Sakias long Sikamon Tri, i kam long James Tissot

15–21 Mei

Matiu 21–23; Mak 11; Luk 19–20; Jon 12

“!Yufala i luk! King blong Yufala I Stap Kam long Yufala”

Bifo yu ridim ol aedia insaed long aotlaen ia, ridim Matiu 21–23; Mak 11; Luk 19–20; mo Jon 12. Raetemdaon ol filing mo ol tingting we yu save serem wetem famli blong yu, o insaed long klas long Jos

Raetemdaon Ol Filing mo Tingting blong Yu

Sevya i bin hanggri tumas afta we Hem i travel stat long Betani i go kasem Jerusalem, mo i gat wan figtri i stap longwe, i luk olsem wan gudfala ples blong faenem kaekae. Be taem we Jisas i kam kolosap long tri, tri ia i no gat frut long hem (luk long Matiu 21:17–20; Mak 11:12–14, 20). Long wan wei, figtri ia i olsem ol lida blong relijin we oli gat tufes, we oli stap long Jerusalem; emti tijing blong olgeta mo ol tabu fasin we oli stap soemaot aotsaed, oli no givim kaekae long saed blong spirit. Ol Farisi mo ol tija blong loa oli luk olsem se oli stap kipim plante komanmen, be yet, oli stap mestem tufala hae komanmen: blong lavem God mo lavem neba blong yu, olsem yuwan bakegen (luk long Matiu 22:34–40; 23:23).

Long narasaed, plante pipol oli stat blong luksave gud frut ia long ol tijing blong Jisas. Taem we Hem i kasem Jerusalem, oli bin welkamem Hem wetem ol branj we oli katemaot long ol tri blong kavremap rod blong Hem, oli stap glad se, oli wet longtaem blong luk wanem profesi blong bifo i talem: “King blong yufala i stap kam” (Sekaraea 9:9). Taem yu stap rid long wik ia, tingbaot ol frut blong ol tijing blong Sevya, mo sakrifaes blong Hem we i pem praes blong laef blong yu, mo olsem wanem nao yu save tekem “plante frut blong hem” (Jon 12:24).

Sam Aedia blong Skripja Stadi blong Yuwan

Luk 19:1–10

Lod i no jajem man tru long wei we hem i luk aotsaed, be tru long tingting blong hat blong hem.

Long taem blong Jisas, plante pipol oli ting se olgeta we oli stap tekem takis, oli no ol ones pipol, mo oli stap stilim ol pipol. I olsem, from se, Sakias, jif blong ol man blong tekem takis, i bin wan rijman, nao oli ting nogud evriwan long hem. Be Jisas i luk long hat blong Sakias. ?Wanem nao Luk 19:1–10 i soemaot abaot hat blong Sakias? Maet bae yu wantem tekem not long ol toktok long ol ves ia we oli tokbaot wanem nao Sakias i bin mekem blong soem strong hat mo tingting blong hem long Sevya. ?Wanem nao ol samting we hat blong yu i wantem? ?Wanem nao yu stap mekem blong lukaotem Sevya, olsem we Sakias i bin mekem?

Luk tu long Doktrin mo Ol Kavenan 137:9.

Matiu 23; Luk 20:45–47

Jisas i talem se i rong blong gat fasin blong gat tu fes.

Wanem we Sevya i bin mekem wetem ol tija blong loa mo Ol Farisi i stap olsem wan gudfala samting blong komperem wetem storian blong hem wetem Sakias. Olsem we Presiden Dieter F. Uchtdorf i eksplenem: “[Jisas] i girap wetem wan kros we i stret, agensem ol man we oli gat tu fes, olsem ol tija blong loa, Ol Farisi, mo Ol Sadusi—olgeta ia we oli traem blong luk se oli stret mo gud blong save winim ol pres, paoa, mo ol rij samting blong wol ia, mo semtaem, stap mekem nogud long ol pipol ia we oli sapos blong givim blesing long olgeta” (“On Being Genuine,” Liahona, May 2015, 81).

Long Matiu 23,Sevya i bin yusum plante pikja toktok blong tokbaot fasin blong gat tu fes. Tingting blong makem, o mekem wan lis blong ol pikja toktok ia, mo tekem not long wanem oli stap tijim abaot fasin blong gat tufes? ?Wanem i defren bitwin fasin blong gat tufes o wiknes blong man we yumi evriwan i stap fesem taem yumi traem blong laef folem gospel? ?Wanem insperesen nao yu filim blong go mekem from ol tijing blong Sevya?

Luk tu long Bible Dictionary, “Hypocrite.”

Matiu 21:1–11; Mak 11:1–11; Luk 19:29–44; Jon 12:1–8, 12–16

Jisas Kraes i King blong mi.

