Japta 3
Jon Baptaes I Bon
Enjel Gabriel i bin talem long Meri se Elisabet tu bae i karem wan bebi boe. Meri mo Elisabet tufala i sem famle nomo.
Meri i bin go blong visitim Elisabet. Tabu Spirit i bin talem long Elisabet se Meri bae i mama blong Jisas Kraes. Meri mo Elisabet tufala i bin talem tangkyu long God from Hem i blesem tufala. Meri i bin stap wetem Elisabet kasem tri manis. Afta Meri i bin gobak hom long Nasaret.
Boe blong Elisabet i bin bon. Ol fren mo famle blong hem oli glad. Oli ting se bebi ia bae i karem sem nem olsem nem papa blong hem, Sekaraea. Be Elisabet i bin talem se nem blong hem bae hem i Jon. Evriwan i bin sapraes.
Ol pipol oli bin askem Sekaraea se wanem nao bae i nem blong bebi ia. Stil Sekaraea i no save toktok, mekem se hem i bin raetem, “Nem blong hem Jon.”
Afta Sekaraea i save toktok bakegen. Hem i bin fulap wetem Tabu Spirit. Hem i bin talem long pipol se i no longtaem bae Jisas Kraes i bon mo Jon nao bae i mekem rere olgeta pipol from Hem.
Jon i bin groap i kam wan impoten profet. Hem i bin tijim ol pipol abaot Jisas Kraes.