Dei blong Pentekos, i kam long Sidney King

3–9 Julae

Ol Wok 1–5

“Nao Bambae Yufala I Mas Go Talemaot Mi”

Ridim Ol Wok 1–5 blong stap rere long lesen blong yu. Wetem prea, lukaotem blong andastanem ol nid blong ol pikinini we yu tijim. Kam Folem Mi—Blong Wanwan Man, Woman mo Famli mo aotlaen ia i save helpem yu tu.

Invaetem Ol Pikinini blong Serem Wanem Oli Gat

Raetem ?Huia mi? long bod. Givim sam stetmen abaot Pita, mo askem long ol pikinini se, stetmen ia i stap tokbaot huia. ?Wanem bakegen oli save abaot Pita?

Tijim Doktrin: Ol Smol Pikinini

Ol Wok 1:1–11

Jisas Kraes i lidim Jos blong Hem tru long ol profet mo ol aposol.

Taem yumi stap lanem abaot Sevya we i bin lidim Jos long taem bifo tru long ol aposol, i save helpem ol pikinini blong kasem ol testemoni abaot ol profet mo ol aposol long dei blong yumi.

Samfala Aktiviti we Yu Save Mekem

• Soem pikja long ful pej long aotlaen blong wik long Kam Folem Mi—Blong Wanwan Man, Woman mo Famli. Askem ol pikinini se from wanem oli ting se ol pipol oli stap lukluk long skae. Talem long sot toktok, stori long Ol Wok 1:1–11. (Luk tu long “Japta 55: Ol Aposol Oli Lidim Jos,” long Ol Niu Testeman Stori, 145–47, o vidio we i go wetem long ChurchofJesusChrist.org.) Invaetem wan pikinini blong leftemap wan pikja blong wan Aposol we i stap laef tedei. ?Huia nao i stap helpem Jisas Kraes blong lidim Jos, taem Hem i no stap long wol ia?

• Pleplei long wan gem blong majem samting, wetem tu kaen pikja, blong Fas presidensi mo Olgeta Twelef Aposol. Taem oli majem wan, talem nem blong Aposol o blong Presiden mo wan samting abaot hem.

• Biaen long pikja blong Presiden blong Jos, stikim ol smol pikja blong ol samting we hem i stap tijim, olsem Sevya, baptaes o tempol. Letem wanwan pikinini i gat janis blong lukluk long wan long ol pikja mo talem long evriwan long klas, “Ol profet oli tijim yumi abaot [talem topik blong pikja ].” Testifae se ol profet mo ol aposol oli tijim yumi wanem we Jisas i wantem yumi blong save mo mekem.

Ol Wok 3:1–10

Papa long Heven i save blesem ol narafala man tru long mi.

?Wanem nao yu save mekem blong helpem ol pikinini blong luksave ol wei we oli save blesem olgeta we oli stap raon long olgeta . Helpem olgeta blong lanem long eksampol blong Pita mo Jon we tufala stap hilim man we leg blong hem i nogud.

Samfala Aktiviti we Yu Save Mekem

• Invaetem ol pikinini blong mekem aksen we i go wetem stori ia long Ol Wok 3:1–10, olsem blong pusum han blong olgeta blong askem mane, mo jiamjiam from oli glad tumas. ?Olsem wanem nao Papa long Heven i blesem man ia we i no save wokbaot ia?

• Karem wan basket we i gat ol pikja we oli ripresentem ol wei we yumi save blesem mo givim seves long ol narafala man. Letem ol pikinini oli gat janis blong jusum ol pikja long basket, mo serem olsem wanem oli save blesem ol narafala man long wei ia.

• Askem ol pikinini blong serem wan taem we oli bin helpem wan narafala man o woman.

Ol Wok 5:1–11

Mi save stap ones.

Ol kristin long taem bifo oli bin serem wanem oli gat blong helpem kea long wanwan long olgeta Olgeta we oli gat graon, oli salem mo givim ol mane i go long Ol Aposol, mo afta oli givim i go long Ol Sent folem ol nid blong olgeta. Ananaeas mo Safaera oli no bin ones long kontribusen blong tufala, mo tufala i tingting se bae tufala i save giaman long ol wokman blong Lod.

Samfala Aktiviti we Yu Save Mekem

• Helpem ol pikinini blong aktem stori blong Ananaeas mo Safaera. Eksplenem se, nomata se bae yumi no ded taem yumi giaman, stori ia i soem olsem i impoten blong stap ones long Papa long Heven.

• Singsing tugeta wan singsing abaot fasin blong stap ones, olsem “I Believe in Being Honest” (Children’s Songbook, 149). Helpem ol pikinini blong andastanem se, blong stap ones, i minim se, mas stap talem trutok mo no stap karem samting we i blong wan narafala man.

• Yusum ol pepa basket papet blong aktem ol simpol situesen we wan i stap ones mo wan i no stap ones. Askem ol pikinini blong stanap sapos man ia i stap ones o sidaon long floa sapos man ia no stap ones. Helpem ol pikinini blong andastanem, se from wanem i impoten blong stap ones.

