Japta 18

Jisas I Jusum Ol Aposol blong Hem

Wan dei Jisas i stap long wan bot long saed blong Solwota blong Galili mo i stap tijim ol pipol. Bot ia hem i blong wan man nem blong hem Pita.

Luk 5:1–3

Pita mo ol fren blong hem oli bin pulum net ful naet be oli no bin kasem eni fis. Afta Jisas i bin finis tijim ol man, Hem i bin talem long Pita blong tekem bot blong hem i go long dip ples. Afta Hem i bin talem long Pita mo ol fren blong hem blong sakem net blong olgeta i go long solwota.

Luk 5:4–5

Oli bin kasem plante fis tumas mekem se net blong olgeta i stat blong brok.

Luk 5:6

Pita i bin singaot i go long ol fren blong hem long nara bot blong oli kam blong helpem olgeta. Oli fulumap fis long tufala bot ia be fis i fulap tumas mekem se tufala bot ia i stat blong draon.

Luk 5:7

Pita mo ol fren blong hem oli bin sapraes tumas. Oli bin save se Jisas Kraes nao i bin mekem samting ia i hapen.

Luk 5:8–9

Pita i bin nildaon kolosap long leg blong Sevya. Hem i bin talem se hem i no klin inaf blong i stap kolosap long Jisas. Be Jisas i bin talem long Pita blong hem i no fraet.

Luk 5:8–10

Tufala fren blong Pita, Jemes mo Jon, tufala i brata. Jisas i bin talem long Pita, Jemes, mo Jon blong oli folem Hem mo kam ol man blong “pulum man.” Ol man ia oli livim evri samting we oli gat mo oli bin folem Jisas. Sevya i askem ol narafala man tu blong oli folem Hem.

Matiu 4:18–22; 9:9; Luk 5:10–11; Jon 1:35–51

Jisas i bin jusum ol twelef Aposol blong Hem blong lidim Jos blong Hem. Hem i bin prea long ful naet blong Hem i save jusum ol stret man. Long moning Hem i bin jusum mo odenem twelef man, i givim long olgeta prishud atoriti blong oli kam Aposol.

Mak 3:14; Luk 6:12–16; Jon 15:16

Ol Aposol oli bin wokbaot i go long plante taon. Oli bin tijim gospel mo oli bin hilim ol pipol. Oli bin gobak mo talem long Jisas wanem we oli bin mekem.

Mak 6:30; Luk 9:1–6, 10