Las Sapa, i kam long William Henry Margetson

5–11 Jun

Jon 14–17

“Oltaem Yufala I Mas Joen Gud long Mi blong Mi Mi Save Lavem Yufala Olwe”

Prea blong save ol nid blong ol pikinini we yu tijim taem yu stap ridim Jon 14–17. Kam Folem Mi—Blong Wanwan Man, Woman, mo Famli i save help blong sapotem stadi blong yu, mo aotlaen ia i save givim sam aedia abaot olsem wanem blong tijim ol pikinini long klas blong yu.

Invaetem Ol Pikinini blong Serem Wanem Oli Gat

Taem yu helpem ol pikinini blong serem wanem oli bin lanem long hom, letem wanwan pikinini i gat janis blong holem wan pepa hat, mo serem wan samting we hem i mekem blong soem lav long ol narafala man.

Tijim Doktrin: Ol Smol Pikinini

Jon 14:15.

Mi soem lav blong mi long Jisas Kraes taem mi kipim ol komanmen blong Hem.

Helpem ol pikinini blong andastanem se oli save soem long Sevya se oli lavem Hem, taem oli stap obei long ol komanmen blong Hem.

Samfala Aktiviti we Yu Save Mekem

• Helpem ol pikinini blong laenem baehat Jon 14:15. Askem olgeta blong talem: “Sapos yufala i lavem mi,” taem yu leftemap wan sep blong pepa hat. Askem olgeta blong talem: “Obei long ol tok blong mi,” taem bae yu leftemap ol skripja.

• Helpem ol pikinini blong tingting long sam komanmen blong Jisas. Invaetem olgeta blong talem sam wei we oli save obei wanwan komanmen. Testifae se, blong stap mekem ol samting ia, i soem lav blong yumi long Jisas Kraes.

• Singsing tugeta wan singsing abaot ol komanmen, olsem “Keep the Commandments” (Children’s Songbook, 146–47).

• Pleplei long gem long aktiviti pej blong wik ia wetem ol pikinini.

Jon 14:26–27; 15:26; 16:13–14

Tabu Spirit i stap helpem mi.

Jisas i bin tijim ol disaepol blong Hem ol impoten trutok abaot Tabu Spirit. Tingting long olsem wanem ol trutok ia oli save helpem ol pikinini we yu stap tijim.

Samfala Aktiviti we Yu Save Mekem

• Soem pikja blong Las Sapa (Gospel Art Buk, namba 54). Eksplenem long ol pikinini se, long taem blong Las Sapa, Jisas i tijim ol disaepol blong Hem abaot tabu Spirit. Serem sam long ol trutok we Hem i bin tijim long Jon 14:26–27; 15:26; 16:13–14.

  

  Las Sapa, i kam Clark Kelley Price

• Serem wan eksperiens long wan taem we Tabu Spirit i bin givim kamfot long yu, lidim yu, o helpem yu blong save trutok. Testifae se, Tabu Spirit i save helpem ol pikinini long ol semmak wei.

• Singsing tugeta wan singsing abaot Tabu Spirit, olsem “The Holy Ghost” (Children’s Songbook, 105). Invaetem olgeta blong lisin long ol samting, we oli talemaot long singsing, we Tabu Spirit i stap mekem.

Jon 17:3

Mi save kam blong save Papa long Heven mo Jisas Kraes.

Jisas i bin tijim se “laef we i no save finis” i blong save “we yu nomo yu tru God, mo Jisas Kraes.” Taem ol pikinini we yu tijim oli kam blong save Tufala, bae oli faenem paoa long saed blong spirit, we bae i blesem olgeta truaot long laef blong olgeta mo helpem olgeta blong kasem laef we i no save finis.

Samfala Aktiviti we Yu Save Mekem

• Ridim Jon 17:3, mo askem ol pikinini blong lisin long huia nao Jisas i wantem yumi blong save. Soem sam pikja we i ripresentem ol wei we yumi save kam blong save, Papa long Heven mo Jisas Kraes, olsem ol pikja blong ol skripja, wan famli we oli stap lanem samting tugeta mo wan we i stap givim seves long wan narafala man. Putum ol pikja i fes daon, mo invaetem ol pikinini blong gat janis blong tanem ova mo tokbaot wanem we i stap long pikja. ?Hao nao ol samting ia oli helpem yumi blong save Papa long Heven mo Jisas?

• Wetem ol pikinini, tokbaot ol samting we oli stap mekem blong kam blong save ol fren blong olgeta long wan moa gud wei. ?Long wanem wei nao yumi kam blong save moa gud, Papa long Heven mo Jisas Kraes? Serem ol wei we yu bin mekem hemia.