Tijim Doktrin: Ol Bigfala Pikinini

Ol Wok 1:8, 22–26

Jisas Kraes i lidim Jos blong Hem tru long ol profet mo ol aposol.

?Olsem wanem yu save helpem ol pikinini blong andastanem se, ol profet mo ol aposol oli stap lidim Jos blong Sevya tedei, semmak olsem long taem bifo.

Samfala Aktiviti we Yu Save Mekem

• Raetem toktok ia long bod ?Olsem wanem nao Jisas Kraes i lidim Jos taem Hem i no stap long wol ia? Invaetem ol pikinini blong lisin long ol ansa blong kwestin ia taem yu stap ridim ol toktok blong Sevya we i go long Ol Aposol Ol Wok 1:8. Helpem ol pikinini blong andastanem se, Jisas i bin jusum ol profet mo ol aposol blong lidim Jos tedei, semmak olsem Hem i bin mekem bifo.

• Ridim tugeta Ol Wok 1:22–26. Olsem wan klas, talemaot olsem wanem nao Ol Aposol oli singaotem wan niu Aposol.

• Bifo taem blong klas, askem wan pikinini, papa mo mama blong hem, blong stadi abaot wan Aposol blong tedei long “Quorum of the Twelve Apostles,” ChurchofJesusChrist.org). Invaetem pikinini ia blong serem wanem hem i bin lanem, wetem klas, mo sapos i posibol, wanem nao ol Aposol oli bin talem abaot koling blong hem, long fas mesej blong jeneral konfrens.

Ol Aposol oli bin lidim Jos afta we Jisas i gobak antap long heven.

Ol Wok 2:36–47

Tabu Spirit i talem witnes abaot ol trutok blong gospel, i go long hat blong mi.

Taem ol pikinini oli lanem olsem wanem Tabu Spirit i stap toktok long olgeta, bae oli kasem insperesen blong lisin mo tekem aksen folem insperesen we oli kasem.

Samfala Aktiviti we Yu Save Mekem

• Ridim tugeta Ol Wok 2:36–37. ?Bae yumi filim olsem wanem, taem Tabu Spirit i stap talem wan samting long hat blong yumi?

• Olsem wan klas, mekem wan posta blong raetem ol toktok ia ?Wanem nao bae yumi mekem? Antap long posta ia. Soem posta evri wik, mo ademap ol wei we ol pikinini oli save folem, long wanem we oli lanem long lesen blong evri wik.

• Invaetem ol pikinini blong ridim Ol Wok 2:41–47 mo faenem ol gud samting we ol pipol oli bin mekem afta we oli bin kasem baptaes. ?Wanem ol gudfala samting we yumi save mekem blong soem, se yumi talem tangkyu from presen ia blong Tabu Spirit, we yumi bin kasem taem yumi baptaes?

Ol Wok 3:1–10

Papa long Heven i save blesem ol narafala man tru long mi.

?Long wanem wei nao yu save tijim ol pikinini se oli save blesem laef blong ol narawan, nomata se oli no gat “silva mo gol”? (Ol Wok 3:6). ?Olsem wanem yu save helpem olgeta blong luksave ol janis blong givim seves long God, taem we oli stap givim seves long narafala wan? (luk long Mosaea 2:17).

Samfala Aktiviti we Yu Save Mekem

• Askem wan pikinini blong ridim Ol Wok 3:1–10 mo ol narafala pikinini blong aktem stori. (Blong kasem help, luk long “Japta 56: Pita I Hilim Wan Man,” long Ol Niu Testeman Stori, 148–49, o vidio we i go wetem long ChurchofJesusChrist.org.) Yu save soem vidio ia tu blong “Peter and John Heal a Man Crippled Since Birth” (ChurchofJesusChrist.org). ?Long wanem wei nao, blesing we man i kasem i moa bigwan bitim mane we hem i askem?

• Pasem wan basket blong koen i go raon. Taem ol pikinini oli holem basket, askem olgeta wanem oli save pem wetem mane. Askem ol pikinini wanem yumi save givim long ol narafala man, we yumi no nid blong pem wetem mane. Invaetem olgeta blong serem olsem wanem oli save helpem ol narafala wan blong kam moa kolosap long Sevya—wan presen we i no nidim mane (Ol Wok 3:6).

Stap Leftemap Tingting blong Lanem Samting long Hom

Leftemap tingting blong ol pikinini blong oli serem wan risen from wanem oli talem tangkyu from ol skripja, mo blong oli invaetem ol memba blong famli blong olgeta blong mekem semmak samting.

Stap Kam Antap long Fasin blong Yumi blong Stap Tij

Lanem wan skripja baehat. Jusum wan toktok long skripja we yu ting se i save helpem ol pikinini long klas blong yu, olsem Ol Wok 2:38 o Ol Wok 3:19, mo helpem olgeta blong lanem baehat wan toktok long skripja ia. Yusum ol samting we i save help o mekem ol aksen tu, we i save helpem ol pikinini save gud mo tingbaot ol skripja.