Ecce Homo (Kraes we Oli Hangem Hem long Kros), i kam long Antonio Ciseri

19–25 Jun

Matiu 27; Mark 15; Luk 23; Jon 19

“Olgeta Samting I Finis Nao”

Stat blong ridim mo rere long Matiu 27; Mark 15; Luk 23; mo Jon 19. Wetem prea, lukaotem blong andastanem ol nid blong ol pikinini.

Invaetem Ol Pikinini blong Serem Wanem Oli Gat

Askem wanwan pikinini blong holem pikja long aotlaen blong wik ia long Kam Folem Mi—Blong Wanwan Man, Woman mo Famli. Taem oli stap holem pikja, wanwan pikinini i save serem wan samting we oli luk long pikja.

Tijim Doktrin: Ol Smol Pikinini

Matiu 27:11–66; Luk 23; Jon 19

From se Jisas i ded from mi, mi save girap bakegen long ded.

Ol smol pikinini bae oli harem nogud long stori blong Jisas we oli Hangem Hem long Kros. “Japta 52: Ol Hadtaem blong Jisas” mo “Japta 53: Jisas I Bin Krusifae” (long Ol Niu Testeman Stori, 133–138, o vidio we i go wetem long ChurchofJesusChrist.org) givim wan gudfala eksampol blong olsem wanem yu save serem stori ia long wan stret wei, wetem olgeta.

Samfala Aktiviti we Yu Save Mekem

• Soem pikja long aotlaen blong wik ia long Kam Folem Mi—Blong Wanwan Man, Woman mo Famli taem yu stap tokbaot hadtaem blong Jisas, taem oli nilim ded Hem long kros mo taem we oli berem Hem (luk tu long Gospel Art Buk, ol namba 57–58). Invaetem ol pikinini blong serem wanem oli save abaot ol stori ia. Eksplenem se long nambatri dei, Jisas i bin laef bakegen long ded. Long nara toktok, Hem i kambak long laef.

• Askem ol pikinini blong talem nem blong sam samting we ol papa mo mama blong olgeta oli stap mekem blong olgeta, from se oli no save mekem blong olgetawan. Soem wan pikja blong Sevya. Eksplenem se, from Jisas, bae yumi save laef bakegen long ded—wan samting we yumi no save mekem blong yumiwan.

• Soem wan pikja blong wan we yu save we i bin ded finis. Serem testemoni blong yu se, from Jisas Kraes, bae man ia i laef bakegen wan dei.

Taem we Oli Berem Jisas,i kam long Carl Heinrich Bloch

Matiu 27:26–37; Luk 23:34

Mi save fogivim ol narafala man olsem we Jisas i bin mekem.

?Long wanem wei nao bae yu helpem ol pikinini blong andastanem, olsem wanem blong fogivim olgeta we oli no stap kaen, olsem we Jisas i bin mekem?

Samfala Aktiviti we Yu Save Mekem

• Tokbaot ol wei we ol soldia oli no stap kaen long Jisas (luk long Matiu 27:26–37), mo afta, ridim Luk 23:34. Eksplenem se taem yumi fogivim ol narawan, i minim se yumi nomo kros long olgeta, mo yumi soem lav long olgeta.

• Serem wan eksampol abaot wan we i talem o mekem wan samting we i no kaen. Invaetem ol pikinini blong tokbaot olsem wanem bae oli save soem fasin blong fogivim man long ol situesen olsem.

• Singsing tugeta wan singsing abaot fasin blong fogiv “Help Me, Dear Father” (Children’s Songbook, 99). Askem ol kwestin we oli ansarem long singsing olsem, “Whom should we forgive? (?Huia nao mi mas fogivim?)” o “Who can help us when forgiving is hard? (?Huia nao i save helpem yumi taem fasin blong fogivim man i had?)”

• Lukaotem wan magasin blong Fren we i jes kamaot i no longtaem, blong faenem wan stori abaot wan pikinini we i fogivim wan narafala man. Serem stori ia wetem ol pikinini.

Luk 23:32–33, 39–43

From se Jisas i safa mo ded from mi, mi save sakem sin mo kasem fogivnes.

Nomata se ol pikinini we oli anda long eit yia oli no akaontebol, hem i impoten long olgeta blong statem naoia blong stap lanem, olsem wanem blong sakem sin from ol rong joes we oli mekem.

Samfala Aktiviti we Yu Save Mekem

• Talem long sot toktok Luk 23:32–33, 39–43, mo helpem ol pikinini blong faenem tu stilman long pikja 57 long Gospel Art Buk. Eksplenem se taem fas man we sora i nogud i mekem fani long Jisas, seken man we sora i nogud i talemaot se hem i mekem wan samting we i rong—hem i stat blong sakem sin.

• Ridim Doktrin mo Ol Kavenan 19:16 long ol pikinini. ?From wanem Jisas i safa from yumi?

• Soem vidio blong “The Shiny Bicycle” (ChurchofJesusChrist.org). Eksplenem se yumi save prea long Papa long Heven mo Hem i save helpem yumi blong fiksim ol sin mo ol rong blong yumi, mo kasem fogivnes.

• Letem ol pikinini blong mekem ol mak long bod wetem jok, blong ripresentem ol rong joes. Afta, askem olgeta blong waepemaot ol mak ia long bod, blong ripresentem fasin blong sakem sin. Soem wan pikja blong Sevya, mo testifae se yumi save sakem sin, tru long Hem.

