“27 Maj– 2 Epril. Matiu 14; Mak 6; Jon 5–6: ‘Yufala I No Fraet,’” Kam Folem Mi—Blong Praemeri: Niu Testeman 2023 (2022)
“27 Maj– 2 Epril. Matiu 14; Mak 6; Jon 5–6,” Kam Folem Mi—Blong Praemeri: Niu Testeman 2023
27 Maj– 2 Epril
Matiu 14; Mak 6; Jon 5–6
“Yufala I No Fraet”
Taem yu stap rere blong tij long Matiu 14; Mak 6; mo Jon 5–6, lukaotem ol mesej we i go stret wetem wanem i stap hapen long laef blong ol pikinini we yu tijim. ?Wanem nao yu ting se bae i helpem olgeta blong andastanem ol mesej ia? Aotlaen ia i save givim sam aedia long yu.
Invaetem Ol Pikinini blong Serem Wanem Oli Gat
soem wan pikja blong Jisas we i stap wokbaot long wota (luk long aotlaen blong wik ia long Kam Folem Mi—Blong Wanwan Man, Woman mo Famli o Gospel Art Buk, namba 43), mo askem ol pikinini blong serem wanem we oli save abaot stori.
Tijim Doktrin: Ol Smol Pikinini
Jisas Kraes i save wanem mi nidim mo i save helpem mi.
Tingting hevi long stori blong Jisas we i stap hilim man ia long bigfala wota blong Betsata. ?Olsem wanem nao yu save helpem ol pikinini blong luksave wanem we stori i stap tijim abaot fasin blong stap kaen, lav mo ol narafala fasin olsem hemia blong Jisas.
Samfala Aktiviti we Yu Save Mekem
-
Yusum pikja blong Kraes I Hilim Olgeta Sikman long Betseda (Gospel Art Buk, namba 42) blong talem stori long ol pikinini Jon 5:1–9. O soem vidio blong “Jesus Heals a Man on the Sabbath” (ChurchofJesusChrist.org). Askem ol pikinini blong pikjarem long maen blong olgeta se, olgeta ia nao man ia we Jisas i hilim hem. ?Bae oli filim olsem wanem sapos Jisas i hilim olgeta?
-
Askem ol pikinini blong talem nem blong sam samting we i had long olgeta o we i mekem oli stap harem nogud. Talem long olgeta abaot wan taem long laef blong yu, taem yu bin kasem help long Sevya long wan hadtaem. Testifae se Jisas i save abaot evri problem blong yumi mo i wantem blong helpem yumi.
Mi stap folem eksampol blong Jisas taem mi stap kaen long ol narafala man.
Wan wei we Jisas i bin soem lav blong Hem, i blong fidim long man we oli stap folem hem taem oli hanggri. ?Olsem wanem yu save helpem ol pikinini blong lanem blong givim seves long ol narafala man olsem we Jisas i bin mekem?
Samfala Aktiviti we Yu Save Mekem
-
Soem wan basket mo sam bred long ol pikinini taem yu stap talem stori long Matiu 14:13–21. Eksplenem se nomata se Jisas i traem blong faenem wan ples blong Hem i stap Hemwan long hem, ol pipol oli wantem blong stap kolosap long Hem. Tokbaot stori fulwan wetem ol pikinini, mo askem olgeta blong lisin long wanem we Jisas i bin mekem blong soem fasin blong stap kaen mo lav long ol pipol.
-
Askem ol pikinini blong serem ol wei we wan i bin kaen long olgeta. Afta, helpem olgeta blong tingting long ol samting we oli save mekem long wik ia, blong oli stap kaen long ol narafala man. Long evri ansa we oli givim, droem wan pis bred o wan fis long bod. Talem long ol pikinini se taem oli mekem ol samting ia, oli stap folem eksampol blong Jisas we Hem i bin fidim faef taosen pipol we oli bin hanggri.
Fet long Jisas Kraes i save helpem mi blong mi no stap fraet.
Pita i soem bigfala fet taem hem i wokbaot long wota i go from Jisas. ?Wanem ol lesen blong ol pikinini we maet i stap insaed long stori ia?
Samfala Aktiviti we Yu Save Mekem
-
Soem ol pikja long aotlaen blong wik ia long Kam Folem Mi—Blong Wanwan Man, Woman mo Famli (luk tu long Gospel Art Buk, namba 43,) taem yu talem stori long Matiu 14:22–33 long ol toktok blong yuwan. Tingting blong stap yusum aktiviti pej blong wik ia blong helpem ol pikinini blong talem stori i kambak long yu. Yu save karem wan bol glas blong wota i kam long klas mo invaetem ol pikinini blong mekem olsem se oli stap “wokbaot” long wota wetem ol fingga blong olgeta i go krosem antap long wota.
-
Soem vidio blong “Wherefore Didst Thou Doubt?” (ChurchofJesusChrist.org), mo askem ol pikinini se from wanem Pita i bin fraet. Mo afta askem olgeta abaot ol taem we oli bin filim fraet mo serem wanem i bin helpem olgeta. Helpem olgeta blong luksave se fet long Jisas Kraes i helpem yumi blong winim fraet.
Tijim Doktrin: Ol Bigfala Pikinini
Jisas Kraes i tijim mi abaot Papa long Heven.
