“15–21 Mei. Matiu 21–23; Mak 11; Luk 19–20; Jon 12: ‘King blong Yufala I Stap Kam long Yufala,’” Kam Folem Mi—Blong Praemeri: Niu Testeman 2023 (2022)
“15–21 Mei. Matiu 21–23; Mak 11; Luk 19–20; Jon 12,” Kam Folem Mi—Blong Praemeri: 2023
Sakias antap long Sikamotri, i kam long James Tissot
15–21 Mei
Matiu 21–23; Mak 11; Luk 19–20; Jon 12
“King blong Yufala I Stap Kam long Yufala”
Taem yu ridim Matiu 21–23; Mak 11; Luk 19–20; mo Jon 12, lisin mo luksave ol tingting o filing we yu kasem tru long Tabu Spirit. Lukluk i gobak long “Lukluk long Ol Nid blong Ol Yangfala Pikinini” we i stap long stat blong buk ia blong ol samting we yu save putum long maen, taem yu stap tijim ol prinsipol ia.
Invaetem Ol Pikinini blong Serem Wanem Oli Gat
Soem wan pikja long aotlaen blong wik ia long Kam Folem Mi—Blong Wanwan Man, Woman, mo Famli, mo invaetem ol pikinini blong serem wanem oli save we i stap tekem ples long ol pikja ia.
Tijim Doktrin: Ol Smol Pikinini
Papa long Heven mo Jisas Kraes, Tufala i save nem blong mi.
Taem yu rid abaot Sevya we i mit wetem Sakias, ?wanem ol mesej we yu ting se bae i save blesem laef blong ol pikinini we yu tijim?
Samfala Aktiviti we Yu Save Mekem
-
Soem pikja blong Sakias long Sikamotri (long aotlaen ia o long ChurchofJesusChrist.org). Helpem ol pikinini blong faenem Sakias mo talem nem blong hem. Mekemap ol aksen we ol pikinini bae oli stap mekem taem yu stap talem stori blong Sakias wetem Jisas—eksampol, oli stanap long en blong leg blong olgeta blong lukluk i go ova long wan bigfala grup blong ol pipol o mekem olsem se oli stap klaem long wan tri. Eksplenem se Sevya i luk Sakias mo singaotem nem blong hem. Testifae se Sevya i save tu wanwan long ol pikinini mo ol nem blong olgeta.
-
Karem wan emti frem blong foto i kam long klas o mekem wan long pepa. Invaetem wanwan pikinini blong kam wanwan taem blong holem foto fren ia raon long fes blong olgeta, mo bae evri pikinini oli talem, “Papa long Heven mo Jisas tufala i save [afta talem nem blong pikinini ia we i holem frem ia].”
-
Singsing tugeta wan singsing abaot lav blong Papa long Heven, olsem “Mi pikinini blong God” (STPS, 58). Helpem ol pikinini blong lisin long ol samting we i helpem olgeta blong save Papa long Heven i lavem olgeta.
Tempol hem i wan tabu ples.
Respek blong Jisas long tempol, olsem we oli tokbaot long ol ves ia, i save helpem ol pikinini we yu tijim blong andastanem se tempol i wan tabu ples.
Samfala Aktiviti we Yu Save Mekem
-
Soem pikja blong Jisas I Klinim Tempol (Gospel Art Buk, namba 51), mo talem stori we oli rekodem long Matiu 21:12–14. Helpem ol pikinini blong talem stori we pikja ia i soem. Afta, toktok raon long wanem nao risen blong Sevya we i wantem ol man blong jenisim mane mo ol pipol we oli stap salem samting blong aot long tempol.
-
Soem ol pikja blong ol tempol (eksampol, luk long Gospel Art Buk, ol namba 117–119), mo askem ol pikinini blong serem wanem oli filim, taem oli luk wan tempol. Yu save eksplenem se, tempol i wan ples we yumi go blong mekem ol promes wetem God, mo lukaotem ol ansa blong ol prea, mo filim kolosap long God. Helpem ol pikinini blong talemaot ol filing we i kam long Tabu Spirit, we i stap talem long olgeta se tempol i wan spesel ples. Askem ol pikinini blong aktem wanem bae oli mekem, sapos oli bin stap insaed long tempol. Eksampol. Oli save toktok kwaet kwaet nomo mo sidaon kwaet.
-
Singsing tugeta wan singsing abaot ol tempol, olsem “I Love to See the Temple” (Children’s Songbook, 95), mo invaetem ol pikinini blong mekem wan gol blong go insaed long tempol wan dei.
Tempol hem i haos blong Lod.
Mi save stap obei.
Papa long Heven i wantem yumi blong stap obei. Parabol blong tufala pikinini boe, i wan janis blong tij abaot from wanem i impoten blong stap obei.
Samfala Aktiviti we Yu Save Mekem
-
Droem pikja blong tu pikinini boe long bod, mo yusum droing blong talem bakegen stori blong parabol long Matiu 21:28–32. ?Wijwan pikinini boe nao i mekem raet samting long en? Askem ol pikinini blong talem nem blong ol samting we oli save mekem blong stap obei long hom. Letem olgeta oli droem ol pikja blong olgetawan taem oli stap mekem wan long ol samting ia.
