Japta 37
Ten Man we Oli Gat Rabis Sik blong Skin
Jisas i bin go long wan smol taon we ples ia nao Hem i bin luk ten man we oli gat rabis sik blong skin. Ol man we oli kasem rabis sik blong skin oli ol sikman. Sik blong olgeta i mekem olgeta i kasem ol bigfala soa long ful bodi blong olgeta.
Ol dokta oli no save helpem ol man ia we oli gat rabis sik blong skin. Ol pipol oli bin fraet blong go kolosap long olgeta. Oli no wantem blong kasem sik ia tu.
Ol man we oli gat rabis sik blong skin ia oli bin askem Jisas blong i mekem olgeta oli kam gud bakegen. Oli bin save se Hem i save mekem ol soa blong olgeta i finis.
Jisas i wantem olgeta blong oli harem gud. Hem i bin talem long olgeta blong oli go mo soemaot olgetawan long ol pris.
Long rod blong olgeta i go blong mitim ol pris ia, ol ten man ia we oli gat rabis sik blong skin oli bin kam klin. Ol soa blong olgeta i finis.
Wan long ol man ia we i gat rabis sik blong skin i bin save se Jisas i bin hilim olgeta. Hem i bin gobak blong talem tangkyu long Hem. Jisas i bin askem hem abaot ol narafala naen man ia we oli gat rabis sik blong skin. Oli no bin kambak. Jisas i bin talem long man ia we i gat rabis sik blong skin ia se fet blong hem i bin mekem hem i kam klin.