“12–18 Jun. Luk 22; John 18: ‘I No Olsem Tingting blong Mi, Be Mekem Olsem Tingting blong Yu Nomo,’” Kam Folem Mi—Blong Praemeri: Niu Testeman 2023 (2022)
“12–18 Jun. Luk 22; John 18,” Kam Folem Mi—Blong Praemeri: 2023
Tabu Ples long Getsemane, i kam long Derek Hegsted
12–18 Jun
Luk 22; John 18
“I No Olsem Tingting blong Mi, Be Mekem Olsem Tingting blong Yu Nomo”
Blong lanem samting aot long Luk 22 mo John 18 wetem ol pikinini i wan janis blong helpem olgeta blong gat lav we i moa bigwan long Jisas Kraes mo fet blong olgeta long Hem. Wetem plante prea, tingting long olsem wanem blong mekem hemia.
Invaetem Ol Pikinini blong Serem Wanem Oli Gat
Soem ol pikja blong ol samting we oli stap hapen long ol japta ia, olsem Jisas I Stap Prea long Getsemane (Gospel Art Buk, namba 56) mo ol pikja long Kam Folem Mi—Blong Wanwan Man, Woman mo Famli. Invaetem ol pikinini blong talem wanem i stap hapen insaed long ol pikja ia.
Tijim Doktrin: Ol Smol Pikinini
Jisas i safa from mi, from se Hem i lavem mi.
Tingting long olsem wanem yu save helpem ol pikinini blong filim lav blong Jisas long olgeta, taem yu toktok raon long stori blong Hem we i safa long Getsemane.
Samfala Aktiviti we Yu Save Mekem
-
Talem stori long Luk 22:39–46 long ol pikinini, ating taem yu stap yusum “Japta 51: Jisas I Safa long Garen blong Getsemane” (long Ol Niu Testeman Stori, 129–132, o vidio we i go wetem ChurchofJesusChrist.org). Eksplenem se Jisas i bin filim evri soa long bodi mo harem nogud, we evriwan oli neva filim bifo. Askem ol pikinini se wanem nao i mekem wan man i save harem nogud, filim soa long bodi o wari. Testifae se Jisas i save helpem yumi blong filim moa gud, taem yumi stap filim olsem.
-
Pasem i go raon pikja blong Sevya long Getsemane (olsem hemia long aotlaen blong wik ia long Kam Folem Mi—Blong Wanwan Man, Woman, mo Famli). Taem evri pikinini oli holem pikja, talem, “Jisas i safa from se Hem i lavem [talem nem blong pikinini ia].” Invaetem ol pikinini blong ripitim ol toktok ia wetem yu.
-
Singsing wan singsing wetem ol pikinini abaot lav blong Sevya from yumi, olsem “Filim Lav blong Sevya” (Fren, Julae 2021). Helpem olgeta blong tingting long ol wei we oli filim lav blong Jisas.
Mi save prea taem mi nidim help.
Taem Jisas i prea long Getsemane, wan enjel i kamkamaot mo mekem Hem i kam strong. ?Long wanem wei nao yu save helpem ol pikinini we yu tijim blong andastanem se, olgeta tu, oli save prea long Papa long Heven blong i givim paoa long olgeta.
Samfala Aktiviti we Yu Save Mekem
-
Talem long sot toktok Luk 22:41–43 long ol pikinini. Serem wan eksperiens long taem we yu bin prea from help, mo Papa long Heven i bin mekem yu kam strong tru long Tabu Spirit o i sendem wan i helpem yu.
-
Long ol pis pepa, raetem sam samting we yumi talem long wan prea, olsem “Papa long Heven,” “Mi talem tangkyu long yu,” “Mi askem yu,” mo “long nem blong Jisas Kraes, amen.” Putum ol pis pepa long flo be i no long oda, mo helpem ol pikinini blong putum long oda, long wei we bae yumi talem long wan prea. ?Wanem nao yumi tangkyu long Papa long Heven from? ?Wanem bakegen yumi save talem long Hem? Testifae se ol pikinini oli save prea long Papa long Heven, long eni ples mo eni taem.
Kraes I stap Prea long Garen blong Getsemane, i kam long Hermann Clementz
Tijim Doktrin: Ol Bigfala Pikinini
Long Getsemane, Jisas Kraes i tekem long Hemwan ol sin mo harem nogud blong mi.
Taem yumi save wanem we Jisas i bin mekem from yumi long Getsemane, i save helpem ol pikinini blong sakem sin mo tanem olgeta i go long Sevya, taem oli fesem ol hadtaem.
