17–23 Julae

Ol Wok 10–15

“Tok blong God I Stap Goraon Moa, Mo I Gat Plante Man Moa Oli Stap Bilif long Hem”

Wetem prea, stadi long Ol Wok 10–15 mo stap tingbaot ol pikinini long klas blong yu. ?Wanem nao yu faenem insaed long ol japta ia we i givim insperesen long yu taem yu no filim i stret o tingting se yu no save mekem wan samting?

Invaetem Ol Pikinini blong Serem Wanem Oli Gat

Blong helpem ol pikinini blong serem wanem we oli stap lanem mo eksperiensem, yu save askem olgeta blong tokbaot ol samting we oli stap mekem blong soem se oli biliv long Jisas Kraes.

Tijim Doktrin: Ol Smol Pikinini

Ol Wok 10:34–35

Papa long Heven i lavem evri pikinini blong Hem.

Wan stamba trutok we iven ol smol pikinini oli save andastanem, i we, evriwan i wan pikinini blong God, mo we Hem i lavem evri pikinini blong Hem.

Samfala Aktiviti we Yu Save Mekem

• Soem pikja blong Kraes mo Ol Pikinini Raon long Wol (Gospel Art Buk, namba 116) taem yu ridim Ol Wok 10:34–35. Eksplenem se, long taem blong Pita, sam pipol oli biliv se ol blesing blong gospel oli no blong evriwan. Be Pita i bin lanem se God i lavem evriwan long ol pikinini blong Hem, mo Hem i wantem evriwan blong lanem gospel.

• Invaetem ol pikinini blong droem wan pikja blong olgetawan. Taem oli stap serem ol pikja blong olgeta, tokbaot wan samting we yu laekem tumas long wanwan pikinini. Serem testemoni blong yu se, Papa long Heven i lavem wanwan long olgeta, mo evri pikinini blong Hem, nomata wanem kala blong skin blong olgeta o weaples oli stap long hem.

• Singsing wetem ol pikinini, wan singsing abaot fasin long stap lavem ol narafala man—eksampol, “I’ll Walk with You” (Children’s Songbook, 140–41). Invaetem ol pikinini blong serem ol wei we oli save soem lav long evriwan, olsem we Jisas i bin mekem.

• Poenem wanwan pikinini mo talem: “Papa long Heven i lavem [talem nem blong olgeta].” Letem ol pikinini oli gat janis blong poen long wanwan long olgeta mo stap talem sentens ia.

Ol Wok 11:26

Mi mi wan Kristin from se mi biliv long Jisas Kraes, mo stap folem Jisas Kraes.

?Long wanem wei nao bae yu helpem ol pikinini blong lanem wanem i minim blong stap wan Kristin Man?

Samfala Aktiviti we Yu Save Mekem

• Ridim Ol Wok 11:26 long ol pikinini, mo askem olgeta blong stanap, taem oli harem yu talem toktok ia Kristin Man. Askem olgeta wanem i minim blong stap wan Kristin Man. Eksplenem se wan we i stap biliv long Jisas Kraes mo stap folem Jisas Kraes, oli singaotem hem, wan Kristin Man, so, yumi Ol Kristin Man.

• Singsing long wan singsing abaot fasin blong stap folem Jisas Kraes, olsem “The Church of Jesus Christ” (Children’s Songbook, 77). ?Long wanem wei nao yumi soem se yumi stap folem Jisas Kraes mo yumi stap long Jos blong Hem. Helpem ol pikinini blong oli tingting long ol samting we oli mekem blong folem Jisas taem oli stap long hom, long skul mo long ol narafala ples.

Papa long Heven i lavem yumi mo ansarem ol prea blong yumi.

Ol Wok 12:1–17

Papa long Heven i harem mo ansarem ol prea.

Stori blong enjel we i mekem Pita i go fri aot long kalabus, i tijim yumi, wetem bigfala paoa se, Papa long Heven i ansarem ol prea.

Samfala Aktiviti we Yu Save Mekem

• Taem yu talem stori we i stap long Ol Wok 12:1–17 long sot toktok, invaetem ol pikinini blong aktem stori blong Pita, taem oli mekem hem i kam fri long kalabus. ?Olsem wanem nao Papa long Heven i ansa long ol prea blong olgeta we oli bin stap prea from Pita?

• Singsing long wan singsing abaot prea—eksampol, “We Bow Our Heads” (Children’s Songbook, 25)—mo jusum sam toktok we i save helpem ol pikinini blong lanem olsem wanem blong prea. Invaetem ol pikinini blong serem ol eksampol blong ol samting we oli save talem tangkyu from, mo askem long Papa long Heven tru long prea.

• Soem ol pikja blong ol pipol we oli stap prea (luk sam eksampol long, Gospel Art Buk, ol namba 111–112) taem bae yu serem wan eksperiens abaot wan taem we Papa long Heven i ansarem ol prea blong yu.

Tijim Doktrin: Ol Bigfala Pikinini

Ol Wok 10:34–35; 15:6–11

“Papa i mekem i semmak long olgeta man.”

Ol pikinini we yu tijim oli nidim blong andastanem se, Papa long Heven i lavem evri pikinini blong Hem, nomata se oli luk olsem wanem, weaples oli stap long hem, o wanem ol joes we oli mekem.

