“8–14 Mei. Matiu 19–20; Mak 10; Luk 18: ‘?Wanem Samting Moa I Stap, we Mi Mi No Mekem Yet?,’” Kam Folem Mi—Blong Praemeri: Niu Testeman 2023 (2022)
“8–14 Mei. Matiu 19–20; Mak 10; Luk 18,” Kam Folem Mi—Blong Praemeri: 2023
8–14 Mei
Matiu 19–20; Mak 10; Luk 18
“?Wanem Samting Moa I Stap, we Mi Mi No Mekem Yet?”
Ridim Matiu 19–20; Mak 10; mo Luk 18, mo stap tingting long ol pikinini we yu tijim long maen blong yu. Raetemdaon ol kwaet toktok we yu kasem long Tabu Spirit. Olsem wanem yu stap rere, bae i helpem yu blong tijim ol pikinini long wanem oli nidim blong save aot long ol japta ia.
Invaetem Ol Pikinini blong Serem Wanem Oli Gat
Invaetem ol pikinini blong serem eni samting we oli tingbaot long lesen blong las wik. Soem ol pikja blong helpem olgeta blong tingbaot.
Tijim Doktrin: Ol Smol Pikinini
Papa long Heven i wantem yumi blong mared long tempol mo gat ol famli we i no save finis.
?Long wanem wei nao ol pikinini we yu tijim oli save glad blong stap lanem, abaot ol doktrin blong mared we i no save finis? Bae i help bigwan long yu blong yu luklukbak long ol trutok abaot mared long “Famli: Wan Ofisol Toktok I Go long Wol” (https://www.churchofjesuschrist.org/study?lang=bis).
Samfala Aktiviti we Yu Save Mekem
-
Ridim long ol pikinini Mak 10:6–8 mo soem wan pikja blong wan kapol we i mared. Askem ol pikinini blong poenem man mo woman taem oli harem yu ridim toktok ia man mo woman. Eksplenem se Papa long Heven i wantem wan man mo wan woman blong maredem tufala (luk long Jenesis 1:27–28).
-
Soem ol pikja blong wan famli mo wan tempol. Invaetem ol pikinini blong tokbaot wanem we oli stap luk long ol pikja ia. Eksplenem se Papa long Heven i wantem yumi blong sil long ol famli blong yumi long tempol, mekem se yumi save stap wetem olgeta blong oltaem. Gat tingting long ol pikinini ia we papa mo mama blong olgeta oli no sil yet long tempol.
-
Singsing wan singsing abaot ol famli olsem, “A Happy Family” (Children’s Songbook, 198). Tingting blong singsing long singsing ia plante taem. Invaetem ol pikinini blong serem ol gudtaem we oli bin gat wetem ol famli blong olgeta. ?From wanem oli tangkyu from ol famli blong olgeta?
-
Singsing long wan singsing abaot tempol, olsem “I Love to See the Temple” o “Families Can Be Together Forever” (Children’s Songbook, 95, 188). Letem ol pikinini blong holem ol pikja blong ol tempol mo ol famli mo invaetem olgeta blong leftemap ol pikja blong olgeta taem oli singsing long “temple (tempol)” o “family (famli).” Helpem ol pikinini blong tingting long ol risen, from wanem i impoten blong mared insaed long tempol.
Jisas i lavem ol pikinini from se “ol pikinini tu oli gat raet wetem ol man we God i King blong olgeta” (Mak 10:14).
Jisas i wantem ol pikinini blong kam long Hem, blong Hem i save blesem olgeta.
Stori ia i givim wan janis, blong helpem ol pikinini blong filim, hamas Jisas i lavem olgeta.
Samfala Aktiviti we Yu Save Mekem
-
Long toktok blong yuwan, serem wan stori long Mak 10:13–16. Maet yu save soem tu vidio ia blong “Suffer the Little Children to Come unto Me” (ChurchofJesusChrist.org). Helpem ol pikinini blong tingting long ol taem we oli bin filim lav blong Jisas, long olgeta. Serem testemoni blong yu long ol pikinini, se Jisas i lavem olgeta mo i wantem blong blesem olgeta.
-
Soem pikja blong Kraes mo Ol Pikinini (Gospel Art Buk, namba 47). Helpem ol pikinini blong pikjarem long maen blong olgeta se, bae i olsem wanem blong stap olsem wan long ol pikinini ia we i stap sidaon narasaed long Jisas, long pikja ia. Invaetem ol pikinini blong serem olsem wanem oli filim abaot Jisas.
-
Askem ol pikinini blong dro pikja blong olgetawan, we Jisas i stap blesem olgeta (luk long Mak 10:16 mo aktiviti pej blong wik ia).
Sapos mi obei long ol komanmen, bae mi save kasem laef we i no save finis.
