Japta 49
Fas Sakramen
Jisas mo ol Twelef Aposol oli nidim wan ples blong lafet blong kaekae Pasova ia. Sevya i bin sendem Pita mo Jon blong faenem wan rum mo mekem rere evri samting blong kaekae blong lafet ia.
Oli bin faenem wan rum mo oli bin mekem rere kaekae blong lafet ia.
Jisas mo evri Aposol oli bin go long ples ia. Oli bin kakae lafet blong Pasova ia tugeta.
Fastaem we Jisas i givim sakramen long ol Aposol blong Hem. Hem i bin tekem bred long han blong Hem, i blesem, mo afta i brekem long ol smosmol pis. Hem i bin talem long ol Aposol blong oli kakae bred.
Jisas i bin talem long olgeta blong oli tingbaot bodi blong Hem taem oli kakae bred. Hem i bin askem olgeta blong oli tingbaot se bae Hem i ded from olgeta.
Jisas i bin kapsaetem waen long wan kap. Hem i bin blesem waen ia mo i bin talem long ol Aposol blong oli dring.
Jisas i bin talem long olgeta blong tingbaot blad blong Hem taem oli dring waen ia. Hem i bin askem olgeta blong tingbaot se blad blong Hem bae i ron mo bae i safa from ol sin blong evri man.
Jisas i bin talem tu long ol Aposol se i no long taem bae ol rabis man bae oli kilim Hem. Ol leven Aposol oli bin harem nogud tumas. Oli bin lavem Sevya mo oli no wantem Hem blong i ded. Jisas i bin save se wan long ol Aposol bae i helpem ol rabis man ia. Nem blong hem Judas Iskariot.