Tijim Doktrin: Ol Bigfala Pikinini

Matiu 27:11–66; Luk 23; Jon 19

Jisas Kraes i ded from mi, from se Hem i lavem mi.

?From wanem yu talem tangkyu from we Jisas Kraes i bin ded from yu? Tingting long olsem wanem yu save helpem ol pikinini blong andastanem wanem we i impoten abaot sakrifaes blong Sevya, from olgeta.

Samfala Aktiviti we Yu Save Mekem

• Raetem ol Matiu 27:11–66 long ol defdefren pis blong pepa, (blong kasem ol help blong mekem hemia, luk long “Japta 52: Ol Hadtaem blong Jisas” mo “Japta 53: Jisas I Bin Krusifae,” long Ol Niu Testeman Stori, 133–38, o vidio we i go wetem long ChurchofJesusChrist.org). Invaetem ol pikinini blong stadi long ol ves ia, mo putum ol samting we i hapen ia, long stret oda blong olgeta.

• Askem wan pikinini blong ridim Matiu 27:54, mo invaetem ol pikinini blong serem ol samting abaot Jisas we i helpem olgeta blong save se Hem i Pikinini blong God.

• Askem ol pikinini long wanem oli lanem abaot Taem we Oli Hangem Jisas long Kros, long singsing ia“Yu luk Ridima i ded long kros” (STPS, namba 16) o wan narafala singsing blong sakramen. ?From wanem nao Jisas i wantem blong safa from yumi? luk long Doktrin mo Ol Kavenan 18:10–11; 19:16).

Matiu 27:26–37; Luk 23:34

Mi save fogivim ol narafala man olsem we Jisas i bin mekem.

I had blong fogivim ol narafala man. Ol pikinini we yu stap tijim bae oli kasem blesing taem bae oli folem eksampol blong Sevya blong lanem blong fogiv.

Samfala Aktiviti we Yu Save Mekem

• Invaetem wanwan pikinini blong ridim wan afta wan, ol ves ia, abaot ol soldia we oli no kaen long Jisas long Matiu 27:26–37 mo Jisas i fogivim olgeta long Luk 23:34. (Luk long ol niu tingting we i stap long Josef Smit Translesen long Luk 23:34, futnot c.) ?Wanem nao yumi lanem long eksampol blong Jisas?

• Raetem long bod ?Wanem nao yu save mekem blong fogivim wan we i no stap kaen long yu? Askem ol pikinini blong gat janis blong raetem ol aedia, wan afta wan, long bod olsem Prea blong gat ol filing blong stap kaen long wan narafala man o Tingting long wan gudfala samting abaot man ia.

Luk 23:32–33, 39–43

From se Jisas i safa mo i ded from mi, mi save sakem sin mo kasem fogivnes.

Lesen ia i wan gudfala taem blong testifae, se from Jisas Kraes, yumi save sakem sin mo kasem fogivnes.

Samfala Aktiviti we Yu Save Mekem

• Invaetem wan pikinini blong ridim laod Luk 23:32–33, 39–43. Eksplenem se tufala we oli hangem tufala long kros, tufala sora i nogud. ?Long wanem wei nao wan long tufala we sora i nogud, i stat blong sakem sin? ?Wanem nao yumi save mekem blong soem se yumi stap sakem sin? (Luk long Gaed long ol Skripja, “Sakem Sin, Fasin blong Sakem Sin,” olskripja.ChurchofJesusChrist.org.)

• Raetem ol toktok ia long bod: “Mi save kasem fogivnes taem mi sakem sin tru long Atonmen blong Jisas Kraes.” Givim long ol pikinini sam help we bae oli save yusum blong fulumap spes long laen.

• Invaetem wan pikinini blong holem wan basket, mo fulumap wetem ol ston, taem ol narafala pikinini oli stap talem ol rong joes we wan i save stap mekem. Helpem ol pikinini blong oli komperem basket ia long ol hevi samting long saed blong spirit, we yumi stap karem taem yumi mekem sin. ?Olsem wanem nao fasin blong sakem sin i olsem, taem oli stap tekemaot ol ston aot long basket? Maet yu rimaenem ol pikinini se fasin blong sakem sin i no hapen wan taem nomo, be i wan samting blong mekem evri dei.

• Lukluk long wan magasin we i jes kamaot i no longtaem long Fren magasin blong faenem wan stori o mesej abaot fasin blong sakem sin mo serem wetem ol pikinini.

Stap Leftemap Tingting blong Lanem Samting long Hom

Leftemap tingting blong ol pikinini blong tingting long wan we oli nidim blong fogivim, mo disaed blong mekem wan samting we bae oli mekem blong soem long man o woman ia, se oli bin fogivim hem.

Stap Kam Antap long Fasin blong Yumi blong Stap Tij

Lanem blong luksave revelesen. Oltaem revelesen i stap kam “tijing folem tijing” (2 Nifae 28:30), i no evriwan long wan taem. Taem yu prea mo tingting hevi long ol skripja mo aotlaen ia, bae yu faenem se ol aedia mo ol tingting mo filing i save kam enitaem mo long eni ples—taem yu go long wok, mekem ol wok blong haos o mitim ol famli mo ol fren.