Las Sapa

Blong Tingbaot, i kam long Walter Rane

29 Mei–4 Jun

Matiu 26; Mak 14; Jon 13

“Blong Tingbaot”

Taem yu ridim Matiu 26; Mak 14; mo Jon 13, lukaotem ol prinsipol we yu filim se bae i blesem ol pikinini we yu tijim.

serem pikja bokis

Invaetem Ol Pikinini blong Serem Wanem Oli Gat

Soem ol samting we i stap hapen insaed long ol japta ia, olsem Gospel Art Buk, ol namba 54–55, mo invaetem ol pikinini blong talem wanem i stap hapen long ol pikja ia.

tijing pikja bokis

Tijim Doktrin: Ol Smol Pikinini

Matiu 26:26–29; Mak 14:22–24

Sakramen i helpem mi blong tingting long Jisas.

Helpem ol pikinini blong andastanem se, blong tekem sakramen i wan janis blong tingbaot wanem we Jisas i bin mekem from yumi.

Samfala Aktiviti we Yu Save Mekem

• Talem long sot toktok, stori blong Jisas we i statem sakramen. Yu save yusum “Japta 49: Fas Sakramen” (long Ol Niu Testeman Stori, 124–26, o vidio we i go wetem long ChurchofJesusChrist.org), o vidio blong “Sacrament” (ChurchofJesusChrist.org). ?From wanem yumi tekem sakramen? Helpem ol pikinini blong andastanem se yumi tingbaot Jisas long taem blong sakramen.

• Soem long ol pikinini, wan pis blong bred mo wan kap blong wota. Askem olgeta sapos oli save mining blong bred mo wota. Eksplenem se ol simbol ia oli helpem yumi blong tingbaot se, Jisas i bin ded mo girap bakegen long ded.

• Askem ol pikinini blong sarem ae blong olgeta mo tingting long wan we oli lavem, afta, invaetem olgeta blong talem long yu, wanem abaot man o woman ia. Askem ol pikinini blong sarem ae blong olgeta bakegen, tingting long Sevya, afta serem ol samting we oli save abaot Hem. Leftemap tingting blong olgeta blong tingbaot Jisas long taem blong sakramen.

• Invaetem ol pikinini blong soem long yu, wanem oli save mekem blong tingbaot Jisas mo stap kwaet long taem blong sakramen. Helpem ol pikinini blong mekem buklet we oli tokbaot long aktiviti pej blong wik ia, mo yusum blong helpem olgeta blong tingbaot Jisas long taem blong sakramen. Ol askem olgeta blong lukaotem sam pikja blong Jisas long ol magasin blong Jos mo krietem wan pikja albom we oli save lukluk long hem long taem blong sakramen.

Jon 13:34–35

Mi save lavem ol narawan olsem Jisas i bin mekem.

Jisas i soem lav blong Hem taem Hem i stap kea long olgeta we oli stap raon long Hem. ?Wanem ol janis we ol pikinini we yu tijim, oli gat we oli save soem lav blong olgeta wetem ol narafalawan?

Samfala Aktiviti we Yu Save Mekem

• Soem ol pikja blong ol stori we ol pikinini oli bin lanem long yia ia, taem we Jisas i soem lav blong Hem long ol narafala man (luk long aotlaen we i pas long Kam Folem Mi—Blong Wanwan Man, Woman, mo Famli). Ridim Jon 13:34–35, mo helpem ol pikinini blong ripitim sentens ia “Olsem we mi mi lavem yufala … lavlavem yufala.” ?Wanem wei nao yumi save soem lav blong yumi long famli mo ol fren blong yumi?

• Invaetem wan pikinini blong holem wan pikja blong Sevya, taem bae evriwan i singsing wan singsing abaot lav blong Sevya, olsem “Love One Another” (Children’s Songbook, 136). Givim long ol pikinini sep blong hat long pepa, mo invaetem olgeta blong droem wan pikja blong olgetawan we oli stap mekem wan samting, blong soem lav blong olgeta long wan narawan.

tijing pikja bokis

Tijim Doktrin: Ol Bigfala Pikinini

Matiu 26:26–29; Mak 14:22–24

Sakramen i helpem mi blong tingbaot Jisas Kraes mo sakrifaes blong Hem from mi.

?Olsem wanem yu save helpem ol pikinini blong gat wan eksperiens we i gat moa mining, long taem blong sakramen?

Samfala Aktiviti we Yu Save Mekem

• Invaetem ol pikinini blong wan i rid afta narawan long ol ves long Matiu 26:26–29 o Mak 14:22–24 (luk tu long Josef Smit Translesen, Mak 14:20–24 [long Baebol apendiks]) mo Doktrin mo Ol Kavenan 20:75–79. ?Wanem ol toktok mo ol aedia we oli semmak long tufala sentens ia?

