25–31 Julae

Ol Wok 16–21

“God I Singaot Mifala, blong Talemaot Gud Nius blong Jisas”

Afta we yu ridim Ol Wok 16–21, folem kwaet voes blong Spirit mo tingting long ol aedia long aotlaen ia, taem yu stap rere blong tij. Luklukgud wanem i stap long “Stap Mitim Nid blong Ol Smol Pikinini” long lesenbuk ia blong kasem sam moa help.

Invaetem Ol Pikinini blong Serem Wanem Oli Gat

Invaetem ol pikinini blong talem long yu, wanem oli save abaot ol eksperiens blong Pol, taem hem i stap serem gospel. Oli save tokbaot tu ol narafala misinari we oli save, o abaot eksperiens blong olgetawan, taem oli stap serem gospel wetem wan narafala man.

Tijim Doktrin: Ol Smol Pikinini

Ol Wok 16:25–34

Ol misinari oli tijim ol pipol abaot Jisas.

?Ol pikinini we yu tijim, oli save wanem ol misinari oli stap mekem? ?Olsem wanem nao yu save helpem ol pikinini blong andastanem se oli save serem gospel wetem ol narafala man?

Samfala Aktiviti we Yu Save Mekem

• Helpem ol pikinini blong aktem stori ia long Ol Wok 16:25–34 taem yu stap talem long sot toktok stori blong Pol mo Saelas (luk tu long “Japta 61: Pol mo Saelas long Kalabus,” long Ol Niu Testeman Stori, 158–160, o vidio we i go wetem long ChurchofJesusChrist.org). Eksplenem se ol misinari tedei tu, oli stap tijim ol pipol abaot Jisas mo helpem olgeta blong rere blong kasem baptaes.

• Mekem ol nem tag blong ol pikinini blong oli werem, mo helpem olgeta blong raetem ol nem blong olgeta long ol tag ia. Tijim ol simpol stetmen blong doktrin we oli save serem wetem ol narafala man olsem “Mi mi Pikinini blong God,” “God i toktok tru long wan profet we i stap laef,” o “Jisas Kraes i Sevya blong yumi.” Rimaenem ol pikinini se, yumi no nidim wan nem tag blong serem gospel wetem ol narafala man.

Ol Wok 17:10–12

Ol skripja oli testifae abaot Papa long Heven mo Jisas Kraes.

Nomata se sam long ol pikinini we yu stap tijim, oli no save rid yet, yu save helpem olgeta blong bildimap moa lav long ol skripja, mo luk olsem wanem bae oli testifae abaot Sevya.

Samfala Aktiviti we Yu Save Mekem

• Helpem wan long ol pikinini blong ridim sentens ia “Oli … stap ridim gud ol tok blong Baebol” (Ol Wok 17:11). Invaetem ol pikinini blong poen i go long wanwan dei long wik, long kalenda, taem bae oli ripitim sentens ia wetem yu. Singsing tugeta wan singsing we i tij abaot ol blesing we i kam taem ridim ol skripja, olsem “Search, Ponder, and Pray” (Children’s Songbook, 109).

• Taem yu tijim ol pikinini se ol skripja oli testifae abaot Papa long Heven mo Jisas Kraes, helpem olgeta blong tanem i go long ol skripja, olsem Ol Wok 17 o 18, mo faenem ol toktok olsem God, Lod, o Jisas. (Bae yu wantem blong makem ol toktok ia bifo finis, mekem se ol pikinini oli save faenem olgeta moa isi.) Evri taem we ol pikinini oli faenem wan long ol toktok ia, invaetem olgeta blong serem wan samting we oli save abaot Papa long Heven mo Jisas Kraes.

Ol Wok 17:22–31

Mi mi Pikinini blong God.

Long hil ya Areopagus, Pol i tokbaot ol stamba tingting abaot fasin blong God, mo ol trutok ia se yumi ol pikinini blong Hem mo we Hem i “no stap longwe long yumi nating” (Ol Wok 17:27). ?Long wanem wei nao bae yu helpem ol pikinini oli filim se oli stap kolosap long Papa blong olgeta long Heven?

Samfala Aktiviti we Yu Save Mekem

• Invaetem ol pikinini blong ripitim toktok ia “Yumi pikinini blong God” (Ol Wok 17:29), mo eksplenem se pikinini i stap minim se yumi ol pikinini blong God. Serem testemoni blong yu long wanwan pikinini, wan afta wan, se hem i wan pikinini blong God. Invaetem olgeta blong serem olsem wanem oli filim abaot Papa blong olgeta long Heven.

• Soem ol pikja blong ol pikinini wetem ol famli blong olgeta (sapos i posibol, soem sam pikja tu blong ol pikinini long klas blong yu). Askem ol pikinini blong poenem ol papa mo mama blong olgeta long ol pikja. Eksplenem se yumi ol pikinini blong ol mama mo ol papa blong yumi, mo yumi evriwan i ol spirit pikinini tu blong papa mo mama blong yumi long heven.

• Singsing wan singsing abaot Papa long Heven, olsem “Mi Save Ridima Hem I laef” (STSP, pej 38). Wetem help blong ol pikinini, raetem o dro sam pikja long bod we i ripresentem ol samting we yumi lanem abaot Papa long Heven, aot long singsing ia.