?Olsem wanem nao ol tijing blong Jisas abaot Papa blong Hem i save helpem ol pikinini blong lanem abaot Papa long Heven.
Samfala Aktiviti we Yu Save Mekem
-
Mekem tu hip blong ol kad we i gat ol toktok we Jisas i bin yusum blong tij abaot Papa long Heven long Jon 5, olsem lav, laef, mo wok (luk long Jon 5:20, 26, 36). Putum ol kad i fes daon, mo askem ol pikinini blong tanem tu kad blong tufala i semmak long wan taem. Taem oli tanem tu kad mo i maj, ridim ves we i gat toktok ia mo askem ol pikinini wanem nao toktok ia i stap tijim yumi abaot Papa long Heven.
-
Askem ol pikinini blong ridim Jon 5:30 mo komplitim sentens ia: “Mi no traem mekem olsem we mi nomo mi wantem, [be] …” ?Olsem wanem nao Jisas Kraes i mekem tingting blong Papa blong Hem long Heven? ?Olsem wanem nao yumi save mekem tingting blong Papa long Heven?
Jisas i mekem bigfala merikel blong fidim faef taosen pipol wetem faef bred mo tu fis.
Ol smol ofring blong mi i save mekem wan bigfala jenis.
Hem i wan yangfala boe we i givim ol bred mo fis we Jisas i yusum blong fidim ol faef taosen pipol. ?Olsem wanem nao yu save helpem ol pikinini we yu stap tijim blong oli luksave olsem wanem oli save kontribiut i go long wok blong Lod?
Samfala Aktiviti we Yu Save Mekem
-
Helpem ol pikinini blong traem pikjarem long maen blong olgeta, wan bigfala namba blong ol faef taosen pipol i bigwan olsem wanem. ?Bae i bin olsem wanem ia blong fidim fulap man olsem wetem faef fis mo tu bred nomo?
-
Invaetem wan pikinini blong talem stori blong Jisas we i bin fidim ol faef taosen pipol long toktok blong olgetawan nomo. Tokbaot bigwan se i wan yangfala boe we i bin givim bred mo fis we Lod i bin yusum blong mekem merikel ia. ?Long wanem wei nao yumi save stap mekem olsem boe ia we oli tokbaot long Jon 6:9? Invaetem ol pikinini blong droem ol bred mo fis long pepa mo raetem long olgeta, ol samting we oli save givim long Lod blong helpem wok blong Hem.
-
Givim wan smol pasel long ol pikinini blong komplitim. ?Wanem bae i hapen sapos wan long ol pis blong pasel ia i lus? Eksplenem se yumi wanwan i olsem wan pis blong pasel—yumi evriwan i impoten mo yumi nidim yumi wanwan. Helpem ol pikinini blong talem sam risen from wanem oli impoten long ol famli blong olgeta, long Praemeri klas, famli blong God mo ol narafala grup.
Fet long Jisas Kraes i save helpem mi blong mi no stap fraet.
Fet blong fraet i plei wan impoten pat insaed long stori blong Jisas mo Pita we tufala i stap wokbaot long solwota. ?Wanem nao ol pikinini oli save lanem aot long stori ia?
Samfala Aktiviti we Yu Save Mekem
-
Soem pikja long aotlaen blong wik ia long Kam Folem Mi—Blong Wanwan Man, Woman mo Famli (luk tu long Gospel Art Buk, namba 43). Askem ol pikinini blong faenem ol sentens long Matiu 14:22–33 we i tokbaot pikja ia.
-
Askem ol pikinini blong lukaotem ol saen blong fet mo ol saen blong fraet taem oli stap ridim Matiu 14:22–33. Yu save soem tu vidio blong “Wherefore Didst Thou Doubt?” (ChurchofJesusChrist.org). ?Wanem nao i minim blong gat fet long Jisas Kraes? Helpem ol pikinini blong tingbaot ol taem we fet blong olgeta i helpem olgeta blong winim fraet.
-
Askem ol pikinini blong traem tingting long maen blong olgeta se oli stap long tetaem ia, mo oli gat wan kamera long taem ia we Jisas mo Pita tufala i wokbaot long solwota. ?Long wanem pat nao bae oli jusum blong tekem foto mo from wanem? Givim tingting long olgeta blong lukluk insaed long Matiu 14:22–33 blong kasem ol aedia. Invaetem olgeta blong dro wan pikja blong pat ia we oli bin jusum, tokbaot pikja blong olgeta mo eksplenem from wanem oli bin jusum pat ia.
Stap Leftemap Tingting blong Lanem Samting long Hom
Sapos ol pikinini oli komplitim aktiviti pej blong wik ia, invaetem olgeta blong yusum blong tijim ol famli blong olgeta wanem oli bin lanem long klas. O givim wan kopi blong pej blong oli komplitim wetem ol famli long hom blong olgeta.
Stap Kam Antap long Fasin blong Yumi Blong Stap Tij
Invaetem ol pikinini blong serem wanem oli gat Askem ol pikinini abaot ol tingting, filing, mo ol eksperiens blong olgeta. Bambae yu faenemaot se oltaem oli gat ol niu tingting we i gat plante mining.