Dei blong Pentekos, i kam long Sidney King

3–9 Julae

Ol Wok 1–5

“Nao Bambae Yufala I Mas Go Talemaot Mi”

Taem yu stap stadi long Ol Wok 1–5, Tabu Spirit i save givim insperesen long yu blong yu faenem ol trutok we oli go stret wetem laef blong yu. Tekem not long ol ves we oli tajem tingting mo filing blong yu, mo lukaotem ol janis blong serem wanem we yu stap lanem.

Raetemdaon Ol Filing mo Tingting blong Yu

?Yu yu eva askem yuwan se Pita i bin stap tingting mo filim wanem taem we hem wetem ol nara Aposol, “oli stap lukluk long skae” taem we Jisas i stap go antap i go long Papa blong Hem? (Ol Wok 1:10). Jos ia, we Pikinini blong God i bin statem, naoia i stap long han blong Pita. Wok ia blong stap lidim efot blong “tijim evri nesen,” naoia i stap long solda blong hem (Matiu 28:19). Be, sapos hem i bin filim se hem i no naf o sapos hem i bin filim se hem i fraet, yumi no gat eni pruf long hemia insaed blong Buk blong Ol Wok. Wanem we yumi faenem, oli ol eksampol blong ol strong testemoni mo fasin blong jenisim laef, ol hiling tru long merikel, ol samting we oli hapen long saed blong spirit, mo Jos we i gro i kam bigwan. Hemia i bin stil, Jos ia blong Sevya, we Hem yet i lidim. Wanem we i stap, i we, Buk blong Ol Wok blong Ol Aposol, bambae oli save singaotem tu Ol Wok blong Jisas Kraes tru long Ol Aposol blong Hem. From se Spirit i bin lidim hem plante we plante, Pita i nomo man blong pulum fis ia we i no save samting, we Jisas i bin faenem long ol so blong Si blong Galili. Mo tu, hem i nomo man ia we tingting i trabol, from we, sam wik i pas, hem i bin stap krae bigwan from hem i tanem hem mo talem se hem i no bin save Jisas blong Nasaret.

Insaed long Buk blong Ol Wok, bae yu ridim ol toktok we oli tokbaot Jisas Kraes mo gospel blong Hem, long wan fasin we i gat paoa. Bae yu luk tu olsem wanem gospel i save jenisim ol pipol—mo yu tu—i kam wan strong disaepol we God i save se oli save kam olsem.

Sam Aedia blong Skripja Stadi blong Yuwan

Ol Wok 1:1–8, 15–26; 2:1–42; 4:1–13, 31–33

Jisas Kraes i lidim Jos blong Hem tru long Tabu Spirit.

Buk blong Ol Wok i raet abaot ol efot blong Ol Aposol blong stanemap Jos Ia blong Jisas Kraes afta long taem we Sevya i go antap long heven. Nomata we Jisas Kraes i nomo stap long wol ia, Hem i bin lidim Jos tru long revelesen, tru long Tabu Spirit. Tingting long wei we Tabu Spirit i bin lidim ol niu lida blong Jos ia blong Kraes taem yu stap luklukbak long olgeta ples ia long skripja: Ol Wok 1:1–8, 15–26; 2:1–42; 4:1–13, 31–33.

Olsem ol memba blong Jos blong Kraes, tedei, wanwan i gat wan responsabiliti blong tekpat long wok ia blong fasin blong sevem man mo fasin blong kam olsem wan god—we i blong stap laef folem gospel blong Jisas Kraes, stap kea long olgeta we oli stap long nid, stap invaetem evriwan blong kam long Kraes, mo blong stap yunaetem ol famli blong taem we i no save finis (luk long Jeneral Hanbuk, 1.2). ?Wanem nao yu lanem aot long ol fasfala Aposol ia abaot wei we yu save dipen long Tabu Spirit blong lidim ol efot blong yu?

Luk long Gaed long Ol Skripja, “Tabu Spirit.”

Ol Wok 2:36–47; 3:12–21.

Olgeta prinsipol mo odinens blong gospel i helpem mi blong kam long Kraes.

?Yu bin filim finis se oli “stikimgud” hat blong yu, semmak olsem Ol Jiu oli bin filim long dei blong Pentekos? (Ol Wok 2:37) Mebi yu bin mekem wan samting we yu rigret, o mebi yu wantem jenisim laef blong yu nomo. ?Wanem nao yu sapos blong mekem taem yu gat olgeta filing ia? Kaonsel blong Pita long Ol Man Jiu i stap long Ol Wok 2:38. Luk olsem wanem, ol fasfala prinsipol o odinens blong gospel (we i tekem fet, fasin blong sakem sin, baptaes, mo presen we i Tabu Spirit—o wanem we samtaem oli tokbaot olsem doktrin blong Kraes) i bin tajem olgeta konvet ia, olsem we oli raetem insaed long Ol Wok 2:37–47.

