“10–16 Julae. Ol Wok 6–9: ‘?Wanem Nao Yu Yu Wantem Mi blong Mekem?,’” Kam Folem Mi—Blong Praemeri: Niu Testeman 2023 (2022)
“10–16 Julae. Ol Wok 6–9,” Kam Folem Mi—Blong Praemeri: 2023
Jenis we I Hapen long Rod i go long Damaskes, i kam long Michelangelo Merisi da Caravaggio
10–16 Julae
Ol Wok 6–9
“?Wanem Nao Yu Yu Wantem Mi blong Mekem?”
Ridim Ol Wok 6–9 blong stap rere long lesen blong yu. Aotlaen blong wik ia long Kam Folem Mi—Blong Wanwan Man, Woman mo Famli i save helpem yu blong stadi long japta ia. Ol aktiviti blong ol yangfala pikinini we oli stap long aotlaen ia, yu save stretem blong yusum wetem ol pikinini we oli bigwan, mo nara wei raon.
Invaetem Ol Pikinini blong Serem Wanem Oli Gat
Raetem sam nem blong ol pipol ia long Ol Wok 6–9, olsem Sol, Steven mo Tabita. Invaetem ol pikinini blong serem eni samting we oli save abaot ol pipol ia.
Tijim Doktrin: Ol Smol Pikinini
Mi save folem Jisas Kraes taem mi stanap folem raet samting.
?Wanem nao ol pikinini oli lanem long Steven, abaot stap olsem wan man blong folem Jisas Kraes?
Samfala Aktiviti we Yu Save Mekem
-
Helpem ol pikinini blong krietem ol aksen we i go wetem wan singsing abaot fasin blong jusum raet, olsem “Stand for the Right” (Children’s Songbook, 159). Yusum Ol Wok 7:51–60 blong tijim ol pikinini se Steven i bin tij abaot Jisas Kraes, nomata we i mekem ol lida blong Jiu oli kros tumas (luk tu long “Japta 57: Ol Rabis Man Oli Kilim Steven,” long Ol Niu Testeman Stori, 150–151, o vidio we i go wetem long ChurchofJesusChrist.org). ?Long wanem wei nao Steven i stanap from wanem we i raet?
-
Givim long ol pikinini, sam situesen blong ol pikinini we oli mas mekem wan joes bitwin raet mo rong. Askem ol pikinini long wanem bae oli save mekem, blong stanap from wanem we i raet.
Tabu Spirit i givim insperesen long mi, blong serem gospel long ol narafala man.
Filip i folem ol kwaet toktok blong Spirit mo mo i helpem wan man Itiopia, we i stap traehad blong andastanem ol skripja. ?Wanem lesen nao stori ia i gat blong ol pikinini we yu tijim?
Filip I Stap Tijim Ol Man Itiopia, i kam long Robert T. Barrett
Samfala Aktiviti we Yu Save Mekem
-
Pulum tu jea tugeta blong mekem wan kat blong ron. Invaetem tu pikinini blong sidaon long kat ia, wan i ripresentem Filip mo narawan i ripresentem man Itiopia. Afta, talem stori blong olsem wanem Filip i bin tijim gospel long man Itiopia ia.
-
Serem wan eksperiens we yu bin filim Tabu Spirit i talem long yu blong serem gospel wetem wan narawan. Testifae se, Tabu Spirit i save helpem yumi blong Jisas long ol narafala man.
Papa long Heven i invaetem mi blong mi sakem sin mo jenisim laef blong mi.
Taem we Jisas i talem long Sol blong stop blong givim hadtaem long Jos, kwiktaem, Sol i sakem sin mo jenisim laef blong hem. ?Long wanem wei nao stori ia i helpem ol pikinini we yu tijim blong wantem blong jenisim kwiktaem, taem oli mekem wan mistek?
Samfala Aktiviti we Yu Save Mekem
-
Talem long sot toktok, stori blong Sol we i bin jenisim laef blong hem, we i stap long Ol Wok 9:1–20 (luk tu long “Japta 59: Sol I Lanem Abaot Jisas,” long Ol Niu Testeman Stori, 154–55, o vidio we i go wetem long ChurchofJesusChrist.org).
-
Toktok long ol pikinini abaot ol samting we i jenis, olsem wan bebi frog we i no fom gud, we i jenis i kam wan frog o wan katapila, we i jenis i kam wan bataflae. Soem ol pikja sapos i posibol. ?Long wanem wei nao Sol i jenisim laef blong hem, taem we Kraes i bin visitim hem?
-
Dro wan fok rod long bod. Invaetem ol pikinini blong talem nem blong ol ples we bae oli wantem blong visitim, mo raetem long top blong rod. ?Wanem bae i hapen sapos yumi tanem i go long rong rod? Komperem fasin blong sakem sin, i olsem se, blong stap tanem i gobak long stret rod.
-
Askem ol pikinini blong ripitim wanem we Sol i bin talem long Lod: “?Wanem nao Lod i wantem blong mi mekem?” Ol Wok 9:6 ?Wanem nao Lod i wantem blong mi mekem?
