambak i no longtaem, i we, gospel blong Hem bae oli prijim i go long ful wol. Ol pikinini oli save help blong mekem profesi ia i hapen, taem oli stap serem gospel.
Samfala Aktiviti we Yu Save Mekem
-
Soem wan map, wan raon wol map, o wan pikja blong wol (luk long Gospel Art Buk, namba 3) mo helpem ol pikinini blong talem: “Gospel ia … bambae oli prijim long ful wol” (Josef Smit—Matiu 1:31). ?From wanem God i wantem evri pikinini blong Hem oli harem gospel?
-
Invaetem ol pikinini blong stap maj long sem ples we oli stanap long hem taem bae yufala singsing tugeta wan singsing abaot wok blong stap serem gospel, olsem “I Want to Be a Missionary Now” o “Called to Serve” (Children’s Songbook, 168, 174).
-
Soem vidio blong “I’ll Go Where You Want Me to Go” (ChurchofJesusChrist.org). Taem ol pikinini oli stap waj, helpem olgeta blong kaontem ol wei blong serem gospel, we oli luk long vidio. ?Wanem sam narafala wei blong serem gospel, we olgeta oli save tingting long hem?
Bae oli prijim gospel i go long ful wol NASA Johnson Space Center i glad blong serem foto ia.
Mi save yusum ol talen we God i bin givim long mi.
Ol smol pikinini oli stap faenemaot ol talen mo samting we oli gud long hem. Helpem olgeta blong andastanem se ol talen ia mo save o paoa blong mekem samting, oli kam long God.
Samfala Aktiviti we Yu Save Mekem
-
Karem sam koen i kam blong yusum taem yu stap talem parabol blong ol talen we i stap long Matiu 25:14–30. Yu save askem tri pikinini blong ripresentem ol trifala wokman. Eksplenem se long taem blong Jisas, ol talen oli luk olsem mane, be tedei ol talen i save minim ol talen, o ol samting we yumi save mekem, o yumi gud long olgeta.
-
Askem ol pikinini blong talem ol wei we papa mo mama, ol brata mo sista, ol tija o ol fren, oli bin helpem olgeta. ?Wanem talen nao olgeta ia oli gat we i helpem olgeta blong givim seves long ol narafala man?
-
Raetemdaon wan smol not i go long ol pikinini blong talem long wanwan long olgeta abaot ol talen mo kwaliti, we yu bin luksave long olgeta. Taem yu serem wetem wanwan long ol pikinini ol talen we yu luk long olgeta, leftemap tingting blong olgeta blong mekem ol talen blong olgeta i kam antap, mo blong oli yusum blong givim seves long ol narafalawan.
Jisas i wantem mi blong givim seves long ol narafala man.
Yumi givim seves long Papa long Heven mo Jisas Kraes, taem yumi givim seves long ol pipol raon long yumi. Helpem ol pikinini blong tingting long ol wei we oli save givim seves long ol narafala man.
Samfala Aktiviti we Yu Save Mekem
-
Long sot toktok, talem parabol ia long Matiu 25:34–46. Helpem ol pikinini blong andastanem se taem yumi stap givim seves long ol narafala man, yumi stap givim seves long Jisas.
-
Leftemap pikja blong wan pikinini mo haedem pikja blong Jisas biaen long hem. ?Wanem nao yumi save mekem blong givim seves long pikinini ia? Karemaot pikja blong pikinini, mo eksplenem se taem yumi givim seves long yumi wanwan, yumi stap givim seves long Jisas.
-
Invaetem ol pikinini blong dro olgeta bakegen we oli stap givim seves long ol narafala man, long ol wei we Sevya i stap tokbaot long Matiu 25:35–36. Askem ol pikinini blong talemaot wanem oli stap droem.
-
Invaetem ol pikinini blong serem ol eksperiens taem wan i bin soem fasin olsem hemia blong Kraes tru long seves, long olgeta o long ol famli blong olgeta.
Tijim Doktrin: Ol Bigfala Pikinini
Bifo Jisas bae i kambak bakegen, bae oli prijim gospel i go long ful wol.
Ol pikinini we yu stap tijim oli save help blong prijim gospel i go long ful wol bifo Seken Kaming blong Sevya.