-
Invaetem ol pikinini blong serem ol eksperiens we oli bin kasem, taem oli stap obei long papa mo mama blong olgeta. ?Wanem blesing nao oli kasem taem oli stap obei?
Tijim Doktrin: Ol Bigfala Pikinini
Taem mi stap lukaotem Sevya, bae mi faenem Hem.
Yu save yusum stori blong Sakias, blong helpem ol pikinini blong tingting long ol samting we oli save mekem, blong kam kolosap moa long Sevya.
Samfala Aktiviti we Yu Save Mekem
-
Ridim Luk 19:1–10, mo stap stop long sam ves blong toktok raon long wanem ol ves ia oli talemaot abaot Sakias. ?Wanem nao Sakias i mekem blong i save luk Jisas? ?Wanem nao hem i mekem taem Jisas i askem hem blong kamdaon long tri? Askem ol pikinini blong givim wan risen from wanem bae oli wantem blong luk Jisas. Sapos Sevya i kam long siti blong yumi, ?wanem nao bae yumi mekem blong rere from taem ia?
-
Invaetem ol pikinini blong tingting long ol pipol we oli save, we oli bin olsem Sakias, maet oli stap lukaotem Sevya. Askem ol pikinini wanem nao bae oli save mekem blong helpem wan narafala man blong save abaot Sevya.
-
Invaetem ol pikinini blong serem ol eksperiens, taem we oli bin filim se Papa long Heven mo Jisas Kraes, oli save gud mo lavem olgeta.
Tempol i wan tabu ples we mi mas respektem.
?Long wanem wei nao stori blong Sevya we i stap ronemaot ol pipol we oli mekem maket long tempol, i helpem yu blong tijim ol pikinini abaot from wanem ol tempol oli tabu tumas?
Samfala Aktiviti we Yu Save Mekem
-
Invaetem ol pikinini blong ridim Matiu 21:12–14. Soem pikja blong Jisas I Klinim Tempol (Gospel Art Buk, namba 51), mo askem olgeta se wijwan ves nao i stap tokbaot ol pikja ia.
-
Invaetem ol pikinini blong serem, wanem oli filim taem oli bin go insaed long tempol, taem wokbaot long raonem tempol o taem oli lukluk long ol pikja blong tempol. ?Wanem nao i helpem olgeta blong save se, tempol i wan tabu ples? Yu save tokbaot wetem ol pikinini from wanem yu lavem tempol. ?From wanem i tabu long yu?
-
Invaetem wan o sam yut blong kam long klas mo tokbaot, olsem wanem olgeta oli bin rere long olgetawan blong go insaed long tempol. Sapos yu bin go long tempol, askem olgeta blong tokbaot wanem nao oli bin filim taem oli bin stap long ples ia.
-
Katem wan pikja blong tempol blong mekem ol pis blong pasol, mo givim wan pis long evri pikinini. Askem evri pikinini blong raetem wan samting we oli save mekem blong go insaed long tempol, biaen long pis blong pasol blong olgeta. Taem wanwan pikinini i serem wan aedia, ademap pis blong pasol blong hem i go pasol blong tempol ia.
-
Raetem sentens ia long bod: i save helpem mi blong rere blong givim seves long tempol. Invaetem ol pikinini blong talemaot sam wei blong komplitim sentens ia. Sam aedia ia bae i gat tu “Taem mi stap kipim ol kavenan we mi mekem taem mi baptaes” o “Tabu Spirit.”
Jisas i wantem mi blong stap stret mo gud, long ol aksen mo ol samting we hat blong mi i stap wantem.
Jisas i bin tijim ol tija blong loa mo ol Farisi abaot olsem i impoten blong stap laef folem gospel—be i no blong stap priten nomo blong stap stret mo gud. ?Wanem nao bae i helpem ol pikinini blong andastanem trutok ia?
Samfala Aktiviti we Yu Save Mekem
-
Taem yu ridim Matiu 23:25–28 wetem ol pikinini, tingting blong serem mining blong hypocrite (Man blong tufes) long Bible Dictionary: “wan we i priten se hem i wan kristin, be hem i giaman.” ?From wanem i nogud blong stap olsem man blong tufes?
-
Soem wan kap long ol pikinini we i klin aotsaed be long insaed i toti, blong soem mining blong wanem oli stap tokbaot long Matiu 23:25. ?Olsem wanem nao yumi save mekem sua se yumi klin long insaed?
Stap Leftemap Tingting blong Lanem Samting long Hom
Helpem ol pikinini blong tingting long wan samting we oli bin lanem long klas, we oli save serem wetem ol famli blong olgeta long hom.
Stap Kam Antap long Fasin blong Yumi blong Stap Tij
Sapotem ol papa mo mama blong ol pikinini. “Ol papa mo mama oli ol gospel tija long ol pikinini blong olgeta mo oli ol moa impoten tija—tufala i gat tugeta bigfala wok mo bigfala paoa blong lidim tingting blong ol pikinini blong olgeta (luk long Dutronome 6:6–7 Taem yu tij long jos, prea mo lukaotem ol wei blong sapotem ol papa mo mama blong olgeta long impoten wok blong olgeta” (Teaching in the Savior’s Way, 25).