Tijim Doktrin: Ol Bigfala Pikinini
Bambae mi wan witnes blong Jisas Kraes.
?Olsem wanem nao yu save helpem ol pikinini we yu stap tijim blong oli lanem blong stanap olsem ol witnes blong Jisas Kraes, long eksampol blong Steven?
Samfala Aktiviti we Yu Save Mekem
-
Tugeta, ridim Ol Wok 6:5–15 mo 7:51–60 wetem ol pikinini. ?Wanem nao i mekem se Steven i gat bigfala paoa blong stap olsem wan witnes blong Jisas Kraes? Invaetem wan o moa long ol pikinini blong mekem olsem se, oli Steven mo serem from wanem oli biliv long Kraes.
-
Invaetem ol pikinini blong ridim Ol Wok 6:3–10, blong lukaotem ol kwaliti we Steven i bin gat we helpem hem blong gro.
-
Askem ol pikinini blong helpem yu tingting long ol situesen we bae oli save stanap olsem ol witnes blong Jisas Kraes mo gospel blong Hem. Helpem olgeta blong mekem drama long ol situesen ia. Askem ol pikinini blong ridim Mosaea 18:9. Poenemaot se blong stap wan witnes blong Jisas Kraes, i gat tu long ol promes we yumi mekem taem yumi baptaes.
Prishud i wan presen we i no gat praes blong hem, mo we i kam tru long God.
Setan i promotem mesej se, ol samting blong wol oli givim bigfala glad long yumi. ?Olsem wanem nao bae yu yusum stori blong Saemon blong helpem ol pikinini blong oli tingting long ol samting long saed blong spirit se, oli gat moa valiu, olsem prishud mo ol blesing blong hem.
Samfala Aktiviti we Yu Save Mekem
-
Talem long sot toktok stori blong Saemon we i stap long Ol Wok 8:9–24 (luk tu long “Japta 58: Saemon mo Prishud,” long Ol Niu Testeman Stori, 152–53, o vidio we i go wetem ChurchofJesusChrist.org). ?From wanem yumi no save kasem prishud sapos yumi stap pem? ?Olsem wanem stret, wan man i save kasem prishud atoriti? (Luk long Toktok blong Bilif 1:5.).
-
Soem ol pikja blong sakramen, wan tempol (we i ripresentem ol blesing blong tempol), wan baptaes, mo ol narafala blesing we yumi kasem tru long prishud. Eksplenem se ol presen ia we i kam long God, yumi no save pem wetem mane. ?From wanem oli gat moa valiu bitim eni samting we yu save pem? ?Olsem wanem nao yumi save kasem ol blesing ia?
Papa long Heven i invaetem mi blong mi sakem sin mo jenisim laef blong mi.
Taem we Jisas i talem long Sol blong stop blong givim hadtaem long Jos, kwiktaem, Sol i sakem sin mo jenisim laef blong hem. ?Long wanem wei nao stori ia i helpem ol pikinini we yu tijim blong wantem blong jenisim kwiktaem, taem oli mekem wan mistek?
Samfala Aktiviti we Yu Save Mekem
-
Invaetem ol pikinini blong foldem wan pis pepa long haf. Askem olgeta blong raetem Bifo long wan saed Afta long narasaed. Ridim wetem ol pikinini Ol Wok 8:1–3; 9:1–2; mo 9:17–22, mo askem olgeta blong raetemdaon ol toktok o ol sentens we o tokbaot Sol, long bifo mo afta we hem i bin luk Lod.
-
Invaetem wan memba long wod blong serem stori blong hem we i jenisim laef, mo olsem wanem taem hem i stap olsem wan memba blong Jos, i bin jenisim laef blong hem, olsem we laef blong Sol i bin jenis.
-
Droem wan “rod i go long Damaskes” long bod. Invaetem ol pikinini blong ridim Ol Wok 9:6, 11, 18, 20–22, blong lukaotem wanem Sol i bin mekem blong sakem sin mo tanem hem i go long Kraes, mo raetem ol aksen ia folem rod. ?Wanem nao yumi lanem long Sol, long olsem wanem yumi save kam moa olsem Kraes?
-
Invaetem ol pikinini blong droem fevret pat blong stori blong Sol we i bin jenisim laef, mo serem droing blong olgeta wetem klas.
Stap Leftemap Tingting blong Lanem Samting long Hom
Leftemap tingting blong ol pikinini blong tokbaot wetem famli blong olgeta, fevret aktiviti we oli mekem long klas tedei, mo wanem nao aktiviti ia i bin tijim long olgeta.
Stap Kam Antap long Fasin blong Yumi blong Stap Tij
Helpem ol pikinini blong lanem samting aot long skripja. Ol smol pikinini, maet oli no save rid tumas, be yu save yusum olgeta blong lanem samting aot long ol skripja. Eksampol: Yu save ridim wan sentens mo invaetem olgeta blong stanap o leftemap han blong olgeta, taem oli harem wan spesel toktok o sentens we yu wantem olgeta blong lukluk nomo long hem.