Maet yu bin baptaes finis mo yu bin kasem presen we i Tabu Spirit; sapos olsem, ?hao nao yu yu gohed blong yusum doktrin blong Kraes? Tingting long ol toktok blong Elda Dale G. Renlund: “Bae yumi save kam stret gud evriwan taem yumi stap ripitim fasin blong stap praktisim fet long Kraes, stap sakem sin, stap tekem mo kaekae sakramen blong riniu ol kavenan mo mekem bakegen ol kavenan mo blesing blong baptaes, mo kasem Tabu Spirit olsem wan kampani blong yu we i stap oltaem, hemia long wan mak we i hae moa. Taem yumi mekem olsem, yumi kam moa olsem Kraes, mo yumi save stap strong kasem en, wetem evri nara samting we hemia i kam wetem” (“Latter-day Saints Keep on Trying,” Liahona, May 2015, 56).

Ol Wok 3:19–21

?Wanem nao hem i taem we Jisas “i givim niufala paoa”, mo taem we “olgeta samting oli kam niuwan bakegen”?

Taem blong “niufala paoa,” i tokbaot Mileniom, taem we Jisas Kraes bae i kambak long wol ia. Ol taem blong “olgeta samting oli kam niuwan bakegen” i tokbaot Restoresen blong gospel, we i mekem wol ia i rere from Mileniom.

Ol Wok 3; 4:1–31; 5:12–42

Ol disaepol blong Jisas Kraes oli kasem paoa blong mekem ol merikel long nem blong Hem.

Man ia we i no bin save wokbaot, i stap hop blong kasem mane long ol pipol we oli stap kam long tempol. Be ol wokman blong Lod oli givim hem moa bitim hemia. Taem yu stap ridim Ol Wok 3; 4:1–31 mo 5:12–42, tingting long wei we merikel ia i bin kam afta, i bin tajem olgeta pipol ia:

• Man ia we i no save wokbaot

• Pita mo Jon

• Ol witnes we oli bin stap long tempol

• Ol hae pris mo ol man we oli rul

• Ol narafala Sent

Wanem Mi Gat Mi Givim long Yu Masta, i kam long Walter Rane

Ol Aedia blong Famli Skripja Stadi mo Haos Naet

Ol Wok 1:21–26.Sapos yufala i stap ridim Ol Wok 1:21–26 hem i save helpem famli blong yu blong toktok raon long ol blesing we oli kam taem yumi gat Ol Aposol tedei long wol ia. Ol memba blong famli oli save serem olsem wanem oli kasem wan witnes se ol aposol blong tedei, mo ol profet blong tedei, God nao i singaotem olgeta. ?From wanem nao i impoten blong gat witnes ia?

Ol Wok 2:37.Sentens ia, “stikim” hat blong olgeta, ?i minim wanem? ?Wetaem nao yu bin filim wan semmak samting olsem? ?From wanem i impoten blong talem: ‘?Bae yumi mekem wanem?, taem yumi gat ol kaen filing olsem?

Ol Wok 3:1–10.Maet famli blong yu bae i laekem blong aktem stori we i stap long ol ves ia. Yufala i save wajem vidio ia: “Plan of Salvation—We’re Still a Family” (ChurchofJesusChrist.org). ?Olsem wanem nao, man ia long tempol, i kasem blesing long wan defren wei be i no olsem we hem i ting long hem? ?Long wanem wei nao yumi luk ol blesing blong Papa long Heven oli kam long yumi long sam wei we yumi no ting nating long hem?

Ol Wok 3:12–26; 4:1–21; 5:12–42.?Wanem nao i tajem tingting blong yu abaot wei we Pita mo Jon oli stap fetful? (Luk tu long “Peter Preaches and Is Arrested” on ChurchofJesusChrist.org). ?Olsem wanem bae yumi save talem ol testemoni blong yumi abaot Jisas Kraes wetem ful tras mo klia fasin? Tingting long helpem ol yangfala pikinini blong oli praktis blong stap serem testemoni blong olgeta.

Ol Wok 4:31–5:4.?Olsem wanem yumi save helpem famli blong yumi, wod blong yumi, o komuniti blong yumi blong kam moa olsem wanem we i stap long Ol Wok 4:31–37? ?Hem i minim wanem blong gat wan hat mo wan sol? ?Long wanem wei nao, samtaem, yumi stap holembak pat blong kontribusen blong yumi? ?From wanem nao, taem yumi olsem, i semmak olsem se yumi stap giaman long God? (Ol Wok 5:2, 4). ?Olsem wanem nao fasin blong no stap ones i spolem yumi long saed blong spirit?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Let the Holy Spirit Guide,” Hymns, namba 143.

Kam Antap long Fasin blong Yumi blong Stap Tij

Jusum wan topik. Letem wanwan memba blong famli i gat taem blong jusum wan topik insaed long Ol Wok 1–5 blong oli stadi long hem tugeta.

Taem Jisas I Go Antap long Heven, i kam long Harry Anderson