Japta 34
Boe we I Gat Ivel Spirit
Wan dei wan man i bin askem Sevya blong helpem boe blong hem. Boe ia i bin gat wan ivel spirit long hem. Ol disaepol oli bin traem finis blong mekem boe blong man ia i kam gud bakegen, be oli no save.
Jisas i bin talem long man ia blong karem boe blong hem i kam long Hem. Taem boe ia i kam, ivel spirit ia i mekem hem i foldaon i go long graon.
Sevya i bin askem hamas yia nao ivel spirit ia i bin stap insaed long boe ia. Papa blong hem i talem se samting ia i stap long hem taem hem i smol pikinini finis.
Jisas i bin talem se Hem i save mekem boe ia i kam gud bakegen sapos papa blong hem i gat fet. Papa blong hem i stat blong krae. Hem i bin talem se hem i bin gat fet. Be hem i bin askem Jisas blong i helpem hem blong gat moa fet.
Jisas i bin komandem ivel spirit ia blong i kamaot long boe ia mo neva gobak long hem bakegen. Ivel spirit ia i kros. Hem i spolem boe ia bakegen. Afta hem i obei long Jisas mo i bin aot.
Boe ia i bin silip kwaet nomo mekem se plante pipol oli talem se hem i ded. Be Jisas i bin holem han blong hem mo i bin helpem hem blong i stanap. Boe ia i bin harem gud. Ivel spirit ia i bin aot finis.
Smol taem afta, ol disaepol oli bin askem Jisas from wanem oli no save mekem ivel spirit ia i aot long boe ia. Jisas i bin talem long olgeta se blong mekem wan man i kam gud bakegen samtaem oli nidim blong oli livim kakae mo prea blong oli save mekem wan man i kam gud bakegen.