Fidim Sipsip blong Mi, i kam long Kamille Corry

26 Jun–2 Julae

Matiu 28; Mak 16; Luk 24; Jon 20–21

“Hem I Girap Bakegen long Ded”

Ol pikinini we oli gat wan testemoni blong ol trutok long ol japta ia, oli gat wan strong fandesen we oli save bildimap fet blong olgeta long hem. ?Long wanem wei nao bae yu invaetem Spirit blong i testifae long ol trutok ia?

Invaetem Ol Pikinini blong Serem Wanem Oli Gat

Taem oli lukluk ol pikja, i save helpem olgeta blong tingbaot ol samting we oli bin lanem long hom o long ol narafala ples. Yu save soem pikja long aotlaen blong wik ia long Kam Folem Mi—Blong Wanwan Man, Woman, mo Famli mo askem ol pikinini blong serem wanem oli save abaot stori long pikja.

Tijim Doktrin: Ol Smol Pikinini

Matiu 28; Mak 16; Luk 24; Jon 20:1–23

Bambae mi laef bakegen afta we mi ded.

Atonmen blong Jisas Kraes, mo tu, Laef Bakegen long Ded blong Hem, i wan impoten samting tumas we i bin hapen long histri, mo hem i fandesen blong ol kristin bilif. Taem yu stap rid abaot Laef Bakegen long Ded, tingting hevi long olsem wanem bae yu helpem ol pikinini blong bildimap fet blong olgeta long Jisas Kraes.

Samfala Aktiviti we Yu Save Mekem

• Talem stori abaot Laef Bakegen long Ded blong Jisas long toktok blong yuwan. (Sapos i nidim, yusum “Japta 54: Jisas I Bin Girap Bakegen,” long Ol Niu Testeman Stori, 139–44, o ol vidio we i go wetem long ChurchofJesusChrist.org.) Eksplenem se taem Jisas i ded, spirit blong i bin lego bodi blong Hem. Taem Hem i laef bakegen long ded, spirit mo bodi blong Hem i bin kambak tugeta bakegen. Askem ol pikinini blong oli ripitim stori ia i kambak long yu, wan afta wan. Askem ol pikinini, se bae oli filim olsem wanem, sapos oli bin luk Jisas i laef bakegen.

• Soem vidio blong “What Happens after We Die?” (ChurchofJesusChrist.org), mo tokbaot wan we yu save, we i bin ded finis. Serem testemoni blong yu se, evriwan bae oli laef bakegen long ded, sam dei. Invaetem ol pikinini blong serem testemoni blong olgeta.

• Singsing wan singsing abaot Laef Bakegen blong Sevya, olsem “Did Jesus Really Live Again?” (Children’s Songbook, 64). Askem ol pikinini blong pikjarem long maen blong olgeta, wanem bae oli filim sapos oli luk Jisas. Letem olgeta i serem ol tingting blong olgeta wetem klas.

Jon 20:24–29

Mi save gat fet long Jisas Kraes, nomata mi no save luk Hem.

Tingting long olsem wanem yu save helpem ol pikinini blong andastanem wanem ia fet, mo olsem wanem oli save praktisim fet long Sevya.

Samfala Aktiviti we Yu Save Mekem

• Soem pikja blong Christ Approaches Thomas (ChurchofJesusChrist.org) taem yu stap tokbaot eksperiens blong Tomas long Jon 20:24–29. Ripitim stori, be naoia, askem ol pikinini blong givim smol tingting.

• Soem wan katen we i gat wan samting insaed we ol pikinini oli no save luk, mo tokbaot samting long ol pikinini. Askem olgeta sapos oli biliv se i gat wan samting insaed long katen ia, mo from wanem. Afta, soem samting ia long katen, long olgeta, mo eksplenem se fet i blong biliv long samting we yumi no save luk. Fet we yumi save gat, we i moa impoten, i blong gat fet long Jisas Kraes.

Luk Ol Han blong Mi, i kam long Jeff Ward

Jon 21:15–17

Mi save soem lav blong mi long Jisas taem mi stap givim seves long ol narafala man.

?Long wanem wei nao yu save givim insperesen long ol pikinini blong lavem mo helpem olgeta we oli stap raon long olgeta?

Samfala Aktiviti we Yu Save Mekem

• Ridim Jon 21:15–17, o soem vidio blong “Feed My Sheep” (ChurchofJesusChrist.org). Helpem ol pikinini blong andastanem wanem Jisas i wantem Pita blong mekem: serem gospel mo invaetem evriwan blong biliv long Jisas. Givim long wanwan pikinini wan pepa sipsip, mo askem olgeta blong raet o dro long hem, wan samting we oli save mekem blong helpem wan we oli save, blong kam moa kolosap long Jisas.

• Helpem ol pikinini blong tingting long ol samting we oli stap mekem blong lavem mo givim seves long ol narafala man. ?Wanem bakegen yumi save mekem blong soem lav blong yumi?