Taem we Jisas i kasem Jerusalem sam dei bifo Hem i mekem Atonmen blong Hem, olgeta ia we oli bin luksave Hem olsem King blong olgeta, oli bin soem hat mo tingting blong olgeta taem oli anoentem Hem, oli putum ol klos long Hem, mo taem oli sakem ol lif long rod we bae Hem i wokbaot long Hem i kam insaed long Jerusalem, mo oli bin singsing ol pres long Hem. Tingting long olsem wanem nao olgeta risos ia oli save mekem yu gat moa dip andastaning abaot ol taem ia, we i stat long las wik blong laef blong Sevya.

• Wan eksampol blong bifo blong anoentem wan king: 2 King 9:1–6, 13

• Wan profesi blong bifo blong wan viktri maj: Sekaraea 9:9

• Mining blong toktok ia hosana: “Hosana” long Gaed long Ol Skripja (olskripja.ChurchofJesusChrist.org)

• Ol profesi abaot wei we Sevya bae i kambak bakegen: Revelesen 7:9–12

?Olsem wanem nao yu save ona mo akseptem Sevya olsem Lod mo King?

Luk tu long Gerrit W. Gong, “Hosana mo Aleluia—Jisas Kraes we I Stap Laef: Stamba blong Restoresen mo Ista,” Liahona, Mei 2020, 52–55; “The Lord’s Triumphal Entry into Jerusalem” (vidio), ChurchofJesusChrist.org.

Matiu 22:34–40

Tufala hae komanmen ia, hem i blong lavem God mo lavem ol narawan olsem yu lavem yuwan bakegen.

Sapos yu stap filim se ol samting oli hevi tumas taem yu stap traehad blong folem Jisas Kraes, ol toktok blong Sevya i go long loya long Matiu 22 oli save helpem yu blong mekem wok blong yu olsem disaepol i simpol, mo i lukluk long wan samting nomo. Hemia wan wei blong mekem hemia. Mekem wan lis blong plante long ol komanmen blong Lod. ?Olsem wanem nao , wanwan long ol komanmen long lis blong yu i go wetem tufala hae komanmen? ?Olsem wanem nao, taem yu lukluk long tufala hae komanmen ia bae i helpem yu blong kipim ol narafala komanmen?

Ol Aedia blong Famli Skripja Stadi mo Haos Naet

Matiu 21:12–14.?Olsem wanem nao ol toktok mo ol aksen blong Jisas long Matiu 21:12–14 oli soem hao nao Hem i bin filim abaot tempol? ?Olsem wanem nao yumi soem wei we yumi filim abaot tempol? ?Wanem nao yumi save sakem i aot (ves 12) long laef blong yumi blong mekem hom blong yumi i moa olsem wan tempol? Tingting blong singsing wan singsing abaot tempol, olsem, “I Love to See the Temple” (Children’s Songbook, 95).

Matiu 21:28–32.?Wanem lesen nao aot long parabol blong man wetem tu boe, bae i save helpem famli blong yu? Eksampol. Yu save yusum stori ia blong toktok raon long hamas i impoten blong stap obei wetem tru tingting, mo blong stap sakem sin wetem tru hat. Maet bae famli blong yu i save raetem wan drama blong aktem parabol, mo wanwan i gat janis blong aktem ol defren rol.

Matiu 22:15–22; Luk 20:21–26.Maet bae ol pikinini oli glad blong mekem ol giaman selen wetem pikja blong Jisas mo nem long olgeta. Long bak blong selen oli save raetem sam samting we oli blong God, (Matiu 22:21) we yumi save givim long Hem. Maet yu save tokbaot se i minim wanem blong gat fes mo nem blong Sevya long yumi (Matiu 22:20; luk tu long Mosaea 5:8; Alma 5:14).

Jon 12:1–8.?Olsem wanem nao Meri i bin soem lav blong hem long Sevya? ?Olsem wanem nao bae yumi soemaot lav blong yumi long ol narafala man?

Wasem Ol Leg blong Jisas, i kam long Brian Call

Jon 12:42–43.?Wanem samfala sosol samting we, samtaem, oli daonem tingting blong yumi blong talemaot, o difendem bilif blong yumi long Kraes? Blong gat sam eksampol blong ol pipol we oli no stap foldaon long fos blong sosaeti, luk long Daniel 1:3–20; 3; 6; Jon 7:45–53; 9:1–38; mo Mosaea 17:1–4. ?Hao nao, taem yumi soem respek long ol narawan i helpem yumi blong talemaot o difendem ol bilif blong yumi long saed blong relijin?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Rejoice, the Lord Is King!,” Hymns, namba 66.

Kam Antap long Fasin blong Yumi blong Stap Tij

Yusum art blong mekem ol memba blong famli oli tekpat. “Buk ia, Gospel Art Buk mo Gospel Media Library long LDS.org i holem plante pikja mo vidio we i save helpem [famli blong yu] blong gat wan pikja long maen abaot ol aedia, o ol taem ia we i bin hapen finis” (Teaching in the Savior’s Way, 22).

Viktri Wokbaot, i kam long Walter Rane