Jisas i bin tijim yangfala rij man se, blong kasem laef we i no save finis—wan laef olsem hemia blong Papa long Heven i gat—hem i mas obei long ol komanmen.
Samfala Aktiviti we Yu Save Mekem
-
Talem stori blong yang rijman ia long Mak 10:17–22 long ol pikinini. (Luk tu long “Japta 42: Yang Rij Man,” long Ol Niu Testeman Stori, 105–6, o vidio we i go wetem long ChurchofJesusChrist.org.) Askem olgeta blong lisin long wanem we Jisas i bin talem long yangfala rij man blong mekem mo wanem ansa blong yangfala man ia.
-
Talem wan mo moa stori abaot ol pikinini we oli askem advaes long papa mo mama blong olgeta, be oli no folem. ?Wanem nao samfala samting we Papa long Heven i askem yumi blong mekem? ?Yumi filim olsem wanem taem yumi folem ol komanmen blong Hem?
-
Serem ol eksperiens we yu bin kasem blong yuwan, abaot kwaet voes blong Tabu Spirit, blong mekem wan samting, blong kam moa gud.
Tijim Doktrin: Ol Bigfala Pikinini
Papa long Heven i wantem yumi blong mared long tempol mo gat ol famli we i no save finis.
Ol samting we Jisas i bin tijim abaot mared, i save helpem ol pikinini blong lukluk fored blong mared long tempol, mo resemap wan famli we i no save finis.
Samfala Aktiviti we Yu Save Mekem
-
Askem wan long ol pikinini blong ridim laod Mak 10:6–8 . Eksplenem se joen i minim blong “stak strong long” o “holem taet strong” wan samting. ?From wanem i impoten se ol hasban mo waef oli joen tugeta, lavem olgeta wanwan mo wok olsem ol patna?
-
Askem ol pikinini blong helpem yu blong tingting long ol ansa long ol kwestin olsem, “?From wanem famli i impoten long Jos?” o “?From wanem i impoten blong yu, blong kasem mared insaed long tempol?” Helpem olgeta blong fanem ol ansa long ol risos olsem Mak 10:6–8; 1 Korin 11:11; Doktrin mo Ol Kavenan 42:22; 131:1–4; Moses 3:18, 21–24; mo “Famli: Wan Ofisol Toktok I Go long Wol.”
-
Singsing tugeta wan singsing abaot ol famli, olsem “Families Can Be Together Forever” (Children’s Songbook, 188). Serem testemoni blong yu wetem ol pikinini abaot mared we i no save finis mo famli. Invaetem olgeta tu blong serem ol testemoni blong olgeta.
Jisas i save helpem mi blong save wanem mi nidim blong mekem blong progres.
Yangfala rij man i lukaotem Jisas mo bin kasem spesel instraksen, speseli blong hem. ?Long wanem wei nao yu save givim insperesen long ol pikinini, blong oli lukaotem semmak instraksen olsem?
Samfala Aktiviti we Yu Save Mekem
-
askem ol pikinini blong fanem wan ves long Mak 10:17–22 we i tokbaot pikja long aotlaen blong wik ia long Kam Folem Mi—Blong Wanwan Man, Woman mo Famli. Eksplenem se kaonsel we i Jisas i bin givim long yangfala man ia, i blong hemwan nomo, mo yumi evriwan i save kasem daereksen blong yumiwan we i kam long Lod tru long Spirit.
-
Ridim tugeta Mak 10:17–22. Invaetem ol pikinini blong raetem long bod, ol komanmen, we Sevya i bin talem long yang rij man blong obei (luk long ves 19). ?Wanem bakegen Jisas i askem long hem blong mekem? (luk long ves 21). Leftemap tingting blong ol pikinini blong tingting long ol samting we maet bae oli nidim blong stat blong mekem o blong stop blong mekem, blong save folem Jisas moa gud. ?Wanem nao samfala wei we yumi save faenemaot, we Jisas i wantem yumi blong mekem?
Stap Leftemap Tingting blong Lanem Samting long Hom
Invaetem ol pikinini blong soem long ol famli blong olgeta se oli lavem olgeta, maet oli save raetem wan not o wetem kaen fasin, mekem wan wan seves.
Stap Kam Antap long Fasin blong Yumi Blong Stap Tij
Lisin long ol pikinini. ?Olsem wanem nao ol pikinini long klas blong yu oli stap tekpat long taem blong lanem ol aktiviti? Sapos oli no soem intres, ating hem i taem blong traem wan narafala aktiviti o long kwaet fasin, go wokbaot blong wan sot taem. Long nara tingting, sapos yu luk se ol pikinini oli stap tekpat mo lisin mo stap lanem samting long wan pat blong wan lesen, no filim se yu mas fos blong mas gohed blong kavremap ol nara pat blong lesen.