Samfala Aktiviti we Yu Save Mekem
-
Invaetem ol pikinini blong ridim Luk 22:39–46, mo mo lukaotem ol toktok o sentens we i tokbaot wanem nao Jisas i bin filim long Getsemane. ?Wanem nao Jisas i stap eksperiensem we i mekem se Hem i filim olsem ia? (luk long Doktrin mo Ol Kavenan 19:16–19). Givim janis long ol pikinini blong serem ol filing blong olgeta abaot Jisas mo sakrifaes blong Hem from yumi.
-
Invaetem ol pikinini blong serem wan taem we oli bin harem nogud o filim soa long bodi. Askem olgeta sapos oli save eniwan we i bin filim semmak samting. Invaetem olgeta blong ridim Alma 7:11–12. ?Wanem nao ol ves ia oli stap tijim yumi abaot Jisas Kraes mo safaring blong Hem, from yumi.
-
Givim wan stik we i longfala bitim sotfala saed blong doa blong klasrum, mo askem hem blong holem kros mo traem blong wokbaot go tru long doa. Eksplenem se stik ia i ripresentem ol sin blong yumi, we i blokem yumi blong go insaed long kingdom blong God. Karemaot stik mo soem se Jisas i bin tekem long Hemwan ol sin blong yumi, mekem se yumi save kasem fogivnes taem yumi sakem sin.
Yumi save folem eksampol blong Jisas taem yumi stap obei long Papa long Heven.
Jisas i soem fasin blong stap obei long Papa taem Hem i bin talem: “I no olsem tingting blong mi, be mekem olsem tingting blong yu nomo” (Luk 22:42). ?Olsem wanem nao yu save helpem ol pikinini blong lanem samting aot long eksampol blong hem?
Samfala Aktiviti we Yu Save Mekem
-
Helpem ol pikinini blong lanem baehat sentens ia: “I no olsem tingting blong mi, be mekem olsem tingting blong yu nomo,” (Luk 22:42) mo toktok raon long mining blong hem. ?Wanem nao yumi save mekem blong obei long tingting blong Papa long Heven?
-
Helpem ol pikinini blong talemaot sam risen, from wanem, samtaem i had blong mekem wanem we Papa long Heven i wantem. ?Wanem ol blesing we yumi bin kasem taem yumi stap obei long Papa long Heven, nomata se i had?
Jisas i lavem ol enemi blong Hem.
Blong stap lanem blong stap olsem man we i putum pis, i no isi, speseli taem ol narawan oli no kaen long yumi. ?Olsem wanem nao stori long Luk 22:50–51 i save givim insperesen long ol pikinini we yu stap tijim blong stap kaen long evri situesen?
Samfala Aktiviti we Yu Save Mekem
-
Invaetem ol pikinini blong ridim Luk 22:50–51. ?Wanem nao yumi lanem abaot Jisas long stori ia? Truaot long wik, askem sam long ol papa mo mama blong ol pikinini blong talem long yu abaot ol taem we, ol pikinini blong olgeta oli bin soem fasin blong stap kaen, nomata se i had. Serem ol stori ia long klas. (Rimaenem ol pikinini se, blong stap kaen i no minim se, blong oli letem ol narawan oli mekem nogud long olgeta, oli mas toktok long papa mo mama o wan adalt we oli trastem, sapos wan i stap mekem nogud long olgeta.)
-
Singsing long wan singsing abaot fasin blong stap kaen, olsem “Kindness Begins with Me” (Children’s Songbook, 145). ?Wanem nao singsing ia i tijim abaot fasin blong stap kaen? ?Olsem wanem nao yumi save soem fasin blong stap kaen long ol narafala man, olsem we Sevya i bin mekem?
Stap Leftemap Tingting blong Lanem Samting long Hom
Invaetem ol pikinini blong oli serem ol testemoni blong olgeta abaot Sevya, wetem ol famli blong olgeta. Oli save askem tu ol memba blong famli blong olgeta blong serem testemoni blong olgeta abaot Hem.
Kam Antap long Fasin blong Yumi blong Stap Tij
Invaetem ol pikinini blong serem wanem we oli save. “Askem [ol pikinini] blong serem ol tingting blong olgeta, ol filing mo ol eksperiens blong olgeta wetem yu, we i go wetem ol prinsipol we yu stap tijim. Bae yu faenem se oli gat ol niu tingting we oli simpol, klin mo fulap long paoa” (Teaching in the Savior’s Way, 26).