17–23 Julae

Ol Wok 10–15

“Tok blong God I Stap Goraon Moa, Mo I Gat Plante Man Moa Oli Stap Bilif long Hem”

Ridim gud Ol Wok 10–15 mo givim taem blong Spirit i toktok kwaet long yu wetem ol tingting mo ol filing. ?Wanem i stap long ol japta ia blong yu yu lanem?

Raetemdaon Ol Filing mo Tingting blong Yu

Long taem blong seves blong Hem long wol ia, plante taem, Jisas Kraes i bin givim ol jalenj long ol pipol long saed blong ol longtaem kastom mo bilif we oli bin gat. Hemia i no bin stop afta we Hem i go antap long heven, taem we Hem i bin stap gohed blong lidim Jos blong Hem tru long revelesen. Eksampol: long taem blong laef blong Jisas, ol disaepol blong Hem oli bin prijim gospel nomo long ol Jiu fren blong olgeta. Be, i no longtaem afta we Sevya i ded, mo Pita i kam lida blong Jos long wol, Jisas Kraes i bin talem long Pita tru long revelesen se, naoia, i stret taem blong oli prijim gospel long olgeta we oli no Jiu. Aedia ia blong serem gospel long Ol Jentael, tedei, i no wan sapraes; ?mekem se wanem nao lesen we yumi mas lanem? Maet, wan lesen ia, i we, long tugeta ia, Jos blong bifo mo blong tedei, i gat wan Sevya we i gat lav we i stap lidim ol lida we Hem i stap jusum olgeta (luk long Amos 3:7; Doktrin mo Ol Kavenan 1:38). Revelesen we i gogohed blong kam, i wan tru saen se hemia i Jos Ia blong Jisas Kraes, mo Jos ia i tru mo i stap laef. Olsem Pita, yumi mas wantem blong akseptem revelesen we i gogohed blong kam, mo laef folem evri toktok blong God (Luk 4:4), wetem “evri toktok we God i bin talemaot finis, evri toktok we Hem i stap talemaot naoia,” mo “plante bigfala mo impoten samting” we bambae Hem i talemaot yet tru long revelesen “abaot kingdom blong God” (Ol Toktok blong Bilif 1:9).

Sam Aedia blong Skripja Stadi blong Yuwan

Ol Wok 10

“God mekem i semmak long olgeta man.”

Blong plante jeneresen, Ol Jiu oli bin biliv se blong kamaot long laen blong Ebraham, o blong kamaot stret long laen blong Ebraham, i minim se man o woman ia, God i akseptem mo jusum hem (luk long Luk 3:8). Oli bin tekem se, eni narawan i wan Jentael we i “no klin” we i no bin akseptem God. Long Ol Wok 10, wanem nao Lod i stap tijim Pita abaot huia “bambae God i glad long hem”? (Ol Wok 10:35). ?Wanem pruf nao yu yu faenem insaed long japta ia, se laef blong Konilias, i wan laef we Lod i akseptem? Tingting se wanem i stap biaen long toktok ia “God i mekem i semmak long olgeta man” (ves 34; luk tu long 1 Nifae 17:35). ?From wanem hem i impoten, long yu, blong yu save trutok ia?

Olsem Ol Jiu, we oli lukdaon long olgeta we oli no kamaot long laen blong Ebraham, ? Yu tu, yu luk se yu stap mekem samting we i no kaen, o yu mekem sam toktok abaot wan we i defren long yu? ?Olsem wanem nao yu save winim kaen fasin ia? Bae i intresting blong traem wan simpol aktiviti blong ol nekis dei: Taem yu toktok wetem wan, traem talem long yuwan se: “Hem ia, i wan pikinini blong God.” Taem yu stap mekem, ?wanem jenis nao yu yu luk se i hapen long wei we yu stap tingting abaot mo mekem samting wetem ol narawan?

Luk tu long 1 Samuel 16:7; 2 Nifae 26:13, 33; Russell M. Nelson, “Letem God I Win,” Liahona, Nov 2020, 92–95; “Peter’s Revelation to Take the Gospel to the Gentiles” (vidio), ChurchofJesusChrist.org.

Ol Wok 10; 11:1–18; 15

Papa long Heven i stap tijim mi, laen folem laen, tru long revelesen.

Taem we Pita i bin luk visen we oli tokbaot long Ol Wok 10, hem i gat trabol long fas taem, blong andastanem visen ia, mo “Pita i stap trabol lelebet blong save mining blong visen” (ves 17). Be yet, Lod i givim Pita bigfala moa andastaning, taem we Pita i bin stap lukaotem. Taem yu stap ridim Ol Wok 10, 11, mo 15, luk olsem wanem andastaning blong Pita abaot visen ia i kam moa bigwan wetem taem. ?Long wanem wei nao yu yu bin lukaotem mo kasem bigfala moa andastaning we i kam long God taem we yu bin gat ol kwestin?

