Japta 38
Farasi mo Man blong Karem Mane blong Takis
Wan dei Sevya i bin toktok long sam pipol we oli ting se oli stret mo gud moa long ol narafala pipol. Jisas i bin talem long olgeta wan stori.
I gat tu man tufala i bin go long tempol blong prea. Wan long tufala hem i wan Farasi. Nara-wan hem i wan man blong karem mane blong takis. Olgeta pipol oli no laekem ol man we oli stap karem mane blong takis. Oli ting se ol man blong takis oli no stap ones.
Farasi i bin stanap long fored blong ol narawan blong prea. Hem i bin talem tangkyu long God se hem i moa gud bitim ol nara pipol. Hem i bin talem se hem i bin livim kakae tu taem long evri wik mo i stap pem taeting blong hem. Man blong karem mane blong takis ia i bin stanap hemwan, i bodaon, mo i prea, “God, mi mi man nogud. Plis, yu gat sore long mi.”
Farasi ia i bin ting se hem i wan stret man mo hem i no nidim help blong God. Be man blong karem mane blong takis ia i bin save se hem i no wan stret man mo i nidim help blong God. Hem i bin putum tingting blong hem i stap daon mo i bin askem God blong i fogivim hem.
Jisas i bin talem se olgeta pipol oli mas kam olsem man blong karem mane blong takis. Oli no mas tingting se olgeta oli moa gud bitim ol narafala pipol. Oli mas sakem sin blong olgeta mo askem God blong i fogivim olgeta.