Tijim Doktrin: Ol Bigfala Pikinini

Jon 14:15; 15:10–14

Mi soem lav blong mi long Jisas Kraes taem mi kipim ol komanmen blong Hem.

Taem yu stap ridim ol skripja ia long stadi blong yuwan, tingbaot ol pikinini we yu tijim. ?Olsem wanem nao bae oli kasem blesing, taem we oli andastanem se, taem oli stap obei long Sevya, i wan saen blong lav blong olgeta long Hem?

Samfala Aktiviti we Yu Save Mekem

• Invaetem ol pikinini blong serem ol wei we Jisas i bin soem se Hem i stap obei long Papa long Heven. Soem ol pikja blong laef blong Sevya blong helpem olgeta (luk long Gospel Art Buk, ol namba 34–35, 56–57). Askem ol pikinini blong tokbaot ol taem we oli bin obei long Papa long Heven.

• Invaetem wan pikinini blong ridim Jon 14:15. Letem ol pikinini oli gat janis blong droem ol pikja we i ripresentem wan we i stap obei long wan komanmen, mo evriwan long klas bae oli traem blong talemaot wanem we hem i stap droem ia. Blong kasem ol eksampol blong ol komanmen, luk long Blong Ol Yut Oli Kam Strong buklet (2022). ?Long wanem wei nao taem yumi stap obei long ol komanmen, i soem long Sevya se yumi lavem Hem?

Jon 14:26; 15:26; 16:13

Tabu Spirit i lidim, i givim kamfot mo i testifae long trutok.

Ol pikinini we yu tijim, ?oli kasem presen ia we i Tabu Spirit? ?Wanem nao oli save abaot, olsem wanem Tabu Spirit i save helpem olgeta? Tingting long olsem wanem yu save helpem olgeta blong andastanem moa, ol wok blong Tabu Spirit.

Samfala Aktiviti we Yu Save Mekem

• Givim ol ves ia long ol pikinini blong oli stap tutu mo ridim: Jon 14:26; 15:26; mo 16:13. Askem olgeta blong faenem ol toktok we i tijim olgeta abaot wanem we Tabu Spirit i stap mekem. Raetem ol toktok long bod.

• Serem wan eksperiens taem we Tabu Spirit i bin lidim yu, i bin givim kamfot long yu, o i bin testifae long yu long saed blong wan trutok. Invaetem ol pikinini blong serem eni eksperiens we oli bin gat. ?Long wanem wei nao oli save luksave paoa blong Tabu Spirit?

• Invaetem wanwan pikinini blong droem fes blong hem long wan pepa basket. Saenem wan tojlaet, we i ripresentem Tabu Spirit, i go insaed long wanwan basket. Afta, putum ol samting insaed long basket we bae i blokem laet, olsem wan pis klos, blong tijim se ol rong joes blong yumi i save katemdaon paoa blong Tabu Spirit long laef blong yumi. Askem ol pikinini blong karemaot ol samting long ol basket blong ripresentem fasin blong sakem sin.

Jon 15:1–9; 17:3

Papa long Heven mo Jisas Kraes, Tufala i wantem mi blong save Tufala.

Bae yu blesem laef blong ol pikinini taem yu stap helpem olgeta blong save moa gud abaot Papa long Heven mo Jisas Kraes.

Samfala Aktiviti we Yu Save Mekem

• Soem wan plan (o wan pikja blong plan) taem bae ol pikinini oli stap rid, wan afta wan, ol ves ia Jon 15:1–9. ?Long wanem wei nao Jisas i olsem wan rop? ?Long wanem wei nao yumi yumi olsem ol branj? ?Wanem nao yumi save mekem blong “obei long,” o stap kolosap long Sevya?

• Ridim laod Jon 17:3. Askem ol pikinini se, wanem nao oli stap mekem blong save Papa long Heven mo Jisas Kraes. Tokbaot olsem wanem yu stap kam blong save Olgeta.

Stap Leftemap Tingting blong Lanem Samting long Hom

Leftemap tingting blong ol pikinini blong serem wetem ol famli blong olgeta, wan singsing we oli jes lanem i no longtaem long klas o long singsing taem.

Kam Antap long Fasin blong Yumi blong Stap Tij

Stretem ol aktiviti. Sapos yu tijim ol smosmol pikinini, yu save faenem sam moa aedia we yu save stretem wetem klas blong yu, long seksen blong aotlaen ia blong ol bigfala pikinini. I semmak tu, ol aktiviti blong ol smosmol pikinini, oli save stretem blong tijim long ol bigfala pikinini.