• Raetem nem blong evri pikinini long klasrum blong yu, long ol pis blong pepa we oli katem long ol sep blong sipsip, mo raetemdaon wanwan nem blong ol pikinini long klas blong yu, mo putum ol pepa sipsip ia raonem rum. (Putum tu ol nem blong ol pikinini we oli no stap kam oltaem.) Invaetem ol pikinini blong karem i kam tugeta ol sipsip we i gat nem blong olgeta long hem. Helpem ol pikinini blong oli tingting long ol wei we oli go aot mo givhan long wan fren we i no stap kam long jos.

Tijim Doktrin: Ol Bigfala Pikinini

Matiu 28; Mak 16; Luk 24; Jon 20:1–23

From se Jisas i laef bakegen long ded, evriwan bae oli laef bakegen long ded.

Hem i nomol blong ol pikinini oli sapraes long ol samting we i stap hapen afta we yumi ded. Tingting long ol wei we yu save tij abaot Laef Bakegen long Ded long wan wei we bae i bildimap fet blong olgeta.

Samfala Aktiviti we Yu Save Mekem

• Invaetem ol pikinini blong sarem ae blong olgeta mo pikjarem se oli stap sidaon long saed blong tumb blong Jisas, taem yu stap ridim Jon 20:1–17 o talem long sot toktok, Laef Bakegen long Ded blong Hem (luk tu long “Japta 54: Jisas I Bin Girap Bakegen,” long Ol Niu Testeman Stori, 139–44, o ol vidio we i go wetem long ChurchofJesusChrist.org). ?Hem i minim wanem blong laef bakegen long ded? ?Bae i olsem wanem sapos yumi bin luk Sevya ia we i laef bakegen long ded?

• Askem ol pikinini blong stadi long eksperiens blong wan we i bin luk Sevya we i laef bakegen long ded, mo serem wetem evriwan long klas, wanem we hem i bin lanem.

• Wajem wan o moa long ol vidio ia wetem ol pikinini: “Jesus Is Laid in a Tomb,” “Jesus Is Resurrected,” “Christ Appears on the Road to Emmaus,” mo “The Risen Lord Appears to the Apostles” (ChurchofJesusChrist.org). Invaetem ol pikinini blong serem from wanem Laef Bakegen long Ded, blong Sevya, i impoten long olgeta.

Jon 20:24–29

Mi save gat fet long Jisas Kraes, nomata mi no save luk Hem.

?Long wanem wei nao yu helpem ol pikinini blong mekem fet blong olgeta long Jisas Kraes i kam moa strong?

Samfala Aktiviti we Yu Save Mekem

• Invaetem ol pikinini blong ridim Jon 20:24–29. (Luk tu long vidio blong “Blessed Are They That Have Not Seen, and Yet Have Believed” long ChurchofJesusChrist.org.) ?Olsem wanem nao yumi save se Jisas Kraes i stap laef, nomata se yumi no save luk Hem?

• Raetem wanwan toktok long sentens ia: “Be olgeta we oli no luk mi, be oli bilif long mi,” long wan narafala pis blong pepa. Invaetem ol pikinini blong putum ol toktok long oda. Invaetem olgeta blong talemaot ol eksperiens we oli bin filim lav blong Sevya, nomata se oli no bin luk Hem.

• Invaetem ol pikinini blong dro ol pikja blong ol samting we oli save mekem blong mekem fet blong olgeta i kam moa strong, long wik ia. Askem olgeta blong serem wanem we oli bin droem, mo serem wanem we yu bin mekem blong mekem fet blong yu i kam moa strong long Jisas Kraes.

Jon 21:1–17

Mi save soem lav blong mi long Jisas taem mi stap fidim sipsip blong Hem.

Ol pikinini oli save kam wan bigfala paoa long olgeta we oli stap raon long olgeta. ?Olsem wanem yu save leftemap tingting blong olgeta blong helpem ol kam antap moa strong long gospel?

Samfala Aktiviti we Yu Save Mekem

• Ridim tugeta Jon 21:1–17 wetem ol pikinini. Taem yu ridim ol ves 9–13, askem ol pikinini blong tingbaot wan taem we wan i mekem wan spesel kaekae blong olgeta, mo askem olgeta blong tingbaot ol wei we Jisas i stap fidim yumi long saed blong spirit. Taem yu ridim ol ves 15–17, riplesem nem blong Saemon wetem nem blong ol pikinini. ?Huia ol sipsip blong Jisas? ?Long wanem wei nao yumi helpem Hem blong fidim olgeta?

• Serem wan wan smol swit kaekae wetem ol pikinini. Taem oli stap kakae, askem olgeta long olsem wanem taem oli stap serem gospel wetem wan man, i olsem we oli stap fidim olgeta.

Stap Leftemap Tingting blong Lanem Samting long Hom

Invaetem ol pikinini blong yusum aktiviti pej blong wik ia blong tijim ol famli blong olgeta abaot Laef Bakegen long Ded, blong Sevya.

Stap Kam Antap long Fasin blong Yumi Blong Stap Tij

Folemap ol invitesen blong tekem aksen. Taem yu invaetem ol pikinini blong tekem aksen folem wanem we oli stap lanem, folemap invitesen ia long nekis klas. Hemia i soem long ol pikinini se yu kea long olsem wanem gospel i stap blesem laef blong olgeta. Taem oli stap serem ol eksperiens blong olgeta, bae oli kam moa strong mo bae i helpem olgeta wanwan blong laef folem gospel.