Samfala Aktiviti we Yu Save Mekem
-
Invaetem ol pikinini blong serem ol blesing we oli bin kasem o bae oli kasem, from se oli ol memba blong Jos blong Kraes. Ridim tugeta Josef Smit—Matiu 1:31, mo askem ol pikinini, wanem oli filim abaot gospel we bae i blesem ol pikinini blong God raon long wol.
-
Soem long ol pikinini wan map blong wol, o blong kantri blong yu, mo helpem olgeta blong talemaot sam ples we wan memba blong famli o fren i bin go prijim gospel long ples ia, long taem blong misin blong olgeta.
-
Invaetem sam pikinini blong rere blong serem olsem wanem ol memba blong famli blong olgeta o ol bubu blong olgeta, oli bin kasem gospel long fas ples.
-
Askem wanwan pikinini blong talem nem blong wan we bae oli save tokbaot Jisas Kraes long olgeta, o invaetem olgeta blong kam long jos. Mo tu, askem ol pikinini blong mekem wan lis blong ol samting we oli save mekem naoia, blong stap olsem wan misinari.
Mi mi responsibol blong jenisim laef blong mi i go long Jisas Kraes.
Parabol blong ol ten yangfala gel i tijim se, yumi no save askem laef blong wan we i jenisim laef i go long Sevya, blong givim i kam long yumi. ?Olsem wanem bae yu helpem ol pikinini blong oli responsibol blong jenisim laef blong olgetawan?
Samfala Aktiviti we Yu Save Mekem
-
Askem wan pikinini blong rere blong serem olsem wanem hem bin lanem abaot parabol blong ol ten yangfala gel, long hom long wik ia.
-
Dro long bod wan laet we i yusum oel mo raetem long hem se testemoni. Givim long wanwan pikinini wan pis blong pepa we sep blong hem i olsem wan drop blong oel, mo askem wanwan pikinini blong raetem wan samting we hem bae i mekem blong jenisim moa laef blong hem i go long Sevya. Stikim ol pepa drop ia raon long lamp laet ia, long bod.
-
Invaetem ol pikinini blong helpem yu blong mekem wan lis blong ol samting blong mekem, blong wan spesel visita. ?Long wanem wei nao ol samting ia oli semmak o defren long ol wei we yumi save rere long saed blong spirit, from Seken Kaming blong Sevya?
-
Long faef pis blong pepa, raetem ol samting we yumi no save askem wan blong i letem long yumi from yumi wantem. Long faef pis blong pepa, raetem ol samting we yumi save askem blong oli letem long yumi. Miksim ol pis ia, mo askem ol pikinini blong putum gud olgeta long tufala grup ia. Ridim tugeta Matiu 25:1–13. ?From wanem hem i impoten blong no dipen long ol narawan blong yumi jenisim laef i go long Sevya?
Long taem blong faenol jajmen, bae yumi givim wan stori blong laef blong yumi long Lod.
Afta long Laef Bakegen long Ded, Lod bae i jajem yumi folem fasin blong yumi, blong stap obei long ol komanmen blong Hem mo blong akseptem atonmen mo sakrifaes blong Hem. Parabol blong ol talen mo parabol blong ol sipsip mo nanigot, oli tijim yumi abaot Las Jajmen ia.
Samfala Aktiviti we Yu Save Mekem
-
Invaetem haf long ol pikinini blong ridim Matiu 25:14–30 mo narafala haf blong oli ridim Matiu 25:31–46. Askem ol grup blong aktem ol parabol ia long klas. ?Wanem nao Lod i stap tijim yumi long ol parabol ia?
-
Invaetem ol pikinini blong ridim Matiu 25:35–36 tutu mo mekem wan lis blong ol samting we oli save mekem blong soem laf blong olgeta long Jisas Kraes.
Stap Leftemap Tingting blong Lanem Samting long Hom
Askem ol pikinini blong serem wetem ol famli blong olgeta, ol wei we oli save kam ol moa gud misinari mo toktok long ol famli blong olgeta abaot ol pipol we oli save serem gospel wetem olgeta.
Kam Antap long Fasin blong Yumi blong Stap Tij
Lisin, o aktem wan stori. From se ol pikinini oli laekem ol stori, lukaotem ol wei blong mekem se oli pat long ol stori we yu stap serem wetem olgeta. Oli save holem ol pikja o ol samting, dro ol pikja blong ol stori, aktem ol stori o help blong talem stori. Ripitim ol stori blong helpem olgeta blong luksave ol impoten pat mo ol tijing blong gospel.