Samfala Aktiviti we Yu Save Mekem

• Askem ol pikinini sapos oli save talem, o traem blong talem se, taem oli lukluk long wan man, se hem blong wea. Folem wanem we i stap long Ol Wok 10:35, ?wanem nao tingting blong God long wan we “Hem bae i akseptem”?

• Tugeta, ridim wetem ol pikinini Ol Wok 10:34–35; 15:6–11 . Eksplenem se long taem blong Pita, Ol Man Jiu oli biliv se God i no akseptem ol pipol we oli no Ol Man Jiu (oli singaotem ol pipol ia, Ol Jentael). Be God i bin tijim Pita se God i lavem evri pikinini blong Hem, tugeta Ol Man Jiu mo Ol Jentael. Tugeta, singsing “Mi Pikinini blong God.” (STSP, 58). Invaetem ol pikinini blong putum nem blong olgeta long ples we oli luk ol toktok ia Mi o mi.

• Invaetem ol pikinini blong serem wan samting we i spesel abaot wan nara pikinini long klas. Eksplenem se, toktok ia: “Papa i mekem i semmak long olgeta man,” i minim se Papa long Heven i lavem evri pikinini blong Hem, mo from se Hem i lavem olgeta, Hem i wantem evri pikinini blong Hem blong harem gospel.

Ol Wok 11:26

Wan Kristin man, i wan man we i biliv long Jisas Kraes, mo stap folem Jisas Kraes.

?Olsem wanem nao yu save helpem ol pikinini blong andastanem se, ol toktok mo ol aksen blong olgeta, i soem se oli ol Kristin man o woman?

Samfala Aktiviti we Yu Save Mekem

• Invaetem ol pikinini blong ridim Ol Wok 11:26; 3 Nifae 27:3–8; mo Doktrin mo Ol Kavenan 115:4. Raetem Ol Man blong Kraes long bod mo raetem wan laen andanit long toktok ia: “Kraes.” Askem ol pikinini blong serem tingting blong olgeta long wanem i minim blong stap wan Kristin man o woman.

• Askem ol pikinini blong talem nem blong ol defren grup we oli stap long hem, olsem long famli blong olgeta o long nesen Invaetem olgeta blong serem ol risen, from wanem oli glad blong stap olsem wan Kristin man o woman, mo stap pat blong Jos Ia blong Jisas Kraes blong Ol Lata-dei Sent. ?Long wanem wei nao yumi soem long ol narafala wan se yumi ol Kristin man o woman?

• Soem sam samting o ol pikja we i ripresentem samting we i spesel long ol trutok long Jos Ia blong Jisas Kraes, olsem pikja blong restoresen blong prishud (luk long Gospel Art Buk, ol namba 93–94). Askem wan pikinini blong jusum wan long ol samting ia o wan long ol pikja, mo tokbaot olsem wanem, hem i wan blesing long Jos blong yumi. Eksplenem se, nomata ol Kristin man o woman raon long wol oli pat blong ol defdefren jos, yumi pat blong semmak Jos ia we Jisas Kraes i bin stanemap long wol.

• Soem vidio blong “True Christianity” (ChurchofJesusChrist.org). Invaetem ol pikinini blong raetem mo droem ol samting we oli save mekem blong stap olsem ol tru Kristin man mo woman.

Ol Wok 12:1–17

Taem mi prea wetem fet, Papa long Heven bae i ansa.

Tingting hevi long ol taem we Papa long Heven i bin ansarem o prea blong yu. ?Olsem wanem nao yu save yusum ol eksperiens ia blong tijim ol pikinini se, Papa long Heven bae i harem mo ansarem ol prea blong olgeta, long wei mo taem blong Hem?

Samfala Aktiviti we Yu Save Mekem

• Invaetem wan pikinini blong stap ridim stori long Ol Wok 12:1–17, mo ol pikinini blong aktem stori blong enjel we i mekem Pita i go fri aot long kalabus.

• Askem ol tingting blong ol pikinini se i minim wanem blong “oli stap prea we oli no spel nating” (Ol Wok 12:5). ?Long wanem wei nao ol pipol oli stap kasem ansa long ol prea blong olgeta? Invaetem ol pikinini blong oli serem ol eksperiens blong olgeta, taem we Papa God i bin ansarem wan prea blong olgetawan o wan prea blong famli. Yu save serem wan eksperiens tu, long taem we Hem i bin ansarem prea blong yu. Maet yu save talem tu, ol eksperiens blong wan taem we ansa i kam, be long wei we man i no tingting se bae i olsem. Testifae se God i lavem yumi mo bae i ansarem ol prea blong yumi, long wei mo taem we i blong gud blong yumi.

Stap Leftemap Tingting blong Lanem Samting long Hom

Invaetem ol pikinini blong mekem wan samting we i stap rimaenem olgeta long wanem we oli bin lanem tedei, olsem wan rimaenda blong prea.

Stap Kam Antap long Fasin blong Yumi blong Stap Tij

Testifae abaot ol blesing we Lod i promesem. Taem yu invaetem ol pikinini long Praemeri blong laef folem wan prinsipol, serem ol promes we God i bin mekem long olgeta we oli laef folem prinsipol ia. Eksampol. Yu save serem testemoni blong yu abaot ol blesing we yu bin kasem, taem yu bin prea wetem fet.