• Ridim long ol pikinini ol toktok ia long Ol Wok 17:27: “Be i tru we God ya i no stap longwe long yumi nating.” Tokbaot ol taem we yu bin filim kolosap long Papa long Heven, mo invaetem ol pikinini blong mekem semmak.

Evri man mo woman, oli wan pikinini blong God.

Tijim Doktrin: Ol Bigfala Pikinini

Ol Wok 16:14–15, 25–34; 18:7–8, 24–28

Mi save stap olsem wan misinari naoia.

?Olsem wanem nao yu save helpem ol pikinini blong kam olsem Pol mo serem wanem we oli stap lanem wetem ol narafala wan, abaot gospel?

Samfala Aktiviti we Yu Save Mekem

• Invaetem ol pikinini blong ridim Ol Wok 16:14–15, 25–34; 18:7–8, 24–28 mo mekem wan lis blong ol pipol we Pol mo Apolos, tufala i bin serem gospel wetem olgeta. Afta, invaetem olgeta blong mekem wan lis blong ol pipol we oli save serem gospel wetem olgeta. Invaetem ol pikinini blong mekem wan drama, long olsem wanem bae oli talem long ol pipol ia abaot Jisas Kraes o invaetem olgeta long jos. Yu save invaetem ol pikinini tu blong raetem ol testemoni blong olgeta long ol not, abaot wan gospel trutok long ol pipol ia.

• Invaetem ol fultaem misinari, olgeta we oli kambak finis long misin blong visitim klas, mo talem ol eksperiens blong olgeta long saed blong serem gospel. Leftemap tingting blong ol pikinini blong askem ol kwestin abaot olsem wanem oli save serem gospel wetem ol narafala man.

Ol Wok 17:2–4, 10–12; 18:28

Ol skripja oli testifae abaot Jisas Kraes.

Evri profet oli testifae abaot Jisas Kraes. ?Olsem wanem nao yu save tijim ol pikinini blong faenem Hem insaed long ol skripja, iven sapos oli no talem nem blong Hem?

Samfala Aktiviti we Yu Save Mekem

• Helpem ol pikinini blong ridim Ol Wok 17:2–4, 10–12; 18:28, mo invaetem olgeta blong lukaotem wanem ol ves ia oli tokbaot, we oli semmak. Folem ol ves ia, ?wanem nao i helpem ol pipol blong biliv long gospel blong Jisas Kraes? Invaetem ol pikinini blong serem ol fevret stori abaot Jisas, we oli bin lanem long ol skripja.

• Long ol pis pepa, raetem ol skripja refrens we oli tij abaot Sevya (yu save faenem sam long Gaed long Ol Skripja, “Jisas Kraes,” olskripja.ChurchofJesusChrist.org). Haedem ol pepa raon long rum mo invaetem ol pikinini blong faenem. Helpem ol pikinini blong lukluk long ol refrens we oli fanem, mo askem olgeta blong serem wetem wanwan long olgeta, wanem nao wanwan long ol skripja ia i stap tijim abaot Jisas.

Ol Wok 17:22–31

Mi mi Pikinini blong God.

?Olsem wanem nao yu save helpem ol pikinini blong tingbaot se oli ol pikinini blong God.

Samfala Aktiviti we Yu Save Mekem

• Soem long ol pikinini wan ston, mo eksplenem se long taem blong Pol, ol pipol oli wosipim ol god we oli mekem long ol ston mo ol materiol samting. Askem ol pikinini blong ridim Ol Wok 17:27–29. ?Wanem nao yumi lanem abaot God aot long ol ves ia? Eksplenem se pikinini i stap minim se ol pikinini blong God. Askem ol pikinini se oli filim olsem wanem blong save se olgeta, oli ol pikinini blong God.

• Askem ol pikinini blong ridim Ol Wok 17:27. Invaetem ol pikinini blong raet abaot o dro ol pikinini blong ol wei we oli save “filim” o kam moa kolosap long God. ?Wetaem nao oli filim se Hem “i no stap longwe long [olgeta]”?

Stap Leftemap Tingting blong Lanem Samting long Hom

Leftemap tingting blong ol pikinini blong lukaotem wan skripja long wik ia, we i stap tij abaot Jisas Kraes (hemia i save hapen long taem blong stadi blong hemwan o famli skripja stadi). Nekis wik, invaetem olgeta blong serem wanem oli bin faenem.

Stap Kam Antap long Fasin blong Yumi blong Stap Tij

Helpem ol pikinini blong oli kam blong lanem samting long wan moa gud wei. Stamba tingting blong yu blong tijim ol pikinini i no jes blong serem trutok nomo wetem olgeta. Yu mas helpem olgeta tu blong oli developem fasin blong dipen long olgetawan blong stap ol man blong lukaotem trutok. Eksampol, no stap talem nomo stori blong Pol we i stap prij long hil ya Areopagus, long ol pikinini, be yu save mekem plan blong ol aktiviti, olsem olgeta we oli givim long aotlaen ia, we i helpem olgeta blong faenemaot ol trutok long stori blong olgetawan.