Japta 46
Seken Kaming
Jisas i bin stap long Hil blong Ol Tri Ya Olif. Ol disaepol blong Hem oli bin wantem blong askem Jisas sam kwestin. Oli bin askem wanem taem bae oli smasemgud ol rabis man. Oli wantem tu blong save wanem taem bae Jisas i kambak bakegen.
Jisas i bin talem long olgeta se bifo long Seken Kaming blong Hem, bae ol giaman profet bae oli talem se olgeta ia nao oli Kraes. Plante pipol bae oli folem olgeta. Be sapos ol man we oli stap folem Hem oli obei long ol toktok blong Hem, bae ol giaman profet ia bae oli no save trikim olgeta. Bae oli stap sef.
Jisas i bin talem tu se bifo bae Hem i kambak bakegen, bae i gat plante wo, bae i no gat kakae, bae i gat ol rabis sik, mo ol etkwek. Plante man bae oli stop blong helpem ol narafala man mo bae oli kam nogud.
Bae oli prijim gospel i go long ful wol, be plante pipol bae oli no lisin.
San bae i kam tudak, mun bae i nomo saen, mo ol sta bae oli foldaon long heven.
Taem Jisas Kraes bae i kambak bakegen, ol pipol bae oli luk Hem i kamdaon long ol klaod wetem paoa mo bigfala glori. Hem bae i sendem ol enjel blong Hem blong karem i kam tugeta ol stret mo gud man.
Yumi save rere from Seken Kaming taem yumi mekem wanem hem i raet. Taem yumi luk ol saen we Jisas i bin promesem, bae yumi save se taem blong Sevya i kambak i stap kam kolosap. I nogat man i save stret taem, we bae Jisas i kambak long hem. Sapos yumi rere, yumi save stap wetem Hem.