Ol Wok 10, 11, mo 15 oli talembak ol taem we Lod i bin soem rod long ol wokman blong Hem, tru long revelesen. Maet bae i help blong raetemdaon wanem we yu lanem abaot ol revelesen taem yu stap ridim olgeta japta ia. ?Long wanem wei nao Spirit i toktok long yu?

Luk tu long Gospel Topics, “Revelation,” topics.ChurchofJesusChrist.org; Quentin L. Cook, “Blesing blong Revelesen we I Stap Gogohed we I Go long Ol Profet mo Revelesen blong Yuwan blong Soem Rod blong Laef blong Yu,” Liahona, Mei 2020, 96–100; “The Jerusalem Conference” (vidio), ChurchofJesusChrist.org.

Ol Wok 11:26

Mi mi wan Kristin from se mi biliv long Jisas Kraes, mo stap folem Jisas Kraes.

?Wanem hem i impoten abaot taem we oli singaotem wan se hem i wan Kristin man o woman? (luk long Ol Wok 11:26). ?Hem i minim wanem, long yu, blong oli save yu olsem wan Kristin man o woman? Tingting long mining blong ol nem. Eksampol: ?Famli nem blong yu, i minim wanem long yu? ?From wanem nao nem blong Jos i impoten long yu? (luk long Doktrin mo Ol Kavenan 115:4). Long yu, ?hem i minim wanem blong tekem long yuwan nem blong Jisas Kraes, tru long kavenan? (luk long Doktrin mo Ol Kavenan 20:77).

Luk tu long Mosaea 5:7–15; Alma 46:13–15; 3 Nifae 27:3–8; Russell M. Nelson, “Stret Nem blong Jos,” Liahona, Novemba 2018, 87–90.

Ol Aedia blong Famli Skripja Stadi mo Haos Naet

Ol Wok 10:17, 20.?Yumi bin gat finis ol eksperiens long saed blong spirit, mo afta, gat tu tingting long wanem yumi bin filim o lanem? ?Wanem advaes nao yumi save givim long wanwan we i save helpem yumi blong winim ol tu tingting blong yumi? (Luk long Neil L. Andersen, “Ol Memori long Saed blong Spirit we I Givim Paoa,” Liahona, Mei 2020, 18–22.)

Ol Wok 10:34–35.?Olsem wanem nao yu save tijim famli blong yu se “God i mekem i semmak long olgeta man”? (Ol Wok 10:34). Maet yu save soem ol pikja blong ol pipol we oli kam long defren bakgraon mo kalja taem we famli blong yu i stap ridim ol ves ia. ?Olsem wanem nao, ol trutok long ol ves ia oli stap lidim tingting blong yumi, o ol aksen blong yumi? (Eksampol, luk long “I’ll Walk with You” [Children’s Songbook, 140–41]).

Ol Wok 12:1–17.Famli blong yu i save aktem stori blong Pita we oli sakem hem long kalabus mo ol memba blong Jos oli stap kam tugeta mo stap prea from hem. ?Wetaem nao yumi bin gat blesing tru long prea? ?I gat wan we yumi filim blong prea from, olsem wan lida blong Jos, o wan we yumi lavem? ?I minim wanem blong prea we yumi no mas stop? (Ol Wok 12:5; luk tu long Alma 34:27).

Pita we i Kam Fri long Kalabus, i kam long A. L. Noakes

Ol Wok 14.Taem yu stap ridim japta ia tugeta, sam memba blong famli oli save raetem blong sam blesing we oli bin kam long ol disaepol, mo long Jos. Ol nara memba blong famli oli save teknot long wanem i kam agens, o ol tes we ol disaepol oli bin gotru long olgeta. ?From wanem God i letem ol had samting blong oli hapen long ol pipol we oli stret mo gud?

Ol Wok 15:1–21.Ol ves ia, oli tokbaot wan tingting, insaed long jos, we wanwan i no agri wetem narawan, long saed blong ol konvet, se oli nidim o no blong folem loa blong Moses, we i tekem loa blong sakomsaes. ?Wanem nao Ol Aposol oli bin mekem long saed blong ol tingting ia we oli no agri? ?Wanem nao yumi stap lanem aot long eksampol ia abaot wei we ol lida blong Jos oli stap lidim wok blong Jos?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “I’ll Walk with You,” Children’s Songbook, 140–41.

Stap Kam Antap long Fasin blong Yumi blong Stap Tij

Droem wan pikja. Ol pikja oli save helpem ol memba blong famli blong luk ol tijing mo ol stori we oli stap long ol skripja. Yu save invaetem ol memba blong famli blong droem ol pikja blong wanem yu ridim, olsem visen blong Pita, we i stap long Ol Wok 10.

Ol eksperiens blong Pita mo Konilias oli soem se “God i stap mekem i semmak nomo long olgeta man” (Ol Wok 10:34).