• Askem ol pikinini wanem oli mekem blong helpem olgeta blong tingbaot Jisas, long taem blong sakramen? Helpem olgeta blong faenem ol toktok long ol hym blong sakramen, we oli save ridim long taem blong sakramen, afta, mekem lis blong ol hym ia long wan kad, blong ol pikinini oli save lukbak long hem long nekis taem we oli tekem sakramen. Singsing sam long ol singsing ia wetem ol pikinini (luk long Hymns, ol namba. 169–97).

  ol pikinini oli stap tekem sakramen.

  Sakramen i helpem yumi blong tingbaot Jisas Kraes mo sakrifaes blong Hem from yumi.

• Raetem ol ki toktok we i stap long ol prea blong sakramen long bod, mo helpem ol pikinini blong lanem baehat. ?Wanem nao ol toktok ia oli minim? ?From wanem hem i impoten blong riniu ol kavenan we yumi mekem taem yumi baptaes, evri wik?

• Invaetem wan Aronik Prishud blong talem long ol pikinini abaot eksperiens blong hem, long saed blong stap rere, blesem o pasem sakramen. ?Wanem i helpem hem blong rere from hemia? ?Wanem nao hem i filim taem hem i mekem hemia? ?Long wanem wei nao, bred mo wota i rimaenem hem long Sevya?

• Askem ol pikinini we oli bin baptaes blong serem wanem oli tingbaot abaot baptaes blong olgeta. ?Oli bin filim olsem wanem? ?Wanem kavenan nao oli bin mekem? (luk long Mosaea 18:8–10). Talem long olgeta se, evri wik taem yumi tekpat long sakramen, i save olsem se, yumi baptaes bakegen—yumi save kasem fogivnes from ol sin blong yumi, mo yumi riniu ol kavenan blong yumi.

Jon 13:1–17

Jisas i bin soem long mi olsem wanem blong givim seves long ol narafala man.

Stori blong Sevya we i stap wasem leg blong ol disaepol blong Hem, i save givim insperesen long ol pikinini we yu tijim, blong stap lavem mo givim seves long ol pipol raon long olgeta.

Samfala Aktiviti we Yu Save Mekem

• Sam dei bifo, askem wan pikinini blong ridim Jon 13:4–9 mo serem stori wetem evriwan long klas, abaot wanem tingting blong Pita. ?Wanem nao Sevya i stap traem blong tijim long Pita mo ol narafala Aposol? Ol pikinini oli save tokbaot wanem oli bin lanem abaot Jisas Kraes aot long stori ia. ?Wanem nao yumi lanem abaot fasin blong stap givim seves long narafala man?

• Tugeta, ridim Jon 13:12–17. Askem ol pikinini blong wanwan i raet abaot wan taem, taem we Sevya i givim seves long wan narafala man. Leftemap tingting blong olgeta blong raetem tu wanem oli lanem aot long eksampol blong Hem. Sapos oli nidim help, oli save lukaotem ol eksampol we i stap long vidio blong “Christlike Attributes” (ChurchofJesusChrist.org). Invaetem olgeta blong serem wanem we oli raetem wetem evriwan long klas.

Jon 13:34–35

Ol disaepol blong Jisas Kraes oli lavem ol narafala man olsem we Jisas i bin mekem.

Taem we yumi kasem baptaes, yumi mekem ol kavenan blong kam ol disaepol blong Jisas Kraes. Long Jon 13:34–35, Sevya i tokbaot olsem wanem yumi save soem se yumi ol disaepol blong Hem.

Samfala Aktiviti we Yu Save Mekem

• Raetem long bod yufala i mas lavlavem yufala; olsem we mi mi lavem yufala (Jon 13:34). Invaetem ol pikinini blong lukluk long ol skripja mo fulumap spes long laen. ?Wanem sam narafala samting we yumi save mekem, blong soem se yumi ol disaepol blong Kraes? Maet bae ol pikinini oli tingting long sam narafala toktok we bae i komplitim sentens long bod, olsem givim seves mo bin givim seves o tij mo bin tijim.

• Invaetem ol pikinini blong ridim Jon 13:35 mo tingting long ol pipol we oli bin stap olsem ol disaepol blong Jisas Kraes. Askem olgeta blong serem olsem wanem nao ol pipol ia oli soem lav long ol narafala man, olsem we Sevya i bin mekem.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong tokbaot wetem ol famli blong olgeta, wan samting we bae oli mekem, from se oli bin lanem long klas. Eksampol: Oli save tokbaot se, long wanem wei nao bae oli tingbaot Jisas Kraes long taem blong sakramen.

Stap Kam Antap long Fasin blong Yumi Blong Stap Tij

Serem testemoni blong yu long klas. Wan testemoni hem i save simpol nomo olsem: “Mi save se Papa long Heven i lavem wanwan long yufala” o : “Mi harem gud taem mi lanem abaot Jisas Kraes.”

aktiviti pej: sakramen